གསུམ་པ་ཉམས་ན་ཕྱིར་བཅོས་པའི་ཚུལ།

གསུམ་པ་ཉམས་ན་ཕྱིར་བཅོས་པའི་ཚུལ་ནི།

བག་མེད་ལ་སོགས་པའི་དབང་གིས་བླ་མ་ལ་སྨོད་པ་སོགས་རྩ་ལྟུང་བཅུ་བཞི་གང་རུང་བྱུང་ན་འགྱོད་སེམས་དྲག་པོས་བླ་མ་ལ་ཅི་འབྱོར་བས་མཆོད་པ་སྔོན་དུ་འགྲོ་བས། སྐྱབས་འགྲོ་སེམས་བསྐྱེད་ནན་ཏན་བྱས་ནས་དབང་དང་འབྲེལ་བར་སྡོམ་པ་སླར་གསོ་བར་བྱ་ལ། སྟོབས་བཞི་ཚང་བའི་སྡིག་སྦྱོང་དགོས་སོ། །རྩ་ལྟུང་གི་ཡན་ལག་མ་ཚང་བ་ཕམ་པའི་སྡེར་གཏོགས་པའི་སྦོམ་པོ་རྣམས། ཡུལ་བླ་མའམ་སྔགས་ཀྱི་སྡོམ་ལྡན་ལ། རྒན་ན་ཕྱག་འཚལ་གཞོན་ན་འདུད་པ་ཙམ་བྱས་སྙན་གསན་ཕབ་ནས། ཙོག་པུར་འདུག་སྟེ་ཕམ་པའི་མིང་རིགས་ཀྱི་ཕྱིར་བཅོས་དང༌། སྦོམ་པོ་གཞན་རྣམས་སྦོམ་པོའི་མིང་རིགས་ཀྱི་ཕྱིར་བཅོས་བྱེད་ཚུལ་གྱི་ཆོ་ག་གཞན་ལས་ཤེས་པར་བྱའོ། །གཞན་ཡང་ཐམས་ཅད་མཁྱེན་པ་ཏཱ་ར་ནཱ་ཐས་དམ་ཚིག་ཉམས་ན་སླར་གསོ་བར་བྱེད་པའི་ཚུལ་འདི་ལྟར་གསུངས་ཏེ། དུས་འཁོར་དཀྱིལ་ཆོག་རྣམ་བཤད་བདུད་རྩིའི་རྒྱ་མཚོ་ལས། གལ་ཏེ་དམ་ཚིག་ཉམས་ན་སླར་གསོ་བར་བྱེད་པའི་ཚུལ་ནི། རྒྱུད་ལས། རྩ་བའི་ལྟུང་བ་རྣམ་པར་དག་པར་འགྱུར་ཏེ་ཡོན་ཏན་ལྡན་པ་དབང་བདུན་ལ་གནས་དག་གིས་སོ། །བུམ་པ་གསང་བ་ལ་གནས་གལ་ཏེ་བརྟུལ་ཞུགས་ངེས་པའི་དབང་གིས་གོང་མ་ལ་ནི་དག་པ་མེད། །རྩ་བའི་ལྟུང་བ་བྱུང་བ་གང་ཞིག་དག་པའི་སླད་དུ་སླར་ཡང་དཀྱིལ་འཁོར་འདིར་ནི་འཇུག་བྱ་སྟེ། །རྗེས་སུ་གནང་བ་ཐོབ་ནས་སླར་ཡང་ཚོགས་ཀྱི་འདུས་པར་ཐུ་བོའི་མིང་ནི་ཆུང་བ་ཉིད་དུ་འགྱུར། །དེ་ལ་ཡོན་ཏན་ལྡན་པ་ཞེས་པ་ནི་ཕྱིས་མི་བྱེད་པའི་སྡོམ་པ་ལ་གནས་པ་ཡིན་ཏེ། །འདི་ནི་སྐབས་འདིའི་དོན་ཚན་རྣམ་གྲངས་གལ་ཆེ་ཤོས་གཅིག་ཏུ་སྦྱོར་རྒྱུ་ཡིན་ནོ། །དེ་ཡང་དབང་བདུན་ཐོབ་ལ་གོང་མ་མ་ཐོབ་པ་ནི། རྩ་ལྟུང་བྱུང་ན་སྡིག་པ་སྦྱང་བའི