དྲིས་ལན་གཉིས་པ་ལ་དྲི་ལན་གཉིས་ལས།

དྲིས་ལན་གཉིས་པ་ལ་དྲི་ལན་གཉིས་ལས།

དང་པོ་ནི། བྱང་ཕྱོགས་ཀྱི་སྡེ་ཚན་བདུན་ལས་དང་པོ་གསུམ་གྱི་མཚན་ཉིད་དབྱེ་བ་ས་མཚམས་དམིགས་རྣམ་གང་ཡིན་ཞེས་པའོ། །གཉིས་པ་ལན་ནི། དྲན་པ་ཉེར་བཞག་བཤད་པ་ལ། དམིགས་པ་ནི། བྱིས་པ་རྣམས་བདག་གི་རྟེན་ནམ་གནས་སུ་རྟོག་པའི་གཞི་ལུས་དང༌། བདག་གི་ལོངས་སྤྱོད་དུ་རྟོག་པའི་གཞི་ཚོར་བ་དང༌། བདག་གི་ངོ་བོར་རྟོག་པའི་གཞི་སེམས་དང༌། བདག་ཀུན་ནས་ཉོན་མོངས་པར་དང་རྣམ་བྱང་དུ་འགྱུར་བར་འཁྲུལ་གཞི་དད་སོགས་དགེ་བ་དང༌།ཆགས་སོགས་ཉོན་མོངས་པའི་ཆོས་རྣམས་ཡིན་ནོ། །རྣམ་པ་ནི། ནང་དང་ཕྱི་དང་གཉིས་ཀའི་ལུས་ཚོར་སེམས་ཆོས་རྣམས་ལ་ལུས་ཚོར་སེམས་ཆོས་ཀྱི་རྗེས་སུ་མཐུན་པའོ། །ངོ་བོ་ནི། ངོ་བོ་ཤེས་རབ་དང་དྲན་པ་ཅི་རིགས་ཀྱི་མངོན་རྟོགས་དེ་ཡིན་ཏེ། ཀུན་བཏུས་ལས།ངོ་བོ་ཉིད་གང་ཞེ་ན། ཤེས་རབ་དང་དྲན་པའོ། །ཞེས་དང༌། མཛོད་དུ། དྲན་པ་ཉེར་བཞག་ཤེས་རབ་སྟེ། །ཞེས་གསུངས་པས་སོ། །མཚན་ཉིད་ནི། བདེན་པ་བཞི་ལ་འཇུག་པར་བྱ་བའི་ཕྱིར་དངོས་པོ་ལ་ལེགས་པར་རྟོག་པའི་ཤེས་རབ་དང་དྲན་པ་གང་རུང་ངམ་དེ་དང་མཚུངས་ལྡན་ཅི་རིགས་ཀྱི་རིགས་སུ་གནས་པ་དེ། དྲན་པ་ཉེར་བཞག་གི་མཚན་ཉིད་ཡིན་ཏེ། ཉ་ཊཱིཀ་ལས། བདེན་པ་བཞི་ལ་འཇུག་པར་བྱ་བའི་ཕྱིར་དངོས་པོ་ལ་ལེགས་པར་རྟོག་པའི་ཤེས་རབ་དང་དྲན་པ་མཚུངས་ལྡན་གཙོ་བོར་གྱུར་པའོ། །ཞེས་གསུངས་པས་སོ། །རིགས་གནས་མ་སྦྱར་ན་སངས་རྒྱས་ཀྱི་དྲན་ཉེ་ལ་མ་ཁྱབ་པར་སྣང་ངོ༌། །ཀུན་བཏུས་ས་འགྲེལ་ལས། དབུས་མཐར།གནས་ངན་ལེན་ཕྱིར་སྲེད་རྒྱུའི་ཕྱིར། །གཞི་ཡི་ཕྱིར་དང་མ་རྨོངས་ཕྱིར། །བདེན་པ་བཞི་ལ་འཇུག་བྱ་བས། །དྲན་པ་ཉེ་བར་བཞག་པ་བསྒོམ། །ཞེས་པ་ལྟར་ལུས་འདུ་བྱེད་གནས་ངན་ལེན་གྱིས་ཕྱེ་བར་རིག་ནས་སྡུག་བསྔལ་དང༌། ཚོར་བ་སྲེད་པའི་རྒྱུར་རིག་ནས་ཀུན་འབྱུང་དང༌། སེམས་བདག་ཏུ་ཞེན་པའི་གཞིར་རིག་ཅིང་བདག་ཆད་ཀྱིས་དོགས་ནས་མྱང་འདས་ལ་སྐྲག་པ་མེད་པས་འགོག་པ་དང༌། ཆོས་ཉོན་མོངས་རྣམ་བྱང་སྤང་གཉེན་དུ་ཤེས་ཤིང་མ་རྨོངས་པས་ལམ་ལ་འཇུག་པས་ན་འཕགས་པའི་བདེན་པ་བཞི་ལ་འཇུག་པ་དང༌། ཟག་བཅས་ཀྱི་ལུས་ལ་སོགས་པ་བཞིའི་ས་བོན་དང༌། བྲལ་བའི་རིམ་གྱིས་ཐོབ་པའོ། །ཞེས་གསུངས་པའི་ཕྱིར་རོ། །སྒྲ་དོན་ནི། དབྱིག་གཉེན་ནི། ཤེས་རབ་འདིས་དྲན་པ་ཉེ་བར་འཇོག་པས་དྲན་པ་ཉེར་གཞག་སྟེ། ཇི་ལྟར་འཇོག་ན། ཤེས་རབ་ཀྱིས་དོན་ཇི་ལྟར་མཐོང་བ་བཞིན་དུ་དྲན་པས་མངོན་དུ་འཛིན་པའི་ཕྱིར་རོ། །ཞེས་དང༌། བྱེ་བྲག་སྨྲ་བ་ནི། ཤིང་གཤེག་པ་ཁྱེའུས་འཛིན་པ་ལྟར་དྲན་པའི་སྟོབས་བསྐྱེད་པས་ཤེས་རབ་དམིགས་པ་ལ་འཇུག་པས་དེ་སྐད་དོ། །ཞེས་སོ། །དབྱེ་བ་ལ། ལུས་གཙང་ཚོར་བ་བདེ། སེམས་རྟག་ཆོས་བདག་ཏུ་ཕྱིན་ཅི་ལོག་བཞིའི་གཉེན་པོར་ལུས་ཚོར་སེམས་ཆོས་དྲན་པ་ཉེར་བཞག་བཞིར་ངེས་སོ། །དེ་ཡང་འདིར་ཚོགས་ལམ་ཆུང་ངུ་ནས་ས་བཅུའི་བར་རོ། །སྤྱིར་སངས་རྒྱས་ལ་ཡང་ངོ༌། །ཞེས་ཉ་ཊཱིཀ་ལས་སོ། །གྲོགས་ནི། དེ་དང་མཚུངས་ལྡན་གྱི་སེམས་སེམས་བྱུང་རྣམས་ཡིན་ཏེ། ཀུན་བཏུས་ལས། གྲོགས་གང་ཞེ་ན། དེ་དང་མཚུངས་པར་ལྡན་པའི་སེམས་དང་སེམས་ལས་བྱུང་བའི་ཆོས་རྣམས་སོ། །ཞེས་གསུངས་པའི་ཕྱིར་རོ། །སངས་རྒྱས་ཀྱི་དྲན་པ་ཉེར་བཞག་ཆོས་ཅན། བདེན་པ་བཞི་ལ་འཇུག་པར་བྱ་བའི་ཆེད་ཡིན་པར་ཐལ། དྲན་པ་ཉེར་བཞག་ཡིན་པའི་ཕྱིར། ཁྱབ་སྟེ། ཉ་ཊཱིཀ་ལས། འདི་ལ་མཚན་ཉིད་ནི། བདེན་པ་བཞི་ལ་འཇུག་པར་བྱ་བའི་ཕྱིར་དངོས་པོ་ལ་ལེགས་པར་རྟོག་པའི་ཤེས་རབ་དང་དྲན་པ་མཚུངས་ལྡན་གཙོ་བོར་གྱུར་པའོ། །ཞེས་གསུངས་པའི་ཕྱིར་ན་མ་ཁྱབ་སྟེ་སློབ་པའི་དྲན་པ་ཉེར་བཞག་ལ་བདེན་པ་བཞི་ཅི་རིགས་ལ་འཇུག་ཕྱིར་དུ་སྒོམ་པ་ཡིན་ལ་སངས་རྒྱས་ཀྱི་དྲན་པ་ཉེར་བཞག་ཀྱང་དེའི་རིགས་སུ་གནས་པ་ཡིན་ཞེས་བཤད་ན་ལེགས་སམ་དཔྱད། ཡང་དྲན་པ་ཉེར་བཞག་ལ་དེ་འདྲའི་ཤེས་རབ་དང་དྲན་པ་མཚུངས་ལྡན་དགོས་པར་ཐལ། ཉ་ཊཱིཀ་ལས་བཤད་པའི་མཚན་ཉིད་དེའི་ཕྱིར་ན་མ་ཁྱབ་པོ། །ཡང་དག་པར་སྤོང་བ་བཞི་བཤད་པ་ལ། དམིགས་པ་ནི། མི་དགེ་བ་སྐྱེས་པ་དང་མ་སྐྱེས་པ་དང༌། དགེ་བ་སྐྱེས་པ་དང༌། མ་སྐྱེས་པ་རྣམས་ཡིན་ནོ། །གཉིས་པ་ངོ་བོ་ནི་བརྩོན་འགྲུས་ཡིན་ཏེ། ཀུན་བཏུས་ལས།ངོ་བོ་ཉིད་གང་ཞེ་ན། བརྩོན་འགྲུས་སོ། །ཞེས་དང༌། མཛོད་ལས། བརྩོན་འགྲུས་ཡང་དག་འཇོག་ཅེས་བྱ། །ཞེས་གསུངས་པའི་ཕྱིར་རོ། །མཚན་ཉིད་ནི། དྲན་པ་ཉེར་བཞག་བསྒོམས་པས་སྤང་གཉེན་ཤེས་ནས་དེ་གཉིས་ལ་བླང་དོར་བྱ་བའི་ཕྱིར་ཉེས་པའི་གཉེན་པོར་བསྒོམ་པའི་བརྩོན་འགྲུས་སམ་དེ་དང་མཚུངས་ལྡན་ཅི་རིགས་དེ་ཡིན་ཏེ། རྒྱན་ལས། བརྟན་པ་རྣམས་ཀྱི་ཡང་དག་སྤོང༌། །ལུས་ཅན་ཀུན་དང་མཚུངས་པ་མེད། །དྲན་པ་ཉེ་བར་བཞག་པ་ཡི། །ཉེས་པ་རྣམས་ཀྱི་གཉེན་པོར་བསྒོམས། །ཞེས་དང༌། དེའི་ས་འགྲེལ་ལས། མཚན་ཉིད་མདོར་བསྟན་ནི། བརྟན་པ་བྱང་ཆུབ་སེམས་དཔའ་རྣམས་ཀྱིས་སྤང་བྱ་མི་དགེ་བའི་ཆོས་མ་སྐྱེས་པ་མི་སྐྱེད་པ་དང་སྐྱེས་པ་སྤོང་བ་དང༌། གཉེན་པོ་དགེ་བའི་ཆོས་མ་སྐྱེས་པ་སྐྱེད་པ་དང་སྐྱེས་པ་སྤེལ་བའི་ཆེད་དུ་འདུན་པ་བསྐྱེད་ནས་འབད་ཅིང༌། བརྩོན་འགྲུས་རྩོམ་པའི་ཡང་དག་པར་སྤོང་བ་བཞི་ནི་རང་གཞན་ཐམས་ཅད་ཀྱི་དོན་དུ་སྒོམ་པའི་ཕྱིར་ཉན་རང་ལ་སོགས་པའི་ལུས་ཅན་ཀུན་གྱི་ཡང་དག་སྤོང་བ་དང་མཚུངས་པ་མེད་ཅིང་ཁྱད་པར་དུ་འཕགས་པ་ཡིན་ལ། དེ་ཡང་སྔར་བཤད་པའི་དྲན་པ་ཉེ་བར་བཞག་པ་བཞི་པོའི་མི་མཐུན་ཕྱོགས་བདག་གཉིས་འཛིན་པ་ལ་སོགས་པའི་ཉེས་པ་རྣམས་ཀྱི་གཉེན་པོར་བསྒོམ་པའོ། །དབུས་མཐར།མི་མཐུན་ཕྱོགས་དང་གཉེན་པོ་རྣམས། །རྣམ་པ་ཐམས་ཅད་ཡོངས་ཤེས་ནས། །དེ་དག་སྤང་ཕྱིར་བརྩོན་འགྲུས་ནི། །རྣམ་པ་བཞི་དག་རབ་ཏུ་འབྱུང༌། །ཞེས་སོ། །ཉ་ཊཱིཀ་ལས། མཚན་ཉིད་ནི། དྲན་པ་ཉེར་བཞག་བསྒོམས་པས་སྤང་གཉེན་ཤེས་ནས་དེ་གཉིས་ལ་བླང་དོར་བྱ་བའི་ཕྱིར་ཉེས་པའི་གཉེན་པོར་བསྒོམ་པའི་བརྩོན་འགྲུས་སོ། །ཞེས་གསུངས་སོ། །མཚོན་བྱ་ནི། མི་དགེ་བ་ཡང་དག་པར་སྤོང་བས་དེ་སྐད་བརྗོད་དོ། །དགེ་བ་སྐྱེད་པ་སོགས་ཀྱང་མི་དགེ་བ་སྤོང་བ་ཡིན་ནོ། །དབྱེ་བ་ནི། དྲན་པ་ཉེར་བཞག་བསྒོམས་པ་དེའི་འོག་ཏུ་དངོས་པོ་ལ་བརྟགས་ནས་ཞུགས་པ་ལ་སྒྲིབ་པ་སྤོང་བའི་བརྩོན་འགྲུས་འབྱུང་བས། དེ་ཙམ་ཞིག་དབྱེ་གཞིའོ། །དབྱེ་བ་ནི། མི་དགེ་བ་སྐྱེས་པ་ཡང་དག་པར་སྤོང་བའི་རྒྱུའི་བརྩོན་འགྲུས། མ་སྐྱེས་པ་མི་བསྐྱེད་པའི་རྒྱུའི་བརྩོན་འགྲུས། གོ་རིམ་བཞིན་དུ་དགེ་བ་སྐྱེས་པ་འཕེལ་བའི་རྒྱུའི་བརྩོན་འགྲུས། མ་སྐྱེས་པ་བསྐྱེད་པའི་རྒྱུའི་བརྩོན་འགྲུས་བཞིའོ། །ངོ་བོ་གཅིག་གམ་ཐ་དད་ནི། ངོ་བོ་གཅིག་པ་སྟེ་སྡིག་པ་སྐྱེས་པ་སྤོང་བའང་དགེ་བ་བསྐྱེད་པ་ཡིན་པ་སོགས་ཡིན་པར་ཉ་ཊཱིཀ་ལས་སོ། །གྲངས་ངེས་ནི། སྡིག་པའི་གཉེན་པོ་སྟོབས་བཞིར་ངེས་པ་ལས་ཏེ། སྡིག་པ་བྱས་པ་ལ་འགྱོད་སེམས་དུག་འཐུངས་བ་ལྟར་ཡིད་ལ་བྱེད་པ་རྣམ་པར་སུན་འབྱིན་པའི་སྟོབས། ད་ཕྱིན་ཆད་སྲོག་གི་ཕྱིར་ཡང་མི་བྱ་སྙམ་ནས་སྤོང་བ་ཉེས་པ་ལས་སླར་ལྡོག་པའི་སྟོབས་ཏེ། དེ་གཉིས་ལས་དང་པོ་གཉིས་སུ་ངེས། སྡིག་པ་བྱས་རྗེས་སུ་སྔར་བླངས་པའི་གསུམ་ལ་སྐྱབས་སུ་འགྲོ་བ་སོགས་མངོན་དུ་བྱེད་ན་རྟེན་གྱི་སྟོབས། དེའི་གཉེན་པོ་བདག་མེད་བསྒོམ་པ་དང་སྡིག་བཤགས་འབད་ནས་བྱེད་པ་སོགས་གཉེན་པོ་ཀུན་ཏུ་སྤྱོད་པའི་སྟོབས་ཏེ། དེ་གཉིས་ལས་ཕྱི་མ་གཉིས་སུ་ངེས་སོ། །ས་མཚམས་ནི། འདིར་བྱང་སེམས་ལ་ནི་ལམ་བཞི་ཡོད་ལ། སྤྱིར་ཚོགས་ལམ་འབྲིང་ནས་སངས་རྒྱས་བར་ནའོ། །གསུམ་པ་གྲོགས་ནི། དེ་དག་དང་མཚུངས་ལྡན་གྱི་སེམས་དང་སེམས་བྱུང་རྣམས་ཡིན་ནོ། །ཡང་དག་སྤོང་བཞིའི་དམིགས་པ་ལ་ཉ་ཊཱིཀ་ལས། མི་དགེ་བ་སྐྱེས་མ་སྐྱེས་དང༌། དགེ་བ་སྐྱེས་མ་སྐྱེས་སོ། །ཞེས་དགེ་མི་དགེ་མ་སྐྱེས་པའི་མཚན་གཞི་གང་ཡིན་དང༌། ཚིག་གི་འཁྲི་ཚུལ་མི་དགེ་བ་མ་སྐྱེས་པ་སྐྱེ་བ་མི་སྲིད་པས་དེ་མི་སྐྱེ་བ་ལ་འབད་པ་དོན་ཡོད་མེད་དཔྱད། ཡང་དག་སྤོང་ལ་བརྩོན་འགྲུས་ཀྱིས་ཁྱབ་པར་ཐལ། གནོད་འཇོམས་ལས། ཡང་དག་པར་སྤོང་བ་བཞི་ཞེས་བྱ་ནི། འདིས་སེམས་ཡང་དག་པར་འཇོག་པས་ན་ཡང་དག་པར་འཇོག་པ་ཞེས་བྱ་སྟེ་བརྩོན་འགྲུས་སོ། །བརྩོན་འགྲུས་དེ་ཡང་སྦྱོར་བའི་བྱེ་བྲག་གི་རྣམ་པ་བཞིར་གྱུར་པས་ན་བཞི་ཞེས་བྱའོ། །ཞེས་དང༌། ཉ་ཊཱིཀ་ལས། མཚན་ཉིད་ནི། དྲན་པ་ཉེར་བཞག་བསྒོམས་པས་སྤང་གཉེན་ཤེས་ནས་དེ་གཉིས་ལ་བླང་དོར་བྱ་བའི་ཕྱིར་ཉེས་པའི་གཉེན་པོར་བསྒོམ་པའི་བརྩོན་འགྲུས་སོ། །ཞེས་གསུངས་པའི་ཕྱིར་ཟེར་ན་མ་ཁྱབ་སྟེ། གཙོ་བོའི་མིང་གིས་མཚུངས་ལྡན་དག་ལ་བཤད་པར་སྣང་བའི་ཕྱིར། གོང་དུ་འདོད་མི་ནུས་ཏེ། དེ་འདྲའི་བརྩོན་འགྲུས་དང་མཚུངས་ལྡན་དང་བཅས་པ་ཡང་དག་སྤོང་བ་ཡིན་པའི་ཕྱིར། དེར་ཐལ། མཛོད་ལས། གཞན་ནི་འབྲེལ་དང་དམིགས་པ་ལས། །ཞེས་དང༌། དེའི་རང་འགྲེལ་ལས། དེ་དང་ལྷན་ཅིག་རྒྱན་གྱི་ས་འགྲེལ་ལས། གཙོ་བོ་སྨོས་པས་དེ་དག་ནི། །སྦྱོར་བྱུང་ཡོན་ཏན་རྣམས་ཀྱང་ཡིན། །ཞེས་པ་ལྟར་ཡིན་པ་དང༌། ཞེས་གསུངས་པའི་ཕྱིར། ཡང་ཉ་ཊཱིཀ་ལས། ངོ་བོ་གཅིག་པ་སྟེ་སྡིག་པ་སྐྱེས་པ་སྤོང་བའང་དགེ་བ་བསྐྱེད་པ་ཡིན་པ་སོགས་སོ། །ཞེས་སོགས་ཀྱིས་ཡང་དག་སྤོང་བཞི་ཡིན་ཁྱབ་མཉམ་ཡིན་མིན་དཔྱད། ཡང་ཉ་ཊཱིཀ་ལས། སྤྱིར་ཚོགས་ལམ་འབྲིང་ནས་སངས་རྒྱས་བར་ནའོ། །ཞེས་དང༌། མཚན་ཉིད་ཀྱི་ཟུར་ལ་ཉ་ཊཱིཀ་ལས།དེ་གཉིས་ལ་བླང་དོར་བྱ་བའི་ཕྱིར་ཉེས་པའི་གཉེན་པོར་བསྒོམ་པའི་བརྩོན་འགྲུས་སོ། །ཞེས་སོགས་ཀྱིས་སངས་རྒྱས་ཀྱི་ས་ན་མི་དགེ་བའི་ཆོས་སྐྱེས་པ་སྤོང་བར་བྱེད་པ་དང༌།དགེ་བའི་ཆོས་མ་སྐྱེས་པ་སྐྱེད་པར་བྱེད་པ་དང༌། བླང་དོར་བྱ་བའི་ཕྱིར་ཉེས་པའི་གཉེན་པོར་བསྒོམ་པའི་བརྩོན་འགྲུས་ཡོད་མེད་དཔྱད་པར་བྱའོ། །རྫུ་འཕྲུལ་གྱི་རྐང་པ་བཞི་བཤད་པ་ལ། དམིགས་པ་ནི། ཏིང་ངེ་འཛིན་གྱིས་གྲུབ་པའི་རྫུ་འཕྲུལ་བསྒྱུར་བ་ལ་སོགས་པའི་བྱ་བ་ཡིན་ཏེ། ཀུན་བཏུས་ལས། རྫུ་འཕྲུལ་གྱི་རྐང་པ་རྣམས་ཀྱི་དམིགས་པ་གང་ཞེ་ན། ཏིང་ངེ་འཛིན་གྱིས་གྲུབ་པའི་བྱ་བའོ། །ཞེས་གསུངས་པས་སོ། །ངོ་བོ་ནི། ཏིང་ངེ་འཛིན་ཏེ། ངོ་བོ་ཉིད་ནི་ཏིང་ངེ་འཛིན་ཡིན་ཏེ། ཀུན་བཏུས་ལས། ངོ་བོ་ཉིད་གང་ཞེ་ན། ཏིང་ངེ་འཛིན་ཏོ། །ཞེས་དང༌། མཛོད་དུ། རྗུ་འཕྲུལ་རྐང་བ་ཏིང་ངེ་འཛིན། །ཞེས་གསུངས་པས་སོ། །མཚན་ཉིད་ནི། རང་གི་བདག་རྐྱེན་སྤོང་བའི་འདུ་བྱེད་བརྟེན་པ་ལས་བྱུང་བའི་སེམས་གནས་པ་ལས་སུ་རུང་བའི་ཏིང་ངེ་འཛིན་ནམ་དེ་དང་མཚུངས་ལྡན་ཅི་རིགས་དེ། རྫུ་འཕྲུལ་གྱི་རྐང་བའི་མཚན་ཉིད་ཡིན་ཏེ། ཉ་ཊཱིཀ་ལས། མཚན་ཉིད་ནི། རང་གི་བདག་རྐྱེན་སྤོང་བའི་འདུ་བྱེད་བརྟེན་པ་ལས་བྱུང་བའི་སེམས་གནས་པ་ལས་སུ་རུང་བའི་ཏིང་ངེ་འཛིན་ནོ། །དབུས་མཐར། དེར་གནས་ལས་སུ་རུང་བ་ཉིད། །དོན་རྣམས་ཐམས་ཅད་འབྱོར་བར་འགྱུར། །ཉེས་པ་ལྔ་སྤོང་འདུ་བྱེད་བརྒྱད། །བརྟེན་ པའི་རྒྱུ་ལས་བྱུང་བའོ། །ཞེས་སོ། །སྒྲ་བཤད་ནི། མངོན་ཤེས་ལ་སོགས་པ་དོན་ཐམས་ཅད་འགྲུབ་པར་བྱེད་པ་ནི་རྫུ་འཕྲུལ་ལོ། །དེའི་གནས་ཡིན་པས་རྫུ་འཕྲུལ་གྱི་རྐང་བ་ཞེས་བྱ་སྟེ་རྒྱུ་ཞེས་པའི་ཐ་ཚིག་གོ ། ཞེས་བློ་བརྟན་ནོ། །རྫུ་འཕྲུལ་གྱི་རྟེན་ཡིན་པ་སྟེ་འདི་དག་གི་སྟོབས་ཀྱིས་རྫུ་འཕྲུལ་བྱེད་པའི་ཕྱིར། རྫུ་འཕྲུལ་ནི་འཇིག་རྟེན་ལས་འདས་པའི་ཆོས། རྐང་བ་ནི་གཞི་དང་གནས་སུ་གྱུར་པའི་ཕྱིར། ཞེས་གནོད་འཇོམས་དག་ཟླ་གསུམ་ན་བཤད་ཅེས་ཉ་ཊཱིཀ་མཆན་ལས་སོ། །དབྱེ་བ་ནི། སྒྲིབ་པ་སྤོང་བའི་བརྩོན་འགྲུས་དང་ལྡན་པ་ནི་ཏིང་ངེ་འཛིན་གྱིས་སེམས་ལས་སུ་རུང་བ་ཉིད་དུ་བྱེད་པས། དེར་བྱེད་པའི་རྫུ་འཕྲུལ་རྐང་བ་དབྱེ་གཞིའོ། །གསལ་བའི་དབྱེ་བ་ནི། བྱང་སེམས་ཀྱི་ཚོགས་ལམ་ཆེན་པོ་དབང་རྣོན་གྱི་རྒྱུད་ཀྱི་གུས་སྦྱོར་དང་འདུན་པ་བསྐྱེད་པ་ལ་བརྟེན་ནས་སེམས་རྩེ་གཅིག་པ་ཉིད་ལ་རེག་པའི་ཏིང་ངེ་འཛིན་ཆོས་ཅན། འདུན་པའི་ཏིང་ངེ་འཛིན་རྫུ་འཕྲུལ་གྱི་རྐང་བ་༡ཡིན་ཏེ། གུས་སྦྱོར་དང་འདུན་པ་བསྐྱེད་པ་ལ་བརྟེན་ནས་སེམས་རྩེ་གཅིག་པ་ལ་རེག་པའི་རྫུ་འཕྲུལ་རྐང་བ་ཡིན་པས་སོ། །དེ་ལྟར་འདོན་པ་བསྒྱུར་ཏེ།རྟག་སྦྱོར་དང་འབད་པ་དང་རྩོན་འགྲུས་བརྩོམ་པ་ལས་སེམས་རྩེ་གཅིག་པ་ལ་རེག་པ་བརྩོན་འགྲུས་ཀྱི་ཏིང་ངེ་འཛིན༢། སྔོན་ཏིང་ངེ་འཛིན་བསྒོམས་པའི་སེམས་ཀྱི་ས་བོན་མཐུ་བརྟས་པས་རང་གི་ངང་གིས་དང༌། སེམས་ཉིད་ཀྱིས་སེམས་ནང་དུ་རབ་ཏུ་འཇོག་ཅིང་འཛིན་སྡུད་པར་བྱེད་པ་ན་སེམས་རྩེ་གཅིག་པ་ལ་རེག་པ་སེམས་ཀྱི་ཏིང་ངེ་འཛིན༣། གཞན་གྱིས་བསྟན་ནས་ཆོས་རབ་ཏུ་རྣམ་འབྱེད་ལ་བརྟེན་ནས་དང་ལྷག་མཐོང་གིས་སེམས་རབ་ཏུ་འཛིན་པ་ན་སེམས་རྩེ་གཅིག་པ་ལ་རེག་པ་དཔྱོད་པའི་ཏིང་ངེ་འཛིན་རྫུ་འཕྲུལ་གྱི་རྐང་བ༤འོ། །ཞེས་ཀུན་བཏུས་ལས་བཤད་དོ། །ངོ་བོ་ནི་ཕལ་ཆེར་ཐ་དད་ཡིན་པར་ཉ་ཊཱིཀ་ལས་བཤད་དོ། །གྲངས་ངེས་ནི། གྲོགས་འདུན་སོགས་བཞི་ཡོད་པས། གྲོགས་ཅན་རྫུ་འཕྲུལ་རྐང་བཞིར་ངེས་སོ། །དམིགས་རྣམ་གཉིས་སུ་ཕྱེ་བའི་རྣམ་པ་བློ་རང་རང་གི་འཛིན་སྟངས་ཀྱི་ཡུལ་གང་ཡིན་དེ་ཡིན་ནོ། །ས་མཚམས་ནི། འདིར་བྱང་སེམས་ཀྱི་རྫུ་འཕྲུལ་གྱི་རྐང་བ་ནི་ལམ་བཞི་ན་ཡོད་ལ། སྤྱིར་ཚོགས་ལམ་ཆེན་པོ་ནས་སངས་རྒྱས་སའི་བར་ན་ཡོད་དོ། །གྲོགས་ནི། འདུན་པ་དང་བརྩོན་འགྲུས་དང་སེམས་དང་དཔྱོད་པ་དང༌། དེ་དང་མཚུངས་པར་ལྡན་པའི་སེམས་སེམས་བྱུང་རྣམས་སོ། །རྫུ་འཕྲུལ་གྱི་རྐང་བ་ལ་ཏིང་ངེ་འཛིན་གྱིས་ཁྱབ་པར་ཐལ། ཉ་ཊཱིཀ་ལས། མཚན་ཉིད་ནི།རང་གི་བདག་རྐྱེན་སྤོང་བའི་འདུ་བྱེད་བརྟེན་པ་ལས་བྱུང་བའི་སེམས་གནས་པ་ལས་སུ་རུང་བའི་ཏིང་ངེ་འཛིན་ནོ། །ཞེས་གསུངས་པའི་ཕྱིར་ན་མ་ཁྱབ་པ་སྔར་ཡང་དག་སྤོང་བ་ལྟར་རོ། །ཡང་རྫུ་འཕྲུལ་གྱི་རྐང་བ་བཞི་ཕལ་ཆེར་ངོ་བོ་ཐ་དད་ཡིན་པར་ཐལ། ཉ་ཊཱིཀ་ལས། ཐ་དད་ནི། ཕལ་ཆེར་ངོ་བོ་ཐ་དད་དོ། །ཞེས་གསུངས་པའི་ཕྱིར་ཟེར་ན་ཕལ་ཆེར་ཞེས་སྨོས་པ་དང་ངོ་བོ་ཐ་དད་ཡིན་པའི་རྒྱུ་མཚན་ལ་དཔྱད། ཡང་ཉ་ཊཱིཀ་ལས། གྲངས་ངེས་ནི། གྲོགས་འདུན་སོགས་བཞི་ཡོད་པས། གྲོགས་ཅན་རྫུ་འཕྲུལ་རྐང་བཞིར་ངེས་སོ། །ཞེས་གྲོགས་འདུན་སོགས་བཞི་ཡོད་པས་གྲོགས་ཅན་རྫུ་འཕྲུལ་གྱི་རྐང་བ་བཞིར་ངེས་པ་མི་རིགས་པར་ཐལ། གྲོགས་ལ་འདུན་སོགས་ལས་གཞན་དུ་མ་དམིགས་པའི་ཕྱིར་ཟེར་ན་དཔྱད། ཡང་ཉ་ཊཱིཀ་ལས།འདུན་པ་བསྐྱེད་པ་ལ་བརྟེན་ནས། ཞེས་སོགས་གསུངས་པ་ལྟར་ཀུན་བཏུས་ས་འགྲེལ་དང༌། མདོ་ལུགས་མ་སོགས་ལས་འདུན་པ་སོགས་ལ་བརྟེན་པ་ཡིན་པར་གསུངས་པས་དེ་ལྟར་ན་མཚུངས་ལྡན་གྱི་གྲོགས་ཡིན་ཚུལ་ཇི་ལྟར་ཡིན། གྲོགས་ཀྱང་ཡིན་དགོས་ཏེ། །མངོན་པ་ཀུན་བཏུས་ལས། གྲོགས་གང་ཞེ་ན་འདུན་པ་དང་བརྩོན་འགྲུས་དང༌། སེམས་དང༌། དཔྱོད་པ་དང༌། དེ་དག་དང་མཚུངས་པར་ལྡན་པའི་སེམས་དང་སེམས་ལས་བྱུང་བའི་ཆོས་རྣམས་སོ། །ཞེས་གསུངས་པའི་ཕྱིར་རོ། །སྤྱིར་བྱང་ཕྱོགས་ཀྱི་ཡན་ལག་བདུན་གྱི་ས་མཚམས་ལ། སྡེ་ཚན་བདུན་ནི་གོ་རིམ་བཞིན། །ལས་ནི་དང་པོ་པ་དག་དང༌། །ངེས་འབྱེད་ཆ་མཐུན་རྣམས་དང་ནི། །སྒོམ་དང་མཐོང་ལ་རབ་ཏུ་ཕྱེ། །ཞེས་རིམ་པ་ལྟར་ཚོགས་ལམ་དང་དྲོད་དང་རྩེ་མོ་དང་བཟོད་པ་དང་ཆོས་མཆོག་དང་སྒོམ་ལམ་དང༌། མཐོང་ལམ་རྣམས་ན་སྡེ་ཚན་རེ་རེ་ཡོད་པར་འདོད་མོད་འདིར་ནི་ཐེག་ཆེན་པའི་ལུགས་ཀྱིས་ཚོགས་ལམ་ཆུང་ངུ་ན་དྲན་པ་ཉེར་གཞག་པ་བཞི་དང༌། འབྲིང་པོ་ན་ཡང་དག་པར་སྤོང་བ་བཞི་དང༌། ཆེན་པོ་ན་རྫུ་འཕྲུལ་གྱི་རྐང་པ་བཞི་དང༌། སྦྱོར་ལམ་དང་པོ་གཉིས་ན་དབང་པོ་ལྔ་དང༌། ཕྱི་མ་གཉིས་ན་སྟོབས་ལྔ་དང༌། མཐོང་ལམ་ན་བྱང་ཆུབ་ཀྱི་ཡན་ལག་བདུན་དང༌། སྒོམ་ལམ་ན་འཕགས་པའི་ལམ་ཡན་ལག་བརྒྱད་ཡོད་པར་བཞེད་པ་དང་མཐུན་པར་འཆད་དོ། །ས་མཚམས་དེ་ལྟར་བཤད་པ་ནི་ས་བཟང་གི་ཀུན་བཏུས་འགྲེལ་བའི་ཚིག་ཟིན་ལྟར་ཡིན་ལ། འོན་ཀྱང་ཚོགས་ལམ་ཆུང་ངུ་ན་ཡང་དག་སྤོང་བཞི་དང་རྫུ་འཕྲུལ་གྱི་རྐང་བ་གཉིས་ཡོད་མེད་དང་མཐོང་ལམ་ལ་འཕགས་ལམ་ཡན་ལག་བརྒྱད་ཡོད་དམ་དཔྱད་པར་བྱའོ། །