དོན་དམ་ཤེས་པ་མ་ཡིན་པ་ལ་ལུང་དང་འགལ་བར་བསྟན་པ།
ལྔ་པ་དོན་དམ་ཤེས་པ་མ་ཡིན་པ་ལ་ལུང་དང་འགལ་བར་བསྟན་པ་ནི། གལ་ཏེ་དོན་དམ་ཤེས་པ་མ་ཡིན་ན། །གཤིས་ལུགས་ཟབ་མོ་སྟོན་པའི་རྫོགས་ལྡན་ཆོས། །མདོ་རྒྱུད་ཟབ་མོ་ཀུན་དང་འགལ་བར་འགྱུར། །རྩ་བར། གལ་ཏེ་དོན་དམ་ཤེས་པ། ཞེས་པ་ནས་ཀུན་དང་འགལ་བར་འགྱུར། ཞེས་པའི་བར་རྐང་བ་གསུམ་བྱུང༌། དེའི་དོན་ནི་ག༵ལ་ཏེ༵་དོན༵་དམ༵་ཤེས༵་པ༵་མ༵་ཡི༵ན་པར་ཕྱོགས་སྔ་མའི་འདོད་པ་ལྟར་ཡིན་ན༵་ནི། གཤི༵ས་ལུག༵ས་ཟབ༵་མོ༵་སྟོ༵ན་པའི༵་རྫོ༵གས་ལྡན༵་གྱི་ཆོ༵ས་མདོ༵་དང་རྒྱུ༵ད་སྡེ་ཟབ༵་མོ༵་ཀུན༵་དང༵་འགལ༵་བར༵་འགྱུ༵ར་ཏེ། རྒྱུད་བླ་མ་ལས། སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། །ཞེས་དང༌། ཆོས་དབྱིངས་བསྟོད་པ་ལས། ས་ཡི་ནང་ན་གནས་པའི་ཆུ། །དྲི་མ་མེད་པར་ཡང་དག་གནས། །ཉོན་མོངས་ནང་ན་ཡེ་ཤེས་ཀྱང༌། །དེ་བཞིན་དྲི་མ་མེད་པར་གནས། །ཞེས་དང༌། འདི་ཉིད་གྱིས་འགྲེལ་བ་ལས། དེ་རྣམས་ལས་ནི་དོན་དམ་ཆོས་ཉིད་གང་ཡིན་ཐམས་ཅད་རིག་པ་དང་རང་རིག་དང་བདེ་བ་དང་ཤེས་པ་དང་ཡེ་ཤེས་དང་རྟག་པ་དང་འདུས་མ་བྱས་དང་ཁྱབ་བདག་ལ་སོགས་པར་ཡང་ཡང་གསུངས་པས་གནོད་དེ་མགོ་བོར་ཐོག་ལྷུང་བ་བཞིན་ནོ། །ཞེས་གསུངས་བའི་ཕྱིར་རོ། །