འཕགས་པ་ཆོས་ཐམས་ཅད་ཀྱི་ཡུམ་ཞེས་བྱ་བའི་གཟུངས།
༈ རྒྱ་གར་སྐད་དུ། ཨཱརྻ་སརྦ་དྷརྨ་མ་ཏྲྀ་ཀ་ནཱ་མ་དྷ་ར་ཎི། བོད་སྐད་དུ། འཕགས་པ་ཆོས་ཐམས་ཅད་ཀྱི་ཡུམ་ཞེས་བྱ་བའི་གཟུངས། སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་བཞུགས་ཏེ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཐམས་ཅད་ཀྱི་ཡུམ་ཞེས་བྱ་བའི་ཕྱག་རྒྱའི་གཟུངས། ནད་ཐམས་ཅད་རབ་ཏུ་ཞི་བར་བྱེད་པ། དེ་བཞིན་གཤེགས་པ་ཐམས་ཅད་ཀྱིས་གསུངས་ཏེ། ང་ཡང་ད་ལྟར་འཆད་པ་ཟུངས་ཤིག །ཏདྱ་ཐཱ། ཨ་བརྟེ། ཨ་བརྟེ། བི་བརྟེ། བི་བརྟེ། བྷ་ག་མ། ཤུདྡྷེ། པྲ་བྷ་སཱ་རེ། ཏ་ར་ཎེ། ཨུག་ཁ་ལེ། མུག་ཁ་ལེ། སརྦ་དྷརྨཿ པཱ་ཤ་པ་ནྱཻ་སྭཱ་ཧཱ། དེ་ནས་གནས་གཙང་མའི་ལྷ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ཀྱང་འདིའི་སྙིང་པོ་བརྗོད་པར་བྱའོ། །ཏདྱ་ཐཱ། ཨཙྪེ། ཨ་ན་ལེ། ཨེ་ལུ་ལེ། ཨ་ལུ་ཕེ། མུརྟ་ཨ་ནུ་ག་ཏེ། སརྦ་དྷརྨ་ཨ་དྷི་བ་ཏི་ཡ་པྲ་ཏེ། ཛྱོ་སྣ་ཀ་ར། ཨ་དྷི་ག་ཏ་ཛྙཱ་ནེ། བི་ཤུདྡྷེ་པ་ཏི་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་བསྩལ་ནས། ཚེ་དང་ལྡན་པ་ཀུན་དགའ་བོ་དང༌། ཐམས་ཅད་དང་ལྡན་པའི་འཁོར་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཆོས་ཐམས་ཅད་ཀྱི་ཡུམ་ཞེས་བྱ་བའི་གཟུངས་རྫོགས་སོ།། །།