བཞི་བ་བསྲུངས་པའི་ཕན་ཡོན།

བཞི་བ་བསྲུངས་པའི་ཕན་ཡོན་ནི།

རྩ་བ་དང་ཡན་ལག་གི་ཉེས་པས་མ་གོས་པའམ། གོས་ཀྱང་ཕྱིར་བཅོས་ཚུལ་བཞིན་དུ་བྱས་ནས་དམ་ཚིག་དང་སྡོམ་པ་དག་བསྲུང་ན། ཚེ་འདིར་མཆོག་སངས་རྒྱས་ཀྱི་གོ་འཕང་ངམ། ལས་རབ་འབྱམས་འགྲུབ་པ་དང༌། ལམ་སྒོམ་པའི་བརྩོན་པ་དང་ལྡན་པས་ཤི་འཕོས་ན་སྐྱེ་བ་བདུན་དང༌། ལམ་སྒོམ་པའི་བརྩོན་པ་དང་མི་ལྡན་ཡང་སྐྱེ་བ་བཅུ་དྲུག་ཚུན་ཆད་ལ་མཆོག་སངས་རྒྱས་ཀྱི་གོ་འཕང་ཐོབ་པར་གསུངས་སོ། །ཡང་སྐབས་འདིར་ཤེས་དགོས་པ་ནི། ཇི་སྐད་དུ། མཚམས་ལ་གཅེས་པའི་སྤང་བླང་ནི། །བོད་ལ་མཚམས་སྒྲུབ་མང་ན་ཡང༌། །རྟགས་དང་ཡོན་ཏན་ཚུལ་བཞིན་དུ། །མི་འབྱུང་མཚམས་གསུམ་རལ་བའི་སྐྱོན། །སྐུ་མཚམས་མ་གྲོལ་གཞན་དང་ཕྲད། །གསུང་མཚམས་མ་གྲོལ་ངག་བཅད་ཤོར། །ཐུགས་མཚམས་མ་གྲོལ་ཉོན་མོངས་དྲག །དམ་ཚིག་ཉམས་པ་རྣམ་གསུམ་ནི། །བསྐྱེད་པའི་སྐུ་ནི་མི་གསལ་ཞིང༌། །བཟླས་པའི་ངག་ནི་མ་དག་དང༌། །བསྒོམས་པའི་ཏིང་འཛིན་བྱིང་བའོ། །བསྲུང་བྱ་རྣམ་གསུམ་ཉམས་པ་ནི། །ལུས་བཅུད་ཁམས་ཀྱི་དྭངས་མ་ཉམས། །ངག་བཅུད་ཁ་རླངས་མཆིལ་མ་དོར། །ཡིད་བཅུད་རྣམ་རྟོག་རྒྱུན་མ་བཅད། །དེ་དག་གསུམ་ཚན་གསུམ་པོ་ནི། །རྩ་བའི་ཉེས་པ་རྣམ་དགུའོ། །ཡན་ལག་ཉེས་པ་བཅུ་གསུམ་ནི། །སྒྲུབ་པ་པོ་ཡིས་བསྲུང་དགོས་པས། །མཚམས་མ་གྲོལ་བར་གནས་མི་སྤོ། །གདན་དང་གདིང་བ་མི་སྤྲུག་གོ །གཞན་དང་ཁ་ཕོར་མི་བསྲེ་ཞིང༌། །གཏོར་མ་དུས་ལས་མ་ཡོལ་འབུལ། །འཐབ་དང་འཁོན་འཛིན་མི་བྱ་ཞིང༌། །སྒྲུབ་ཁང་གཏོར་ཕུད་ཉམས་མི་འཇུག །ཁྱི་དང་མཛེ་བོ་ཤན་པ་གསུམ། །སྒྲུབ་ཁང་ནང་དུ་མི་འཇུག་ཅིང༌། །ཉམས་གྲིབ་ཅན་གྱི་ཟས་ལ་འཛེམ། །སྨ་ར་ཨག་ཚོམ་མི་བྲག་གོ །རང་གི་མལ་དུ་གཞན་མི་གཏང༌། །ཕྲེང་སོགས་གཞན་གྱི་ལག་མི་འགྲེམ། །མདའ་གཞུ་མཚོན་རྩེ་མི་རེག་ཅིང༌། །མཚོན་རྩེ་ཁ་ལ་མི་འཇུག་པ། །དེ་དག་བཅུ་བཞི་བསྲུང་དགོས་སོ། །ཞེས་གསུངས་པ་ལྟར་ཤེས་པར་བྱའོ། །བསམ་པའི་ཁྱད་པར་ངེས་འབྱུང་གི་བསམ་པ་དང༌། བྱང་ཆུབ་སེམས་བསྐྱེད། ཡང་དག་པའི་ལྟ་བ་བཅོས་མ་ཚུད་ཆད་ཀྱིས་རྒྱུན་དུ་ཟིན་པ་གལ་ཆེ་བའོ། །

སྨྲས་པ། རྒྱལ་བསྟན་གཞིར་གྱུར་རྣ༷མ་ད༷ག་ཚུལ་ཁྲིམས་ཀྱི། །གཙོ་བོ་སྡོམ་གསུམ་རྣ༷མ་ད༷ག་ལེན་པའི་ཐབས། །བསྲུང་བའི་ཐབས་ཚུལ་རྣ༷མ་ད༷ག་ཕྲ་ཞིབ་དང༌། །ཉམས་ན་ཕྱིར་བཅོས་བྱེད་ཚུལ་ཕན་ཡོན་བཅས། །ཚངས་པའི་མགུར་ནས་ཇི་སྐད་བཀའ་བསྩལ་བཞིན། །མ་འདྲེས་གསལ་བའི་ངག་གིས་ལེགས་པར་བཀོད། །རྣམ་དཀར་ཆོས་ལྡན་བརྩོན་པའི་ཐར་འདོད་རྣམས། །གཞུང་འདིར་འཇུག་ནས་སྒོ་གསུམ་བྱི་དོར་གྱིས། །ཀྱེ་མ་ཚེ་འདིའི་སྣང་བས་རབ་བསླུས་ནས། །ཕྱི་མའི་སྡུག་བསྔལ་དྲག་པོའི་རྒྱུ་བསྒྲུབས་སྟེ། །སྐོམ་པ་སེལ་སླད་ལན་ཚ་འཐུང་བ་ལྟར། །འགྱུར་ཕྱིར་སྡོམ་གསུམ་རྒྱུན་དུ་བསྲུང་བར་གྱིས། །དེང་དུས་བཤད་སྒྲུབ་བསྟན་པ་ཡལ་བོར་ཏེ། །བྱ་བ་ལས་ཀྱི་འཁོར་ལོའི་མིང་བཏགས་ནས། །ཆགས་སྡང་སྙན་གྲགས་ཆོས་བརྒྱད་སྨག་རུམ་གྱིས། །སྡོམ་གསུམ་བསླབ་བྱ་མཚན་མོའི་གཟུགས་ཇི་བཞིན། །དེ་ཕྱིར་སྐྱབས་འགྲོ་སྡོམ་གསུམ་བསླབ་བྱ་རྣམས། །དྲན་ཤེས་བག་ཡོད་བརྟན་པོས་སྲུངས་ཤིག་དང༌། །གཏན་བདེའི་ཐར་བའི་ཡིད་བཞིན་དབང་གི་རྒྱལ། །མྱུར་དུ་ཐོབ་པར་འགྱུར་ཞེས་རྒྱལ་བས་གསུངས། །སྡོམ་གསུམ་བསླབ་བྱ་ཞིབ་ཅིང་ཕྲ་བ་རྣམས། །བདག་བློ་སྦྱང་བ་དམན་དང་བློ་གྲོས་ཕྲ། །དེ་བས་མ་བཤད་ལོག་བཤད་ཉེས་མཆིས་ན། །ཐམས་ཅད་མཁྱེན་པ་རྣམས་ལ་སྙིང་ནས་བཤགས། །འདིར་འབད་ལེགས་ཚོགས་བདུ༷ད་རྩི༷འི་ཆུ༷་གཏེ༷ར་ཆེ། །རྒྱལ་བའི་རྣམ་དཀར་མཚོ་ཆེན་དང་འདྲེས་ནས། །ལྷག་བསླབ་རིན་ཆེན་གཏེར་གྱི་སྒོ་འབྱེད་ཅིང༌། །ཁྲིམས་ལྡན་ཀླུ་དབང་ཚོགས་ཀྱིས་རོལ་བར་སྨོན། །ཞེས་སྡོམ་གསུམ་གྱི་བསླབ་བྱ་དྭངས་གསལ་བདུད་རྩིའི་ཆུ་གཏེར་ཞེས་བྱ་བ་འདི་ནི་སྤྲུལ་རྡོ་རྗེ་དགྲ་འདུལ་གྱི་འབྲི་གཞིའི་ཤོག་གུ་དང་དར་བཅས་བཀས་བསྐུལ་བ་དང༌། སློབ་བུ་འགའ་ཞིག་ལ་ཕན་ཕྱིར་དང་རང་གི་བློ་སྦྱང་བའི་ཆེད་དུ་བཙུན་པ་ངག་དབང་དངོས་གྲུབ་དཔལ་ནས་རབ་གནས་མེ་ཁྱི་ལོའི་རྒྱལ་ཟླའི་ཚེས་ཉེར་དྲུག་ལ་དབུ་བཟུང་ནས་མེ་ཕག་ལོའི་མཆུ་ཟླ་བའི་ཚེས་དྲུག་གི་བར་ཏེ་ཉིན་བཅུ་གཅིག་གི་རིང་ལ་རྫོགས་པར་བྲིས་པའོ། །འདིས་ཀྱང་རྒྱལ་བསྟན་ཕྱོགས་དུས་ཀུན་ཏུ་རྒྱས་པར་གྱུར་ཅིག ། །སརྦ་མངྒ་ལམ།།།།