དམ་པ་གསུམ་གྱི་རྣམ་གཞག་བསྡུས་པ། མཁན་ཆེན་ཚེ་དབང་རིག་འཛིན།

༄༅། །དམ་པ་གསུམ་གྱི་རྣམ་གཞག་བསྡུས་པ། རྗེ་བཙུན་འཇམ་དཔལ་དབྱངས་ལ་ཕྱག་འཚལ་ལོ། །འདིར་ཐེག་པ་ཆེན་པོའི་ལམ་གྱི་ངོ་བོ་དངོས་གཞི་མཐར་ཐུག་པ་ནི་དམ་པ་གསུམ་སྟེ། དེ་ཡང་ཀུན་མཁྱེན་ཆེན་པོས། ཁྱད་པར་ཐེག་ཆེན་དགེ་བ་རླབས་པོ་ཆེ། །སྦྱོར་བ་སེམས་བསྐྱེད་དངོས་གཞི་དམིགས་པ་མེད། །རྗེས་ལ་བསྔོ་བ་དམ་པས་ཟིན་པ་ནི། །ཐར་ལམ་བགྲོད་པའི་གཅེས་པ་རྣམ་གསུམ་ཡིན། །ཞེས་པ་ལྟར་གསུམ་ལས། དང་པོ་སྦྱོར་བ་སེམས་བསྐྱེད་དམ་པ་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་དགྲ་ཕར་མི་བཞག་གཉེན་ཚུར་མ་བླངས་པར་སེམས་ཅན་ཐམས་ཅད་མཉམ་པར་སེམས་ཅན་རྣམས་བདག་གི་ཕ་མ་ཡིན། ཕ་མ་བྱས་པའི་ཚེ་གཅན་གཟན་གཏུམ་པོ་དང་། འདྲེ་སྲིིན་པོའི་བུ་རུ་སྐྱེས་ནའང་རང་གི་བུ་ལ་བརྩེ་བ་མེད་པ་སུ་ཡང་མེད་པས་ནམ་ཕ་མ་བྱས་པའི་ཚེ། ཟས་ཀྱི་ཕུད་སྦྱིན་གོས་ཀྱི་རྩེ་མོས་ནི་གཡོགས། ཤིན་ཏུ་བྱམས་པས་བསྐྱེད་བསྲིངས་བ་ཤ་སྟག་ཡིན་པས། བདག་དེ་དག་གི་བདག་པོ་ཡིན། ངེད་མ་བུ་རྣམས་ཡིན་པས་སེམས་ཅན་དེ་རྣམས་ཀྱི་སྐྱིད་སྡུག་ལ་བདག་གིས་བལྟ་དགོས་པས། ད་ལྟ་སེམས་ཅན་རྣམས་ཀྱིས་འདོད་པ་བདེ་བ་འདོད། སྡུག་བསྔལ་མི་འདོད་ཀྱང་། རྒྱུ་བླང་དོར་ནི་མི་ཤེས། སློབ་མཁན་ནི་མེད། ལ་ལ་སྡུག་བསྔལ་གྱི་རྒྱུ་ལ་སྤྱོད། ལ་ལ་འབྲས་བུ་ལ་སྤྱོད་པའི་སེམས་ཅན་སྡུག་བསྔལ་ཅན་རྣམས་སྙིང་རེ་རྗེ། སྙིང་རྗེ་སར་བཞག་པས་ནི་མི་ཕན་པས། ད་ནི་རྒྱལ་བ་སྲས་བཅས་རྣམས་དལ་དུ་བཞུགས་དང་བདག་ཁོ་ནས་སྡུག་བསྔལ་རྒྱུ་འབྲས་ལས་བསྒྲལ་ཏེ། སངས་རྒྱས་ཀྱི་གོ་འཕང་ལ་འགོད་སྙམ་པའི་ཟུར་གཉིས་ཚང་བའི་སྒོ་ནས་སེམས་བསྐྱེད་དགོས་པའི་རྒྱུ་འབྲས་མན་ངག་བདུན་གྱིས་བློ་སྦྱངས་