གཉིས་པ་གཞན་ལུགས་དགག་པ།
གཉིས་པ་གཞན་ལུགས་དགག་པ་ནི།
འདིར་ཁ་ཅིག་ན་རེ་གཞན་དེ་ལྟར་ཡིན་ཡང་རབ་ཏུ་བྱུང་བ་བར་མ་མེད་ན་དགེ་ཚུལ་དང་དགེ་སློང་གི་སྡོམ་པ་མི་སྐྱེ་སྟེ། ཊཱི་ཀ་ལས། དགེ་ཚུལ་ཉིད་རབ་ཏུ་བྱུང་བ་ཁོ་ན་ལ་བྱེད། ཅེས་དང༌། རིགས་པས་ཀྱང་རབ་ཏུ་མ་བྱུང་བ་ལ་དགེ་ཚུལ་དང་དགེ་སློང་གི་སྡོམ་པ་སྐྱེ་ན་ནི། རབ་ཏུ་མ་བྱུང་བར་དགེ་ཚུལ་དང་དགེ་སློང་གི་སྡོམ་པ་མནོས་ན། དགེ་ཚུལ་དང་དགེ་སློང་གི་སྡོམ་པ་དེ་ཁྱིམ་པའི་སྡོམ་པ་ཡིན་ནམ་རབ་ཏུ་བྱུང་བའི་སྡོམ་པ་ཡིན། སྔ་མ་ལྟར་ན་རབ་ཏུ་བྱུང་བ་སྡེ་ལྔ་ཞེས་གསུངས་པའི་གཞུང་དང་འགལ་ལ། ཕྱི་མ་ལྟར་ན་རྒྱུ་རབ་ཏུ་བྱུང་བ་མ་བྱས་པར་འབྲས་བུ་རབ་ཏུ་བྱུང་བའི་སྡོམ་པ་སྐྱེས་ན་རྒྱུ་འབྲས་འཆོལ་བར་འགྱུར་རོ་ཞེས་ཟེར་རོ། །དེ་དག་དགག་པ་ལ་གཉིས་ལས། དང་པོ་གནོད་བྱེད་བརྗོད་པ་ནི། ཚིགས་སྔ་མ་མེད་པ་ལ་ནི་ཉེས་བྱས་ཙམ་དུ་ཟད་དེ། ཞེས་དང༌། གླེང་གཞིའི་སྡོམ་ལས། རབ་ཏུ་མ་བྱུང་བསྙེན་པར་རྫོགས། །ཞེས་དང༌། དེའི་སྡོམ་བཤད་ལས། བཙུན་པ་ཁྱིམ་པ་རབ་ཏུ་མ་བྱུང་བ་ཞིག་བསྙེན་པར་རྫོགས་པར་བགྱིད་ན་བསྙེན་པར་རྫོགས་པ་ཞེས་བགྱིའམ་མ་རྫོགས་པ་ཞེས་བགྱི། ཨུ་པ་ལི་བསྙེན་པར་རྫོགས་མོད་ཀྱི་བསྙེན་པར་རྫོགས་པར་བྱེད་པ་ནི་འདས་པ་དང་བཅས་པ་འགྱུར་རོ། །ཞེས་རབ་ཏུ་བྱུང་བ་མ་བྱས་པ་ལ་དགེ་སློང་གི་སྡོམ་པ་སྐྱེ་བར་གསུངས་པས། དགེ་ཚུལ་གྱི་སྡོམ་པ་སྐྱེ་བ་ལྟ་ཅི་སྨོས་སོ། །རིགས་པས་ཡང་རབ་ཏུ་བྱུང་བ་ནི་མཁན་པོ་ཁོ་ན་ལས་འཐོབ་ལ། མཁན་པོ་མེད་པ་ལ་སྡོམ་པ་སྐྱེ་བར་གསུངས་པས་གནོད་དོ། །དེ་ཡང་ཊཱི་ཀ་ལས། རབ་ཏུ་འབྱུང་བ་ནི་མཁན་པོ་ཁོ་ན་ལས་འགྱུར་ལ། ཞེས་དང༌། མཁན་པོ་མེད་པ་ཉིད་ལ་ཡང་ངོ༌། །ཞེས་སོ། །