ཁྱུང་པོ་ཏིང་ཆེན་ཕྱོགས་ཀྱི་གཡེར་གྱི་ཁྲ་གཟེར་མའི་བསང་མཆོད་འདོད་འབྱུང་ནོར་བུའི་གཏེར་མཛོད།
ཀྱཻ། མདུན་མཁར་འཇའ་འོད་ཟེར་ཁྱིམ་འཁྲིགས་པའི་དབུས།།
སྣང་སྲིད་ཟིལ་གནོན་པདྨ་ཧེ་རུ་ཀ།
དམར་ནག་ཁྲོ་འཛུམ་གཟི་བརྗིད་ཉི་ལྟར་འབར།།
དབང་མཛད་ཕྱག་རྒྱས་སྡེ་བརྒྱད་བྲན་འཁོལ་བའི།།
མདུན་དུ་གཡུ་མཁར་གསེར་གྱི་ལན་ཀན་ཅན།།
སྣ་ཚོགས་རིན་ཆེན་དྲ་བས་མཛེས་པའི་དབུས།།
གཡེར་ཕྱོགས་དགྲ་ལྷའི་གཙོ་བོ་ཁྱུང་དྲག་རྩལ།།
མི་སྨུག་དུང་གི་ཚེམས་མཛེས་བཞད་འཛུམ་ཞལ།།
དར་དཀར་རལ་ག་གསོལ་ཞིང་འགྱིང་བག་བརྗིད།།
རེས་འགའ་འཁོར་གསུམ་དུག་རལ་སྐེད་ལ་ཐོག།
མདུང་དམར་ཞགས་པས་དགྲ་སྲོག་འགུམ་པར་བྱེད།།
ལྷ་གཉན་ཆེན་པོ་ཡུམ་སྲས་འཁོར་དང་བཅས།།
དེང་འདིར་རྣལ་འབྱོར་བདག་གི་གནས་འདིར་གཤེགས།།
གཙང 
་མའི་གདན་ལ་དགྱེས་པར་བཞུགས་སུ་གསོལ།།
གསེར་སྐྱེམས་གཡུ་སྐྱེམས་ཇ་ཆང་ཕུད་ཀྱིས་མཆོད།།
དབང་པོའི་ཡུལ་དུ་གྱུར་པའི་འདོད་ཡོན་ལྔ།།
ཟག་མེད་ཆོས་ཁམས་རྣམ་དག་བདུད་རྩིའི་རོ།།
བདེ་ཆེན་སྒྱུ་མའི་རྣམ་རོལ་མཆོད་པའི་སྤྲིན།།
དགའ་བཞིའི་ཡེ་ཤེས་རྫོགས་པས་ཐུགས་དམ་བསྐང་།།
ཁྱད་པར་གཡུ་ཤུག་འཁན་དཀར་བ་ལུ་སོགས།།
སྣ་ཚོགས་སྨན་ཤིང་མེ་ཏོག་ གཙང ་མའི་རྫས།།
དམར་མོའི་མེ་ལ་བསྲེགས་པའི་དུད་པའི་སྤྲིན།།
བདུད་རྩི་དྭངས་མའི་ཆབ་ཀྱིས་བྲན་བྱས་པར།།
ཏིང་འཛིན་སྔགས་རྒྱས་སྦྱང་སྤེལ་བསྒྱུར་བ་ཡི།།
རྣམ་མང་རྫས་ཀྱི་འབྱོར་བས་ཁྱེད་རྣམས་བརྔན།།
ལྷ་སྲུང་གཉེན་པོར་མི་ གཙང ་ཉམས་གྲིབ་ཀྱིས།།
མནོལ་ཞིང་གོས་པ་སྔགས་ཀྱི་ཆོ་ག་དང་།།
དག་བྱེད་ གཙང ་མའི་ལྷ་ཆབ་འོ་རྒྱུན་གྱིས།།
གཡའ་དག་མེ་ལོང་ངོས་སུ་བཀྲུ་བར་བགྱི།།
ཉེས་ཀུན་མི་དམིགས་འོད་གསལ་སྟོང་པའི་ངང་།།
