འོད་གསལ་ཐོད་རྒལ་གྱི་བསྡུས་དོན་རིན་ཆེན་གཟེར་ཡིག

༈ འོད་གསལ་ཐོད་རྒལ་གྱི་བསྡུས་དོན་རིན་ཆེན་གཟེར་ཡིག་བཞུགས་སོ། །

ན་མོ་གུ་རུ་པདྨ་ཀཱ་ར་ཡེ། དེ་ལ་དང་པོ་རུ་ཤན་བྱེད་པ་ལ། །བྱང་ཆུབ་སེམས་བསྐྱེད་གཞི་བདག་མགྲོན་རིགས་དང༌། །བགེགས་མགྲོན་བརྔན་ནས་བསྲུང་འཁོར་བསྒོམ་པ་དང༌། །དེ་ནས་འགྲོ་དྲུག་ལུས་ངག་ཡིད་སྤྱོད་དང༌། །སངས་རྒྱས་ཉིད་ཀྱི་སྐུ་གསུང་ཐུགས་སྤྱོད་བྱ། །རྐང་མཐིལ་དམྱལ་བའི་ས་བོན་དུ་ནག་པོ། །གསང་གནས་ཡི་དྭགས་ས་བོན་པྲེ་ཐལ་སྐྱ། །ལྟེ་བར་དུད་འགྲོའི་ས་བོན་ཏྲི་དམར་ནག །སྙིང་ཁར་མི་ཡི་ས་བོན་ཎྀ་《ནྲི་དཔྱད།》ལྗང་ཁུ། །མགྲིན་པར་ལྷ་མིན་ས་བོན་སུ་སེར་པོ། །སྤྱི་བོར་ལྷ་ཡི་ས་བོན་ཨ་དཀར་པོ། །རང་མདོག་ཐིག་ལེའི་དཀྱིལ་ན་བསྒོམ་པ་ལ། །རིགས་དྲུག་ལས་ཉོན་སྡིག་སྒྲིབ་འདུས་པར་བསམ། །སྤྱི་བོར་ཨོཾ་དཀར་མགྲིན་པར་ཨཱཿདམར་པོ། །སྙིང་ཁར་ཧཱུྃ་མཐིང་རྣམས་ལས་འོད་དཀར་དམར། །མཐིང་གསུམ་འཕྲོས་པས་ས་བོན་བག་ཆགས་བསྲེགས། །དེ་ནི་ཕྱི་ཡི་རུ་ཤན་དབྱེ་བའོ། །འབྲུ་གསུམ་རྡོ་རྗེའི་བཟླས་པ་འབུམ་བདུན་བཟླ། །ནང་གི་རུ་ཤན་ལུས་ཉིད་རྡོ་རྗེ་ནི། །ཡར་རྩེ་སྐུ་གསུམ་མར་རྩེ་ངོ་བོ་དང༌། །རང་བཞིན་ཐུགས་རྗེ་གསུམ་གྱི་བདག་ཉིད་ཅན། །སྐེད་པ་ཐབས་ཤེས་ཟུང་འཇུག་མཚོན་པ་ལས། །མེ་སྟག་འཕྲོས་པས་གདོན་བགེགས་ཚར་བཅད་དེ། །རྡོ་རྗེ་ལང་འདུག་སྐོར་གསུམ་ཉམས་སུ་བླང༌། །ངག་གིས་ཧཱུྃ་བརྗོད་སྙིང་ཁའི་ཧཱུྃ་འཕྲོས་པས། ཁམས་གསུམ་སྣོད་བཅུད་ཧཱུྃ་དུ་ཞུ་བར་བསམ། །ཚུར་འདུས་བུ་ག་དགུ་ནས་ཞུགས་པ་ཡིས། །ལུས་ནང་ཐམས་ཅད་ཧཱུྃ་གིས་གང་བར་བསམ། །དེ་ནས་ཧཱུྃ་འཕྲོས་རི་བྲག་ཐམས་ཅད་འབིགས། །ཚུར་འདུས་རང་ལུས་གོལ་རྩེ་མེད་པར་འབིགས། །མདུན་དུ་ཤིང་བཙུག་སྙིང་ཀའི་ཧཱུྃ་ལས་ནི༑ ༑ཧཱུྃ་གི་ཐག་པ་ཤིང་ལ་དཀྲིས་པར་བསམ། །ཤིང་རྩེར་ཧཱུྃ་ཞིག་ལང་ལ་སེམས་ལ་གཏོད། །མཐར་ནི་གཅིག་ཐིམ་གཉིས་ཐིམ་སྙིང་ཀར་བསྡུ། །དེ་ནས་ཧཱུྃ་ཞིག་རིགས་དྲུག་གནས་སུ་སོང༌། །རིགས་དྲུག་སྡུག་བསྔལ་སྦྱང་ནས་ཞིང་ལྔར་བཀོད། །རྒྱལ་བ་རིགས་ལྔར་དབང་ཞུས་ལུང་བསྟན་ཐོབ། །ཉན་ཐོས་བྱང་སེམས་ཁྲོ་བོའི་ལྟ་སྟང་གིས། །བལྟས་ནས་རུ་ལུ་སོགས་བརྗོད་བྱ་བ་ཀུན། །དགུ་སྤྲུགས་བཏང་བའི་རིམ་པ་དང་བཅས་པ། །དེ་དག་སྔོན་འགྲོ་དེ་ནས་དངོས་གཞི་ནི། །སེམས་ཀྱི་བྱུང་གནས་བཙལ་ནས་སྟོང་བར་ཤེས། །དེ་ནས་ལུས་ཀྱིས་ཙོག་པུར་བྱས་ནས་སུ། །ལག་པའི་སོར་བསྣོལ་པུས་མོར་འཁྱུད་པ་དང༌། །དེ་ལས་ལག་གཉིས་མཆན་ཁུང་རེག་པ་དང༌། །ལག་རྒྱབ་ཁུ་ཚུར་ལྐོག་མར་བཏེགས་པ་གསུམ། །དེ་གསུམ་དུས་སུ་ལྟ་སྟངས་སྣ་རྩེར་ཕབ། །དེ་དག་སྤྲུལ་སྐུའི་བཞུགས་སྟངས་གཟིགས་སྟངས་སོ། །ཁ་སྦུབས་ལག་མཐིལ་འགྲམ་པ་སྐྱོར་བ་དང༌། །མིག་གཉིས་ཐད་བལྟ་ལོངས་སྤྱོད་རྫོགས་པའོ། །རྐང་བ་མདུན་སྤྲད་དབུས་སུ་ཁུ་ཚུར་བཙུག །སྒལ་ཚིགས་དྲང་བསྲེང་མིག་ནི་གྱེན་ལ་བལྟ། །ཆོས་ཀྱི་སྐུ་ཡི་བཞུགས་སྟངས་གཟིགས་སྟངས་སོ། །ཀུན་ལ་རླུང་གནད་མཆུ་སོ་མ་རེག་པར། །རླུང་ནི་དལ་བས་ཕྱི་རུ་རིང་བ་ཞིག །ཁ་ནས་གཏོང་ཞིང་མིག་གིས་ཕྱེད་བཙུམ་བལྟ། །ཡུལ་ནི་ཉི་ཟླ་མར་མེ་སྐུ་གསུམ་རྟེན། །དེ་ལ་བརྟེན་པ་ཙིཏྟ་ཤ་ཡི་སྒྲོན། །ཡེ་ཤེས་བཞུགས་གནས་སྙིང་གི་རྩེ་མོ་ནས། །སོར་བཞིའི་མཚམས་ནས་རྩ་བ་གཅིག་པ་ལས། །རྩེ་མོ་གཉིས་ཅན་སྒལ་ཚིགས་རྒྱུད་པ་སྟེ། །དཀར་འཇམ་རྩ་ཡི་སྒྲོན་མ་དེའི་རྩ་སྣ། །མིག་གི་དཀྱིལ་ཟུག་རྒྱང་ཞགས་ཆུ་ཡི་སྒྲོན། །དེ་ནི་སྣོད་ཀྱི་སྒྲོན་མ་རྣམ་གསུམ་མོ། །དེ་ནས་བཅུད་ཀྱི་སྒྲོན་མ་རྣམ་གསུམ་ནི། །ནམ་མཁར་བལྟས་ན་སྔོ་ནག་ཉི་ཟླ་ལ། །བལྟས་ན་ཁ་དོག་ལྔ་ལྡན་རབ་རིབ་འཆར། །དེ་ནི་རྣམ་དག་དབྱིངས་ཀྱི་སྒྲོན་མའོ། །དེ་ནང་ཐིག་ལེ་ཁ་དོག་ལྔ་ལྡན་པ། །ཀོར་མོའི་གཟུགས་ཏེ་ཐིག་ལེ་སྟོང་སྒྲོན་ནོ། །བར་མཚམས་ལུག་རྒྱུད་ཐིག་ལེ་འབྲེལ་ཞིང་འཁྱོག །ཤེས་རབ་རང་བྱུང་གདངས་ཡིན་སེམས་ཀྱི་དངོས། །སྟོང་གསལ་རིག་པ་ཤེས་རབ་རང་བྱུང་གི །ངོ་བོ་ཡིན་ནོ་ཡུལ་ཀུན་ཤེས་བྱེད་པ། །ཤེས་རབ་རང་བྱུང་སྒྲོན་མའི་རྩལ་ཡིན་ནོ། །མ་ཡེངས་རྣམ་རྟོག་མི་འགྱུ་དེ་ལ་བལྟ། །དེ་ལྟར་བལྟས་ན་སྣང་བཞི་རིམ་གྱིས་རྫོགས། །མཚན་མོའི་ཉམས་ལེན་སྦ་བསྡུ་དག་སྦྱོར་ནི། །ལུས་ནང་དབུ་མའི་ཡར་སྣེ་ཧཾ་ཡིག་དང༌། །མར་སྣེ་ཨ་ཐུང་གསལ་བཏབས་ཨ་ལས་མེ། །འབར་བས་སྤྱི་བོའི་ཧཾ་ལ་རེག་པ་ན། །ཧཾ་ལས་བདུད་རྩི་བབས་པས་མེ་གསོས་བྱས། །མེ་ཉིད་ཆེར་མཆེད་ལས་ཉོན་བག་ཆགས་བསྲེགས། །འོད་ལུས་དབུས་སུ་དབུ་མ་གསལ་བཏབ་བྱ། །མེ་འོད་ཀྱིས་ཁྱབ་བསམ་ཞིང་འོད་ལ་ནི། །སེམས་གཏད་པ་ཉིད་འོད་གསལ་སྦ་བའོ། །དེ་ལ་སེང་གེའི་ཉལ་སྟབས་བཞུགས་སྟངས་དགོས། །ཡང་ན་སྣ་རྩེར་ཐིག་ལེ་ཞིག་གསལ་ལ། །ལུས་ཉིད་འོད་ཞུ་དེ་ལ་ཐིམ་པར་བསམ། །སླར་ཡང་ལུས་དབུས་དབུ་མའི་ནང་ཉིད་ཀྱི། །སྙིང་ཀ་སྤྱི་བོ་གཉིས་སུ་ཨ་གཉིས་གསལ། །དེ་གཉིས་བར་དུ་ཨ་དཀར་བཅུ་དགུ་ནི། །འོད་ཟེར་ཉི་མ་འབུམ་དང་འདྲ་བར་སྒོམ། །སྤྱི་བོ་ནས་བཟུང་ཨ་རྣམས་མས་ཐིམ་དུ། །སྙིང་ཀའི་ཨར་བསྡུ་དེ་ལ་ཐམས་ཅད་ཀྱི། །འོད་དང་ཟེར་འབར་བསམ་པས་གཟི་བརྗིད་ཀྱིས། དབུ་མའི་ནང་ཀུན་རབ་ཏུ་གང་བར་བསམ། །འོད་དེར་ཤེས་པ་གཏད་དེ་གཉིད་པར་བྱ། །དེ་ཡི་འདུག་སྟངས་གླང་ཆེན་ཉལ་སྟབས་སོ། །དེ་ནི་ཤེས་བྱ་བུམ་པར་བསྡུ་བའོ། །ཐོ་རངས་ལང་ནས་རླུང་རོ་གསུམ་བསལ་ཏེ། །དམར་ནག་དཀར་ནག་ཁམ་ནག་རྣམ་པ་རུ། །དུག་གསུམ་ལས་བྱུང་སྡིག་སྒྲིབ་དག་པར་བསམ། །དེ་ནས་སྙིང་ཀའི་ཨ་ལས་སྨིན་མཚམས་སུ། །ཨ་མཐིང་ཞིག་གསལ་དེ་ལས་འོད་འཕྲོས་པས། །སྣོད་བཅུད་འོད་ཞུ་འོད་མཐིང་རྣམ་པར་གང༌། །དེ་ནི་ནམ་མཁའི་འབྱུང་བ་དག་སྦྱོར་རོ། །ཡང་ཅིག་ཨ་དཀར་ཆུ་ཡི་རང་བཞིན་ལ། །འོད་འཕྲོས་སྣོད་བཅུད་འོད་དཀར་རྣམ་པར་ཞུ། །གསུམ་པ་ཨ་སེར་འོད་ཀྱིས་སྣོད་བཅུད་སྦྱངས། །བཞི་པ་ཨ་དམར་འོད་ཀྱིས་སྣོད་བཅུད་སྦྱངས། །ལྔ་བ་ཨ་ལྗང་འོད་ཀྱིས་སྣོད་བཅུད་ཞུ། །འོད་ཟེར་དཀར་སེར་དམར་ལྗང་མཐིང་ནག་གི །འོད་ཀྱིས་འཁོར་འདས་ཁྱབ་ནས་བརྡལ་བསམ་ལ། །དེ་ཡི་བཞུགས་སྟངས་དྲང་སྲོང་ཙོག་པུར་གནས། །བར་སྐབས་འཆི་སྦྱངས་དབེན་པའི་གནས་ཉིད་དུ། །སེང་གེ་ཉལ་སྟབས་བྱས་ནས་འཆི་བའི་དུས། །གཉེན་བཤེས་ཀུན་གྱིས་མཐར་བསྐོར་འོ་དོད་འབོད། །བསམ་ཞིང་ང་ནི་ཅི་ལ་ཡང་མི་ཆགས། །ནམ་མཁའ་རྣམ་པར་དག་པའི་དབྱིངས་ཉིད་དུ། །ང་ནི་མྱ་ངན་འདའ་བསམ་མིག་གིས་ནི། །བར་སྣང་ལམ་བྱེད་དབྱིངས་རིག་བསྲེ་བའོ། །ཡང་ན་གླང་ཆེན་ཉལ་སྟབས་བྱས་ནས་སུ། །མངོན་དགའ་དཔལ་ལྡན་སྟུག་པོ་བཀོད་པ་དང༌། །བདེ་བ་ཅན་དང་ལས་རབ་རྫོགས་པ་རུ། །རྡོ་རྗེ་སེམས་དཔའ་རིན་འབྱུང་སྣང་མཐའ་ཡས། །དོན་གྲུབ་རྣམ་སྣང་བཞུགས་པའི་ཞབས་དྲུང་དུ། །ང་ནི་འདའ་སྙམ་དབྱིངས་ཐིག་མངོན་དུ་བྱ། །སླར་ཡང་རང་བཞིན་སྤྲུལ་པའི་ཞིང་ལྔ་གསལ། །ད་ནི་འཆི་བས་ཅི་ལ་མི་ཆགས་པར། །རང་བཞིན་སྤྲུལ་པའི་ཞིང་ལ་འགྲོ་སྙམ་ནས། །དབྱིངས་ཐིག་མངོན་བྱེད་དྲང་སྲོང་ཙོག་པུར་འདུག །དེ་ལྟར་གནད་བསྣུན་ཉིན་མཚན་ཁ་སྦྱོར་ནས། །ཟླ་བ་དྲུག་ན་ཆོས་ཉིད་མངོན་སུམ་མཐོང༌། །རིག་པ་གཅེར་ལྡང་ལུས་ནི་རུས་སྦལ་བཞིན། །ངག་ནི་ལྐུགས་པ་སེམས་ནི་གར་གཏད་སྡོད། །ཉམས་སྣང་གོང་འཕེལ་དབྱིངས་ཐིག་སྐུ་རུ་སྨིན། །ཤེས་ཉམས་སྣང་ཉམས་རྟགས་གསུམ་སྒོ་གསུམ་འཆར། །རིག་པ་ཚད་ཕེབ་ཚོམ་བུ་གཅིག་ཏུ་འཆར། །སྒོ་གསུམ་རྟགས་ཐོབ་འོད་ཟེར་ཚེ་དབང་ཐོབ། །སླར་ཡང་ཆོས་ཟད་བློ་ཟད་དབང་ཡུལ་ཟད། །སྒོ་གསུམ་རྟགས་ཐོན་གདེངས་བཞི་ཐོབ་ནས་ཀྱང༌། །སྐྱེ་འཇུག་ལ་དབང་སེམས་ཅན་སུམ་སྟོང་འདྲེན། །སླར་ཡང་ཤེས་སྒྲིབ་ཕྲ་བའི་ཕྲ་བ་ཉིད། །རྡོ་རྗེ་ལྟ་བུའི་ཏིང་འཛིན་གྱིས་བཅོམ་ནས། །གཞོན་ནུ་བུམ་སྐུ་ནང་གསལ་ཆེན་པོ་རུ། །སྐུ་ལྔ་ལྷུན་གྲུབ་ཡེ་ཤེས་གསུམ་དང་ལྡན། །མཛད་པ་གཞན་ངོར་སྐུ་གསུམ་ལུགས་འབྱུང་བ། །ལོ་ནི་གསུམ་བདུན་བཅུ་གཉིས་དབང་ཁྱད་ཀྱིས། །མངོན་རྫོགས་སངས་རྒྱས་འཇའ་ལུས་འོད་སྐུར་འགྲུབ། །རྟེན་ལ་ཁྱད་མེད་རྡོ་རྗེའི་ཚིག་ཆེན་ཡོད། །ཡལ་བར་མ་དོར་སྐལ་བཟང་རིགས་ལྡན་མ། །ཅེས་ཀྱང་ག་གཱས་སོ། །