ཁྲོ་ཆུའི་ཐུན་གཏོར་ཞལ་ཤེས་གབ་སྦས་ཀྱི་ཟིན་བྲིས།
ཁྲོ་ཆུའི་ཐུན་གཏོར་ཞལ་ཤེས་གབ་སྦས་ཀྱི་ཟིན་བྲིས་བཞུགས་པའི་དབུ་ཕྱོགས་ལགས་སོ། །གཞན་ལ་ཤིན་ཏུ་གསང་རྒྱའོ།།
ན་མོ་གུ་རུ་ཡི་མཱནྟ་ཀ་ཀྲོ་ཏ་ཡེ། རིགས་གསུམ་འདུས་པའི་ཁྲོ་བོ་ལ། །སྒོ་གསུམ་གུས་པས་ཕྱག་འཚལ་ནས། །སུམ་ལྡན་བླ་མས་བཀས་བསྐུལ་ཕྱིར། །ཞལ་ཤེས་སྙན་བརྒྱུད་རྣམ་གསུམ་བཀོད། །གནམ་ལྕགས་གོ་མཚོན་ཡིག་ཆུང་ལས། །ཐུན་གཏོར་འདི་ལ་ཟབ་ཁྱད་ཀྱི། །ཞལ་ཤེས་གསུམ་ཡོད་ཐུགས་ལ་གབ། །གསུངས་པའི་དོན་ནི་འདི་ལྟ་སྟེ། ་།ཐུན་མཚམས་སམ་ནི་རྒྱུན་ཁྱེར་ལ། །དམར་གཏོར་གཅིག་བཤམ་ཆུས་བྲན་ལ། །གཏོར་སྣོད་ལྕགས་སྲེག་ཧོམ་ཁུང་བསམ། །གཏོར་མ་དགྲ་བོ་དངོས་སུ་བསམ། །སྤྲུལ་པའི་ཕོ་ཉ་དཔག་མེད་ཀྱིས། །བྱིའུ་ཁྲ་ཡིས་
གཅུམ་པའམ། །རྔོན་པས་རི་དྭགས་དེད་པ་ལྟར། །བཀུག་ནས་གཏོར་མ་ཉིད་ལ་བསྟིམ། །གཞུང་ལྟར་བདེན་བདར་ལན་གསུམ་རྗེས། །རྩ་སྔགས་ཤམ་བུ་དུ་ཏྲི་སོགས། །བླ་འགུགས་བདུན་ནམ་ཉེར་གཅིག་བརྗོད། །གཏོར་མ་དགྲ་བོར་གསལ་བ་ཡི། །སྙིང་དཀྱིལ་ཁོ་རང་ཐོག་མེད་ནས། །བསགས་པའི་ལས་ངན་སྡིག་སྒྲིབ་དེ། །གནམ་ལྕགས་འཁོར་ལོ་རྩིབས་དྲུག་པ། །དང་པོ་ཆུང་ངུ་གཅིག་ཡོད་པས། །ལས་ངན་རླུང་གིས་གཡོན་དུ་འཁོར། །ཤུགས་དྲག་མྱུར་འཁོར་ཇེ་ཆེར་སོང་། །རྣ་ཡིག་ཚེ་སྲོག་དོན་སྙིང་དང་། །ཤ་ཁྲག་ཐམས་ཅད་དམར་ཉིལ་གཏུབ། །
དེ་ནས་འཁོར་ལོ་མི་དམིགས་གྱུར། །ཁོ་ཡི་ཚེ་བསོད་ནུས་མཐུ་རྣམས། །ཨོཾ་དཀར་ཨཱཿདམར་ཧཱུཾ་མཐིང་གི །རྣམ་པར་རང་གི་གནས་གསུམ་ཐིམ། །བཀྲག་མདངས་གཟི་བརྗིད་སྔར་ལས་རྒྱས། །རྣམ་ཤེས་ངོ་བོ་ཨ་དཀར་པོ། །འོག་གི་ཕྱོགས་ཀྱི་འཇིག་རྟེན་སུ། །རྒྱལ་བ་གཅིག་གི་ཐུགས་ཀར་ཐིམ། །ཆོས་སྐུ་སྐྱེ་མེད་ཐོབ་པར་དམིགས། །ཁོ་ཡི་ཤ་ཁྲག་བླ་ཚེ་སྲོག །གཏོར་སྣོད་བྷན་ལྕང་ལོ་ཅན། །གྲུ་གསུམ་ཡངས་ཤིང་རྒྱ་ཆེའི་ནང་། །སྦེ་སྣུམ་རོ་བཅུད་ལྡན་པ་ཡིས། །དམར་དང་མེ་རེ་གང་བར་བསྒོམ། །ཤ་ཁྲག་བདུད་རྩིར་མི་བསྒྱུར་བར་། །དེ་དག་བསྔོ་བ་རྣོ་བའི་གནད། །།གནམ་ལྕགས་འཁོར་ལོ་འཁོར་བའི་ཚེ། །རྩ་སྔགས་ལ་ནི་བསད་སྔགས་བཏགས། །བདུན་ནམ་ཉེར་གཅིག་བརྒྱ་ལ་སོགས། །མང་ཉུང་དོ་གལ་ཆེ་ཆུང་བསྟུན། །གཤིན་རྗེའི་ཤ་ཁྲག་ཟོས་བསྒོམ་ཚེ། །རྩ་སྔགས་བ་ལཾ་ཁཱ་ཧི་སོགས། །གནོད་བྱེད་བྱེད་མ་ཞེས་པ་རྣམས། །གང་ཡིན་ཆེ་གེའི་མིང་འཇུག་བྱ། །ཁྱད་ཟློག་རང་སྲུང་གཙོར་བཏོན་ན། ༈ །ཨེ་དྲག་པོ་ཆོས་དབྱིངས་གཤིན་རྗེ་སོགས། །གཞུང་གི་ཟློག་ཐུང་དེ་ཉིད་འདོན། །བསད་པ་ཁོ་ན་ཡིན་ན་ཡང་། །ཕྱོགས་ཕྱོགས་དག་ཀྱང་ཕ་ཀི་
སོགས་། །ཁྲོ་ཆུའི་བསྐུལ་པ་ཆེན་པོ་འདོན། །དེ་ནས་རོལ་མོ་དང་བཅས་པས། །བསད་བཟློག་གང་ཡིན་སྔགས་གཅིག་བརྗོད། །གཏོར་མ་མཆོད་གཡོག་བཀྱག་གམ་ལག་ཏུ་ཐོགས། །ཕྱོག་གཙང་དགྲ་ཕྱོགས་འགྲིགས་ན་ཟོར་དུ་འཕང་། །ཕྱོགས་མ་འགྲིགས་ན་དགྲ་ཕྱོགས་འབུལ་དུ་བཅུག །དམིགས་པ་གཤིན་རྗེས་ཟོས་ལྷག་གཏོར་མ་དེ། །རང་གི་ཐུགས་ཀའི་འོད་ཟེར་དང་། །མཁའ་འགྲོ་རྣམས་དང་སྣང་སྲིད་ལྷ་འདྲེ་དང་། །བདུད་དང་སྡེ་བརྒྱད་ཀུན་གྱིས་བཅུད་བསྡུས་ནས། །ངོ་བོ་འཇིག་རྟེན་དུག་རྫས་སྣ་ཚོགས་ལ། །རྣམ་པ་གནམ་ལྕགས་ཁྲོ་ཆུ་ཁོལ་མ་ལས། །གྲུབ་པའི་རི་བོ་ཟུར་གསུམ་རྣོ་ངར་ཅན། །མདའ་མདུང་རལ་གྲི་སྤུ་གྲི་ཆུ་གྲི་སོགས། །རྣོ་དབལ་མཚོན་ཆའི་ཚོགས་ནི་རྩི་ཤིང་ལྟར། །གདུག་པའི་མེ་དཔུང་དམར་ནག་འབར་ཞིང་འཁྲུག །དུག་ཆེན་ཧ་ལའི་རླངས་པ་སྔོ་དམར་འཕྱུར། །དགྲ་བོ་གར་གནས་འོག་གཞི་འབྱུང་རིམ་བརྩེགས། །ཁོ་ཡི་སྦྲ་ཁང་གྲུ་གསུམ་ཧོམ་ཁུང་བསམ། །ཁོ་ཉིད་གན་རྐྱལ་སྙིང་དཀྱིལ་ནི་ཡིག་མཚན། །རང་ཉིད་ཁྲོ་ཆུར་གསལ་བའི་ཕྱག་གཡས་ཀྱིས། །ནམ་མཁའི་དབྱིངས་སུ་ཕྱུར་བའི་དགྲ་བོ་ལ། །བརྒྱབས་པས་གཏོར་
རྩེ་ཕུར་པའི་རྩེ་འདྲ་བ། །སྲོག་ཡིག་ཚྭ་ལ་བརྒྱབས་པས་སྲོག་རྩ་བཅད། །དཔེར་ན་ནམ་མཁའི་དབྱིངས་ནས་ཐོག་བརྒྱབ་ལྟར། །འོག་གཞི་འབྱུང་བ་བཞི་ཡི་རིམ་སོང་ཕུག །དགྲ་ལུས་ས་དང་བསྲེས་ཏེ་རྣམ་ཤེས་ཕྲལ། །འོག་གཞི་རྒྱ་མཚོ་དང་བསྲེས་ཚེ་བསོད་བཀྲུས། །དེ་འོག་མེ་ཡི་དཀྱིལ་འཁོར་དང་བསྲེས་ནས། །སྟོབས་ནུས་ཁོ་ཡི་ཕུང་པོ་དང་བཅས་པ། །གཞོབ་བུན་ཐུལ་གྱིས་བསྲེགས་ནས་ཐལ་བ་དེ། །འོག་གཞི་རླུང་གི་དཀྱིལ་འཁོར་དང་བསྲེས་པས། །ཐལ་བ་གཏོར་ནས་རྗེས་མེད་བརླག་པར་བསམ། །ཀུན་གཞིའི་རྣམ་ཤེས་ནམ་མཁའ་དང་བསྲེས་པས། །འཁྲུལ་སྣང་འགགས་ནས་ཆོས་ཉིད་ཀློང་དུ་ཐིམ། །དེ་རྗེས་རྩ་སྔགས་མཇུག་ཏུ་ཟློག་བསད་སྔགས། །ཟློག་བསད་གང་ཡིན་སྐབས་འཇུག་སྔགས་བཟླའོ། །རྩ་སྔགས་མཇུག་ཏུ་ཟློག་བསད་སྔགས་གཉིས་པོ། །ཟློག་སྔགས་མཇུག་ཏུ་ཐལ་མོ་བརྡབས་པ་ཡིས། །དེ་ནས་ཐལ་མོ་བརྡབ་པའི་དམིགས་པ་ནི། །རང་ཉིད་ཁྲོ་ཆུ་རྩ་ཕྱག་གཡས་པ་ཡིས་། །ཕྱག་མཐིལ་འཛམ་གླིང་ཁྱོན་ཙམ་རྒྱ་ཆེ་བ། །སྲ་མཁྲེགས་རྡོ་རྗེ་ཕ་ལམ་རྒྱུ་ལས་གྲུབ། །གཡོན་གྱི་མཐིལ་དུ་མཚོན་ཆའི་ས་གཞིའི་དབུས། །ནྲྀ་ཏྲི་ལས་བྱུང་གནོད་བྱེད་གང་
ཡིན་གསལ། །སྤྲུལ་པ་ཁྲོ་ཆུང་རླུང་ནག་འཚུབ་མའི་ཚོགས། །སྤྲོས་པས་བཀུག་ལ་ཕྱག་གཡོན་གཟུགས་ལ་བསྟིམ། །ཕྱག་གཡས་མཐིལ་གྱིས་གནམ་ལྕགས་འཁོར་ལོ་ནི། །རྩིབས་བརྒྱད་ལྡན་ཐབས་གནས་པའི་རྩིབས་རྩེར་ནི། །གཤིན་རྗེ་མཚོན་ཐོགས་མང་པོ་སྐར་ལྟར་འཕྲོ། །འཁོར་ལོའི་ལྟེ་བར་ཆུ་གྲི་རབ་རྣོ་བར། །རྩ་བ་སྲ་མཁྲེགས་རྩེ་མོ་རབ་ཏུ་རྣོ། །ཕྱག་གཉིས་དྲག་ཏུ་བརྡབས་པས་ཆུ་གྲི་དེ། །དམིགས་བྱའི་སྙིང་ཁར་བརྒྱབས་པས་སྲོག་རྩ་བཅད། །ཤ་ཁྲག་དམར་ཉིལ་ཁྲག་སྐྱོ་ལྟར་དཀྲུགས་ནས། །ཁོ་ཡི་ལྷ་སྲུང་གཤིན་རྗེའི་ཚོགས་སུ་གྱུར། །ཤ་ཁྲག་དབང་པོ་དོན་སྙིང་ཧབ་ཐོབ་ཟོས། །ལྷག་རོལ་ཐམས་ཅད་བསྐལ་པའི་མེ་འབར་བསྲེགས། །དེ་ནས་འཁོར་ལོ་བསྐལ་པའི་ཆུ་བྱུང་བཀྲུས། །དེ་རྗེས་འཁོར་ལོ་བསྐལ་པའི་རླུང་བྱུང་གཏོར། །རྣམ་ཤེས་ཚུ་ཡིག་གྱུར་པའི་འོག་ཕྱོགས་ཀྱི། །འཇིག་རྟེན་ཁམས་སུ་རྒྱལ་བའི་ཐུགས་ཀར་ཐིམ། །ཐལ་རྡེབ་རེ་དང་ཟློག་བསད་སྔགས་རེ་སྤྱད་། །ཐལ་མོ་དགུ་བརྡབ་བྱད་མ་འབུམ་རྡུགས་ཡིན། །བསད་པ་ཡིན་ན་བསད་སྔགས་རེ་དང་སྤྱད། །དེ་ལྟར་ལྟེ་བར་ཆུ་གྲི་བསྒོམ་པ་དེ། །སྔགས་པ་དང་ནི་བོན་པོ་ལ་ཡིན་
གྱི། །བེན་དེ་ཡིན་ན་གསེར་གྱི་རྡོ་རྗེ་ནི། །ར་དགུ་ལྡིང་ཞིང་རྣོ་ངར་ལྡན་པའོ། །བཙན་པོ་ལ་ནི་གནམ་ལྕགས་རྡོ་རྗེ་ནི། །ཕུར་པ་རྣོ་ངར་ཚྭ་ཚྭ་འཕྲོ་བར་བསྒོམ། །བུད་མེད་ལ་ནི་སྤུ་གྲི་འབར་བར་བསམ། །དེ་བཞིན་སྐྱེས་པར་རལ་གྲི་རྣོ་ངར་ཅན། །དེ་དག་ཀུན་ཀྱང་རྩ་བ་རབ་ཏུ་བརྟན། །རྩེ་མོ་སྤུ་གྲི་བསམ་ཆོད་འབར་བ་བསྒོམ། །བསྙེན་པ་ལ་སོགས་གོང་ལྟར་མཚུངས་པ་ཡིན། །བྱེ་མ་འབུམ་རྡུགས་སྤུ་གྲི་རེག་གཅོད་ཡིན། །སྔགས་ཀྱིས་བསྒྱུར་ཁས་ཟློག་པ་གང་འདོད་འགྲུབ། །འདི་ཉིད་བྲིས་པས་བརྩེ་བྲལ་བསྟན་བཅོས་ཀྱི། །ཉེས་པ་གང་མཆིས་ཡི་དམ་ལྷ་ལ་བཤགས། །དགེ་བས་དཀོན་མཆོག་དབུ་འཕང་མཐོ་གྱུར་ཅིག །འདི་དག་གསལ་བར་བཀོད་པ་མི་འོས་ཏེ། །དཀོན་མཆོག་ཀུན་འདུས་བླ་མའི་བཀས་བསྐུལ་ཕྱིར། །སྙིགས་དུས་སྔགས་ནག་རཱ་ག་ཨ་སྱས་སྨྲས། །གསང་རྒྱ། སྦས་རྒྱ། གཞན་ལ་མ་སྤེལ་རང་སྲོག་བཙའ་བར་གྱིས། །སྔགས་པ་དམ་མེད་ལག་ཏུ་སོང་གྱུར་ན། །ལུས་སེམས་ཕྱེ་མར་བརླག་པའི་བཀའ་རྒྱ་ཡོད། །སྤྱི། །