་ཐབས་རང་འདོད་པའི་ལྷའི་སྙིང་པོའམ། རྡོ་རྗེ་སེམས་དཔའི་ཡི་གེ་བརྒྱ་པ་སྟོང་ཕྲག་སུམ་ཅུ་རྩ་དྲུག་གི་བཟླས་པས་དག་པར་ནུས་པ་དང༌། བུམ་དབང་དང་གསང་བའི་དབང་བསྐུར་ཙམ་ཐོབ་པ་ལ་ནི། སློབ་དཔོན་གྱིས་ཇི་སྐད་བཀའ་སྩལ་བའི་བརྟུལ་ཞུགས་ངེས་པའི་ཆད་པ་དང་དུ་བླངས་པས་སྡིག་པ་དག་པར་འགྱུར་ཏེ། དེ་ཡང་བུམ་དབང་ཙམ་ཐོབ་པ་ལ་ཡོན་འབུལ་བ་དང་ཕྱག་ མཆོད་སོགས་བསོད་ནམས་ཀྱི་ཚོགས་ཆད་པ་ཙམ་དང༌། དེ་སྟེང་གསང་དབང་ཡང་ཐོབ་པ་ལ་ནི། བསོད་ནམས་ཀྱི་ཚོགས་ཀྱི་ཆད་པ་སྔོན་དུ་འགྲོ་བའི་དཀའ་ཐུབ་དཀའ་སྤྱད་ཚུལ་ཁྲིམས་ཀྱི་ཚོགས་ཀྱི་ཆད་པ་ཉམས་སུ་བླང་དགོས་པ་ཡིན་ནོ། །གལ་ཏེ་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ་ན། དེ་ལ་བྱུང་བའི་རྩ་ལྟུང་ནི། ཆད་པའི་ལས་ཙམ་གྱིས་དག་པར་མི་འགྱུར་བས་བསོད་ནམས་དང་ཚུལ་ཁྲིམས་ཀྱི་སྟོབས་ཅི་ནུས་ཅི་ལྕོགས་སུ་བྱས་ནས་མཐོལ་བཤགས་རྒྱ་ཆེར་ཕུལ་ཏེ། བསྐྱེད་པའི་རིམ་པའམ་རྫོགས་པའི་རིམ་པའི་རྣལ་འབྱོར་ལ་ནན་ཏན་དུ་འབད་པས་རིམ་གྱིས་ལྟུང་བ་བྱང་བར་འགྱུར་རོ། །འདིའི་འགྲེལ་བར། སློབ་དཔོན་གྱིས་འདིའི་ཆད་པ་སྦྱིན་པར་མི་འགྱུར་རོ་ཞེས་པ་ནི། བསོད་ནམས་དང་ཚུལ་ཁྲིམས་ཀྱི་ཆད་ལས་བྱིན་པ་ཙམ་ལས་ལྟུང་བ་དག་པར་སློབ་དཔོན་གྱིས་གནང་བ་མི་སྦྱིན་པ་ཁོ་ན་སྟེ། སྦྱིན་པར་མི་འགྱུར་རོའི་དོན་སྦྱིན་པ་ཙམ་གྱིས་དག་པར་མི་འགྱུར་ཅེས་པའོ། །སྤྱིར་སློབ་དཔོན་གྱིས་དགེ་བའི་ཆད་ལས་སྟེར་བ་བཀག་པའོ་སྙམ་དུ་སེམས་ཤིང་སྨྲ་བ་མ་ཡིན་གྱི། སྐབས་དེར་དགེ་བ་གང་བསྒྲུབ་ཀྱང་དེའི་ལྟུང་བའི་གཉེན་པོར་འགྱུར་བ་ཁོ་ན་ཡིན་པའི་ཕྱིར་རོ། །ཞེས་པ་ནས། རྩ་བའི་ལྟུང་བ་བྱུང་བ་ཀུན་ལ་སྡོམ་པ་ཞིག་པའམ་རྩ་བ་ནས་མ་ཞིག་ཀྱང་ཉམས་སྨད་པའི་ཕྱིར་རོ། །སླར་བླང་བའམ་གསོ་བའི་དོན་དུ་དཀྱིལ་འཁོར་ཆེན་པོ་འདིར་ཡོངས་སུ་ཞུགས་ཏེ་དབང་བླང་བར་བྱའོ། །དེའི་ཚེ་སྡོམ་པ་སོར་ཆུད་པས་སློབ་དཔོན་གྱི་བཀའི་གནང་བ་ཐོབ་པར་བྱས་ནས་ཚོགས་ཀྱི་འདུས་པར་འཇུག་ཏུ་རུང་ལ། སྔོན་ལྟུང་བ་མ་བྱུང་བའི་དུས་ན་གཞན་གྱི་གྲལ་སོགས་བཀུར་སྟི་དབང་བ་ཡིན་ཡང༌། སྐབས་དེར་དམ་ཚིག་གི་བསླབ་པ་གཞོན་པ་རྣམས་ཀྱང་གྲལ་གོང་དུ་བཏང་སྟེ། དམ་ཚིག་བསྐྱར་བ་དེ་ནི་གྲལ་གྱི་ཐ་མར་བཞག་པར་བྱའོ། །ཞེས་པ་ནས། དེ་ལྟར་དམ་ཚིག་གསོའི་ཟིན་ནས། གཟོད་བཟླས་བརྗོད་དང་ཆད་ལས་སོགས་བླང་བར་བྱ་བ་ཡིན་གྱི་དམ་ཚིག་མ་བསྐྱལ་པ་ལ་བཟླས་བརྗོད་བྱ་བར་མི་རིགས་སོ། །ཞེས་སོགས་གསུངས་སོ། །གཞན་རིམ་གཉིས་བསྒོམ་པ། གཟུངས་སྔགས་ཟབ་མོ་བཟླ་བ། ལྟུང་བཤགས་སྤྱི་བཤགས་སོགས་སྡིག་ལྟུང་སྦྱོང་བའི་ཐབས་མང་དུ་གསུངས་ལ། ཁྱད་པར་དུ་རང་གི་སྤྱི་བོར་རྡོར་སེམས་ཡབ་ཡུམ་བསྒོམས་ནས་བདུད་རྩི་འབེབ་སྦྱོང་གི་དམིགས་པ་དང་སྟོབས་བཞིས་ནན་ཏན་བྱས་ཏེ་ཉིན་རེ་བཞིན་ཡི་གེ་བརྒྱ་བ་ཉེར་གཅིག་རེ་མ་ཆག་པར་བཟླས་ན། ལྟུང་བ་ཞག་རེ་བཞིན་ཉིས་འགྱུར་དུ་འགྲོ་བའི་འཕེལ་ཁ་ཆད་ཅིང༌། འབུམ་ཕྲག་གཅིག་བཟླས་ན་རྩ་ལྟུང་ཡང་རྣམ་པར་དག་པར་གསུངས་སོ། །འདི་ནི་བྱ་སླ་ལ་དོན་ཆེ་པས་ན་བདག་ལེགས་སུ་འདོད་པ་རྣམས་ཀྱིས་འབད་པར་བྱའོ། །བཤགས་པའི་སྐབས་ཀུན་ཏུ་གཉེན་པོ་སྟོབས་བཞི་ཚང་དགོས། དེ་ལ་སྔ་མ་ལ་འགྱོད་སེམས་དྲག་པོ། ཕྱི་མ་ལ་སྡོམ་སེམས་གཉིས་ངེས་པར་དགོས་ཤིང༌། དེ་ལ་མ་བསྲུང་བའི་ཉེས་དམིགས་དང༌། བསྲུང་བའི་ཕན་ཡོན་བསམ་པ་དགོས་པས། ཚེ་འདིའི་ཉེས་དམིགས་རྩ་ལྟུང་སོགས་བྱུང་ན་བདུད་དང་ལོག་འདྲེན་སོགས་ཀྱིས་བཟུང་སྟེ། རིམས་ནད་སོགས་མི་འདོད་པ་སྣ་ཚོགས་འབྱུང་ཞིང༌། ཕྱི་མར་དམྱལ་བ་ཆེན་པོ་རྣམས་སུ་སྡུག་བསྔལ་ཚད་མེད་པ་མྱོང་བར་འགྱུར་རོ། །