རང་སློབ་དམ་པ་པདྨ་བཛྲ་ལ་གདམས་པ།
༄། །རང་སློབ་དམ་པ་པདྨ་བཛྲ་ལ་གདམས་པ་བཞུགས་སོ། །རྗེ་འགྲོ་བའི་མགོན་པོ་རྡོ་རྗེ་འཆང་། །གྲུབ་དབང་བླ་མའི་ཞབས་ལ་འདུད། །བདག་ཅག་བརྒྱུད་འཛིན་སློབ་བུ་ལ། །བྱིན་གྱིས་རློབས་པར་མཛད་དུ་གསོལ། །བུ་ཆུང་ནས་བསྐྱངས་པའི་སྐལ་བ་ཅན། །དད་བརྩོན་ཤེས་རབ་ཀུན་ལྡན་པའི། །སྙིང་གི་དྭངས་མ་གང་དེ་ལ། །སྙིང་གཏམ་ཚིག་གསུམ་སྨྲ་ལ་གསོན། །བུ་ཐེག་པ་མས་ནས་འཛེགས་པ་དང་། །སྡོམ་གསུམ་མིག་ལྟར་བསྲུང་བ་དང་། །བསླབ་གསུམ་ལམ་གྱི་ལུས་ཉིད་དུ། །སྔ་ནས་བཤད་བཞིན་མཁྱེན་པར་མཛོད། །བུ་དེ་རྗེས་མི་རྟག་སྡུག་བསྔལ་སོགས། །བདེན་བཞིའི་འཇུག་ལྡོག་ལ་བསམ་ནས། །ངེས་འབྱུང་བྱང་ཆུབ་སེམས་བསྐྱེད་པའི། །ཐབས་ལ་ནན་ཏན་བགྱིད་འཚལ་ལོ། །བུ་སྙིང་ནས་གཞན་དོན་གཉེར་བ་དང་། །རང་འདོད་ཞེན་འཁྲིས་མེད་པ་ན། །སྒོ་གསུམ་བྱ་བ་ཅི་སྤྱད་ཀྱང་། །བྱང་ཆུབ་ལམ་དུ་འགྱུར་བ་ཡིན། །བུ་ཁྱད་པར་སྙིང་རྗེའི་གཞན་དབང་གིས། །འགྲོ་ལ་ཕན་ཕྱིར་ཚེ་འདི་རུ། །རྡོ་རྗེ་འཆང་དབང་སྒྲུབ་འདོད་པ། །དེ་ཚེ་རྡོ་རྗེའི་ཐེག་ལ་འཇུག །བུ་གསང་སྔགས་རྒྱུད་སྡེ་གྲངས་མང་ཡང་། །བླ་མེད་ཡོ་གའི་ཏནྟྲ་འདིའི། །ལམ་དང་འཇུག་སྒོ་ཅི་རིགས་སུ། །མ་འདུས་མེད་ཅེས་མཁས་རྣམས་གླེང་། །བུ་བསྐལ་བ་ཞིང་གི་རྡུལ་སྙེད་དུ། །རང་རྒྱུད་སྦྱོངས་པ་སྔོན་སོང་བའི། །ཤེས་རབ་ཅན་གྱི་སྤྱོད་ཡུལ་དུ། །གྱུར་པའི་ཆོས་འདི་ཉམས་སུ་ལོངས། །བུ་སྔོན་དུས་གྲུབ་པ་མཆོག་བརྙེས་པའི། །རབ་དགྱེས་བདེ་བའི་དངོས་གྲུབ་དང་། །དཔལ་ལྡན་སེང་གེ་འོད་ལ་སོགས། །འཕགས་པའི་ཡུལ་དུ་ཆེས་མང་བྱོན། །བུ་དེ་བཞིན་གངས་རིའི་ལྗོངས་འདིར་ཡང་། །གྲུབ་མཆོག་རྗེ་འབངས་ཉེར་ལྔ་དང་། །དཔལ་ཆེན་ཟུར་པ་མེས་དབོན་སོགས། །བསྟན་པའི་འདི་ལས་བདུད་རྩི་བརྙེས། །བུ་ཆོས་ཁུང་རྡོ་རྗེ་འཆང་ལ་ཐུག །ཆོས་རྒྱུད་དབང་བཞིའི་ཆུ་བོ་རྫོགས། །སྒྲུབ་པའི་བྱིན་རླབས་མ་ཡལ་བའི། །ཆོས་ལ་ཅིའི་ཕྱིར་བརྩོན་མི་མཛད། །བུ་ཁྱད་པར་འོད་གསལ་དྭངས་མའི་སྐུར། །གྲུབ་པའི་ཟུང་འཇུག་རྡོ་རྗེ་འཆང་། །ཨོ་རྒྱན་སངས་རྒྱས་གཉིས་པ་དེ། །སྐྱབས་ཀུན་འདུས་པའི་ངོ་བོར་མཛོད། །བུ་ལྷ་དང་བླ་མ་དབྱེར་མེད་པ། །དཔལ་ཆེན་ཧེ་རུ་ཀ་ཉིད་དང་། །ཕྲིན་ལས་ཁྲོས་པ་ཀཱི་ལ་ཡ། །ཉིད་དང་དབྱེར་མེད་སྒྲུབ་མཛོད་ཅིག །བུ་བསྐྱེད་རིམ་གསལ་བའི་ཏིང་འཛིན་ལ། །གཞི་འབྲས་སྦྲེལ་བའི་དག་དྲན་དང་། །དངོས་སྣང་ལྡོག་པ་གལ་ཆེ་བས། །མཚན་མའི་རྣམ་རྟོག་ཅི་ཐུལ་མཛོད། །བུ་ཇི་ལྟར་ཏིལ་ལས་ཏིལ་མར་བཞིན། །བསྐྱེད་པའི་རིམ་པ་མ་བརྟན་པར། །རྫོགས་པའི་རྣལ་འབྱོར་མི་སྨིན་པས། །ལམ་འདི་ངེས་རྫོགས་ཚུལ་གྱིས་བསྒོམས། །བུ་རིམ་པ་དང་པོར་ངེས་རྙེད་ནས། །རྩ་རླུང་ཐིག་ལེའི་རང་བཞིན་འདི། །སྐུ་གསུམ་བསླབ་གསུམ་དཀོན་མཆོག་ཏུ། །རྟོགས་པས་སྐྱབས་སུ་ཉེ་བར་བསྟེན། །བུ་གནས་པ་རྩ་ཡི་དཀྱིལ་འཁོར་འདི། །སྤྲུལ་སྐུའི་གཞི་དང་བདེ་གསལ་གྱི། །ཞི་ལྷག་ཆོས་ཀྱི་རྟེན་གྱུར་པ། །ཚུལ་ཁྲིམས་དང་ནི་དགེ་འདུན་ལགས། །བུ་རྩ་ཡིག་རླུང་གི་དཀྱིལ་འཁོར་འདི། །ལོངས་སྐུའི་གཞི་དང་གསལ་སྟོང་གི །ཏིང་འཛིན་བསླབ་པས་བསྡུས་པ་ཡི། །བྱེ་བྲག་རྟོགས་པའི་ཆོས་སུ་བཤད། །བུ་ཐིག་ལེ་བྱང་ཆུབ་སེམས་དཀྱིལ་ནི། །ཆོས་ཀྱི་སྐུ་ཡི་སྒྲུབ་གཞི་དང་། །འོད་གསལ་ཤེས་རབ་བསླབ་པ་ཡི། །རང་བཞིན་སངས་རྒྱས་ཉིད་ཡིན་ནོ། །བུ་གཉུག་མའི་རྩ་རླུང་ཐིག་ལེ་འདིའི། །ངོ་བོ་ལུང་མ་བསྟན་ཡིན་ཡང་། །རྐྱེན་གྱིས་འཁོར་འདས་གཉིས་བྱེད་པ། །དེ་ཕྱིར་ཐབས་གྱིས་ཟིན་པ་གཅེས། །བུ་རྟེན་གྱི་གཟུང་འཛིན་རོ་རྐྱང་གི །རླུང་རྟོག་དབུ་མར་ཞུགས་པ་དང་། །ལྷན་ཅིག་བརྟེན་པའི་གཟུང་འཛིན་གྱི། །རོ་རྐྱང་སྤྲོས་བྲལ་དབུ་མར་འཇུག །བུ་དོན་འདི་རྟོགས་ནས་ལས་བྱེད་པའི། །འཁོར་ལོ་གཉིས་ལ་གནད་བསྣུན་པས། །ཡེ་ཤེས་དག་པའི་ཙནྚ་ལིས། །ཁམས་གསུམ་མཚན་མའི་བུད་ཤིང་ཟ། །བུ་དེ་ཚེ་སྒྱུ་མའི་སྐུ་འགྲུབ་ཅིང་། །དཔེ་དང་དོན་གྱི་འོད་གསལ་དག །རིམ་བཞིན་མངོན་དུ་བྱས་ནས་སུ། །ཟུང་འཇུག་སློབ་དང་མི་སློབ་འགྲུབ། །བུ་ལམ་ལྔའི་རིག་འཛིན་བཞིའི་གྲུབ་མཐའ། །རིམ་བཞིན་སྙོགས་པར་མཛད་ནས་སུ། །མཐར་ཐུག་སྐུ་གསུམ་ཡན་ལག་བདུན། །རྫོགས་པའི་ཁ་སྦྱོར་མངོན་བྱེད་མཛོད། །བུ་ཚེ་འདིར་རྡོ་རྗེ་འཆང་གྲུབ་ནས། །གང་འདུལ་ཕྲིན་ལས་རྣམ་པ་བཞིས། །མ་རྣམས་སྲིད་མཚོ་ལས་སྒྲོལ་པའི། །བླ་མེད་ཐུགས་མཆོག་སྐྱེད་མཛོད་ཅིག །བུ་ཐུན་མོང་ཐེག་པས་རྒྱུད་སྦྱངས་ནས། །ཐུན་མིན་འོད་གསལ་སྙིང་པོ་ཡི། །ཐེག་པས་ཟུང་འཇུག་ལ་སྦྱོར་བའི། །ཚུལ་འདི་སྔོན་བྱོན་མཁས་པའི་ལུགས། །བུ་རྒྱ་བོད་རིག་འཛིན་རྒྱ་མཚོ་ཡི། །ཐུགས་བཅུད་གྲུབ་བརྙེས་བླ་མ་ལས། །ཇི་ལྟར་ཐོས་བཞིན་གདམས་པ་འདི། །དབེན་པར་རྩེ་གཅིག་སྒྲུབ་མཛོད་ཅིག །བུ་ཚེ་རབས་དུ་མར་ལེགས་སྨོན་གྱིས། །འབྲེལ་བའི་བློ་ལྡན་གང་དེ་ལ། །ཆོས་དང་མཐུན་པའི་གདམས་ངག་འདི། །སྨས་པ་རང་གཞན་དོན་འགྲུབ་ཤོག །ཅེས་པ་འདི་ཡང་སྔོན་གོམས་རྣམ་པར་དཀར་བའི་འབྲས་བུ་དུས་སུ་སྨིན་པའི་རང་སློབ་དམ་པ་བུ་པདྨ་བཛྲ་ལ་བཙུན་པ་གཞན་ཕན་མཐའ་ཡས་པས་ལེགས་པར་གདམས་པ་དགེ། །།