དང་པོ། ཉམས་སུ་ལེན་པ་སྤྱིའི་ཆིངས།
༄༅། །ཟབ་མོ་ཡང་ཏིག་ལས། སྙིང་པོའི་ཡང་བཅུད་བཞུགས་སོ། །
༄༅། སྙིང་པོའི་ཡང་བཅུད་ཅེས་བྱ་བ། དཔལ་ཀུན་ཏུ་བཟངཔོ་ལ་ཕྱག་འཚལ་ལོ། །ལེགས་པའི་ཡོན་ཏན་མ་ལུས་མཐར་ཕྱིན་པ། །དུས་གསུམ་རྒྱལ་བ་རིག་འཛིན་མཁའ་འགྲོར་བཅས། །བླ་མ་དམ་པའི་ཞབས་ལ་ཕྱག་འཚལ་ཏེ། །སྙིང་པོའི་ཡང་བཅུད་གནད་ཀྱི་མན་ངག་བྲི། །
དེ་ལ་ཉམས་སུ་ལེན་པ་སྤྱིའི་ཆིངས། བྱེ་བྲག་གི་ཆིངས། བླ་ན་མེད་པའི་ཆིངས་དང་གསུམ་ལས། དང་པོ་ནི། མངོན་སུམ་གནད་ཀྱི་མན་ངག་ཐོབ་ནས། རབ་ཏུ་དབེན་པའི་གནས་སུ་སྒྲུབ་པ་ལ་རྩེ་གཅིག་ཏུ་ཞུགས་པ་ན། ཐོག་མར་གནད་གསུམ་གཅུན་ནས་རིག་པ་རྟེན་དང་ཕྲལ་བར་བྱ་སྟེ། ལུས་ཀྱི་གནད་བཞུགས་སྟངས་གཅུན་པས་རིག་པ་ཡུལ་དང་ཕྲལ། ངག་གི་གནད་མི་སྨྲ་བར་གཅུན་པས་བརྗོད་དུ་མེད་པའི་དོན་ཁོང་དུ་ཆུད། ཡིད་ཀྱི་གནད་དྲན་བསམ་འཕྲོ་འདུ་གཅུན་པས་གང་བསམ་བསམ་གཏན་དུ་འགྱུར་རོ། །དེ་ནས་ལུས་ངག་ཡིད་གསུམ་རུ་ཤན་འབྱེད་པའི་སྤྱོད་པ་ཟླ་བ་ཕྱེད་དུ་སྦྱངས་པས་སྒོ་གསུམ་གྱི་ཞེན་པ་ཆོད་དེ། འཁོར་བར་མི་འཇུག་ཅིང་སྒྲུབ་པ་ངང་གིས་འཕེལ་བའི་གནད་དོ། །འདི་ཉིད་སྐབས་སུ་སྦྱངས་པས་བོགས་འབྱིན་གྱི་མཆོག་ཏུ་འགྱུར་རོ། །