རྗེ་བཙུན་མི་ཏྲ་ཛོ་གིའི་ལུགས་འཇིག་རྟེན་དབང་ཕྱུག་གསང་བའི་སྒྲུབ་པ་ཞེས་བྱ་བའི་སྒྲུབ་ཐབས།
ཨོཾ་སྭཱ་སྟི། འཕགས་པ་སྤྱན་རས་གཟིགས་དབང་ལ། །བཏུད་ནས་གསང་བའི་སྒྲུབ་ཐབས་ནི། །མི་ཏྲ་ཛོ་གའི་མན་ངག་བཞིན། །མདོར་བསྡུས་ཙམ་ཞིག་ཡེ་གེར་འགོད། །སྐྱབས་སེམས་སྔོན་དུ་འགྲོ་བས། སྭ་བྷཱ་ཝས་སྟོང་པར་སྦྱངས། སྟོང་པའི་ངང་ལས་བསྲུང་འཁོར་གྱི་ནང་ཆོས་འབྱུང་གི་དབུས་སུ་འབྱུང་བཞི་རི་རབ་དང་བཅས་པའི་རྩེ་མོར་གཞལ་ཡས་ཁང༌། དབུས་སུ་པད་ཟླའི་གདན་ལ་ཧྲཱིཿལས་པདྨ་ཧྲཱིཿས་མཚན་པ་ཡོངས་སུ་གྱུར་པ་ལས་རང་ཉིད་འཇིག་རྟེན་མགོན་པོ་སྐུ་མདོག་དཀར་ལ་དམར་བའི་མདངས་ཆགས་པ་ཞལ་གཅིག་ཕྱག་གཉིས་ཡིད་ཙམ་ཁྲོ་བ་སྤྱན་གསུམ་དང་ལྡན་པ། ཕྱག་གཡས་མུ་ཏིག་གི་འཕྲེང་བ་དང༌། གཡོན་པདྨའི་སྡོང་བུ་འཛིན་པས་ཡུམ་ལ་འཁྱུད་པ། རུས་པའི་རྒྱན་གྱིས་བརྒྱན་པ། གཡོན་བརྐྱང་གི་སྟབས་ཀྱིས་བཞུགས༌། དེ་ལ་འཁྱུད་པའི་ཡུམ་གསང་བ་ཡེ་ཤེས་ཀྱི་མཁའ་འགྲོ་མ་དམར་མོ་ཌ་མ་རུ་དང་ཐོད་ཁྲག་འཛིན་པ་རྡོ་རྗེ་ཕག་མོ་དང་མཚུངས་པ། རིགས་བཞི་མཁའ་འགྲོའི་འཁོར་གྱིས་བསྐོར་བ། ཕྱི་སྐོར་དུ། ཐུབ་པ་འཇམ་དཔལ་འོད་དཔག་མེད། །ཕྱག་རྡོར་ཤེས་རབ་ཕ་རོལ་ཕྱིན། །སྒྲོལ་མ་དང་ནི་རིག་བྱེད་མ། ཁྲོ་གཉེར་ཅན་སོགས་དཔག་ཡས་བཞུགས། །གནས་གསུམ་བྱིན་རླབས། ཡེ་ཤེས་སྤྱན་དྲངས། དབང་བསྐུར་རྒྱས་གདབ་རྣམས་སྤྱི་དང་འདྲ་བ་ལས། ཡབ་ཡུམ་གཉིས་ཀ་ལ་འོད་དཔག་མེད་ཀྱིས་དབུ་བརྒྱན། རང་གི་ལྟེ་བ་དང༌། ཡུམ་གྱི་མཁའ་ནང་དུ་དགའ་འཁྱིལ་གྱི་ལྟེ་བར་གཙོ་བོ་ཡབ་ཡུམ། ལག་བཞི་ལ་མཁའ་འགྲོ་མ་བཞི། དེ་གཡོན་སྐོར་དུ་འཁོར་བ་ལ་སེམས་གཏད་དེ་འགོག་པའི་བཟླས་པ་བྱའོ། །དེ་ནས་སྤྲོ་བསྡུའི་དམིགས་པ་གསལ་བཏབ་སྟེ། ཨོཾ་མ་ཎི་པདྨེ་ཧཱུཾ།
ཌཱ་ཀི་ནཱི་ཧ་རི་ནི་ས་ཧཱུཾ། འབུམ་ཕྲག་བཅུ་བཞི་བཟླའོ། །ཨརྒྷཾ་ནས་ཤཔྟའི་བར་གྱིས་མཆོད། སྐྱོན་གྱིས་མ་གོས་སྐུ་མདོག་དཀར། །སོགས་དང༌། བདེ་སྟོང་གཉིས་སུ་མེད་པ་ཡི། །གསང་བ་ཡེ་ཤེས་ལ་འདུད་དོ། །འཕྲིན་ལས་རྣམ་བཞི་སྒྲུབ་མཛད་པ། །མཁའ་འགྲོའི་ཚོགས་ལ་ཕྱག་འཚལ་ལོ། །མཐར་སྣོད་བཅུད་ཐམས་ཅད་དཀྱིལ་འཁོར་ལ་བསྡུ། དེ་ཡང་འོད་གསལ་དུ་བསྟིམ། ཐུན་འཚམས་སུ་ལྷ་སྐུར་ལངས་ཏེ་དགེ་བ་བསྔོ། གཏོར་ཆོག་ནི། བླ་མེད་སྤྱི་དང་འདྲ་བ་ལས། སྙིང་པོའི་མཐར་ཨི་དཾ་བཱ་ལིང་ཏ་ཁ་ཁ་ཁཱ་ཧི་ཁཱ་ཧི་བཏགས་པས་འབུལ། འདི་ལ་དབང་ཆོག་རྒྱས་པ་སྦྱོར་བའི་སྲོལ་ཡང་བྱུང་ཞིང༌། རྒྱ་སྟོན་གྱིས་ཀྱང་བྱིན་རླབས་ཀྱི་ཆོ་ག་རྒྱས་པ་ཞིག་མཛད་ནའང༌། དེ་དག་རྙིང་མ་སོགས་གཞན་ནས་བསྲེས་པར་གདའ། འདིའི་རང་ལུགས་བྱིན་རླབས་ནི། སྤྱན་རས་གཟིགས་ཡི་གེ་བདུན་པ་མི་ཏྲིའི་ལུགས་ཉིད་འདོད་པ་སྤོས་པས་བྱ་བ་ཉིད་དོ། །ཀུན་ཏུ་ཟབ་པར་རབ་བསྔགས་ཤིང༌། །རབ་དག༵འི་དང་པ་སྐྱེད་བྱེད་པ། །འཇིག་རྟེན་མགོན་པོའི་སྒྲུབ་ཐབས་ཀྱི། །ཡང་སྙིང༵་གསལ་པོ༵ར་བཀོད་འདི་མཚར། །རྗེ་བཙུན་མི་ཏྲ་ཛོ་གིའི་ལུགས་འཇིག་རྟེན་དབང་ཕྱུག་གསང་བའི་སྒྲུབ་པ་ཞེས་བྱ་བའི་སྒྲུབ་ཐབས་ཀྱི་ལེ་ཚན་ནོ།། །།དར་རྒྱས་འཕེལ། །