བསྟན་བཅོས་ཀྱི་སྐོར།
གཉིས་པ་བསྟན་བཅོས་ཀྱི་སྐོར་ལ་གསུམ་སྟེ། བཀའ་བྱེ་བྲག་གི་དགོངས་པ་གསལ་བར་བྱེད་པ་དང་། སྤྱིའི་དགོངས་པ་གསལ་བར་བྱེད་པ་དང་། ཐོར་བུ་བ་ལུགས་ཀྱི་བསྟན་བཅོས་ལ་སོགས་པའོ། །
དང་པོ་ལ་གསུམ་ལས། དང་པོ་བདེན་པ་བཞིའི་ཆོས་ཀྱི་འཁོར་ལོའི་དགོངས་འགྲེལ་ནི། ལུང་གཞིའི་རྒྱ་ཆེར་འགྲེལ་སློབ་དཔོན་དགེ་ལེགས་བཤེས་གཉེན་གྱིས་མཛད་པ་བསྒྱུར་འཕྲོ་བམ་པོ་བཅུ་གཅིག །རྣམ་འབྱེད་ཀྱི་འགྲེལ་པ་སློབ་དཔོན་དུལ་བའི་ལྷས་མཛད་པ་བམ་པོ་བཅོ་ལྔ་ཀླུའི་རྒྱལ་མཚན་གྱི་འགྱུར། གཞུང་བླ་མའི་བྱེ་བྲག་ལུང་ཞུ་བ་མ་རྫོགས་པའི་འགྲེལ་པ་མདོ་སྡེ་འཛིན་པ་དགེ་བའི་བཤེས་གཉེན་གྱིས་མཛད་པ་བསྒྱུར་འཕྲོ་ཕྲན་ཚེགས་སྒོ་བརྒྱད་པ་ཡན་ཆད་རྫོགས་པའི་འགྲེལ་པ་སློབ་དཔོན་ཚུལ་ཁྲིམས་བསྐྱངས་ཀྱིས་མཛད་པ་བམ་པོ་བཅུ་དགེ་བའི་བློ་གྲོས་ཀྱི་འགྱུར། སོ་སོ་ཐར་པའི་འགྲེལ་པ་སློབ་དཔོན་ཁྱད་པར་བཤེས་གཉེན་གྱིས་མཛད་པའི་འདུལ་བ་བསྡུས་པ་བམ་པོ་བཅོ་ལྔ། བཻ་རོ་ཙ་ན་དང་རྒྱལ་བའི་ཤེས་རབ་དང་ཤཱཀྱ་བཤེས་གཉེན་གྱི་འགྱུར། སོ་སོ་ཐར་པའི་གཞུང་འགྲེལ་བམ་པོ་ཉི་ཤུ་རྩ་བདུན་པ་སློབ་དཔོན་དཔའ་བོས་མཛད་པར་གྲགས་པ་ཀླུའི་རྒྱལ་མཚན་གྱི་འགྱུར། སློབ་དགོན་དྲི་མེད་བཤེས་གཉེན་གྱིས་མཛད་པའི་སོ་སོར་ཐར་པའི་རྒྱ་ཆེར་འགྲེལ་པ་འདུལ་བ་ཀུན་ལས་བཏུས་པ་བམ་པོ་ལྔ་བཅུ་པར་གྲགས་པ་ཀླུའི་རྒྱལ་མཚན་གྱི་འགྱུར། འདུལ་བ་བྱ་བའི་ཕུང་པོ་སོ་སོ་ཐར་པའི་འགྲེལ་པ་མི་བརྗེད་པའི་དྲན་པ། ཡང་སོ་སོར་ཐར་པའི་འགྲེལ་པ་བམ་པོ་བདུན། སོ་སོར་ཐར་པའི་འགྲེལ་པ་ཚིག་གི་བརྗེད་བྱང་དཱ་ན་ཤཱི་ལ་ཆེན་པོས་བྱས