གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

ཉ་ཊཱིཀ་ལས། ཡོན་ཏན་གསུམ་ལྡན་ནི་ངོ་བོ་ཉིད་སྐུ། ཞེས་དང༌། ཡོན་ཏན་ཕྱི་མ་གསུམ་གཟུགས་སྐུའི་དབང་དུ་བྱས་པའོ། །ཞེས་གསུངས་པ་མི་འཐད་པར་ཐལ། ཞང་སྟོན་གྱི་རྒྱུད་བླའི་འགྲེལ་བ་ལས། འདིར་རང་དོན་གྱི་ཡོན་ཏན་གསུམ་ཆོས་སྐུ་དང༌། གཞན་དོན་གྱི་ཡོན་ཏན་གསུམ་གཟུགས་སྐུ་ལ་སྦྱོར་བ་ནི་བྱམས་པ་དང་ཐོགས་མེད་ཀྱི་དགོངས་པར་མི་གསལ་བས་སྤྱིར་མ་ཕྱེ་བའི་སངས་རྒྱས་ལ་ཡོན་ཏན་དྲུག་སྦྱར་བར་བྱའོ། །ཞེས་གསུངས་པའི་ཕྱིར་ཞེ་ན་དཔྱད། ཡང་རྒྱུད་བླ་མ་ལས། དང་པོ་གསུམ་གྱིས་རང་དོན་ཏེ། །ཕྱི་མ་གསུམ་གྱིས་གཞན་དོན་ཡིན། །ཞེས་འདུས་མ་བྱས་པའི་ཡོན་ཏན་སོགས་གསུམ་རང་དོན་ཡིན་ཚུལ་དང༌། མཁྱེན་པའི་ཡོན་ཏན་སོགས་གསུམ་ནི་གཞན་དོན་ཡིན་པའི་རྒྱུ་མཚན་དང༌། རྒྱུད་བླ་མ་ལས། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དོ། །ཞེས་གསུངས་པའི་རྒྱུ་མཚན་དང༌། རྣམ་འགྲེལ་ལས། རྟོག་པའི་དྲ་བ་རྣམ་བསལ་ཞིང༌། །ཟབ་ཅིང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ། ཞེས་པའི་ཐད་དུ་བྲམ་ཟེའི་འགྲེལ་བཤད་ལས།ཕྱེད་སྔ་མས་ནི་རང་གི་དོན་ཕུན་སུམ་ཚོགས་པ་བརྗོད་ལ། ཕྱི་མས་ནི་གཞན་གྱི་དོན་ཕུན་སུམ་ཚོགས་པའོ། །ཞེས་དང༌། རྣམ་འགྲེལ་འགྲེལ་བཤད་རིན་ཕྲེང་ལས། རྫོགས་པའི་སངས་རྒྱས་ལ་ཆོས་ཅན། རང་དོན་ཕུན་ཚོགས་མངའ་སྟེ། མཐར་ཕྱིན་པའི་སྐུ་གསུམ་བརྙེས་པས་སོ། །ཞེས་སོགས་གསུངས་པའི་རྒྱུ་མཚན་རྣམས་འགལ་མི་འགལ་དང་དེ་དག་གིས་བསྟན་པའི་རང་དོན་གཞན་དོན་འགལ་མི་འགལ་དཔྱད་པར་བྱའོ། །ཀུན་རྫོབ་གཟུགས་སྐུ་ལ་ངོ་བོ་ཉིད་སྐུའི་ཡོན་ཏན་དང་འདུས་མ་བྱས་པའི་ཡོན་ཏན་ལྡན་ཚུལ་སོགས་ལ་དཔྱད་པར་བྱའོ། །ཆོས་དཀོན་མཆོག་ལ་འགོག་ལམ་གང་རུང་གིས་ཁྱབ་ན་གསུང་རབ་ལུང་གི་ཆོས་དེ། ཆོས་དཀོན་མཆོག་མ་ཡིན་པར་འགྱུར་ལ། དེ་མི་རིགས་ཏེ། གསུང་རབ་ལུང་གི་ཆོས་གནས་སྐབས་སྐྱབས་ཡིན་ཀྱང་མཐར་ཐུག་གི་སྐྱབས་མ་ཡིན་པར་གསུངས་པའི