དག་མཉམ་གཟུང་འཛིན་མཚན་མ་ཡོངས་ཞི་བའི།།
གཟའ་བྲལ་ཟླ་ལྟར་དཀར་བའི་ལྷ་ཞལ་མདངས།།
མི་འབྲལ་རྟག་ཏུ་འགྲོགས་ཕྱིར་ཁྱེད་རྣམས་བསང་།།
ནད་གདོན་ཞི་བའི་དགྲ་ལྷ་འཁོར་དང་བཅས།།
དཀར་གསུམ་མངར་གྱིས་སྦྲན་པའི་དུད་པས་བསང་།།
ཚེ་བསོད་རྒྱས་པའི་དགྲ་ལྷ་ཡང་འཁོར་བཅས།།
དར་རས་སྨན་སྣ་ཚོགས་པའི་རྫས་ཀྱིས་བསང་།།
དབང་མཛད་དབང་གི་དགྲ་ལྷ་སྤྲུལ་པར་བཅས།།
རྩི་བཅུད་འབྲུ་མར་བསྲེགས་པའི་དུད་པས་བསང་།།
ཚར་གཅོད་དྲག་པོའི་དགྲ་ལྷ་དཔུང་དང་བཅས།།
དྲག་སྐྱེམས་བ་ལིང་གཏོར་མས་བསང་ཞིང་མཆོད།།
སྔོན་ཚེ་བཅོམ་ལྡན་དྲེགས་པ་ཀུན་འདུལ་དང་།།
བར་དུ་སྔགས་འཆང་རྒྱལ་པོ་ཐོད་ཕྲེང་རྩལ།།
ཐ་མ་པདྨའི་མཚན་འཆང་རྫོགས་ཆེན་པས།།
ཇི་ལྟར་བཀའ་བསྒོས་ཐ་ཚིག་དྲན་གྱིས་ལ།།
འགོ་ཞིང་སྲུང་སྐྱོབ་གདོང་གྲོགས་མེལ་ཚེ་གྱིས།།
སྲིད་ཞིའི་ཕྱྭ་གཡང་ཆོས་ནོར་གཏེར་གྱི་མཛོད།།
མ་ལུས་འདུས་པའི་བཅུད་གཡང་བྱིན་ཆེན་ཕོབས།།
ཁྱད་པར་ཡང་ཟབ་རྨད་བྱུང་རྫོགས་པ་ཆེའི།།
བསྟན་པ་སྲིད་པའི་བླ་རུ་འདེགས་པ་དང་།།
བསྟན་འཛིན་ཞབས་བརྟན་བསྟན་ལ་འཚེ་བ་ཡི།།
དགྲ་འདྲེ་འབྱུང་པོ་མིང་གི་ལྷག་མར་ཐོངས།།
མདོར་ན་འཕྲལ་ཕུགས་ཕན་བདེའི་དཔལ་ཡོན་དང་།།
ཕུན་ཚོགས་དགེ་ལེགས་ཡོན་ཏན་འབུམ་བདལ་བས།།
འགྲོ་རྣམས་ཀུན་བཟང་གདོད་མའི་རྒྱལ་ཐབ་ཆེར།།
འགོད་པའི་ཕྲིན་ལས་སྒྲུབ་ལ་མ་གཡེལ་ཞིག།
རྩ་གསུམ་ལྷ་དང་སྲུང་མའི་བྱིན་རླབས་མཐུ།།
བསླུ་མེད་བདེན་པའི་སྟོབས་དང་འགྲོགས་པ་ཡི།།
བདེ་ལེགས་སྣང་བ་དཀར་པོའི་བཀྲ་ཤིས་ཀྱིས།།
མི་འབྲལ་རྟག་ཏུ་སྲུང་བའི་བཀྲ་ཤིས་ཤོག།
ཅེས་པའང་ཡུལ་དེའི་སློབ་བུ་ཞིག་གི་ངོར་རྫོགས་ཆེན་པདྨ་སྐལ་བཟང་གིས་གང་ཤར་ཡིད་ཀྱི་ཚོན་རིས་འགོག་མེད་དུ་བཤུས་པའོ།།