་པར་གྲགས་པ་བན་པོ་གཉིས་ཀླུའི་རྒྱལ་མཚན་གྱི་འགྱུར། སོ་སོར་ཐར་པའི་འགྲེལ་པ་ཚིག་གི་དགའ་སྐྱེད་མ་འདི་བསྟན་འགྱུར་དུ་མ་ཆུད། སོ་སོར་ཐར་པའི་རྒྱ་ཆེར་འགྲེལ་པ་ཆེན་པོ་བམ་པོ་བརྒྱ་རྩ་བཅུ་གཉིས་པ་དིང་སང་མ་རྙེད་དོ། །དགེ་སློང་མའི་སོ་སོར་ཐར་པའི་འགྲེལ་པ་བམ་པོ་གཉིས། ཡང་དགེ་སློང་མའི་སོ་ཐར་གྱི་འགྲེལ་པ། སློབ་དཔོན་ཡོན་ཏན་འོད་ཀྱིས་མཛད་པའི་འདུལ་བ་མདོ་རྩ་བམ་པོ་དགུ་པ་དང་། ལས་བརྒྱ་རྩ་གཅིག་པ་ཤུ་ལོ་ཀ་སུམ་སྟོང་དྲུག་བརྒྱ་བམ་པོ་བཅུ་གཉིས་པ་ཀླུའི་རྒྱལ་མཚན་གྱི་འགྱུར། མདོའི་འགྲེལ་པ་ཉིད་ཀྱི་རྣམ་བཤད་ཚུལ་ཁྲིམས་འབྱུང་གནས་ཀྱི་འགྱུར། མདོའི་རྒྱ་ཆེར་འགྲེལ་པ་བམ་པོ་བདུན་ཅུ་པ་ཆོས་ཀྱི་བཤེས་གཉེན་གྱིས་མཛད་པ་ཀླུའི་རྒྱལ་མཚན་གྱི་འགྱུར། འདུལ་བའི་མདོའི་འགྲེལ་ཆུང་སློབ་དཔོན་ཡོན་ཏན་འོད་ཀྱིས་མཛད་ཟེར་བ་འདི་ཐེ་ཚོམ་གྱི་གཞི་ཡིན། འདུལ་བའི་མདོའི་འགྲེལ་པ་སློབ་དཔོན་ཤེས་རབ་བྱེད་ཀྱིས་མཛད་པ། དགྲ་བཅོམ་པ་ས་གའི་ལྷས་མཛད་པ་འདུལ་བ་མེ་ཏོག་ཕྲེང་བརྒྱུད་བམ་པོ་དྲུག་བྱམས་པའི་དཔལ་གྱི་འགྱུར། སློབ་དཔོན་མདོ་སྡེ་འཛིན་པ་དགེ་བའི་བཤེས་གཉེན་གྱིས་མཛད་པ་འདུལ་བའི་དྲི་བའི་ཚིག་ལེའུར་བྱས་པ་ཤུ་ལོ་ཀ་བརྒྱ། དེའི་འགྲེལ་པ་བམ་པོ་ལྔ་དང་ཤུ་ལོ་ཀ་བརྒྱ་དྲུག་ཅུ་རྩ་བཞི་པ་གཉིས། དཔལ་བརྩེགས་ཀྱི་འགྱུར། འདུལ་བ་ལ་བསྟོད་པ་དགྲ་བཅོམ་པ་ཆོས་ཀྱི་ཚོང་དཔོན་གྱིས་མཛད་པ་དང་། དེའི་འགྲེལ་པ་སློབ་དཔོན་དུལ་བའི་ལྷས་མཛད་པ་གཉིས་ཀླུའི་རྒྱལ་མཚན་གྱི་འགྱུར། སློབ་དཔོན་ཤཱཀྱ་འོད་ཀྱིས་མཛད་པའི་དགེ་ཚུལ་གྱི་ཚིག་ལེའུར་བྱས་པ་སུམ་བརྒྱ་པ་དང་། དེའི་རང་འགྲེལ་འོད་ལྡན་བམ་པོ་བརྒྱད་པ་གཉིས། ལྷའི་དབང་པོ་བསྲུང་བའི་འགྱུར། སློབ་དཔོན་དུལ་བའི་ལྷས་མཛད་པའི་སློབ་མ་ལ་ཕན་པ་དགེ་ཚུལ་གྱི་ཚིག་ལེའུར་བྱས་པ་ལྔ་བཅུ་པ་ཡེ་ཤེས་སྡེའི་འགྱུར། དེའི་འགྲེལ་པ་ཀ་མ་ལ་ཤཱི་ལས་མཛད་པའི་དོན་བརྒྱད་མ་དགེ་ཚུལ་གྱི་བྱ་བ། སྡེ་པ་ཐ་དད་བཀླག་པའི་འཁོར་ལོ་བཙུན་པ་དབྱིག་བཤེས་ཀྱིས་མཛད་པ་ལས་བཏུས་པ། སློབ་དཔོན་དུལ་བ་ལྷས་མཛད་པ་ཤུ་ལོ་ཀ་དྲུག་ཅུ་རྩ་ལྔ། སློབ་དཔོན་བྷ་བྱས་མཛད་པའི་སྡེ་པ་ཐ་དད་པ་རྣམ་པར་བཤད་པ་ཤུ་ལོ་ཀ་བདུན་ཅུ་རྩ་ལྷག་ནག་ཚོའི་འགྱུར། སློབ་དཔོན་པདྨ་འབྱུང་གནས་ཀྱིས་མཛད་པའི་དགེ་ཚུལ་གྱི་དང་པོའི་ལོ་དྲི་བ་རྒྱལ་བ་ཤེས་རབ་ཀྱི་འགྱུར། དགེ་སློང་གི་དང་པོའི་ལོ་དྲི་བ་ནག་ཚོའི་འགྱུར། མདོ་སྡེ་འཛིན་པ་དགེ་བའི་བཤེས་གཉེན་གྱིས་མཛད་པ་དགེ་ཚུལ་གྱི་བསླབ་པའི་གཞི་མདོ་གཞོན་ནུ་མཆོག་གི་འགྱུར། པཎྜི་ཏ་སུ་ནྱ་ཤྲཱིས་མཛད་པ་དགེ་བསྙེན་གྱི་སྡོམ་པ་བརྒྱད་པ་རྩ་འགྲེལ་དར་མ་གྲགས་ཀྱི་འགྱུར། གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ་ཁ་ཆེ་བི་མ་ལ་ཤྲཱི་བྷ་དྲས་མཛད་པ་གཞོན་ནུ་མཆོག་གི་འགྱུར། ཆེད་དུ་བརྗོད་པའི་ཚོགས་ཀྱི་འགྲེལ་པ་སློབ་དཔོན་ཤེས་རབ་གོ་ཆས་མཛད་པ་ཤཱཀྱ་བློ་གྲོས་ཀྱི་འགྱུར། སློབ་དཔོན་དབྱིག་གཉེན་གྱིས་མཛད་པའི་ཚིགས་སུ་བཅད་པ་བསྡུས་པ་རྩ་འགྲེལ་ཡེ་ཤེས་སྙིང་པོ་དང་དཔལ་བརྩེགས་ཀྱི་འགྱུར། སློབ་དཔོན་ཀླུ་སྒྲུབ་ཀྱིས་མཛད་པའི་ཆོས་ཀྱི་སྙིང་པོའི་འགྲེལ་པ་དཔལ་བརྩེགས་ཀྱི་འགྱུར། འཇིག་རྟེན་གདགས་པ་བམ་པོ་བདུན། རྒྱུ་གདགས་པ་བམ་པོ་བདུན། ལས་གདགས་པ་བམ་པོ་ལྔ། དེ་རྣམས་ཡེ་ཤེས་སྡེའི་འགྱུར། འདི་དག་བྱེ་བྲག་ཏུ་སྨྲ་བས་བཀར་འདོད་ལ། དཀར་ཆག་ཆེན་མོ་དག་ཏུ་ཡང་བཀར་བཤད་མོད་ཀྱི། མདོ་སྡེ་པ་ལ་སོགས་པས་བསྟན་བཅོས་སུ་འདོད་པ་བཞིན་གནས་སོ། །སློབ་དཔོན་དབྱིག་གཉེན་གྱིས་མཛད་པའི་ཆོས་མངོན་པ་མཛོད་ཀྱི་ཚིག་ལེའུར་བྱས་པ་བམ་པོ་གཉིས་པ་དང་། དེའི་རང་འགྲེལ་བམ་པོ་སུམ་ཅུ་པ་གཉིས་དཔལ་བརྩེགས་ཀྱི་འགྱུར། དེའི་འགྲེལ་བཤད་དོན་གསལ་བ་བམ་པོ་དྲུག་ཅུ་པ་སློབ་དཔོན་རྒྱལ་པོའི་སྲས་གྲགས་པའི་བཤེས་གཉེན་གྱིས་མཛད་པ་དཔལ་བརྩེགས་ཀྱི་འགྱུར། སློབ་དཔོན་གང་བ་སྤེལ་གྱིས་མཛད་པའི་མངོན་པ་མཛད་ཀྱི་འགྲེལ་བཤད་མཚན་ཉིད་ཀྱི་རྗེས་སུ་འབྲང་བམ་པོ་དྲུག་ཅུ་པ་ཚབ་ཀྱི་འགྱུར། བལ་པོ་ཞི་གནས་ལྷས་མཛད་པའི་ཆོས་མངོན་པའི་མཛོད་ལ་ཉེ་བར་མཁོ་བ་ཞེས་བྱ་ད་མདོ་དང་སྦྱར་བའི་ཊཱི་ཀ་བལ་པོ་ཤེས་རབ་འོད་ཟེར་གྱི་འགྱུར། སློབ་དཔོན་འདུས་བཟང་གིས་མཛད་བ་ཆོས་མངོན་པ་མཛོད་ཀྱི་འགྲེལ་པ་མདོ་དང་མཐུན་པ་བམ་པོ་བཅོ་ལྔ། སློབ་དཔོན་ཕྱོགས་གླང་གིས་མཛད་པའི་མཛད་ཀྱི་འགྲེལ་པ་གནད་ཀྱི་སྒྲོན་མ་འཇམ་དཔལ་གཞོན་ནུའི་འགྱུར་ཏེ། ཐེག་ཆུང་གི་བསྟན་བཅོས་ལྔ་བཅུའོ། །འདིར་སློབ་དཔོན་ཤནྟི་སོ་མས་མཛད་པའི་མཛོད་འགྲེལ་བམ་པོ་བཅུ་བཞི། མཛོད་གྱི་ཐབས་བསྡུས་པ་བམ་པོ་བཅུ། ཆོས་མངོན་པ་ལ་འཇུག་པ་བམ་པོ་གཉིས་དང་ཤུ་ལོ་ཀ་ལྔ་བཅུ། དེའི་རྒྱ་ཆེར་འགྲེལ་པ་བམ་པོ་ལྔ། མཁན་པོ་བོ་དྷི་ས་ཏྭས་མཛད་པའི་དགེ་སློབ་གི་ཚུལ་ཤུ་ལོ་ཀ་ལྔ་བཅུ། སློབ་དཔོན་དབྱིག་གཉེན་གྱིས་མཛད་པའི་གཞུང་ལུགས་ཀྱི་བྱེ་བྲག་བཀོད་པའི་འཁོར་ལོ་ཤུ་ལོ་ཀ། དེ་རྣམས་བཙལ་བར་བྱའོ། །