་ཕྱིར་ཏེ། ལྷན་ཐབས་འོད་བརྒྱ་འབར་བ་ལས། ཆོས་དཀོན་མཆོག་ནི་ལུང་དང་རྟོགས་པ་གཉིས་ལས། དང་པོ་ནི། ཆོས་གསུང་རབ་མིང་ཚིག་ཡི་གེར་སྣང་བ་དང༌། ངག་ཏུ་བརྗོད་པ་རྣམས་ཡིན་ལ། ཞེས་དང༌། ཞང་སྟོན་རྒྱུད་བླའི་འགྲེལ་བ་ལས། ངེས་པའི་དོན་དུ་ན་ཆོས་དང་དགེ་འདུན་གཉིས་སྐྱབས་མ་ཡིན་ཏེ། ཆོས་ལ་ལུང་དང་རྟོགས་པ་གཉིས་ལས་ལུང་ནི་ལམ་མངོན་པར་རྟོགས་པ་ན་ཆུར་བརྒལ་ཟིན་གྱི་གཟིངས་བཞིན་དུ་ས་ལ་དོར་བར་བྱ་བ་ཡིན་པའི་ཕྱིར་རོ། །ཞེས་སོགས་གསུངས་པའི་ཕྱིར་ཟེར་ན་དཔྱད་དོ། །ཡང་ཉ་ཊཱིཀ་ལས། སངས་རྒྱས་མིན་པའི་དེའི་མཚན་ཉིད་ནི་རིག་གྲོལ་གྱི་ཡོན་ཏན་གྱི་འཕགས་པ་སློབ་པ་ཕྱིར་མི་ལྡོག་ཅེས་པའོ། །ཞེས་པ་ལྟར་སློབ་པ་ཐེག་ཆེན་དགེ་འདུན་དཀོན་མཆོག་ལ་ཕྱིར་མི་ལྡོག་གི་དགེ་འདུན་དགོས་ན་དབང་རྟུལ་མཐོང་ལམ་པ་སོགས་ཀྱིས་ངེས་མ་ངེས་དཔྱད་པར་བྱའོ། །ཡང་ཉ་ཊཱིཀ་ལས། དེ་གསུམ་རིག་པའོ། །ཞེས་པ་ནས། དམན་པའི་སྒྲིབ་པ་མེད་པ་སྟེ་དེ་གསུམ་གྲོལ་བའོ། །ཞེས་རིག་པའི་ཡོན་ཏན་གསུམ་དང་གྲོལ་བའི་ཡོན་ཏན་གསུམ་སྦྱར་བ་མི་འཐད་པར་ཐལ། དེ་ལྟར་རྒྱུད་བླ་ཐོགས་འགྲེལ་སོགས་རྒྱུད་བླའི་འགྲེལ་བ་ཚད་ལྡན་ན་མི་སྣང་བ་དང༌། གྲོལ་བ་གསུམ་གྱི་ནང་ནས་ཕྱི་མ་དམན་སྒྲིབ་ལས་གྲོལ་བ་ཞེས་རྒྱུད་བླ་རྩ་འགྲེལ་ན་མེད་པས་སོ། །ཞེ་ན་དཔྱད་པར་བྱའོ། །ཡང་ཉ་ཊཱིཀ་ལས། འདིར་ཐེག་དམན་གྱི་དགེ་འདུན་ནི་གཞན་ཕན་གྱི་བསམ་པ་མ་དག་པས་མཆོད་པའམ་སྐྱབས་ཀྱི་འོས་མིན་པས་མ་སྨོས་སོ། །ཞེས་གསུངས་པ་ལྟར་ཡིན་ན་ཐེག་ཆེན་གྱི་དགེ་བའི་བཤེས་གཉེན་དུ་གྱུར་བའི་ཐེག་དམན་པ་ཡོད་ལ་དེ་ལ་ཐེག་ཆེན་པ་སྐྱབས་སུ་འགྲོ་མི་འགྲོ་དཔྱད་པར་བྱའོ། །ཡང་སྤང་ཕྱིར་བསླུ་བའི་ཆོས་ཅན་ཕྱིར། །མེད་ཕྱིར་འཇིགས་དང་བཅས་པའི་ཕྱིར། །ཆོས་རྣམ་གཉིས་དང་འཕགས་པའི་ཚོགས། །གཏན་གྱི་སྐྱབས་མཆོག་མ་ཡིན་ནོ། །དམ་པའི་དོན་དུ་འགྲོ་བ་ཡི། །སྐྱབས་ནི་སངས་རྒྱས་ཉག་གཅིག་ཡིན། །ཐུབ་པ་ཆོས་ཀྱི་སྐུ་ཅན་ཕྱིར། །ཚོགས་ཀྱང་དེ་ཡི་མཐར་ཐུག་ཕྱིར། །ཞེས་པའི་དོན་ཉ་ཊཱིཀ་ལས། ཆོས་ལ་གཉིས་ཀྱི་ལུང་གི་ཆོས་ནི་ལམ་མངོན་པར་རྟོགས་པའི་མཐར་ཐུག་པ་ཙམ་ཡིན་པས་གཟིངས་ལྟ་བུ་སྟེ་རྟོགས་པའི་ཆོས་ཡིད་ལ་བྱེད་པ་ན་སྤང་བྱ་ཡིན་པའི་ཕྱིར་དང༌། རྟོགས་པའི་ཆོས་སློབ་པའི་ལམ་བདེན་ནི་བརྫུན་པ་བསླུ་བའི་ཆོས་ཅན་གྱི་ཕྱིར་དང༌། འགོག་བདེན་ནི་ཉན་ཐོས་ཀྱི་ཚུལ་གྱིས་ཉོན་མོངས་དང་སྡུག་བསྔལ་མེད་པ་ཙམ་གྱིས་རབ་ཏུ་ཕྱེ་ལ་དེ་ལྟར་ན་མེད་དགག་ཙམ་ལས་དོན་ལ་མ་འདས་པས་མེད་པ་ནི་སྐྱབས་སུ་འོས་པ་མ་ཡིན་ནོ། །འདིས་རང་སྟོང་པའི་ལུགས་ཀྱི་འགོག་བདེན་མཐར་ཐུག་ཡང་སྐྱབས་མིན་པར་བསྟན་ནོ། །དགེ་འདུན་ཡང་འདིར་ཉན་རང་གི་ཐམས་ཅད་དང༌། ཐེག་ཆེན་སློབ་པ་སྟེ་དེ་ཡང་འཇིགས་པ་དང་བཅས་པ་འཇིགས་པ་དེ་ལས་ངེས་པར་འབྱུང་བ་ཚོལ་བ་དེ་པ་ལ་སྐྱབས་སུ་སོང་བ་སློབ་པ་བྱ་བ་དང་བཅས་པའོ། །ཞེས་པ་ནས། ཐུབ་པ་ནི་རྣམ་བྱང་གི་བདེན་པ་གཉིས་ཀྱི་མཚན་ཉིད་ཅན་གྱི་ཆོས་སྐུ་མངའ་བ་དང་ཐེག་པ་གསུམ་གྱི་ཚོགས་ཀྱང་ཆོས་སྐུ་རྣམ་དག་དེ་ཐོབ་པས་མཐར་ཕྱིན་པར་འགྱུར་བའི་ཕྱིར་རྟག་པའི་སྐྱབས་གཡུང་དྲུང་གི་སྐྱབས་དོན་དམ་པའི་སྐྱབས་ནི་གཅིག་ཉིད་དེ། འདི་ལྟ་སྟེ་དེ་པ་དགྲ་བཅོམ་ཡང་དག་པར་རྫོགས་པའི་སངས་རྒྱས་སོ། །འདི་རྒྱས་པར་དཔལ་ཕྲེང་གི་མདོ་བཞིན་རྟོགས་པར་བྱའོ་ཞེས་སོ། །འདིར་ལམ་བདེན་ནི་སློབ་ལམ་གྱི་དབང་དུ་བྱས་པ་སྟེ་ཐུབ་པ་ནི་རྣམ་པར་བྱང་བའི་བདེན་པ་གཉིས་ཀྱི་ཞེས་སོགས་བཤད་པས་སོ། །ཞེས་ལམ་བདེན་དང་དགེ་འདུན་སློབ་པ་ལ་སྦྱར་དགོས་པ་ནི་སངས་རྒྱས་སའི་ལམ་བདེན་གཏན་གྱི་སྐྱབས་ཡིན་པས་རྒྱུ་མཚན་གྱིས་ཡིན་ནམ་ཅི། ཡིན་ན་སངས་རྒྱས་ཀྱི་སའི་ལམ་བདེན་ཆོས་ཅན། གཏན་གྱི་སྐྱབས་མ་ཡིན་པར་ཐལ། བསླུ་བའི་ཆོས་ཅན་ཡིན་པའི་ཕྱིར་ཏེ། འདུས་བྱས་ཡིན་པའི་ཕྱིར། ཁྱབ་སྟེ། ཞང་སྟོན་པའི་རྒྱུད་བླའི་འགྲེལ་བ་ལས། ལམ་ནི་འདུས་བྱས་ཡིན་པས་བརྫུན་པ་བསླུ་བའི་ཆོས་ཅན་ཡིན་པའི་ཕྱིར་རོ། །ཞེས་གསུངས་པའི་ཕྱིར་ཞེ་ན་འདིའི་སྐབས་ཀྱི་འགྲེལ་བ་དག་ལ་བརྟེན་ནས་ཞིབ་པར་དཔྱད་པར་བྱའོ། །