དེ་ལ་རྩོད་པ་སྤོང་བ།

གསུམ་པ་དེ་ལ་རྩོད་པ་སྤོང་བ་ལ། རྩོད་པ་འགོད་པ་དང༌། དེའི་ལན་དང་གཉིས། དང་པོ་ནི། རྩ་བར། གལ་ཏེ་དོན་དམ་ཤེས་པ་ཡིན་ན་ནི། །འདུས་བྱས་མི་རྟག་པར་ཡང་འགྱུར་ཞེ་ན། །ཞེས་བྱུང༌། དེའི་དོན་ནི་གསུམ་ལྡན་མར་བཅད་རྣམས་ཀྱིས་གལ༵་ཏེ༵་དོ༵ན་དམ༵་ཤེས༵་པ༵་ཡི༵ན་ན༵་ནི༵། འདུ༵ས་བྱས༵་ཡིན་པར་འགྱུར་ཞིང་མི༵་རྟག༵་པ་ཡིན་པ༵ར་ཡ༷ང་འགྱུ༵ར་རོ་ཞེ༵་ན༵་ཞེས་རྩོད་པ་ཡིན་ནོ། །གཉིས་པ་དེའི་ལན་ནི། གལ་ཏེ་དོན་དམ་ཤེས་པ་ཡིན་ན་ནི། །འདུས་བྱས་མི་རྟག་པར་ཡང་འགྱུར་ཞེ་ན། །དེ་འདྲ་གསུམ་ལྡན་མར་བཅད་ལུགས་ཡིན་གྱི། །རྫོགས་ལྡན་ཆོས་མཆོག་ཁྱད་འཕགས་ལུགས་ལ་ནི། །ཤེས་པ་ལ་ཡང་འདུས་བྱས་འདུས་མ་བྱས། །ཡེ་ཤེས་ལ་ཡང་འདུས་བྱས་འདུས་མ་བྱས། །དཀོན་མཆོག་གསུམ་སོགས་ཀུན་ལའང་བདེན་གཉིས་དང༌། །འདུས་བྱས་འདུས་མ་བྱས་སུ་ཕྱེ་ནས་གསུངས། །མི་རྟག་པ་དང་རྟག་པར་ཕྱེ་ནས་གསུངས། །རང་སྟོང་གཞན་སྟོང་ལེགས་པར་ཕྱེ་ནས་གསུངས། །རྣམ་ཤེས་ཡེ་ཤེས་ལེགས་པར་ཕྱེ་ནས་གསུངས། །གཞན་བྱུང་རང་བྱུང་ལེགས་པར་ཕྱེ་ནས་གསུངས། །ཆོས་དང་ཆོས་ཉིད་མཐའ་དབུས་ཕྱེ་ནས་གསུངས། །བཅོས་མ་རང་བཞིན་ལེགས་པར་ཕྱེ་ནས་གསུངས། །གློ་བུར་གཉུག་མ་ལེགས་པར་ཕྱེ་ནས་གསུངས། །ཀུན་བརྟགས་ཡོངས་གྲུབ་ལེགས་པར་ཕྱེ་ནས་གསུངས། །རྗེས་ཐོབ་མཉམ་བཞག་ལེགས་པར་ཕྱེ་ནས་གསུངས། །ཤན་འབྱེད་ལ་ཟློ་ལེགས་པར་ཕྱེ་ནས་གསུངས། །དབྱེར་ཡོད་དབྱེར་མེད་ལེགས་པར་ཕྱེ་ནས་གསུངས། །འཁྲུལ་ལུགས་གཤིས་ལུགས་ལེགས་པར་ཕྱེ་ནས་གསུངས། །འདོད་ལུགས་ཡིན་ལུགས་ལེགས་པར་ཕྱེ་ནས་གསུངས། །སྲོལ་འབྱེད་སྲོལ་འགོག་ལེགས་པར་ཕྱེ་ནས་གསུངས། །ཕུང་གསུམ་ཡོད་མེད་ལེགས་པར་ཕྱེ་ནས་གསུངས། །དུས་བཞི་ཆེ་ཆུང་ལེགས་པར་ཕྱེ་ནས་གསུངས། །ཆུང་བ་ལ་ཡང་རྫོགས་ལྡན་ཆོས་མཆོག་དང༌། །གསུམ་ལྡན་མར་བཅད་དམན་པར་རབ་ཕྱེ་ནས། །དཔང་དུ་རུང་དང་མི་རུང་ཕྱེ་ནས་གསུངས། །ངོ་བོ་ཉིད་གསུམ་ལེགས་པར་ཕྱེ་ནས་གསུངས། །བདག་གསུམ་རྣམ་དབྱེ་ལེགས་པར་ཕྱེ་ནས་གསུངས། །སྟོང་ཉིད་གསུམ་གྱི་རྣམ་དབྱེ་ཕྱེ་ནས་གསུངས། །ཕྱི་ནང་གཞན་མཆོག་ལེགས་པར་ཕྱེ་ནས་གསུངས། །བདེན་བཞི་ཆོས་བཞི་ཆོས་ལྔ་ལ་སོགས་པ། །ལེགས་པར་ཕྱེ་བའི་ཆོས་འཁོར་གསུངས་པ་ལྟར། །རྫོགས་ལྡན་ཆོས་མཆོག་རྣམས་ལ་གོམས་བྱས་ན། །མཚུངས་པ་མེད་པའི་མཁས་པ་ཆེན་པོར་འགྱུར། །རྒྱལ་བ་སྲས་བཅས་ཐམས་ཅད་དགྱེས་པར་འགྱུར། །རྒྱལ་བའི་གོ་འཕང་མྱུར་དུ་ཐོབ་པར་འགྱུར། །རྩ་བར། དེ་འདྲ་གསུམ་ལྡན་མར་བཅད་ལུགས་ཡིན་གྱི། །ཞེས་པ་ནས། མྱུར་དུ་ཐོབ་པར་འགྱུར། ཞེས་པའི་བར་ཤོ་ལོ་ཀ་བརྒྱད་དང་རྐང་བ་གསུམ་བྱུང༌། དེའི་ཚིག་དོན་ནི་ཤེས་པ་ཡིན་ན་འདུས་བྱས་སོགས་ཡིན་པས་ཁྱབ་པ་ཡོད་པ་དེ༵་འདྲ༵་འདོད་པ་ནི། གསུ༵མ་ལྡན༵་མར༵་བཅད༵་སྐྱོན་ཅན་རྣམས་ཀྱི་ལུག༵ས་ཡི༵ན་གྱི༵་རྫོག༵ས་ལྡན༵་ཆོས༵་མཆོ༵ག་ཁྱ༵ད་པར་དུ་འཕག༵ས་པའི་ལུག༵ས་ལ༵་ནི༵། འདུས་མ་བྱས་དང་རྟག་པ་ཡིན་པའི་ཤེས་པ་དང་རིག་པ་དང་ཡེ་ཤེས་དང་རང་རིག་དང་བདེ་བ་དང་འདོད་ཆགས་ཆེན་པོ་དང་དགའ་བ་ཆེན་པོ་མགུ་བ་ཆེ་ལ་སོགས་པ་ཤིན་ཏུ་མང་བར་བཤད་ཅིང་འཆད་པར་ཡང་འགྱུར་རོ། །དེས་ན་འདིར་ནི་ཤེས༵་པ༵་ལ༵་ཡང༵་འདུས༵་བྱ༵ས་