གསུམ་པ་རྩོད་པ་སྤོང་བ།
གསུམ་པ་རྩོད་པ་སྤོང་བ་ལ།
བྱམས་པ་དང་ཞེ་སྡང་གཉིས་ཆོས་ཅན། ལྷན་ཅིག་མི་གནས་འགལ་གྱི་དངོས་འགལ་ཡིན་པར་ཐལ། དངོས་སུ་གནོད་བྱ་གནོད་བྱེད་དུ་ཞུགས་པའི་སྒོ་ནས་རྒྱུན་ནུས་མཚུངས་སུ་འགྲོགས་སུ་མི་རུང་བའི་དངོས་པོ་དེ་ཡིན་པའི་ཕྱིར། དེར་ཐལ། བྱམས་པ་ཞེ་སྡང་གི་དངོས་སུ་གནོད་བྱེད་དང༌། ཞེ་སྡང་བྱམས་པའི་དངོས་སུ་གནོད་བྱ་ཡིན་ལ་དེ་གཉིས་འཕྲད་པའི་སྐད་ཅིག་གཉིས་པར་བྱམས་པས་ཞེ་སྡང་གི་རྒྱུན་ནུས་ཆུང་དུ་བྱེད་པ་ཡིན་པའི་ཕྱིར། རྩ་བར་འདོད་མི་ནུས་ཏེ། རྣམ་འགྲེལ་ལས། བྱམས་སོགས་རྨོངས་དང་འགལ་མེད་ཕྱིར། །ཤིན་ཏུ་ཉེས་པ་ཚར་གཅོད་མིན། །ཞེས་གསུངས་པའི་ཕྱིར་ན་མ་ཁྱབ་སྟེ། ལུང་དེའི་དོན་ནི་བྱམས་པས་ཞེ་སྡང་གི་དངོས་གཉེན་བྱེད་མི་ཐུབ་ཅེས་པའི་དོན་ཡིན་པའི་ཕྱིར། ཁ་ཅིག་ན་རེ། རྟག་མི་རྟག་གཉིས་ཆོས་ཅན། ཕན་ཚུན་སྤངས་འགལ་གྱི་དངོས་འགལ་ཡིན་པར་ཐལ། རྣམ་བཅད་ཡོངས་གཅོད་ཀྱི་སྒོ་ནས་མི་མཐུན་པར་གནས་པ་དེ་ཡིན་པའི་ཕྱིར། འདོད་ན། དེ་གཉིས་ཆོས་ཅན། ཁྱོད་གཉིས་པོ་གང་རུང་མ་ཡིན་པའི་ཕུང་སུམ་པ་མེད་པར་ཐལ། ཁྱོད་་ཕན་ཚུན་སྤངས་འགལ་གྱི་དངོས་འགལ་ཡིན་པའི་ཕྱིར། འདོད་ན། དེ་གཉིས་ཆོས་ཅན། ཁྱོད་གང་རུང་མ་ཡིན་པའི་ཕུང་སུམ་པ་ཡོད་པར་ཐལ། རི་བོང་རྭ་དེ་དེ་གཉིས་གང་ཡང་མ་ཡིན་པའི་ཕྱིར་ན་མ་ཁྱབ། རི་བོང་རྭ་དེ་གཉིས་གང་ཡང་མ་ཡིན་པ་ཡིན་ཀྱང་དེ་གཉིས་གང་རུང་མ་ཡིན་པའི་ཕུང་སུམ་པ་མ་ཡིན་པའི་ཕྱིར། དེར་ཐལ། དེ་གཉིས་གང་རུང་མ་ཡིན་པའི་ཆོས་མི་སྲིད་པའི་ཕྱིར་རོ།། །།