ཐིག་ལེ་གཅིག་པ་ཞེས་བྱ་བ།
གཉིས་མེད་རྡོ་རྗེ།
དང་པོ། ཡི་གེ་ལ་སེམས་གཟུང་བའི་ཐིག་ལེ།
རྒྱ་གར་སྐད་དུ། །ཏི་ལ་ཀ་ཨེ་ཀ་ནཱ་མ། བོད་སྐད་དུ། ཐིག་ལེ་གཅིག་པ་ཞེས་བྱ་བ། འཕགས་པ་འཇམ་དཔལ་ཡེ་ཤེས་སེམས་དཔའ་ཆེན་པོ་ལ་ཕྱག་འཚལ་ལོ། །རང་བཞིན་བདེ་བ་བརྙེས་པ་ཡི། །ཡེ་ཤེས་སེམས་ལ་ཕྱག་འཚལ་ལོ། །དམིགས་པ་ལ་ནི་སེམས་བཞག་ནས། །སྦྱོར་པ་ཡེ་ཤེས་ཐིག་ལེ་བཤད། །སྣ་ཚོགས་ཆོས་ཀུན་ཤེས་རབ་ཀྱིས་བལྟས་ནས། །གཅིག་དང་དུ་མ་མཐའ་ཡིས་བརྟགས་པ་དང༌། །གཅིག་ཀྱང་མི་དམིགས་རང་བཞིན་སྟོང་པ་ཡིན། །ཐམས་ཅད་རིག་པའི་ངོ་བོར་གསལ་འགྱུར་པ། །གཉིས་ཀྱི་མཐའ་ཡིས་དབེན་པ་གཉིས་མེད་དེ། །རྣམ་པ་ཐམས་ཅད་ལྡན་པ་ཡེ་ཤེས་སྐུར། །བསྒོམས་ཏེ་ས་བོན་ཉིད་དུ་སེམས་གནས་བྱ། །དེ་ལ་དམིགས་པ་ཉེ་བ་ཉིད་དུ་གྱུར་པ་ནི། །གསལ་དང་མི་གསལ་ཕྱི་མའི་བློ་ཡིས་བརྟགས་ན་ཡིད་ཀྱི་ཡི་གེ་ཉིད། །རྗེས་ལ་འགྲོ་བ་རྣམ་པར་དག་བྱས་ལ། །རྟེན་དང་བརྟེན་པ་སྐུལ་བའི་ཀུ་རུ་བཞག །ཡི་གེ་ལ་སེམས་གཟུང་བའི་ཐིག་ལེ་དང་པོའོ།། །།
གཉིས་པ། རེག་བྱ་ལ་སེམས་གཟུང་བའི་ཐིག་ལེ།
ཐབས་དང་ཤེས་རབ་ཁ་སྦྱོར་ལ། །ཤིགས་པ་མེད་པའི་ཡི་གེ་ནས། །ཚངས་པའི་མིག་གསུམ་བཞི་ཡིས་བསྐོར། །དེ་ལ་རྣམ་ཤེས་བརྟན་པ་དང༌། །འདྲེན་པ་བརྒྱད་དང་དགུར་ལྡན་པའོ། །བདེ་བའི་ལྷག་པའི་བཟླས་པ་བྱ། །རེག་བྱ་ཆེན་པོ་སྐྱེས་པ་ནི། །ལྷག་པའི་ཐིག་ལེ་ཆེན་པོར་བསྡུ། །མཐར་ཕྱིན་རེག་བྱ་སྐྱེས་པ་ན། །སྟེང་གི་གནས་སུ་འཕོ་བར་བྱ། །རེག་བྱ་ལ་སེམས་གཟུང་བའི་ཐིག་ལེ་སྟེ་གཉིས་པའོ།། །།
གསུམ་པ། ཕྲ་མོ་ལ་སེམས་གཟུང་བའི་ཐིག་ལེ།
ཡེ་ཤེས་སེམས་དཔའ་རབ་མཛེས་སྐུ། །ཟླ་བ་ལྟར་རྒྱས་རྡོ་རྗེ་ལ། །བཅུ་དྲུག་ཐིག་ལེ་གཅིག་པ་གང༌། །བཅུ་
བདུན་ལྡན་པར་བཟླས་བྱ་སྟེ། །འཕོ་བ་འབྱུང་ལ་བཟླས་པ་བྱ། །འཇུག་པ་ཐིག་ལ་བཟླས་པ་བྱ། །གསལ་དང་བདེ་དང་ཡོངས་རྫོགས་ནས། །དབྱུ་གུ་དྲུག་ཅུའི་གྲངས་སུ་བགྲང༌། །ཕྲ་མོའི་རྣལ་འབྱོར་རྫོགས་འགྱུར་བ། །བག་དང་ལྡན་པའི་སྦྱོར་བས་བརྩམ། །ཕྲ་མོ་ལ་སེམས་གཟུང་བའི་ཐིག་ལེ་སྟེ་གསུམ་པའོ།། །།
བཞི་པ། ཡེ་ཤེས་ལ་སེམས་གཟུང་བའི་ཐིག་ལེ།