འདུས༵་མ༵་བྱ༵ས་གཉིས་ཕྱེ་བ་དང༌། ཡེ༵་ཤེས༵་ལ་༵ཡང༵་འདུ༵ས་བྱ༵ས་འདུ༵ས་མ༵་བྱ༵ས་གཉིས་ཕྱེ་བ་དང༌། དཀོ༵ན་མཆོ༵ག་གསུམ༵་དང་སོག༵ས་སྒྲས་བསྡུས་པ་བདེན་བཞི་ཕྱིན་དྲུག་སོགས་ཀུ༵ན་ལ༵འང༵་ཀུན་རྫོབ་བདེན་པ་དང༌། དོན་དམ་བདེ༵ན་པ་གཉི༵ས་གཉི༵ས་དང༵༌། འདུ༵ས་བྱ༵ས་འདུ༵ས་མ༵་བྱ༵ས་སུ༵་ལེགས་པར་ཕྱེ༵་ན༵ས་གསུ༵ངས་པ་དང༌། མི༵་རྟག༵་པ༵་དང༵་རྟག༵་པའི་ཁྱད་པ༵ར་ཕྱེ༵་ནས༵་གསུང༵ས་པ་དང༌། རང༵་སྟོང༵་གཞན༵་སྟོང༵་ལེགས༵་པར༵་ཕྱེ༵་ནས༵་གསུ༵ངས་པ་དང༌། ཀུན་རྫོབ་ཀྱི་རྣམ༵་ཤེས༵་དང་དོན་དམ་གྱི་ཡེ༵་ཤེས༵་ལེག༵ས་པར༵་ཕྱེ༵་ནས༵་གསུང༵ས་པ་དང༌། རྒྱུ་རྐྱེན་གཞན༵་ལས་བྱུང༵་བ་དང༌། གདོད་ནས་རང༵་བྱུང༵་གཉིས་ལེག༵ས་པར༵་ཕྱེ༵ས་ན༵ས་གསུང༵ས་པ་དང༌། ཆོས༵་ཅན་ཀུན་རྫོབ་དང༵་ཆོས༵་ཉི༵ད་དོན་དམ་བདེན་པ་གཉིས་ཕྱེ་བ་དང༌། སྤྲོས་པའི་མཐ༵འ་དང༌། མཐའ་དང་བྲལ་བའི་དབུ༵ས་གཉིས་ལེགས་པར་ཕྱེ༵་ནས༵་གསུང༵ས་པ་དང༌། བཅོས༵་མ༵་དང་ར༵ང་བཞི༵ན་ལེ༵གས་པ༵ར་ཕྱེ༵་ན༵ས་གསུ༵ངས་པ་དང༌། ཀུན་རྫོབ་གློ༵་བུ༵ར་བ་དང་རང་བཞིན་གཉུག༵་མ༵་ལེགས༵་པར༵་ཕྱེ༵་ནས༵་གསུང༵ས་པ་དང༌། ཀུན༵་བཏགས༵་ཀྱི་མཚན་ཉིད་དང་ཡོང༵ས་གྲུ༵བ་ཀྱི་མཚན་ཉིད་ལེག༵ས་པར༵་ཕྱེ༵་ནས་གསུང༵ས་པ་དང༌། འདིའི་ཀུན་བཏགས་ཞེས་པས་གཞན་དབང་ཡང་ཀུན་བཏགས་ཀྱི་ནང་དུ་བསྡུས་ནས་བསྟན་པ་ཡིན་ལ། གཞན་དབང་ཀུན་བཏགས་ནང་དུ་འདུས་ཚུལ་ནི། ཐེག་མཆོག་དབུ་མ་ལས། རྣམ་པར་དཔྱད་ན་གཞན་དབང་ཀུན་བཏགས་སུ། །འདུས་ཕྱིར་མཚན་ཉིད་གཉིས་སུ་འགྱུར་བ་ཡིན། །གཞན་དབང་གི་ནི་སྣང་ཆ་ཀུན་བཏགས་ཏེ། །ཞེས་དང༌། དོན་ལ་སྣང་ཆ་ལས་གཞན་སྣང་བ་མེད། །གཞན་དབང་ལ་ནི་རང་ངོའི་ཚུགས་ཐུབ་བྲལ། །ཞེས་གསུངས་པ་དང༌། མདོ་ལང་གཤེགས་ལས། གང་བཏགས་པ་ཡི་དངོས་པོ་འདི། །གཞན་གྱི་དབང་ཡང་དེ་ཉིད་དེ། །བཏགས་པ་སྣ་ཚོགས་སྣང་བ་ནི། །གཞན་གྱི་དབང་ཞེས་རྟོག་པར་བྱེད། །ཅེས་གསུངས་པའི་ཕྱིར་དང༌། དབྱིག་གཉེན་གྱི་ཡུམ་གསུམ་གནོད་འཇོམས་ལས་ཀྱང་ཆོས་ཐམས་ཅད་མཚན་ཉིད་གཉིས་སུ་བསྡུས་པར་བསྟན་པ་སྤྱི་འགྲེལ་གྱི་རྣམ་བཤད་ལས་གསུངས་སོ། །རྗེ༵ས་ཐོབ༵་ཡེ་ཤེས་དང་སྤྲོས་བྲལ་རྣམ་པར་མི་རྟོག་པའི་མཉམ༵་བཞག༵་ལེགས༵་པར༷་ཕྱེ༵་ནས༵་གསུང༵ས་པ་དང༌། རྗེས་ཐོབ་ཤན༵་འབྱེད༵་སྐབས་དང་མཉམ་བཞག་ལ༵་ཟློ༵་བའི་སྐབས་གཉིས་ལེ༵གས་པ༵ར་ཕྱེ༵་ན༵ས་གསུ༵ངས་པའི་ཕྱིར། ཤན་འབྱེད་དང་ལ་ཟློ་བ་ཕྱེ་ཚུལ་ནི། རི་ཆོས་ངེས་དོན་རྒྱ་མཚོ་ལས། དེའི་ཕྱིར་འཁོར་ལོ་ཕྱི་མ་གཉིས་དང་རྡོ་རྗེ་ཐེག་པའི་དོན་གཅིག་མོད་ཀྱི་ཉམས་སུ་ལེན་པ་ན་ལ་ཟློ་བ་ཆོས་ཉིད་ཟབ་མོ་ལ་འཁོར་ལོ་བར་བ་དང་མཐུན་པར་རྟོག་མེད་སྤྲོས་བྲལ་དུ་མཉམ་པར་བཞག་ནས་རྗེས་ཐོབ་དུ་ཤན་འབྱེད་པའི་ཚེ་ཆོས་རྣམས་ལ་ཡང་དག་པར་སོ་སོར་རྟོག་པ་ན་འཁོར་ལོ་ཐ་མ་དང་རྡོ་རྗེ་ཐེག་པ་ལས་གསུངས་པ་བཞིན་དུ་ལེགས་པར་རྣམ་པར་ཕྱེ་སྟེ་ངོ་སྤྲད་ན་ཐེག་པ་ཆེན་པོའི་གསུང་རབ་ཐམས་ཅད་ཀྱི་དོན་ཟབ་མོ་ཉམས་སུ་ལེན་པ་ཚང་ལ་མ་ནོར་ཞིང་ཡོངས་སུ་དག་པ་ཉིད་དུ་འགྱུར་རོ། །དེས་ན་འདིར་གནས་ལུགས་ལ་ཡོད་མེད་དང་རང་རང་གི་ངོ་བོས་སྟོང་མི་སྟོང་དང་རྣམ་གཅོད་ཡོངས་གཅོད་དང་མེད་དགག་མ་ཡིན་དགག་དང་སྤངས་པ་དང༌། རྟོགས་པ་ལ་སོགས་པ་གཤིས་ལ་ཅི་ལྟར་གནས་པ་བཞིན་དུ་ལེགས་པར་ཕྱེ་སྟེ། ཞེས་གསུངས་པ་དང༌། བཀའ་བསྡུ་བཞི་བའི་འགྲེལ་བ་ཕྱོགས་མེད་རིས་མེད་ལས། ལ་ཟློ་བའི་སྐབས་སུ་ནི་ཅིར་ཡང་མི་ལྟ་ཞིང་གང་དུ་ཡང་མི་འཛིན་པ་དགོས་པས་དོན་དང་མཐུན་པར་ལྟ་ཞིང་འཛིན་ན་སྐྱོན་དུ་འགྱུར་ན་དོན་དང་མི་མཐུན་པར་ལྟ་ཞིང་འཛིན་པ་ལྟ་སྨོས་ཀྱང་ཅི་དགོས། ཞེས་གསུངས་པའི་ཕྱིར་རོ། །ཁ་ཅིག་གིས་རི་ཆོས་ཀྱི་ལུང་འདི་སྟོང་ཉིད་མེད་དགག་ཡིན་པའི་ཤེས་བྱེད་དུ་འདྲེན་པ་ནི་རྒྱུ་མཚན་ཅུང་ཟད་ཙམ་ཡང་མ་མཐོང་ངོ༌། །དབྱེ༵ར་ཡོ༵ད་ཀྱི་སྡེ་དང་དབྱེར༵་མེད༵་ཀྱི་སྡེ་གཉིས་ལེག༵ས་པ༵ར་ཕྱེ༵་ནས༵་གསུང༵ས་པའི་ཕྱིར། དེ་ལ་དབྱེར་ཡོད་ཀྱི་སྡེ་ནི་བདེན་གཉིས་མཚན་ཉིད་པ་དང་འཁོར་འདས་མཚན་ཉིད་པ་དང་སྲིད་ཞི་མཚན་ཉིད་པ་དང་བདེན་བཞི་མཚན་ཉིད་པ་དང་ངོ་བོ་ཉིད་གསུམ་མཚན་ཉིད་པ་ལ་སོགས་པ་རྣམས་སོ། །དབྱེར་མེད་གྱི་སྡེ་ནི་དུས་འཁོར་བདེ་དགྱེས་གསང་འདུས་ལ་སོགས་པ་ཆོས་ཉིད་ཀྱི་རྒྱུད་སྡེ་བཞིའི་ལྷ་དང་དཀྱིལ་འཁོར་ལ་སོགས་པ་རིགས་ཀྱི་དབྱེ་བསྡུ་ཇི་སྙེད་གསུངས་པ་ཐམས་ཅད་ལ་མིང་དང་རྣམ་པའི་དབྱེ་བ་ཡོད་ཀྱང་དོན་གྱི་ངོ་བོ་དབྱེར་མེད་པ་སྟེ་ཕྱག་རྒྱ་ཆེན་པོ་དང་མྱང་འདས་ཆེན་པོ་དང༌། འོད་གསལ་ཆེན་པོ་དང་སྲོག་ཆེན་པོ་དང་མཆོད་པ་ཆེན་པོ་དང༌། འདོད་ཆགས་ཆེན་པོ་དང་གཟུགས་ཆེན་པོ་ལ་སོགས་པ་དང་ཤིན་ཏུ་རྣལ་འབྱོར་དང་ཤིན་ཏུ་སྤྲོས་མེད་དང༌། ཤེར་ཕྱིན་ཟབ་མོ་དང་ཡོངས་གྲུབ་བཅུ་གཉིས་ལ་སོགས་པ་ཤིན་ཏུ་མང་པོ་རྣམས་དོན་གྱི་ངོ་བོ་དབྱེར་མེད་པའོ། །དེ་རྣམས་དངོས་པོ་སོ་སོ་ཐ་དད་དུ་འདོད་པ་ལ་ནི་རྫོགས་ལྡན་གྱི་ལུང་གིས་གནོད་དེ། ཇི་སྐད་དུ། གཟུགས་རྣམ་པར་དག་པ་གང་ཡིན་པ་དེ་ནི་ཤེར་ཕྱིན་རྣམ་པར་དག་པའོ། །ཤེར་ཕྱིན་རྣམ་པར་དག་པ་གང་ཡིན་པ་དེ་ནི་གཟུགས་རྣམ་པར་དག་པ་སྟེ། དེ་ལྟར་ན་གཟུགས་རྣམ་པར་དག་པ་དང་ཤེར་ཕྱིན་རྣམ་པར་དག་པ་འདི་ལ་གཉིས་སུ་མེད་དེ་གཉིས་སུ་བྱར་མེད་སོ་སོ་མ་ཡིན་ཐ་མི་དད་དོ་ཞེས་སོགས་རྒྱ་ཆེར་བཀའ་སྩལ་བ་ཡིན་གྱི། གཉིས་སུ་ཡོད་དོ། །གཉིས་སུ་བྱར་ཡོད་དོ་སོ་སོ་ཡིན་ནོ་ཐ་དད་དོ་ཞེས་མ་གསུངས་པའི་ཕྱིར་ཞེས་རྟོན་པ་བཞི་ལྡན་གྱིས་གསུངས་སོ། །འཁྲུ༵ལ་ལུག༵ས་དང༌། གཤི༵ས་ལུག༵ས་གཉིས་ལེག༵ས་པར༵་ཕྱེ༵་ནས༵་གསུང༵ས་པ་སྟེ་འཁྲུལ་ལུགས་ནི་རྣམ་ཤེས་འཁྲུལ་པ་ཐམས་ཅད་ཡིན་པའི་ཕྱིར་དཔེར་ན་དུང་སེར་པོར་སྣང་བ་བཞིན་ནོ། །གཤིས་ལུགས་ནི། གཤིས་ཀྱི་གནས་ལུགས་ཟབ་མོ་ཆོས་ཉིད་ཀྱི་བཞུགས་ཚུལ་ཏེ་རང་བྱུང་ཡེ་ཤེས་མཁའ་ཁྱབ་དེ་ཡིན་ནོ། །འདོ༵ད་ལུག༵ས་དང་ཡི༵ན་ལུག༵ས་གཉིས་ལེག༵ས་པར༵་ཕྱེ༵་ནས༵་གསུང༵ས་པའི་ཕྱིར། དེ་ལ་ཡིན་ལུགས་ནི་དོན་དམ་གྱི་གནས་ལུགས་སོ། །འདོད་ལུགས་ནི་གང་ཟག་སྣ་ཚོགས་ཀྱི་འདོད་ལུགས་སྣ་ཚོགས་ཏེ་དོན་དང་མཐུན་པའི་ངེས་པ་མེད་དོ། །རྫོགས་ལྡན་ཆོས་མཆོག་གི་སྲོལ༵་འབྱེད༵་དང༌། སྲོལ༵་འགོག༵་ལེ༵གས་པ༵ར་ཕྱེ༵་ནས༵་གསུང༵ས་པའི་ཕྱིར། སྲོལ་འབྱེད་ནི་རྫོགས་ལྡན་གྱི་སྐྱེས་མཆོག་དམ་པ་རྣམས་ཀྱིས་རང་སྟོང་གཞན་སྟོང་དང་རྣམ་ཤེས་ཡེ་ཤེས་དང་ཀུན་བཏགས་ཡོངས་གྲུབ་དང་ཕྱི་ནང་གཞན་གསུམ་དང༌། རང་བཞིན་རྣམ་གསུམ་དང་བདག་གསུམ་རྣམ་དབྱེ་དང༌། སྟོང་ཉིད་གསུམ་