ནས་སེམས་བསྐྱེད་བཅོས་མིན་གྱིས་ཟིན་པ་ནི། ལྕགས་ཀྱུས་ཟིན་པའི་དངོས་པོ་བདག་པོའི་ལག་ཏུ་ལོན་ངེས་པ་ལྟར། དགེ་རྩ་ཕྲ་མོ་ཡང་དཔག་མེད་བཞི་ལྡན་དུ་འཕེལ་ཏེ། དེ་ལ་དཔག་མེད་བཞི་ནི། རྒྱུ་དགེ་རྩ་རེ་རེ་ཡང་དམིགས་ཡུལ་སེམས་ཅན་གྱི་གྲངས་བཞིན་འཕེལ་ཏེ། རིན་ཆེན་ཕྲེང་བ་ལས། སེམས་ཅན་ཁམས་ནི་ཚད་མེད་པར། །ཕན་འདོད་དེ་ནི་དེ་འདྲའོ། །ཞེས་དང་། སེམས་ཅན་རེ་རེ་ལ་བསལ་བྱ་སྡུག་བསྔལ་གྱི་གྲངས་བཞིན་འཕེལ་ཏེ། དེད་དཔོན་མཛའ་བོའི་བུ་མོས་སེམས་ཅན་སྡུག་བསྔལ་ཕྱོགས་གཅིག་ཀླད་ནད་ཙམ་བསལ་འདོད་པའང་ངན་སོང་ནས་ཐར་ཏེ་མཐོ་རིས་ནས་ཐར་བའི་བར་ཐོབ་ན། སེམས་ཅན་རེ་རེའི་སྡུག་བསྔལ་དཔག་ཏུ་མེད་པ་བསལ་འདོད་པ་ལ་ཅིས་མི་འཕེལ་ཏེ། སྤྱོད་འཇུག་ལས། སེམས་ཅན་རྣམས་ཀྱི་ཀླད་ནད་ཙམ། །བསལ་ལོ་སྙམ་དུ་བསམ་ན་ཡང་། །ཕན་འདོགས་བསམ་པ་དང་ལྡན་ཏེ། །བསོད་ནམས་དཔག་མེད་ལྡན་གྱུར་ན། །ཞེས་སོགས་གསུངས་པ་དང་། ཐོབ་བྱ་སངས་རྒྱས་ཀྱི་གྲངས་བཞིན་འཕེལ་ཏེ། དེ་ཉིད་ལས། སེམས་ཅན་གྲངས་མཐའ་ཡས་ལ་དུས་རིང་དུ། །བདེ་བར་གཤེགས་ཀྱི་བདེ་བ་བླ་ན་མེད། །ཡིད་ལ་བསམ་པ་མཐའ་དག་རྫོགས་བྱེད་ཅིང་། །རྟག་ཏུ་སྦྱིན་པ་ལྟ་ཞིག་སྨྲོས་ཅི་དགོས། །ཞེས་གསུངས་པ་དང་། ཐོབ་བྱ་སངས་རྒྱས་རེ་རེའི་ཡོན་ཏན་གྱི་གྲངས་བཞིན་འཕེལ་བས་ན། སངས་རྒྱས་ཐོབ་ངེས་ཡིན། དེས་ན་སྨོན་ལམ་རྒྱ་ཆེ་ཆུང་གིས་སངས་རྒྱས་ལ་ལ་སངས་རྒྱས་ནས་ཉིན་གཅིག་ལ་ཆོས་འཁོར་བསྐོར་ནས་མྱ་ངན་ལས་འདས་པ་དང་། བསྟན་པ་ཞག་གཅིག་ལས་མི་གནས་པ་ཡང་ཡོད། སངས་རྒྱས་མོས་པ་ལྟ་བུ་བསྐལ་བཟང་སངས་རྒྱས་སྟོང་གི་སྐུ་ཚེ་དང་། བསྟན་པ་གནས་ཚད་དང་། གཞན་དོན་བྱས་པ་རྣམས་བསྡོམས་པའི་ཚད་ཙམ་དུ་མཛད་པས། སྤངས་རྟོགས་མཉམ་ཡང་བསམ་པ་རྒྱ་ཆེ་ཆུང་གི་ཁྱད་པར་ཡིན་པས་བསམ་པ་རྒྱ་ཆེ་དགོས། གཉིས་པ་དངོས་གཞི་དམིགས་མེད་དམ་པ་ནི། རྣལ་འབྱོར་པ་རྣམས་ཕྱག་རྫོགས་དབུ་གསུམ་གྱི་ལྟ་བའི་ངང་ལ་གནས་བཞིན་དུ་ཆོས་སྤྱོད་ལ་འཇུག་པ་ནི། སྡུད་པ་ལས། ཇི་ལྟར་ཤིང་མཁན་བཟོ་བོ་མཁས་པས་སྐྱེས་པ་བུད་མེད་དང་། །འདྲ་བའི་བཟོ་བྱས་དེ་ཡང་བྱ་བ་ཐམས་ཅད་བྱེད། །དེ་བཞིན་ཤེས་རབ་སྤྱོད་མཁས་བྱང་ཆུབ་སེམས་དཔའ་ཡང་། །རྣམ་པར་མི་རྟོག་ཡེ་ཤེས་བྱ་བ་ཐམས་ཅད་བྱེད། །ཅེས་གསུངས་པ་ལྟར་ལྟ་བའི་ནང་ནས་ཁ་འདོན་བཟླས་བརྗོད་ཕྱག་སྐོར་ཆོས་ཉན་པ་སོགས་ཡོད་དགོས། དེ་ལྟར་ལྟ་བའི་ངང་ནས་ལྷ་བསྒོམ་སྔགས་བཟླ་སོགས་ནི་སྔ་འགྱུར་རྙིང་མའི་ཁྱད་ཆོས། བསྐྱེད་རྫོགས་ཟུང་འཇུག་གི་ལམ། མཆོག་གི་དངོས་གྲུབ་ལ་མྱུར་དུ་སྦྱོར་བྱེད་ཡིན། གསར་ཕྱོགས་པས་ཚོགས་ལམ་ན་བསྐྱེད་རིམ་ཁོ་ན་དབྱིབས་ཀྱི་ལམ་མམ། བཅོས་མའི་ལམ་ནས་སྦྱོར་ལམ་དྲོད་ནས་ཐབས་ལམ་ལ་བརྟེན་ནས་དཔེའི་འོད་གསལ་བསྒོམ་པས་བསྐྱེད་རིམ་མ་བཅོས་པའི་ལྷ་སྐུར་འཆར། དེ་གཉིས་པོ་འདིར་ཚོགས་དྲོད་ཟུང་འཇུག་ཏུ་བསྒོམ་པས་མཆོག་གི་དངོས་གྲུབ་ཐོབ་བྱེད་དུ་འགྱུར་རོ། །དེ་ལྟར་མ་ནུས་ན་ཆོས་ཐམས་ཅད་སྣང་ལ་རང་བཞིན་མེད་པ་སྒྱུ་མ་ལྟ་བུ་རྒྱས་འདེབས་སུ་ཤོར་བ་ཡིན་ཡང་། ལས་དང་པོ་བའི་དངོས་ཞེན་གྱི་གཉེན་པོ་ཡིན་ཏེ། སྤྱོད་འཇུག་ལས། སྟོང་ཉིད་བག་ཆགས་གོམས་པས་ན། །དངོས་པོའི་བག་ཆགས་སྤོང་འགྱུར་ཞིང་། །ཞེས་པ་ལྟར། ས་མ་ཐོབ་ཀྱི་བར་དུ་གཏན་ལ་དབབ་ཚུལ་རྣམ་གྲངས་མིན་པའི་དོན་དམ་ཡིན་ཀྱང་རྟོགས་ཚུལ་རྣམ་གྲངས་ལས་མི་འདའ་བས་གྲངས་མེད་གཅིག་གི་བར་བློས་སྒོམ་པ་ཁོ་ན་བྱེད་དགོས་པས་སྒྱུ་མ་ལྟ་བུའི་ངེས་ཤེས་ཀྱིས་ཟིན་པར་བྱེད་དགོས། དེ་ལྟར་ཡང་མི་ནུས་པའི་ཕལ་བ་ཡིན་ན་ལྷ་དང་སྔགས་ལ་དད་པ་དང་མོས་གུས་ཁོ་ན་དགོས་ཚིག་རྗེས་དོན