ཆོས་སྐྱོང་ཆེན་པོའི་བསྒྲུབ་པའི་ངེས་བརྗོད་རྩེ་མོ།

ཡེ་ཤེས་སྒྱུ་འཕྲུལ་དྲྭ་བ་ལས༔ ཆོས་སྐྱོང་ཆེན་པོའི་བསྒྲུབ་པའི་ངེས་བརྗོད་རྩེ་མོ་བཞུགས་སོ། །

ཆོས་སྐྱོངས་ཆེན་པོ་འདི་བསྒྲུབ་ནས་སྔོན་ཆོས་རྒྱལ་སྡེ་དགེ་ཚང་གི་སྤར་ཁང་ཆེན་མོ་སོགས་ཆོས་སྲིད་བསྟན་པའི་མངའ་ཐང་དར་རྒྱས་སུ་གྱུར་བ་དང་། དེས་རྗེས་སུ་སི་ཏུ་ཆོས་ཀྱི་འབྱུང་གནས་ཀྱིས་བསྒྲུབ་པས་དཔལ་སྤུང་གི་བསྟན་པ་འགྲན་མེད་དུ་གྱུར་བ་དང་། ཀཿཐོག་གཏེར་ཆེན་ཀློང་གསལ་སྙིང་པོའི་གཏེར་ཆོས་དར་རྒྱས་སུ་གྱུར་ནས་ཉི་འོག་ན་འགྲན་ཟླར་གྱུར་བ་གཞན་མེད་པ་དང་། ཀརྨ་བ་བཅུ་བཞི་བ་དང་། འཇམ་དབྱམས་མཁྱེན་བརྩེ་དབང་པོ་རིན་པོ་ཆེ་དང་། ཀོང་སྤྲུལ་ཡོན་ཏན་རྒྱ་མཚོ་རྣམས་ཀྱང་རྩོད་མེད་ཀྱི་དགེ་བའི་བཤེས་གཉེན་དུ་གྲགས་པས། གཅིག་ཏུ་ན་བླ་མ་དེ་རྣམས་ཀྱིས་བསྒྲུབ་པར་འོས་པ་ཡིན་པས། དེའི་སློབ་མ་བརྒྱུད་པར་བཅས་པས་ཀྱང་སྨོན་ན། སློབ་དཔོན་གཉན་པོའི་བསྲུང་མ་སྨད་པའི་ཉེས་པ་འབྱུང་ལ། ཡང་རྫོགས་སྤྲུལ་ཐུབ་བསྟན་ཆོས་ཀྱི་རྡོ་རྗེ་དང་། ཀུན་བཟང་བདེ་ཆེན་རྡོ་རྗེ་ལ་སོགས་པས་ཀྱང་མཆོད་གསོལ་མཛད་ནས་བསྒྲུབ། ད་ལྟ་ཞེ་འཛོང་གི་བསྟན་པ་རྒྱས་པའང་ཆོས་སྐྱོང་འདི་ཡི་བྱིན་རླབས་ཡིན་ཏེ། དེ་དག་སུ་ལའང་མ་གདོན། རྒབ་འདྲེངས་མ་བྱུང་ངོ་། ཡང་བླ་མ་དེ་རྣམས་ལྟ་བ་མཐོ་བས་འདྲེ་བསྒྲུབ་ཀྱང་མི་སྐྱོན་ནོ་ཟེར་ན། དེ་རྣམས་ཀྱིས་ཀྱང་འདྲེ་ངན་རྣམས་མ་བསྒྲུབ་པར་ལྷག་པའི་ལྷ་དང་། རྩ་གསུམ་བསྲུང་མ་བསྒྲུབ་པ་ལས་ལྟོས་ཤིག ལར་གསང་སྔགས་འདི་ལྟ་བ་གཙོ་བར་འདོད་པ་དེ་ཁྱོད་བདེན་ཀྱང་དཀོར་བདག་སྤང་ནས་ཤི་འདྲེ་བསྒྲུབ་པའི་འདམ་ཀ་བྱེད་པ་དེ་ཡང་མི་རིག་ལ། ལྟ་བ་མེད་ན་རྒྱུད་ལས། མི་འགྱུར་ལྟ་བའི་གཟེར་མེད་ན། དཔལ་ཆེན་བསྒྲུབ་ཀྱང་རུ་ཏྲར་གོལ། གསུངས་པས། དེ་ལྟ་ན་ཁྱོད་རང་ཚོས་རྒྱུད་ཚོད་དང་བསྟུན་ན་དཔལ་ཆེན་པོ་ཡང་བསྒྲུབ་ཕོད་པ་མི་སྣང་། ཅིའི་ཕྱིར་ན་རེ་དོགས་འཁུ་འཁྲིག་ཕོ་རོག་ལས་ཀྱང་ཆེ་བའི་ཕྱིར་རོ། །ཡང་ད་ལྟ་སྙིགས་མ་ལྔ་བདོ་བའི་དཀོར་བསྲུང་གིས་ཐོན་པའང་མིན། ད་དུང་ཚེ་ལོ་བཅུ་བ་ལ་འདི་ལས་བརྒྱ་འགྱུར་གྱིས་ཐུབ་པ་དེའང་དཀོར་བདག་བསྒྲུབ་པས་མིན། ངན་སོང་ན་དེ་བས་ཀྱང་ཐུ་བ་དེ་དཀོར་བསྲུང་གིས་ལེ་ལན་མིན། དེ་ཡིན་ན་ཚེ་ལོ་བཅུ་བ་དང་ངན་སོང་བ་དེ་དག་གིས་མི་འདོན་མི་བསྒྲུབ་པས། དེས་གོང་ན་མེད་པའི་བདེ་སྐྱིད་ཅིག་དེ་དག་ལ་ཅིས་ཕྱིར་མེད། དཀོར་བསྲུང་མེད་པ་དང་མི་འདོན་པ་དག་ལ་ནད་མུག་མཚོན་གསུམ་འདི་ཨ་ཆེན་ཁ་བ་སྤྱི་འབབས་མིན་ན་དང་ཨ་ལ་ལ་ཧོ། བསྒྲུབ་རུང་མི་རུང་གི་ཁྱད་པར་རྒན་རྒོན་ཕོ་མོ་ཚོས་མི་ཤེས་ཏེ། སྤྱན་དང་མངོན་ཤེས་ཡོད་པའི་སངས་རྒྱས་བྱང་སེམས་རྣམས་ཀྱིས་གཟིགས་པའི་རྗེས་སུ་སློབ་བར་བྱ་ཡི་ཆགས་སྡང་ཕྲག་དོག་གིས་ནི་མ་ཡིན་ལ། མདོར་ན་གཙུག་ལག་ཆོས་འཁོར་གཉན་པོ་གང་དུ་རྒྱས་པ་དེར་འདི་རབ་ཏུ་གསོལ་ན་མགོ་ལོག་གི་ཤི་འདྲེ་རྩེ་རྒྱལ། ལྷོ་ཁ་ཕྱོགས་ནས་གོ་འཇོའི་རྒྱལ་པོ་དང་། དོལ་གྱི་གཡུ་དམར་སྲོག་གི་སྤུ་གྲི། གསེར་གྱི་དུང་ཐོད་ཅན་རྣམས་ལྟར་ཁྲམ་པ་དང་ཡ་པོ་འགའ་ཞིག་ལས་མཁས་གྲུབ་སུས་ཀྱང་ཞལ་ཐོག་ཏུ་ལེན་མི་མཛད་རྒྱུ་ཞིག་མིན་པས། མཁས་གྲུབ་དེ་དག་གི་རྣམ་ཐར་ཟིན་པར་འདོད་པས་འདི་ཉིད་བསྒྲུབ་པ་དང་ཡ་བོ་རྣམས་ཀྱི་གོ་འཕང་ཐོབ་པར་འདོད་པས་དེ་དག་བསྒྲུབ་པར་གྱིས་ཤིག་ཅེས་སྔགས་སྨྱོན་ག་གཱ་ཨ་བྷྱེ་ནས་སྨྲས་པའོ། །དགེའོ། །ཐོག་མར་ཡི་དམ་གང་རུང་བསྙེན་ལ་གོང་གནོན་མི་ལྷོད་པར་བྱ། དེ་ནས་རང་ཡི་དམ་དུ་གསལ་བའི་མདུན་དུ་བསྐྱེད་ཆོག་གཞུང་བཞིན་བྱས་ལ་བསྙེན་བཟླས་ཀྱི་རབ་འབྱམས་ཕྲིན་ལས་བསྒྲུབ་བསམ་ཞིང་། ཞེས་བཟླས་ལ་མཆོད་བསྟོད་བྱས་ནས། རཾ་ཡཾ་ཁཾཿ སྭ་བྷ་ཝ་ནམ་མཁའ་མཛོད་དང་ཨ་ཀ་རོ་སོགས་བརྗོད་ལ་ཙ་འདི་ནས་ནུབ་ཀྱིས་སོགས། གསོལ་བསྐང་ཚར་གཅིག་མཐར་མཆོད་བསྟོད་བྱས་ནས་གྲོལ་ལོ། །གུང་ཐུན་ལའང་དེ་ལྟར་བྱའོ། །དགོང་ཐུན་དུ་ལས་བྱང་སྔར་ལྟར་ལ་ཐུན་ཕྱེད་དུ་བསྙེན་པ་བཟླ་ཕྱེད་ཕན་ཆད་ཅི་ཙམ་བསྒྲུབ་པའི་ཡར་ཕྱེད་དུ་བསྐང་གསོལ་དང་། མངའ་གསོལ་ཕྲིན་བཅོལ་བཅས་དང་། ཡི་དམ་གྱི་ཚོགས་འཁོར་ཚར་གཅིག་གི་མཐར་མཆོད་བསྟོདབྱ། ནུབ་ཐུན་ལ་ལས་གཞུང་བསྲིང་ཞིང་བསྙེན་པ་འབའ་ཞིག་བཟླས་མཐར་ཆད་བརྟན་སོགས་གྱི་མཐའ་བསྡུའོ། །ཅི་ཙམ་བསྒྲུབ་པའི་མར་ཕྱེད་དུ་ནང་ཐུན་སྔར་བཞིན་ལ་གུང་ཐུན་གྱི་ཕྱེད་དུ་བཟླས་སྔགས་འདོན། ཕྱེད་དུ་ཕྲིན་བཅོལ་མཇུག་གི་ཁྱད་པར་མདུན་གྱི་ལྷའི་ཐུགས་ཀ་ནས་སོགས་གང་བར་བསམ། ཨོཾ་རཱ་ཛ༴ སོགས། སྭཱ་ཧཱས་བར་དང་། ཡང་བཟླས་སྔགས་གཤམ་དུ་ཁམས་གསུམ་སྲིད་གསུམ་སོགས་དབང་བསྡུད་སྔགས་བཟླ་མཆོད་བསྟོད་མཐར་དབང་བསྐུལ་དང་བཅས་པ་འདོན་ལ་བཤགས་པ་བསྟན་སྲུང་དམ་ཅན་སོགས་དང་ཡི་དམ་བཀྲ་ཤིས་བཅས་འདོན། དགོང་ཐུན་ལ་ཐུན་ཕྱེད་དུ་བསྙེན་པ་དབང་བཟླས་དབང་བསྐུལ། ཐུན་ཕྱེད་དུ་ཚོགས་ལྷག་མའི་མཐར་བསྐང་གསོལ་ཅི་ནུས་དང་། ཕྲིན་བཅོལ་སོགས་བྱ། ནུབ་ཐུན་ནང་ཐུན་འདྲ་བ་ལ་མཐར་ཆད་བརྟན་སོགས་བྱ། ཁྱད་པར་འགྲུབ་རྟགས་འོང་ན་དགྲ་མེད་ན་དབང་བསྐུལ་དང་། དབང་གི་ཕྲིན་བཅོལ་གྲངས་བསྐྱལ། ཡོད་ན་ཐུན་བྱེད་དུ་བཟླས་སྔགས་ཀྱི་མཐར་བཟླས་དང་། ཡང་རྦད་སྔགས་དང་བསྐུལ་བ་གཉིས་ཀ་འདོན་ལ་མཚན་མ་བྱུང་ཚེ་བསད་སྔགས་ཀྱང་བཏགས་སོ། །གཞན་གོང་དང་འདྲའོ། །རྗེས་དངོས་གྲུབ་གྱི་དུས་སུ་ཡི་དམ་ཆོས་སྐྱོང་དང་བཅས་པའི་སྐུ་གསུང་ཐུགས་དང་ཕྲིན་ལས་ཀྱི་དངོས་གྲུབ་ཐོབ་པར་བསམ་ལ། ཡི་དམ་དང་ཆོས་སྐྱོང་གི་དངོས་སྒྲུབ་ཡང་བླང་། མཐར་བཀྲ་ཤིས་སོགས་ཀྱིས་མཐའ་བརྒྱན་ནོ། །མན་ངག་ཕྱག་བཞེས་དང་འབྲེལ་བ། །འབྲེལ་བ་བཞི་ལྡན་ཁྱད་ཆོས་ཅན། །བསྒྲུབ་བརྒྱུད་དམ་པའི་ཕ་ལུགས་འདི། །འོད་ཟེར་མཐའ་ཡས་ཀྱིས་བསྐུལ་ངོར། །པདྨ་ཀློང་ཡངས་དེ་ཡིས་སོ། །