གྱི་རྣམ་དབྱེ་ལ་སོགས་པ་དང༌། སྟོང་ཉིད་དང་ཡོངས་གྲུབ་དགུ་ལ་སོགས་པ་གཤིས་ལུགས་མཐར་ཐུག་ཀུན་དང༌། མུ་གཉིས་གཉིས་སུ་གནས་པ་སྟོན་པར་བྱེད་པ་དེ་ཡིན་ནོ། །སྲོལ་འགོག་ནི་ཐམས་ཅད་རང་སྟོང་ཡིན་པས་ཡོངས་གྲུབ་དགུ་དང་བཅུ་གཉིས་ལ་སོགས་པ་གཤིས་ལུགས་ཟབ་མོ་ཐམས་ཅད་རང་སྟོང་ཡིན་ཞིང་རང་སྟོང་གང་ཡིན་ཐམས་ཅད་དོན་དམ་པར་ཅིར་ཡང་མ་གྲུབ་པས་ཡང་དག་པར་ན་སངས་རྒྱས་དང་བྱང་ཆུབ་དང་བྱང་ཆུབ་ཀྱི་སེམས་དང་ལྷ་དང་སྔགས་སོགས་གང་ཡང་མ་གྲུབ་པས་ཐམས་ཅད་མིང་ཙམ་ཁོ་ན་ཡིན་ཞེས་སོགས་སུ་འདོད་པས་གསུམ་ལྡན་མར་བཅད་སྐྱོན་ཅན་གྱི་འདོད་ལུགས་རྣམས་ཀྱི་སྲོལ་འབྱེད། སྔར་གྱི་སྲོལ་བཟང་པོ་དེ་ཉམས་པར་བྱས་ནས་ཕྱིས་ཀྱི་སྲོལ་ངན་འདི་དར་ཞིང་རྒྱས་པར་བྱས་པ་དེ་ཡིན་ནོ། །དེས་ན་བསྟན་པ་ལ་ཐུགས་ཁྲལ་མཛད་པའི་མཁས་པ་རྣམས་ཀྱིས་སྲོལ་འབྱེད་དང་སྲོལ་འགོག་ལ་སྣང་མུན་བས་ཀྱང་ཁྱད་པར་ཆེ་བ་ཡོད་པས་ཁོངས་ཆོད་པར་མཛད་པར་ཞུ། ཞེས་གསུངས་སོ། །ཕུང༵་པོ་གསུ༵མ་པ་ཡོད༵་པ་དང་མེད༵་པ་ལེག༵ས་པར༵་ཁྱད་ཕྱེ༵་ནས༵་གསུང༵ས་པ་ཡིན་ཏེ། འདི་ཉིད་ཀྱི་འགྲེལ་བ་ལས། དངོས་པོ་དངོས་མེད་ལ་ཕུང་པོ་གསུམ་པ་ཡོད་དེ། དེ་གཉིས་གང་ཡང་མ་ཡིན་པའི་དེ་བཞིན་ཉིད་ནི་ཕུང་པོ་གསུམ་པར་རྟག་ཏུ་བཞུགས་པའི་ཕྱིར་ཞེས་པ་ནས་བེམ་པོ་དང་རིག་པ་ལ་ནི་ཕུང་པོ་གསུམ་པ་མེད་དེ་བེམ་རིག་གཉིས་སུ་མི་འདུས་པའི་ཤེས་བྱའི་ཁྱད་པར་འགའ་ཡང་མེད་པའི་ཕྱིར་རོ། །ངེས་དོན་གྱི་གནད་ཟབ་མོ་འདི་དག་ནི་རྫོགས་ལྡན་གྱི་ཆོས་དང་གང་ཟག་ལ་གྲགས་ཀྱི་གསུམ་ལྡན་མར་བཅད་ཀྱི་ཆོས་དང་གང་ཟག་ལ་དེ་ལྟ་མ་ཡིན་པས་དེང་སང་གི་མི་རྣམས་ཀྱི་བློར་ཤོང་བ་དཀའོ། །ཞེས་གསུངས་པའི་ཕྱིར། དུས༵་བཞི༵་ཆེ༵་ཆུང༵་ལ་སོགས་པ་ལེག༵ས་པར༵་ཕྱེ༵་ནས༵་གསུང༵ས་པ་ནི། དཔལ་དུས་ཀྱི་འཁོར་ལོའི་རྒྱུད་འགྲེལ་ཆེན་པོར་དུས་བཞི་ཆེན་པོ་ནི། བསྐལ་དུས་བཟང་ངན་ཡིན་ལ་དུས་བཞི་ཆུང༵་བ༵་ལ༵་ཡང༵་བསྟན་པའི་བཟང་ངན་ཏེ། སངས་རྒྱས་ཀྱི་ཆོས་ལ་ངན་པ་མེད་ཀྱང་གང་ཟག་གི་དབང་གིས་སྐྱོན་དང་ལྷད་ཞུགས་པའི་སྐྱོན་ཇེ་ཆེ་ཇེ་ཆེར་གྱུར་བ་ལས་གསུམ་ལྡན་དང་གཉིས་ལྡན་དང་མཐར་རྩོད་ལྡན་དུ་ཡང་འགྱུར་བས་རྫོག༵ས་ལྡན༵་ཆོ༵ས་མཆོག༵་དང༵༌། གསུ༵མ་ལྡན༵་མར༵་བཅད༵་དམན༵་པ་ལེགས་པར༵་ར༵བ་ཏུ་ཕྱེ༵་ནས༵་དེ་རྣམས་ལས་ཡིད་ཆེས་ཀྱི་དཔང་པོ་རུང་བ་དང༌། མི་རུང་བ་གང་ཞེ་ན་རྫོགས་ལྡན་གྱི་ཆོས་ནི་ཡིད་ཆེས་ཀྱི་དཔང་པོར་རུང་བ་སྟེ། དེར་ཇི་སྐད་གསུངས་བ་བཞིན་དོན་ལ་གནས་པའི་ཕྱིར་རོ། །གསུམ་ལྡན་མར་བཅད་ལ་སྲོལ་འགོག་གི་སྐྱོན་མང་དུ་འདྲེས་པའི་ཕྱིར་ཡིད་ཆེས་ཀྱི་དཔང་པོར་མི་རུང་ངོ༌། །དེས་ན་དཔ༵ང་དུ༵་རུང༵་བ་དང༵་མི༵་རུ༵ང་བ་ལེགས་པར་ཕྱེ༵་ནས༵་གསུ༵ངས་སོ། །ཀུན་བཏགས་མཚན་ཉིད་ངོ་བོ་ཉིད་མེད་པ་དང༌། གཞན་དབང་སྐྱེ་བ་ངོ་བོ་ཉིད་མེད་པ་དང༌། ཡོངས་གྲུབ་དོན་དམ་པ་ངོ༵་བོ༵་ཉིད༷་མེད་པ་དང་གསུམ༵་ལེག༵ས་པར༵་ཕྱེ༵་ནས༵་གསུང༵ས་ཏཻ། སངས་རྒྱས་བཅོམ་ལྡན་འདས་རང་ཉིད་ཀྱིས་གསུངས་པའི་ཤེར་ཕྱིན་དང༌། དབུ་མ་ལ་སོགས་པའི་རང་འགྲེལ་རྣམས་སུ་གསུངས་པའི་ཕྱིར་ཏེ། ཁྲི་བརྒྱད་སྟོང་བའི་ལེའུ་བརྒྱད་ཅུ་རྩ་གསུམ་པ་དང༌། ཉི་ཁྲི་ལྔ་སྟོང་པའི་ལེའུ་བདུན་ཅུ་རྩ་གཉིས་པར་གཟུགས་ནས་སངས་རྒྱས་ཀྱི་ཆོས་རྣམས་ཀྱི་བར་ཚན་པ་གསུམ་དུ་ལེགས་པར་ཕྱེ་ནས་ཀུན་བཏགས་ཡིན་པའི་གཟུགས་སོགས་ཆོས་རྣམས་ནི་ཤེས་པར་བྱ་བ་དང༌། གཞན་དབང་ཡིན་པའི་གཟུགས་སོགས་ཆོས་རྣམས་ནི་སྤང་བར་བྱ་བ་དང༌། ཆོས་ཉིད་ཡོངས་གྲུབ་ཡིན་པའི་གཟུགས་སོགས་ཆོས་རྣམས་ནི་དྲི་མ་བསལ་ནས་ཐོབ་པར་བྱ་བ་ཉིད་དུ་གསུངས་པ་དང༌། ཤེར་ཕྱིན་ལྔ་བརྒྱ་པར་ཡང༌། དངོས་པོ་མེད་པའི་གཟུགས་སོགས་ནི་ཀུན་བཏགས་ཀྱི་ཆོས་ཡིན་པས་ཤེས་པར་བྱ་བ་དང༌། དངོས་པོ་ངན་པའི་གཟུགས་སོགས་ནི་གཞན་དབང་ཡིན་པས་སྤང་བར་བྱ་བ་དང༌། གཤིས་ལ་དངོས་པོ་ཡོད་པའི་གཟུགས་སོགས་ནི་ཡོངས་གྲུབ་ཡིན་པས་དྲི་མ་བསལ་བ་ནས་ཐོབ་པར་བྱ་བ་ཉིད་དོ། །དེ་ལྟར་ལེའུ་གསུམ་པར་གནས་པ་དེ་རྣམས་ཤེས་པ་དང་སྤང་པ་དང་དྲི་མ་བསལ་ནས་མངོན་དུ་བྱས་པར་གསུངས་པ་དང༌། དབུ་མ་ཆེན་པོ་མདོ་སྡེ་རྒྱན་ལས། རྟག་ཏུ་གཉིས་བྲལ་འཁྲུལ་བའི་རྟེན་གང་ཡིན་དང་གང་ཞིག་རྣམ་ཀུན་ཏུ། །བརྗོད་པར་ནུས་མ་ཡིན་ཞིང་སྤྲོས་པ་མེད་པའི་བདག་ཉིད་དེ་ཁོ་ན། །ཤེས་བྱ་སྤང་བྱ་རང་བཞིན་དྲི་མེད་འདོད་གང་རྣམ་པར་སྦྱང་བྱ་སྟེ། །དེ་བཞིན་ནམ་མཁའ་གསེར་དང་ཆུ་ལྟར་ཉོན་མོངས་པ་ལས་རྣམ་དག་འདོད། །ཅེས་དང༌། དབུ་མ་ཆེན་པོའི་གཞུང་དབུས་མཐའ་རྣམ་འབྱེད་ལས། ཡོངས་སུ་ཤེས་དང་སྤང་བ་དང༌། །ཐོབ་པར་མངོན་སུམ་བྱ་བས་ནི། །ཞེས་དང༌། གསེར་འོད་དམ་པ་ལ་སོགས་པ་རྫོགས་ལྡན་དབུ་མའི་གཞུང་མཆོག་ཆེས་ཤིན་ཏུ་མང་བ་རྣམས་སུ་དེ་ལྟར་གསུངས་སོ། །རྫོགས་ལྡན་ཆོས་མཆོག་རྣམས་སུ་གཞན་དབང་སྤང་བྱར་གསུངས་པའི་དགོངས་པ་ནི་གཞན་དབང་གི་བྱེ་བྲག་གློ་བུར་དྲི་མ་ལ་དགོངས་པ་ཡིན་ལ་གཞན་བྱུང་ཡེ་ཤེས་དང་གཟུགས་སྐུ་གཉིས་སོགས་སྤང་བྱ་མ་ཡིན་ནོ། །གང་ཟག་གི་བདག་དང༌། ཆོས་ཀྱི་བདག་དང༌། དག་པའི་བདག༵་དང་གསུ༵མ་དུ་རྣམ༵་པར་དབྱེ༵་བ་ལེག༵ས་པར༵་ཕྱེ༵་ནས༵་གསུང༵ས་པ་དང་འདི་ཉིད་ཀྱི་འགྲེལ་བར་དེ་གསུམ་མཚན་ཉིད་གསུམ་ལ་སྦྱར་ཚུལ་ཡང་གསུངས་སོ། །ཡང་མེད་པའི་སྟོང་བ་ཉིད་དང༌། ཡོད་པའི་སྟོང་བ་ཉིད་དང༌། རང་བཞིན་སྟོང་བ་ཉིད་སྟེ་སྟོ༵ང་ཉིད༵་གསུམ༵་གྱི༵་རྣ༵མ་དབྱེ༵་ལེགས་པར་ཕྱེ༵་ནས༵་གསུང༵ས་བ་ཡིན་ཏེ། དབུ་མ་ཆེན་པོ་མདོ་སྡེ་རྒྱན་གདམས་ངག་རྗེས་སུ་བསྟན་པའི་ལེའུ་ལས། མེད་པའི་སྟོང་བ་ཉིད་ཤེས་ཤིང༌། །དེ་བཞིན་ཡོད་པའི་སྟོང་ཉིད་དང༌། །རང་བཞིན་སྟོང་བ་ཉིད་ཤེས་ན། །སྟོང་བ་ཤེས་པ་ཞེས་བརྗོད་དོ། །ཞེས་དང༌། ཤེར་ཕྱིན་ལྔ་བརྒྱ་བ་ལ་སོགས་པ་རྫོགས་ལྡན་གྱི་དབུ་མའི་གཞུང་མང་པོར་དེ་ལྟར་ཕྱེ་ནས་གསུངས་པ་ལས་སྔ་མ་གཉིས་ནི་ཀུན་བཏགས་དང་གཞན་དབང་གཉིས་ལ་རིམ་བཞིན་སྦྱར་ནས་རང་སྟོང༵་ཟབ་མོ་མ་ཡིན་པ་དང༌། ཕྱི་མ་ནི་གཞན་སྟོང་ཟབ་མོ་ཡིན་ནོ། །ཀུན་བཏགས་ནི། བདེན་པ་གཉིས་ཀྱི་སྐབས་སུ་ཡང་དག་ཀུན་རྫོབ་དང་དོན་དམ་གང་དུ༵་མེད་ཅིང་རང་གི་མཚན་ཉིད་ཀྱིས་གྲུབ་པ་མེད་པའི་ཕྱིར་མེད་པའི་སྟོང་བ་ཉིད་དང༌། གཞན་དབང་ནི་དོན་དམ་པར་མེད་ཅིང་ཀུན་རྫོབ་བདེན་པའི་ངོ་བོར་ཡོད་པས་ན་ཡོད་པའི་སྟོང་བ་ཉིད་དང༌། ཡོངས་གྲུབ་ནི་རང་གི་ངོ་བོ་རང་བཞིན་གྱིས་ཡོད་ཅིང༌། དེ་ལ་ཀུན་བཏགས་གཞན་དབང་གཉིས་ཀྱིས་སྟོང་བའི་གཞི་ཡིན་པའི་ཕྱིར་རང་བཞིན་སྟོང་བ་ཉིད་ཡིན་ནོ། །དེས་ན་ལུགས་འདིར་ཆོས་ཡིན་ན་སྟོང་བ་ཉིད་ཡིན་པས་ཁྱབ་པ་ཡོད་པས། ཆོས་ཐམས་ཅད་སྟོང་བ་ཉིད་ཅེས་པ་ཡང་ལུགས་འདི་ལ་ཤིན་ཏུ་འགྲིགས་པར་ཐེག་མཆོག་དབུ་མའི་ཟིན་བྲིས་ལས་གསུངས་སོ། །ས་སྐྱ་བ་དང་བཀའ་བརྒྱུད་པ་དང༌། སྔ་འགྱུར་རྙིང་མ་རྣམས་ཀྱིས་གཞི་གྲུབ་ན་སྟོང་ཉིད་ཡིན་པས་ཁྱབ་བ་བཞེད་ལ། དགེ་ལུགས་པ་རྣམས་ཀྱིས་ནི། གཞི་གྲུབ་ན་སྟོང་ཉིད་ཡིན་པས་མ་ཁྱབ་སྟེ། སྟོང་ཉིད་དང་དོན་དམ་བདེན་པ་དོན་གཅིག་པར་བཞེད་པའི་ཕྱིར། སྔ་འགྱུར་རྙིང་མ་རྣམས་ཀྱིས་སྣང་བ་ཀུན་རྫོབ་དང་སྟོང་བ་དོན་དམ་བདེན་པར་འདོད་ལ། འོན་ཀྱང་སྣང་བ་གང་ཡིན་ཀུན་རྫོབ་དང་སྟོང་བ་གང་ཡིན་དོན་དམ་བདེན་པར་འདོད་པ་ཡིན་མིན་དང་སྣང་བ་དགག་བྱ་ཡིན་མིན་དང༌། བདེན་གཉིས་ཀྱི་མཚན་ཉིད་གང་འཇོག་སོགས་ལ་དཔྱད་པར་བྱའོ། །ཕྱི༵་ནང༵་སྣོད་བཅུད་དམན་པ་ཀུན་རྫོབ་འདི་དང༌། འདི་ལས་གཞན༵་མཆོག༵་ཕ་རོལ་དམ་པ་དང་པོའི་སངས་རྒྱས་ཏེ། རྫོགས་ལྡན་གྱི་རྒྱུད་མཆོག་ཟབ་མོ་མང་པོར། ཇི་ལྟར་ཕ་རོལ་དེ་བཞིན་ནང༌། །ཇི་ལྟར་ནང་ལ་དེ་བཞིན་གཞན། །ཞེས་གསུངས་སོ། །དེ་ལ་ཕྱི་ནང་བརྟན་གཡོ་འདི་ནི་རང་སྟོང་ཟབ་མོ་མ་ཡིན་པ་དང༌། འདི་ལས་གཞ༵ན་མཆོ༵ག་ཕ་རོལ་དང་པོའི་སངས་རྒྱས་ནི་གཞན་སྟོང་ཟབ་མོ་ཡིན་ཞེས་ལེག༵ས་པ༵ར་ཕྱེ༵་ནས༵་གསུང༵ས་སོ། །བདེ༵ན་བཞི༵་དབྱེར་ཡོད་ནི་རབ་ཏུ་གྲགས་པ་སྟེ། འགོག་བདེན་ནི་གཞན་སྟོང་ཟབ་མོ་དང༌། ལྷག་མ་གསུམ་ནི་རང་སྟོང་མི་ཟབ་པའོ། །བདེན་བཞི་དབྱེར་མེད་ནི་དོན་དམ་བདེན་པ་གཅིག་ཉིད་བདེན་བཞིའི་ཚུལ་གྱི་རྣམ་པ་ཅན་དེ། བཞི་ཀའང་གཞན་སྟོང་ཟབ་མོ་ཡིན་པ་དང༌། ཡང་བདེན་བཞི་ལས་འགོག་བདེན་ཁོ་ན་དོན་དམ་བདེན་པ་དང༌། གཞན་རྣམས་ཀུན་རྫོབ་ཡིན་ཏེ། ཟབ་དོན་ཉེར་གཅིག་ལས། བདེན་པ་བཞིར་ཕྱེ་བའི་འགོག་བདེན་དོན་དམ་དང༌། བདེན་པ་གཞན་གསུམ་ཀུན་རྫོབ་ཏུ་བཞེད། ཞིབ་མོར་ན། འགོག་བདེན་མཚན་ཉིད་པ་གདོད་མའི་འགོག་བདེན་ལ་དོན་དམ་ཁོ་ན་དང༌། གཞན་བདེན་པ་གསུམ་དང་སོ་སོར་བརྟགས་འགོག་ལ་ཀུན་རྫོབ་ཀྱིས་ཁྱབ་པར་དོན་ལ་གནས་པས། ལམ་བདེན་མཚན་ཉིད་པ་ལ་ཀུན་རྫོབ་ཀྱིས་ཁྱབ། འགོག་བདེན་མཚན་ཉིད་པ་ལ་དོན་དམ་གྱིས་ཁྱབ། དོན་དམ་པའི་ལམ་བདེན་ནི་གདོད་མ་དང་གཅིག་པའི་ཕྱིར། འགོག་བདེན་ཉིད་ཡིན་པས་ལམ་བདེན་བཏགས་པ་བ་ཡིན། ཞེས་གསུངས་པའི་ཕྱིར། ཡང་འགོག་བདེན་འདུས་མ་བྱས་དང༌། བདེན་པ་གཞན་གསུམ་འདུས་བྱས་ཡིན་ཏེ། དཔལ་ཕྲེང་གི་ཞུས་པའི་མདོ་ལས། བཅོམ་ལྡན་འདས་འཕགས་པའི་བདེན་པ་བཞི་པོ་དེ་དག་ལས་བདེན་པ་གསུམ་ནི་མི་རྟག་པ་ལེགས་སོ། །བདེན་པ་གཅིག་རྟག་པ་ལགས་སོ། །ཞེས་དང༌། ཚུལ་གཉིས་རྣམ་འབྱེད་ལས། སྡུག་ཀུན་ལམ་བདེན་གསུམ་པོ་ཀུན་རྫོབ་འདུས་བྱས་བདེན་མེད། འགོག་བདེན་དོན་དམ་འདུས་མ་བྱས་པ་ཞེས་གསུངས་པའི་ཕྱིར། ཡང་ཆོས༵་བཞི༵་ནི་སྦྱང་གཞི་དང་སྦྱང་བྱ་སྦྱོང་བྱེད་དང༌། སྦྱང་འབྲས་ཏེ། ནམ་མཁའ་དང༌། དེ་ལ་གནས་པའི་སྤྲིན་དང༌། དེ་འཐོར་བའི་རླུང་དང་སྤྲིན་སངས་པའི་ནམ་མཁའ་རྣམས་ཀྱི་དཔེའི་སྒོ་ནས་ཤེས་པར་བྱའོ། །དེ་ཡང་མཐར་ཐུག་གི་སྦྱང་གཞི་སྦྱང་འབྲས་ནི་གཞན་སྟོང་ཟབ་མོ་ཡིན་ཞིང་ལྷག་མ་རྣམས་ནི་རང་སྟོང་མི་ཟབ་པ་ཡིན་པར་ཆོས་རྗེ་