གཏོར་ཟློག་གི་ལས་མཐའ་ཡང་ཟློག་གི་ཟིན་བྲིས་བསྡུས་ཏེ་བརྗེད་ཐོ་ཙམ་དུ་བཀོད་པ།
གཏོར་ཟློག་གི་ལས་མཐའ་ཡང་ཟློག་གི་ཟིན་བྲིས་བསྡུས་ཏེ་བརྗེད་ཐོ་ཙམ་དུ་བཀོད་པ་བཞུགས་སོ།།
ཤམཡ༔ འཇམ་དཔལ་གཞན་གྱི་སྟོབས་རབ་ཏུ་འཇོམས་པ་ལ་ཕྱག་འཚལ་ལོ། །ཁྲོ་ཆུ་དུག་གདོང་གི་གཏོར་མ་ལ་བརྟེན་ཏེ༔ ཟློག་པ་ལ་ལྔ་སྟེ། རྩང་མདོས། གཏོར་ཟློག །ཟློག་ཟོར། ཁྲག་བསད། ཡང་ཟློག་གོ །དང་པོ་གསུམ་ནི་མཐོང་བ་བརྒྱུད་པ་ལྟར་རོ། །བཞི་པ་ནི། བོང་ང་ནག་པོ། ཐར་ནུ། རེ་ལྕག །ཐང་ཕྲོམ། སྟག་གཟིག་དོམ་དྲེད་འཕར་སྤྱང་ལ་སོགས་གཅན་གཟན་སྣ་ཚོགས་ཀྱི་ཤ་ཁྲག །བ་གླང་ར་ལུག་གི་ཁྲག་རྣམས་ཞིབ་པར་བརྡུང་ལ། འབྲུ་ནག་སོགས་བསྲེས་ལ། གཏོར་མ་ཟུར་གསུམ་ཐོག་མདེལ་ལྟ་བུ་ལ་ལྷ་གྲངས་
ཀྱིས་བསྐོར། ཉ་བོ་སྙིང་གཟུགས་དགུ་རེས་བརྒྱན། དྲག་པོའི་སྣོད་དུ་བཤམས་ལ། ཤ་ཁྲག་གཙང་མས་བརྒྱན། དེ་ནས་བཀྲ་མི་ཤིས་པའི་ས་སྣ་བསྡུས་ལ་ཀོང་བུ་སོར་བཞི་བྱའོ། །ཀོང་བུ་དེ་དགྲ་བོ་བྱད་མ་གནོད་བྱེད་གང་ཡིན་གྱི་ས་ཡུལ་ཞིང་བང་ཁང་དང་བཅས་པར་བསྐྱེད། སྡོང་ཤིང་ལ་ལིང་ག་དཀྲིས་ཏེ། དེ་རྒྱབ་སྡོང་རས་དཀྲི། གཏོར་ཟློག་བསྐུལ་སོགས་གཞུང་ལྟར་བྱ། མར་མེ་ལ་འགུགས་གཞུག་དྲག་ཏུ་བྱ། མར་ཁུ་ཕག་ཚིལ་དང་ར་ཚིལ་ལ་བྱ། དགུ་གསུམ་ལ་བསྒྲུབ། འདི་རང་ཁྱིམ་དུ་མི་རུང་། གལ་ཏེ་དགོས་པ་བྱུང་ན་མར་མེ་བསད། བསད་དུས་སྒོར་
བསད་དེ་ནས་གོང་གི་ཁྲག་སྣ་འདྲེས་པའི་ཁྲག་སྔགས་ལ་བསད་པར་བྱའོ། །སྔགས་ནི་གཞུང་གི་བསད་སྔགས་ཉིད་དམ། ཕྱི་པ་མུ་སྟེགས་པ་དང་བོན་པོ་བསྒྲལ་བའི་མཚོན་ཆ་སྤུ་གྲི་ལྷ་བུའོ། །ཨྠྀི༔ ས་མ་ཡ་ཁ་ཐཾ༔ ཨོྃ༔ རང་གི་ལས་སྦྱོར་བྱས་པ་ལ། ཕ་རོལ་པོས་བཟློག་པ་བྱས་ནས་ཟློག་རྟགས་བྱུང་ན། ཕ་རོལ་པོ་སྟོབས་ཆེན་གྱི་བྱད་ཁ་དང་ལྷ་འདྲེའི་གཡོས་ཆེན་སོགས་ལ་ཡང་ཟློག་བཅའ་སྟེ། གཡུལ་ཆེན་འགྱེད་པའི་ས། གཤའ་རྒྱུད་དྲག་པོའི་ས་དང་གྲོག་མཁར་ས། ཆུ་ཚེ་ཟད། རྡོ་ཚེ་ཟད། ཤིང་ཚེ་ཟད། ཚྭ་ཆུ་ས་སྐྱིན་དང་སྦྱར་ཏེ། སྟེགས་བུ་གནས་དང་བསྟུན་ལ་འདོམ་གང་ངམ། ཇི་ལྟར་མཚམས་པ་གྲུ་བཞི་རྩང་རས་བསྐོར། དེའི་སྟེང་དུ་དཀྱུས་མཐོ་གང་དཔངས་སོར་ལྔ་པ་གྲུ་བཞི་པ་བསྐོར་མར་བརྩེགས། དེ་ལས་ཆེ་ཡང་མི་འགལ། དེའི་སྟེང་དེ་ལས་ཆུང་བའི་གྲུ་གསུམ་གཉིས་བསྣོལ་མར་བརྩེགས། དེའི་སྟེང་དུ་གྲུ་གསུམ་ཆེ་བ་ལ་རིམ་པར་བརྩེགས། དབུས་ལ་གཏོར་མ་ཨེ་ཆུང་བཅོ་ལྔའི་ནང་དུ་ལིངྒ་བཞག །ཁ་གྲུ་གསུམ་གྱིས་བཅད། གྲི་ཕུར་གྱིས་ཐུན་ལ་བཅད། ཐུན་ཐག་ཐམས་ཅད་དབུས་སུ་བྱུང་། རྩང་ར་ནང་དུ་བཏགས། གྲུ་གསུམ་ཐམས་
ཅད་རྩང་རྩེ་ཟུར་གསུམ། སྐེད་པ་གྲུ་བཞི། རྩ་བ་ཟླུམ་པོ་ཉེར་གཅིག་རེ་སྲིན་མོ་འགྲོས་སུ་བསྐོར། གྲུ་གསུམ་རེ་རེའི་ཁར་གཏོར་ཆུང་རེ་རེ་བཤམ། དབུས་སུ་རབས་ཆད་མ་ལ་སོགས་པའི་ཐོད་པ་མཚན་ངན་དུ་ལིང་ཆུང་བརྒྱ་རྩ་བརྒྱད། ལིང་ག་དངོས་གཞུང་བཞིན་གཞུག །ཁ་བཀབ་ཐུན་ནམ་ཕུར་པས་བཅད་ཐུན་ཐག་བཞི་ཕྱོགས་བཞིར་འཐེན། ཕྱི་ཡི་རྩང་ར་ནང་དུ་ཕུར་པ་རལ་གྲི་བཞི་ལ་རྟོད། དབུས་ཀྱི་སྟེང་དུ་རྩང་གི་ལྡེང་ཁྲིའི་ཁར། དུག་ཁྲག་གི་གཏོར་མ་གྲུ་གང་བ་གཅིག་ཤ་ཁྲག་གིས་བརྒྱན་གྱི་ཕུར་དགྲ་སྟ་དར་ནག་ཞིང་ལྤགས་ཀྱི་སྐུ་རྣམས་གཟུགས། དེ་ཡི་གཡས་སུ་ཕུན་སུམ་ཚོགས་པའི་ཚེ་ཟས། གཡོན་དུ་རྟེན་གཏོར། མདུན་དུ་རྒྱུན་གཏོར་དང་ཐུན་གཏོར་རྣམས་བཤམས། བསྡུ་ན་བསད་ཁང་དབུས་མས་ཆོག་གསུངས་པས། བཅུ་བཞི་པའི་ནང་དུ་ཟན་ལིང་རེ་དང་སྟེང་དུ་གཏོར་ཆུང་རེ་བཞག །དབུས་ཀྱི་རྩང་རའི་སྟེང་དུ་དམར་གཏོར་གྲུ་གང་། འོག་ཏུ་ཐུན་ཁང་དུ་ལིངྒ་ལ་ཕུར་པ་གཟིར་བར་བྱའོ། །བསྐྱེད་ཆོག་འདོན་ཆ་སོགས་ཟློག་པ་དང་འདྲའོ། །འདི་དབུ་གཙུག་གམ་འདོན་དུས་མགོ་ཕུར་བདུད་ཉི་སོགས་ལ་བྱ་ཞིང་། གནས་ཀྱང་རི་རྩེ་གསུམ་
ལུང་གསུམ་མདོ་སོགས་བཟང་བར་བཤད་དོ། །དེས་ནི་སྲིད་མེད་བུ་ཡི་སྟོབས་ཡིན་ཀྱང་ཟློག་གོ། ཡང་ཟློག་བསད་ཁང་བཅའ་གཞིའི་འཁྲུལ་འཁོར་གནམ་ལྕགས་སྐྱོགས་ཆེན་དགྲ་བགེགས་ཀུན་འཇོམས་ཞེས་བྱའོ། །ཟིན་བྲིས་རཱ་གས་ཅུང་ཟད་གསལ་བར་བཀོད་པའོ། །དམ་ཉམས་དགྲ་བགེགས་བསྒྲལ་བའི་མཚོན་ཆར་ཤོག །འདི་གཞན་དང་མི་འདྲ་ཀུན་ལ་མེད་པས་སྦས། དེ་ཕྱིར་གཞན་ལ་གབ་སྐུང་ཤེས་པར་གྱིས། ས་མ་ཡ་རྒྱ་རྒྱ་རྒྱ༔ གུ་ཧྱ༔ ཁ་ཐཾ༔ སྤྱི། སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།