བསང་གི་རྗེས་ཆོག

༈ བསང་གི་རྗེས་ཆོག་གི་དང་པོ་སྨོན་ལམ་བཏབ་པ་ནི། ཧོ། བླ་མ་རྣམས་ལ་བསང་མཆོད་ཕུལ་བའི་མཐུས། །རང་བཞིན་གདོད་མའི་གནས་ལུགས་རྟོགས་པར་ཤོག །ཡི་དམ་རྣམས་ལ་བསང་མཆོད་ཕུལ་བའི་མཐུས། །དངོས་གྲུབ་རྣམ་གཉིས་མྱུར་དུ་ཐོབ་པར་ཤོག །མཁའ་འགྲོ་རྣམས་ལ་བསང་མཆོད་ཕུལ་བའི་མཐུས། །ཕྲིན་ལས་རྣམ་བཞི་རྩོལ་མེད་འགྲུབ་པར་ཤོག །ཆོས་སྐྱོང་རྣམས་ལ་བསང་མཆོད་ཕུལ་བའི་མཐུས། །བྱང་ཆུབ་ལམ་ལ་བར་ཆད་མེད་པར་ཤོག །དམ་ཅན་རྣམས་ལ་བསང་མཆོད་ཕུལ་བའི་མཐུས། །བསྟན་དགྲ་དམ་ཉམས་མྱུར་དུ་སྒྲོལ་བར་ཤོག །ཡོན་ཏན་མགྲོན་ལ་བསང་མཆོད་ཕུལ་བའི་མཐུས། །བསྟན་པ་བསྲུངས་ཤིང་སྡོང་གྲོགས་བྱེད་པར་ཤོག །གཞི་བདག་མགྲོན་ལ་བསང་མཆོད་ཕུལ་བའི་མཐུས། །བདག་ཅག་དཔོན་སློབ་འཁོན་འདྲེས་མེད་པར་ཤོག །སྙིང་རྗེའི་མགྲོན་ལ་བསང་མཆོད་ཕུལ་བའི་མཐུས། །སྡུག་བསྔལ་ཀུན་བྲལ་སངས་རྒྱས་ཐོབ་པར་ཤོག །ལན་ཆགས་མགྲོན་ལ་བསང་མཆོད་ཕུལ་བའི་མཐུས། །ཚེ་རབས་གྲངས་མེད་ལན་ཆགས་བྱང་བར་ཤོག །བསང་མཆོད་ཕུལ་བའི་མཐུ་སྟོབས་བྱིན་རླབས་ཀྱིས། །ཚོགས་གཉིས་མྱུར་རྫོགས་དོན་གཉིས་ལྷུན་འགྲུབ་ཤོག །དགེའོ། །༈ རྒྱལ་བ་མཆོད་པས་མཉེས་གྱུར་ཅིག །དམ་ཅནཐུགས་དམ་སྐོང་གྱུར་ཅིག །རིགས་དྲུག་འདོད་པ་ཚིམས་གྱུར་ཅིག །ལན་ཆགས་ཤ་མཁོན་སྦྱང་གྱུར་ཅིག །ཚོགས་གཉིས་ཡོངས་སུ་རྫོགས་གྱུར་ཅིག །སྒྲིབ་གཉིས་བག་ཆགས་དག་གྱུར་ཅིག །དམ་པ་སྐུ་གཉིས་ཐོབ་གྱུར་ཅིག །སྦྱིན་པ་རྒྱ་ཆེན་གྱུར་པ་འདི་ཡི་མཐུས། །འགྲོ་བའི་དོན་དུ་རང་བྱུང་སངས་རྒྱས་ཤོག །སྔོན་གྱི་རྒྱལ་བ་རྣམས་ཀྱིས་མ་གྲོལ་བའི། །སྐྱེ་བོའི་ཚོགས་རྣམས་སྦྱིན་པས་གྲོལ་གྱུར་ཅིག །འབྱུང་པོ་གང་དག་འདིར་ནི་ལྷགས་གྱུར་ཏམ། །ས་འམ་འོན་ཏེ་བར་སྣང་འཁོད་ཀྱང་རུང་། །སྐྱེ་རྒུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །འབད་དང་རྩོལ་བས་མ་གོས་པ། །ཡིད་བཞིན་ནོར་བུ་དཔག་བསམ་ཤིང་། །སེམས་ཅན་རེ་བ་སྐོང་མཛད་པ། །བསམ་པ་འགྲུབ་པའི་བཀྲ་ཤིས་ཤོག །ཅེས་སོགས་ཤིས་པ་བརྗོད་པས་དགེ་ལེགས་སུ་བྱའོ། །འདི་ལ་ཕྱག་ལེན་རྒྱས་བསྡུས་སྣ་ཚོགས་ཤིག་སྣང་བ་ལས། འདིར་ནི་རང་གི་བློ་འདོད་ལྟར་སྤྲོས་པ་བསྡུ་བའི་ངག་འདོན་རྒྱུན་ཁྱེར་དུ་བྲིས་པ་སྟེ་གྲོང་སྔགས་པའི་ཕ་ཇོ་རྒས་གཅོང་ཛྙཱ་ནས་སོ། །