གཡུ་ཁོག་དཔོན་ཚང་ལ་བརྟགས་ལུང་གནང་བ།
༈ གཡུ་ཁོག་དཔོན་ཚང་ལ་བརྟགས་ལུང་གནང་བ། ཡང་ཅིག་དམ་པ་ཉིད་ཀྱི་ཞལ་སྔ་ནས། །བདག་གི་རྒྱུད་ཚོད་བགམ་པའི་གསུང་སྒྲོས་ལ། །སྙིང་ནོར་གཡུ་དཔོན་ཡབ་སྲས་ཆབ་སྲིད་དང་། །སྤྱི་དཔོན་ཁྲོ་ཆེན་ཆུས་ཕྱྭར་བརྟགས་དགོས་སྐད། །འཇིག་རྟེན་མཐུན་འཇུག་བྱ་བའི་མིག་ཕྲ་ཡང་། །པད་འབྱུང་ཐུགས་རྗེས་ཆོས་སྤྱན་ཡངས་རློམ་བདག །བདག་མེད་གནས་ལུགས་རྟོགས་པའི་མེ་ལོང་ངོགས། །ལྐོག་གྱུར་ཀུན་རྫོབ་གཟུགས་བརྙན་འདི་བཞིན་མཐོང་། །ཆོས་རྒྱལ་ཆེན་པོའི་ནང་བློན་ཚེ་འཕོས་པ། །སྔོན་གོམས་བསོད་ནམས་དར་བའི་མི་རྗེ་ཡི། །སྐུ་ཕྱྭར་གེགས་རིགས་ཡོད་མེད་འདི་ལྟར་ཤེས། །འཇིགས་རུང་སྦྲུལ་གྱིས་ལྕེ་གཉིས་རྐྱོང་སྐབས་སུ། །ཕན་བྱེད་སྨན་དེ་དུག་ཏུ་འགྱུར་སྲིད་ན། །ལོ་ལྟར་རིག་འཛིན་ཉི་མ་གྲགས་པ་ཡི། །གཏེར་བྱོན་ཚེ་སྒྲུབ་བུམ་སྒྲུབ་གནད་སྨིན་དང་། །བཛྲ་གུ་རུ་རྡོ་འབུམ་རྟེན་བཞེངས་གལ། །དེ་ཡང་བཅུ་གཉིས་ལོ་ཡི་བདེ་སྡུག་ལྟས། །ཁྲོ་དཀར་གྱིས་བྱས་སྐྱོགས་དེ་གཡང་མཚོར་འཁྲུ། །ལེགས་པའི་ཕན་གྲོགས་ནོར་གཏེར་བྱི་བས་བྱེད། །གླང་གི་དཀར་ནག་སྤུ་རིས་ཚོན་ཁྲ་སྡེབ། །ལུགས་ཟུང་གཉིས་ཀ་སྔར་མེད་གསར་འཛུགས་སྲིད། །སྟག་གི་ལུས་ལ་རིན་ཆེན་དང་པོས་བྱུགས། །མཛེས་པའི་ལྟད་མོར་ཀུན་གྱིས་ཡ་མཚན་བྱེད། །ཡོས་ཀྱི་སྐབས་སུ་ཆོས་གྲྭར་སེམས་དཔའ་ཆེའི། །ཞབས་པད་གསར་བཀོད་ལེགས་བྱས་བྱ་བས་བྲེལ། །གསེར་འབྲུག་དགུང་ནས་ཐེག་ཆེན་ཆོས་སྒྲ་བརྒྱས། །སྣ་ཚོགས་ལུས་སྒེག་རྨ་བྱ་དགའ་བས་བྲེལ། །སྦྲུལ་གྱི་སྨན་དུག་ལྕེ་གཉིས་བརྐྱང་སྐབས་དེར། །སྤོས་དྲིས་རེག་ན་སེམས་དཔའ་འཕྱང་མོ་ཉུག །ཅང་ཤེས་སྤྲིན་ཤུགས་ཞོན་པའི་བརྒྱ་བྱིན་ལྷས། །ཕན་གྲོགས་བྱས་སྐབས་དབུ་འཕང་ཇེ་མཐོར་འགྱུར། །ལུག་གི་བལ་འདབ་ལྟར་འཇམ་སྤུ་གསེབ་ནས། །ཕན་གནོད་མ་ངེས་རེག་བྱ་འཇམ་རྩུབ་འོང་། །སྤྲེལ་བཞིན་ཡན་པའི་ཆབ་སྲིད་མངའ་འོག་འགའ། །རིང་མིན་གཞན་དབང་ཞགས་པས་འཆིང་ཡང་སྲིད། །མཁའ་ལྡིང་རང་ཚུགས་ལུས་རྩལ་རླབས་ཆེ་བས། །གནོད་མང་བྱ་ཁྱུས་གཙེས་ཀྱང་ཆེར་མི་དོགས། །དེ་ལྟར་ཉམས་ནི་བདེན་མེད་སྒྱུ་མ་སྟེ། །སྒྱུ་མའི་ཚིག་རིས་ཐོལ་བྱུང་ཡི་གེར་བྲིས། །ནོངས་པ་ཅི་ཡོད་རིག་རྩལ་ཌཀྐིའི་བརྡ། །བདེན་རྫུན་ཤེས་རབ་ཅན་གྱིས་དཔྱོད་དང་གསལ། །