ཐར་བ་ལ་ཤེར་རབ་དང་ཚུལ་ཁྲིམས་གལ་ཆེ།

ཐར་བ་ལ་ཤེར་རབ་དང་ཚུལ་ཁྲིམས་གལ་ཆེ།

ཐར་བ་ཐོབ་པ་ལ་ཉོན་མོངས་པའི་སྒྲིབ་པ་སྤང་དགོས། དེ་སྤང་བ་ལ་གཉེན་པོ་ཟག་པ་མེད་པའི་ཤེས་རབ་སོགས་ཐོས་བསམ་སྒོམ་གསུམ་གྱི་ཤེས་རབ་དགོས་ལ། དེ་ཡང་སློབ་དཔོན་དབྱིག་གཉེན་གྱི་མཛོད་རྩ་བ་ལས། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས། །གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ། །ཞེས་གསུངས་སོ། །ཤེས་རབ་བསྐྱེད་པ་ལ་གཞི་ཚུལ་ཁྲིམས་རྣམ་དག་གལ་ཆེ་སྟེ། མདོ་ལས། ཚུལ་ཁྲིམས་ལ་བརྟེན་ཚུལ་ཁྲིམས་ལ་གནས་ནས། །རིམ་གྱིས་འཕགས་པའི་བདེན་པ་བཞི་བོ་དག །ཡང་དག་ཇི་བཞིན་དུ་ནི་རྟོགས་པར་འགྱུར། །ཞེས་གསུངས་སོ། །དེས་ན་ཚུལ་ཁྲིམས་ཀྱི་མཆོག་དགེ་ཚུལ་སློང་གི་སྡོམ་པ་ལེགས་པར་བསྲུང་བར་བྱའོ། །ལ་ལ་ཐར་བ་ཐོབ་པ་ལ་ཤེར་རབ་མི་དགོས་པར་འདོད་པ་དང༌། ལ་ལ་ཐར་བ་ཐོབ་པ་ལ་ཚུལ་ཁྲིམས་མི་དགོས་པར་འདོད་པའི་ཉེས་སེལ་དུ་བསྟན་ལ་ལྷག་བསམ་གྱིས་བསྐུལ་ཏེ་བཙུན་པ་དངོས་གྲུབ་དཔལ་ནས་སྨྲས་པའོ། །དྲི་བ། མཁན་པོ་ཞིག་གིས་དེང་སང་གྲྭ་བ་དག་རྫུན་མང་པོས་རབ་བྱུང་ངུར་སྨྲིག་གི་གོས་གྱོན་འདུག་པ་དེ་རུང་ངམ་ཅི། དྲིས་ལན་ནི། གྲྭ་བ་དག་རྫུན་གྱི་ནང་ན་གྲྭ་གོས་གྱོན་པ་དང་མི་གྱོན་པ་མང་ལ། གྲྭ་བ་དག་མ་ཡིན་ན་གྲྭ་གོས་གྱོན་པས་ཁྱབ་པ་མེད་ན་གྲྭ་རྫུན་ལ་དེ་ལས་ཀྱང་མ་ཁྱབ་མོད། སྤྱིར་རབ་བྱུང་བ་རྣམས་ཀྱིས་གོས་ངུར་སྨྲིག་བགོ་དགོས་པ་དང་རབ་བྱུང་མ་ཡིན་པ་དག་གིས་བགོ་མི་རུང་བ་ནི། མདོ་ལས། གང་ཞིག་བསླབ་ལ་མི་གནས་པ། །བདེ་གཤེགས་རྒྱལ་མཚན་འཛིན་པ་ལས། །བསླབ་ལ་མི་གནས་སྐད་ཅིག་གི །གཟུགས་པོར་ཁྱིམ་པར་གནས་པ་བཟང༌། །ཞེས་གསུངས་པ་སོགས་འདུལ་ལུང་སྡེ་བཞི་སོགས་སུ་རྒྱ་ཆེར་གསུངས་པ་མང་མོད་ལུང་དེ་དག་སྐུ་ཉིད་ཀྱིས་མཁྱེན་པ་རེད་བསམ་ནས་མ་སྤྲོས། ཁ་ཅིག་རབ་བྱུང་མ་ཡིན་པ་དག་གིས་རབ་བྱུང་གི་གོས་གྱོན་རུང་བའི་རྒྱུ་མཚན་ལ་གོས་ངུར་སྨྲིག་གི་ཕན་ཡོན་བཤད་པའི་ལུང་མང་པོ་བཀོད་མོད། ལུང་དེ་དག་ནི་རབ་བྱུང་གི་གོས་ཀྱི་ཡོན་ཏན་བསྟན་པ་ཙམ་ལས་ཁྱིམ་པས་གྱོན་དགོས་པའི་ཤེས་བྱེད་དུ་མི་འགྲོའོ། །དཔེར་ན་སངས་རྒྱས་ཀྱི་སྐུ་གཟུགས་ལ་ཡོན་ཏན་ཡོད་ནའང་ལྷམ་ངོ་ལ་སྦྱར་ན་མི་རིགས་པ་ལྟར་ཡིན་ལ། དེས་ན་རབ་བྱུང་གི་གོས་ངུར་སྨྲིག་གྱོན་རུང་བ་དག་ནི་གྲྭ་བ་ངེས་པ་ལགས། དྲི་བ། འོ་ན་མཁན་པོ་བཙུན་མས་རབ་བྱུང་གོས་ངུར་སྨྲིག་གྱོན་མི་རུང་བ་ཡིན་ནམ། ལན། དེ་ནི་མ་ཡིན་ཏེ། བཙུན་མ་རྣམས་གྲྭ་བ་ཡིན་ཡང་གྲྭ་བ་བཙུན་མ་གཉིས་སུ་ཕྱེ་བའི་གྲྭ་བ་མ་ཡིན་པ་ཤེས་དགོས་ལ། དཔེར་ན་རྗེ་བཙུན་སྒྲོལ་མ་འཕགས་པའི་ས་ཐོབ་པས་ན་འཕགས་པ་ཡིན་ཡང་འཕགས་པ་དང་འཕགས་མ་གཉིས་སུ་ཕྱེ་བའི་འཕགས་པ་མ་ཡིན་པ་བཞིན་ཡིན་པར་སེམས་ལགས་སོ། །དངོས་གྲུབ་དཔལ་ནས་བྲིས་པའོ། །