ཀུན་མཁྱེན་རིན་པོ་ཆེས་གསུངས་སོ། །ཆོས༵་ལྔ༵་ནི་མིང་དང་རྒྱུ་མཚན་དང་རྣམ་པར་རྟོག་པ་དང༌། དེ་བཞིན་ཉིད་དང༌། ཡང་དག་པའི་ཡེ་ཤེས་རྣམས་ཡིན་ཏེ། ཐེག་མཆོག་དབུ་མའི་རབ་བྱེད་ལྔ་བ་ལས། ཐེག་པ་ཆེན་པོར་ཆོས་ལྔ་བསྟནཔ་ནི། སྒྲ་དང་ཡིད་ཀྱི་གཡོ་བའི་རང་བཞིན་གྱི། །བརྗོད་པའི་གནས་ཀྱི་སྤྱི་ནི་རྒྱུ་མཚན་ཏེ། །དེ་ལ་བླ་དྭགས་ཚིག་སྤྱི་མིང་དུ་བརྗོད། །སེམས་དང་སེམས་བྱུང་ཆོས་རྣམས་རྣམ་རྟོག་ཡིན། །དེ་བཞིན་ཉིད་ནི་བརྗོད་པའི་ཡུལ་ལས་འདས། །འཕགས་པའི་ཡེ་ཤེས་ཁོ་ནའི་སྤྱོད་ཡུལ་ལོ། །ཡང་དག་ཤེས་པ་མཉམ་བཞག་རྗེས་ཐོབ་གཉིས། །ཞེས་སོགས་གསུངས་པའི་ཕྱིར་རྒྱས་པར་ཐེག་མཆོག་དབུ་མའི་རབ་བྱེད་ལྔ་བའི་རྩ་འགྲེལ་ལ་ལྟ་བར་བྱའོ། །ཆོས་ལྔ་པོ་དེ་དག་ལས། དེ་བཞིན་ཉིད་ནི་གཞན་སྟོང་ཟབ་མོ་ཡིན་ལ། ལྷག་མ་བཞི་ནི་རང་སྟོང་ཡིན་པར་གསུངས་སོ། །ལ༵་སོགས༵་པའི༵་སྒྲས་སྡུད་བྱེད་གསུམ་བསྡུས་ལ་དེ་གསུམ་ནི་གཟུགས་ཀྱི་ཕུང་བོ་དང༌། ཆོས་ཀྱི་ཁམས་དང་ཡིད་ཀྱི་སྐྱེ་མཆེད་དེ་དེ་རྣམས་སུ་མི་འདུ་བའི་ཆོས་འགའ་ཡང་མེད་པའི་ཕྱིར། དེ་ལ་འདུས་མ་བྱས་རྣམས་ཆོས་ཀྱི་ཁམས་སུ་འདུ་ཞིང༌། དེ་བཞིན་ཉིད་ཀྱང་འདུས་མ་བྱས་སུ་འདུས་སོ། །དེ་ལྟར་ལེག༵ས་པར༵་རྣམ་པར་ཕྱེ༵་བའི༵་ཆོས༵་ཀྱི་འཁོར༵་ལོ་གསུང༵ས་པ༵་ལྟར༵། རྫོག༵ས་ལྡན༵་ཆོས༵་མཆོག༵་རྣམ༵ས་ལ༵་གོམ༵ས་པར་བྱ༵ས་ན༵། མཚུང༵ས་པ༵་མེད༵་པའི༵་དོན་གྱི་མཁས༵་པ༷་ཆེན༵་པོ༵ར་འགྱུ༵ར་ལ་རྒྱ༵ལ་བ༵་སྲས༵་བཅས༵་ཐམས༵་ཅད༵་དགྱེ༵ས་པ༵ར་འགྱུ༵ར་བ་དང༌། རྒྱལ༵་བའི༵་གོ༵་འཕང༵་མྱུར༵་དུ༵་ཐོབ་པར༵་འགྱུར༵་ཞེས་པའོ། །གསུམ་པ་ལྷ་སྔགས་སོགས་གསར་བྱུང་གི་འདུས་བྱས་སུ་འདོད་པ་ལ་ལུང་རིགས་ཀྱིས་གནོད་བྱེད་བསྟན་པ་ནི། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །སྙིང་པོའི་དཀྱིལ་འཁོར་ལྷ་དང་སྔགས་དང་རྒྱུད། །རིགས་ཀྱི་དབྱེ་བསྡུ་ཇི་སྙེད་གསུངས་པ་ཀུན། །དབྱིངས་རིག་དབྱེར་མེད་དོན་དམ་འདུས་མ་བྱས། །ཆ་མེད་ཀུན་འགྲོ་ཁྱབ་བདག་ཡིན་མོད་ཀྱང༌། །གསུམ་ལྡན་མར་བཅད་སྐྱོན་ཅན་རྣམས་ན་རེ། །དེ་རྣམས་ཐམས་ཅད་འདུས་བྱས་ཡིན་ནོ་ལོ། །འོ་ན་དེ་རྣམས་ཀུན་རྫོབ་ཡིན་པར་འགྱུར། །མཐར་ཐུག་གཏན་གྱི་སྐྱབས་མཆོག་མིན་པར་འགྱུར། །བརྫུན་པ་བསླུ་བའི་ཆོས་ཀྱང་ཡིན་པར་འགྱུར། །སྙིང་པོ་མདོ་ལྔ་མདོ་བཅུ་ལ་སོགས་སུ། །མཐར་ཐུག་སྐྱབས་མཆོག་གསུམ་པོ་ཐམས་ཅད་ཀྱང༌། །རྟག་བརྟན་ཐེར་ཟུག་གཡུང་དྲུང་འདུས་མ་བྱས། །དོན་དམ་བདེན་པར་ཡང་ཡང་གསུངས་པས་གནོད། །རྩབར། རྫོགས་ལྡན་ཆོས་མཆོག་ཁྱད་པར་འཕགས་རྣམས་སུ། །ཞེས་པ་ནས། དོན་དམ་བདེན་པ་ཡང་ཡང་གསུངས་པས་གནོད། །ཅེས་པའི་བར་ཤོ་ལོ་ཀ་གསུམ་དང་རྐང་བ་གཉིས་བྱུང༌། དེའི་ཚིག་དོན་ནི། རྫོག༵ས་ལྡན༵་ཆོས༵་མཆོག༵་ཁྱད༵་པར༵་འཕགས༵་པ་རྣམ༵ས་སུ༵་སྙི༵ང་པོའི༵་དཀྱིལ༵་འཁོར༵་དང༌། ལྷ༵་དང༵་སྔགས༵་དང༵་རྒྱུད༵་དང༌། དང་པོའི་རྒྱུད་སོགས་ལས་རིགས༵་ཀྱི༵་དབྱེ༵་བསྡུ༵་དུ་མ་གསུངས་པ་རི་ཆོས་ངེས་དོན་རྒྱ་མཚོར་བཀོད་པ་ལྟར་ཇི༵་སྙེད༵་གསུང༵ས་པ༵་ཀུན༵་ནི། དབྱིང༵ས་རིག༵་དབྱེ༵ར་མེད༵་དང་དོན༵་དམ༵་འདུས༵་མ༵་བྱ༵ས་དང༌། ཆ༵་མེད༵་དང་ཀུན༵་འགྲོ༵་དང་ཁྱབ༵་པ་དང་དག་པའི་བདག༵་ཡིན༵་མོད༵་ཀྱང༵་གསུམ༵་ལྡན༵་མར༵་བཅད༵་སྐྱོ༵ན་ཅན༵་རྣམ༵ས་ན༵་རེ༵། ལྷ་སྔགས་སོགས་དེ༵་རྣམས༵་ཐམས༵་ཅད༵་འདུས༵་བྱས༵་ཡིན༵་ནོ༵་ཞེས་འདོད་པ་དང༌། ལོ༵་ཞེས་པ་ནི་མ་རངས་བའི་ཚིག་ཡིན་ནོ། །འོ༵་ན༵་ཕྱོགས་སྔ་ཁྱོད་ལྟར་ན་ལྷ་སྔགས་དེ༵་རྣམ༵ས་ཀུ༵ན་རྫོབ༵་ཡིན༵་པར་༵འགྱུ༵ར་བ་དང་མཐར༵་ཐུག༵་གཏ༵ན་གྱི༵་སྐྱབ༵ས་མཆོག༵་མིན༵་པར༵་འགྱུར༵་བ་དང༌། བརྫུན༵་པ༵་བསླུ༵་བའི༵་ཆོས༵་ཀྱང༵་ཡིན༵་པར༷་འགྱུ༵ར་བར་ཐལ། དེ་དག་འདུས་བྱས་ཡིན་པའི་ཕྱིར། རྟགས་ཁས། ཁྱབ་སྟེ། རྒྱུད་བླ་མ་ལས། སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམས་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །ཞེས་དང༌། རྩ་ཤེས་ལས། འདུས་བྱས་ཐམས་ཅད་བསླུ་བའི་ཆོས། །དེས་ན་དེ་དག་བརྫུན་པ་ཡིན། །ཞེས་གསུངས་པའི་ཕྱིར། ཡང་མདོ་སྡེ་དགོངས་འགྲེལ་ལས། རྟག་པ་རྟག་པའི་དུས་དང་ཐེར་ཟུག་ཐེར་ཟུག་གི་དུས་སུ་ཆོས་ཉིད་དེ་ཉིད་ཀྱི་རྣམ་པར་གནས་པ་འདུས་མ་བྱས་པ་གང་ཡིན་པ་དེ་ནི་འདུས་མ་བྱས་ཡིན་པའི་ཕྱིར། ཞེས་སོགས་སྙིང༵་པོའི༵་མདོ༵་ལྔ༵་མདོ༵་བཅུ་ལ༵་སོགས༵་པ་རྣམས་སུ༵་མཐར༵་ཐུ༵ག་སྐྱབ༵ས་མཆོག༵་གསུམ༵་པོ༵་ཐམས༵་ཅད་ཀྱ༵ང་འགྱུར་བ་མེད་པས་རྟག༵་བརྟན༵་དང༌། ཕྱི་མའི་དུས་སུ་འགྱུར་བ་མེད་པའི་ཆོས་ཉིད་ལ་ཐེར༵་ཟུག༵་ཅེས་རྒྱ་ནག་འགྲེལ་ཆེན་ལས་གསུངས་པ་ལྟར་དང་རྟག་བརྟན་ཡིན་པས་གཡུང༵་དྲུང༵་སྟེ་དེའི་སྐད་དོད་ཤ་ཤྭ་ ར་ཞེས་པ་ཡྀན་པ་ལ་དེས་ན་གཡུང་བ་ནི་རྟག་པའི་བརྡ་ཉིད་དང་དྲུང་ནི་བརྟན་པའི་བརྡ་དང་རྒྱུ་རྐྱེན་གྱིས་འདུས༵་མ༵་བྱས༵་དང་དོན༵་དམ༵་བདེན༵་པར༵་ཡང༵་ཡང༵་གསུང༵ས་པས༵་གནོད༵་ཅེས་པའོ། །དེ་དག་གི་སྐབས་སུ་དོན་དམ་པའི་དཀྱིལ་འཁོར་དང་ལྷ་སྔགས་དང་རྒྱུད་དང་རིགས་དང་དཀོན་མཆོག་གང་ཡིན་ཐམས་ཅད་སྔར་མེད་ཕྱིས་འབྱུང་བའི་འདུས་བྱས་སུ་འདོད་པ་ལ་ལུང་རིགས་ཀྱི་གནོད་བྱེད་བསྟན་ཏོ། །གོང་གི་སྙིང་པོའི་མདོ་ལྔ་ཞེས་པ་ནི། དེ་བཞིན་གཤེགས་པའི་སྙིང་པོའི་མདོ། རྣམ་པར་མི་རྟོག་པ་ལ་འཇུག་པའི་གཟུངས༌། ལྷ་མོ་དཔལ་ཕྲེང་སེང་གེའི་སྒྲའི་མདོ། རྔ་བོ་ཆེན་པོའི་མདོ། སོར་མོའི་ཕྲེང་བ་ལ་ཕན་པའི་མདོ་རྣམས་སོ། །དེ་རྣམས་ཀྱི་སྟེང་དུ་སྟོང་ཉིད་ཆེན་པོའི་མདོ། དེ་བཞིན་གཤེགས་པའི་ཐུགས་རྗེ་ཆེན་པོ་བསྟན་པའི་མདོ། དེ་བཞིན་གཤེགས་པའི་ཡོན་ཏན་དང༌། ཡེ་ཤེས་བསམ་གྱི་མི་ཁྱབ་པ་བསྟན་པའི་མདོ། སྤྲིན་ཆེན་པོའི་མདོ་རྒྱས་པ། མྱང་འདས་ཆེན་པོའི་མདོ་རྒྱས་བསྡུས་གསུམ་གཅིག་ཏུ་བྱས་པ་སྟེ། སྙིང་པོའི་མདོ་བཅུ་དང༌། ཡང་ངེས་དོན་མདོ་ལྔ་ནི། ཤེར་ཕྱིན་ལྔ་བརྒྱ་བ། བྱང་ཆུབ་སེམས་དཔའི་བསླབ་པ་རབ་ཏུ་དབྱེ་བའི་ལེའུ་ཆ་བཅུ་གཉིས་བྱམས་ཞུས་སུ་གྲགས་པ་གཉིས་གཅིག་ཏུ་བསྡུས་པ། རྒྱན་སྡུག་པོ་བཀོད་པའི་མདོ། རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་གྱི་ཏིང་ངེ་འཛིན་གྱི་མདོ། དཀོན་མཆོག་སྤྲིན་གྱི་མདོ་རྣམས་སོ། །དེ་རྣམས་ཀྱི་སྟེང་དུ་གསེར་འོད་དམ་ཆེན། དགོངས་པ་ངེས་པར་འགྲེལ་བ། ལང་ཀར་གཤེགས་པ། ཡེ་ཤེས་སྣང་བ་རྒྱན་གྱི་མདོ། སངས་རྒྱས་ཕལ་པོ་ཆེ་རྣམས་ངེས་དོན་མདོ་བཅུ་ཡིན་པར་ཆོས་རྗེ་ཀུན་མཁྱེན་གྱིས་གསུངས་སོ། །