རྣམ་པར་ཤེས་པའི་རྡོ་རྗེའི་སྐུ། གངྒཱའི་ཀླུང་གི་སངས་རྒྱས་ཀྱིས། །བྱིན་གྱིས་བརླབས་ལ་བསྒོམ་པར་བྱ། །དེ་ཉིད་ཡེ་ཤེས་ཐིག་ལེ་བསྒོམ། །མི་ཤིགས་ས་བོན་འཛིན་པ་ཅན། །དྲན་པ་ལྷན་ཅིག་སྐྱེས་པ་གསལ། །འགྲོ་འོང་མེད་པར་ཉིན་མཚན་དུ། །ཡུལ་མིན་ཤེས་པའི་མཚན་ཉིད་ནི། །གནས་པའི་ཐིག་ལེ་རྫོགས་པ་ཡི། །ཅུང་ཟད་མི་གསལ་ཕྲ་མོར་གསང༌། །ཡེ་ཤེས་ལ་སེམས་གསང་བའི་ཐིག་ལེ་སྟེ་བཞི་པའོ།། །།
ལྔ་པ། ཐིག་ལེ་ཆེན་པོ་གྲུབ་པ་བསྟན་པ།
རྣལ་འབྱོར་ལམ་ལ་བསླབ་པ་ནི། །སྟེང་དང་འོག་གི་མདུད་པ་ལ། །ཨོཾ་དང་ཧཱུཾ་གི་ཐིག་ལེ་བལྟ། །ཐིག་ལེ་སྟོང་པའི་ས་བོན་ལས། །ཨཱ་ལི་ཀཱ་ལི་འཛག་པའི་ཕྲེང༌། །རླུང་གིས་མནན་ལ་སོ་ཀར་བསྟིམ། །དེ་ལ་ལེགས་རོལ་སྐྱེས་པ་དང༌། །འོག་གི་ཐིག་ལེ་སྟོང་པ་ལས། །ཉིས་འགྱུར་ཕུལ་ལ་སྟེང་དུ་བསྟིམ། །དེ་ལ་ལེགས་རོལ་སྐྱེས་བས་ན། །རང་འབྱུང་ཡེ་ཤེས་ཆེན་པོ་བསྒོམ། །དབང་པོ་ལྔ་ལ་ཡི་གེས་ཁྱབ། །ཡུལ་ལྔ་ལེགས་རོལ་ཆེན་པོར་བསྒོམ། །དེ་ནས་བཅོམ་ལྡན་འདས་མ་ལས། །ཐིག་ལེ་ཡི་གེ་མེད་པ་གཉིས། །དབུགས་འབྱུང་ཆེན་པོ་བདག་མེད་བསྒོམ། །ལྷན་ཅིག་སྐྱེས་དགའ་རྣ་བའི་དུས། །གསལ་སྟོང་བདེ་བ་དབྱེར་མེད་པ། །གཉུག་མ་ཉམས་སུ་མྱོང་བས་ཤེས། །གལ་ཏེ་མི་གསལ་གྱུར་པ་ན། །རྡོ་རྗེའི་བཟླས་པ་བརྩམ་པར་བྱ། །སྦྱོར་བ་ལས་བྱུང་འོད་གསལ་སེམས། །རྣམ་པར་ཤེས་པའི་ཆོས་ཉིད་འདས། །ཡེ་ཤེས་གཉིས་མེད་ཚུལ་འཆང་བ། །རྣམ་པར་རྟོག་མེད་ལྷུན་གྱིས་གྲུབ། །དུས་གསུམ་སངས་རྒྱས་ལས་བྱེད་པ། །སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་པ། །ཡེ་ཤེས་མིག་གཅིག་དྲི་མ་མེད། །ཡེ་ཤེས་ལུས་ཅན་དེ་བཞིན་གཤེགས། །ཐིག་ལེ་ཆེན་པོ་གྲུབ་པ་བསྟན་པ་སྟེ་ལྔ་པའོ།། །།མན་ངག་བདུད་རྩི་ལྟ་བུ་གྲོལ་བའི་རིམ་པ་ཐིག་ལ་གྲུབ་པ་གསལ་བྱེད་གཅིག་པ་བསྟན། འདི་ལས་བྱུང་བའི་བསོད་ནམས་ཇི་སྙེད་དེས། །བདེ་བ་ཆེན་པོའི་
གནས་དངོས་རྙེད་པར་ཤོག །ཐིག་ལེ་གཅིག་པ་ཞེས་བྱ་བ། །སློབ་དཔོན་དཔལ་ལྡན་གཉིས་སུ་མེད་པའི་རྡོ་རྗེས་མཛད་པ་རྫོགས་སོ།། །།རྣལ་འབྱོར་བ་བསོད་སྙོམས་པ་པྲ་ཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།།