་དྲན་དང་། དེ་ལས་སེམས་མ་ཡེང་བར་བྱས་ན་དེས་དམིགས་མེད་རྗེས་མཐུན་གྱི་གོ་ཆོད་གསུངས། དམིགས་མེད་ཀྱིས་ཟིན་པའི་དགེ་རྩ་རྣམས་ཁོང་ཁྲོ་སོགས་རྐྱེན་གྱིས་འཇིག་མི་ནུས། གཞན་དུ་དངོས་ཞེན་དང་བཅས་པའི་དགེ་རྩ་བསགས་པ་རྣམས་ནི། སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་པ་ལྟར། སྲིད་པ་སྒྲུབ་བྱེད་ཀྱི་རྒྱུ་ཁོ་ན་ལས་མེད་པ་ཡིན་ལ་སྲིད་པའི་རྩ་བ་བདག་འཛིན་གཅོད་བྱེད་ཀྱི་ལྟ་བ་བདག་མེད་རྟོགས་པའི་ཟིན་པ་མེད་པར། སྦྱིན་སོགས་ལ། སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ། ཚུལ་ཁྲིམས་ལས་བྱུང་བའི་བསོད་ནམས་བྱ་བའི་དངོས་པོ་བསམ་གཟུགས་སོགས་སྒོམ་པ་ལས་བྱུང་བའི་བསོད་ནམས་བྱ་བའི་དངོས་པོ་ཞེས་སྲིད་པའི་ལས་སོགས་བྱེད་ཙམ་ལས་མེད་དེ། སྐྱེས་རབས་ལས། ཁྱོད་ཀྱི་བསྟན་ལས་ཕྱིར་ཕྱོགས་པ། །སྲིད་པའི་རྩེ་མོའི་བར་སོང་ནས། །སླར་ཡང་ངན་སོང་གནས་སུ་ལྷུང་། །ཞེས་དང་། མདོ་སྡེ་རྒྱན་ལས། བྱམས་སོགས་རྨོངས་དང་འགལ་མེད་ཕྱིར། །དེས་ནི་ཉེས་པ་ཚར་གཅོད་མིན། །ཞེས་པ་ལྟར་དམིགས་མེད་གལ་ཆེའོ། །གང་ཟག་པའི་བདག་མེད་རྟོགས་པའི་ཤེས་རབ་ཀྱིས་ཟིན་ན་ཕྱི་རོལ་པ་དང་ཐུན་མོང་ལས་ཁྱད་པར་དུ་འཕགས་པས། དེ་དག་ལྷག་པའི་ཚུལ་ཁྲིམས་དང་། ལྷག་པའི་ཏིང་ངེ་འཛིན་དང་། ལྷག་པའི་ཤེས་རབ་རྣམས་ཡིན། བདག་མེད་གཉིས་རྟོགས་ཀྱིས་ཟིན་ན། སྦྱིན་པའི་ཕར་ཕྱིན་སོགས་ཕ་རོལ་ཏུ་ཕྱིན་པའི་མིང་འཐོབ་སྟེ། སྡུད་པ་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཅིང་འདི་ཡི་མིང་འཐོབ་པོ། །ས་པ་ལྟར། སྲིད་ཞིར་མི་གནས་པའི་མྱང་འདས་ཐོབ་པ་ཡིན་ནོ། །གསུམ་པ་རྗེས་བསྔོ་བ་དམ་པ་ནི། སོ་སོའི་སྐྱེ་བོའི་དགེ་བ་ནི། མ་བསྔོས་ན་གང་དུ་སྨིན་མ་ངེས་པས་ལུང་མ་བསྟན་ཡིན་ལ། ཚུལ་ཁྲིམས་སོགས་མ་དག་ན། ཀླུ་ལོངས་སྤྱོད་ཅན། ལྷ་ཡུལ་གྱི་བྱ་དང་། རྟ་དང་གླང་པོ་རིན་ཐང་ཅན་སོགས་སུ་སྐྱེ་བ་ཡིན་ཏེ། འཇུག་པ་ལས། སྦྱིན་པའི་ལོངས་སྤྱོད་དག་ནི་འགྲོ་ངན་ནའང་། །སྐྱེ་བོ་ཚུལ་ཁྲིམས་རྐང་པ་ཉམས་ལས་བྱུང་། །ཞེས་དང་། རང་བཞིན་གྱི་རྟོག་ངན་དེའི་རྐྱེན་དང་། དགེ་རྩ་འཛད་པའི་རྒྱུ་བཞི་སོགས་ཀྱིས་ཟད་འགྲོ་བ་ཡིན་ཏེ། ལུང་ལས། དགེ་བའི་རྩ་བ་བསགས་ནས་ནི། །མ་བསྔོས་ཡང་ན་ལོག་པར་བསྔོས། །གཞན་ལ་བསྒྲགས་དང་འགྱོད་པ་སྐྱེ། །དེ་ནི་ཟད་པའི་རྒྱུ་བཞི་ཡིན། །ཞེས་སོགས་ཀྱིས་ཟད་འགྲོའོ། །བསྔོས་ན་མི་ཟད་ཅིང་འཕེལ་ཏེ། །བློ་གྲོས་མི་ཟད་པའི་ཞུས་པའི་མདོ་ལས། །ཇི་ལྟར་ཆུ་ཐིག་རྒྱ་མཚོ་ཆེ་ནང་ལྷུང་། །རྒྱ་མཚོ་མ་སྐམ་བར་དུ་དེ་མི་འཛད། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་པ་ལྟར་སངས་རྒྱས་པའི་བར་དུ་ལྷ་མིའི་ལུས་རྟེན་ཁྱད་པར་ཅན་ཤ་སྟག་ཐོབ་ནས་དེས་ཀྱང་མི་ཟད་པར་མཐར་འཚང་རྒྱའོ། །ཇི་སྐད་དུ། བསྔོ་བ་མི་ཟད་ལམ་ཡིན་ཏེ། །སྤེལ་དང་བསྒྱུར་བའི་ཆོས་ཅན་ནོ། །ཞེས་པ་ལྟར། དགེ་རྩ་མི་ཟད་པ་དང་། གོང་དུ་སྤེལ་བ་དང་། སངས་རྒྱས་ཀྱི་གོ་འཕང་སོགས་གང་དུ་འདུན་པས་བསྒྱུར་བ་ནི་དེར་འགྱུར་བ་སྟེ། མི་ཟད་པ་ནི་གོང་དུ་བཤད་མ་ཐག་པ་དང་། སྤེལ་བ་ནི། སྤྱོད་འཇུག་ལས། བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་ནས་མི་ཟད་འཕེལ་བར་འགྱུར། །ཞེས་དང་། འདུན་པས་བསྒྱུར་བ་ནི། མངོན་མཐོ་ལྷ་མི་དང་། ངེས་ལེགས་ཉན་རང་དགྲ་བཅོམ་དང་གཞན་དོན་དུ་རྫོགས་བྱང་གི་ཕྱིར་བསྔོས་ཀྱང་ཐོབ་སྟེ། དེ་ཉིད་ལས། གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླང་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །བྱང་ཆུབ་སེམས་ཞེས་བྱ་བ་རབ་བརྟན་ཟུང་། །ཞེས་སོ། །སེམས་བསྐྱེད་དང་བསྔོ་བ་གཉིས་ཀྱི་ཁྱད་པར་ནི། སངས་རྒྱས་ཀྱི་གོ་འཕང་ཐོབ་པར་བྱ་བའི་དོན་དུ་ཞེས་པ་དང་། ཐོབ་པའི་ཆེད་དུ་ཞེས་པ་ཙམ་ལས་ཁྱད་པར་མེད། བསྔོ་བ་དང་སྨོན་ལམ་གཉིས་ཀྱི་ཁྱད་པར་ནི། དགེ་རྩ་སྔོན་དུ་སོང་མ་སོང་གི་ཁྱད་པར་ཡིན་ནོ། །བསྔོ་བ་ལྟ་བའི་ངང་ནས་སྒྱུ་མ་ལྟ་བུའི་དམིགས་རྣམས་སྤྲད་ནས་བསྔོ་བ་འཁོར་གསུམ་དམིགས་མེད་དོ། །དེ་ལྟར་སྦྱོར་དངོས་རྗེས་གསུམ་པོ་དེར་ཐེག་པ་ཆེན་པོའི་ལམ་ཐམས་ཅད་འདུས། དེ་ལས་མང་མི་དགོས། ཉུང་ན་མི་འདུ་བ་ཡིན་ཏེ། སེམས་བསྐྱེད་དང་བསྔོ་བ་གཉིས་ཀྱི་ཁོངས་སུ་མཚན་ཉིད་ཐེག་པའི་ཐབས་ཀྱི་ཆ་ཐམས་ཅད་དང་། སྔགས་ཀྱི་བསྐྱེད་རིམ་དང་། ལྷུན་གྲུབ་ཐོད་རྒལ་མན་ཆད་འདུ། དངོས་གཞི་དམིགས་མེད་ཀྱི་ཁོངས་སུ་མཚན་ཉིད་ཐེག་པའི་ཤེས་རབ་ཀྱི་ཆ་ཐམས་ཅད་དང་། སྔགས་ཀྱི་རྫོགས་རིམ་དང་ཀ་དག་ཁྲེག་ཆོད་མན་ཆད་འདུ། སེམས་བསྐྱེད་དང་བསྔོ་བ་མེད་ན། དམིགས་མེད་ཀྱིས་སྲིད་པ་ལས་གྲོལ་ནས་ཉན་རང་ཙམ་དུ་འགྱུར། དངོས་གཞི་མེད་ན་སྲིད་པའི་བདེ་བ་ཙམ་ལས་སངས་རྒྱས་མི་འཐོབ། དམ་པ་གསུམ་གྱིས་མཐའ་གཉིས་ལས་གྲོལ་ཏེ། དངོས་གཞི་དམིགས་མེད་ཀྱིས་ཉོན་སྒྲུབ་སྤང་སྟེ་སྲིད་མཐའ་ལས་གྲོལ། སེམས་བསྐྱེད་དང་བསྔོ་བས་ཤེས་སྒྲིབ་སྤང་སྟེ་ཞི་མཐའ་ལས་གྲོལ་དམིགས་མེད་ཀྱིས་ཆོས་སྐུ་དང་གཞན་གཉིས་ཀྱི་གཟུགས་སྐུ་འགྲུབ་སྟེ། རིན་ཆེན་ཕྲེང་བ་ལས། ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །གཟུགས་ཀྱི་སྐུ་ནི་མདོར་བསྡུས་ན། །བསོད་ནམས་ཚོགས་ལས་འཁྲུངས་པ་ཡིན། །ཞེས་གསུངས་སོ། །ཞེས་པ་འདི་ཉིད་ངག་དབང་ཕུན་ཚོགས་དང་དོན་གཉེར་ཅན་འགའ་ཞིག་ངོར། མཁན་མིང་ཚེ་དབང་རིག་འཛིན་གྱིས་བྲིས་པའོ།།