བོད་ཁམས་ལྷ་མི་ཡོངས་ལ་ཆེད་དུ་སྤྲིངས་པ་སྐྱོན་ཡོན་མ་འདྲེས་འཆར་བའི་མེ་ལོང་།
བོད་ཁམས་ལྷ་མི་ཡོངས་ལ་ཆེད་དུ་སྤྲིངས་པ་སྐྱོན་ཡོན་མ་འདྲེས་འཆར་བའི་མེ་ལོང་ཞེས་བྱ་བ་བཞུགས་སོ།།
འདི་ཁོ་ནའོ། །འདྲེན་མཆོག་ཤཱཀྱའི་རྒྱལ་པོའི་བཀའ། སྔགས་འཆང་པདྨ་ཐོད་ཕྲེང་གི་ལུང་། རིག་འཛིན་རྒྱལ་ཁམས་པ་ཁྲོ་རྒྱལ་རྡོ་རྗེའི་ཚིག །འཕགས་མཆོག་རིགས་གསུམ་མགོན་པོའི་གདུལ་བྱར་གྱུར་པ་བོད་ཁ་བ་ཅན་གྱི་ལྗོངས་སུ་སྐྱེས་ཤིང་དཀོན་མཆོག་གསུམ་ལ་བླ་མར་བཟུང་བ་ནང་པ་སངས་རྒྱས་པའི་སྡེ་དང་རིས་སུ་གཏོགས་སོ་འཚལ་མཐའ་དག་ལ་ཆེད་དུ་སྤྲིངས་པ། ད་ལྟ་རྩོད་ལྡན་སྙིགས་མ་ལས་ཀྱང་ཆེས་ཡང་མཐའ་ལ་ཐུག་པས། བོད་ཡུལ་མཐའ་དབུས་གང་དུ་བལྟས་ཀྱང་ཕྱི་རོལ་ནས་མི་དང་མི་མིན་གྱི་ཉེར་འཚེ་མ་
རུངས་པ་རླུང་འཚུབས་ལྟར་ལངས་ཤིང་། ནང་དུ་ཕན་བདེ་གཞི་མ་རྒྱལ་བའི་བསྟན་པ་རིན་པོ་ཆེ་དེ་འཛིན་གྱི་སྡེ་དང་བཅས པ་འཇིག་ལ་ཤིན་ཏུ་ཉེ་བ་དང་། སྐྱེ་འགྲོ་དྲག་ཞན་མེད་པ་དབང་མེད་སྡུག་བསྔལ་གྱི་འདམ་དུ་ཚུད་པའི་གནས་སྐབས་འདི་ལྟ་བུ་བྱུང་བའི་བྱེད་པོ་གཞན་མ་མཆིས་ཏེ། མི་རྣམས་ཤེས་རྒྱུད་ཉོན་མོངས་པ་རགས་ཤིང་། ལས་སུ་མི་དགེ་བཅུ་ལ་འགྱོད་མེད་རྟག་པར་བྱོལ་ཉོག་ཏུ་སྤྱོད་པའི་དབང་གིས། སྔོན་བྱོན་རྒྱལ་བློན་བྱང་ཆུབ་སེམས་དཔའ་རྣམས་ཀྱིས་ལེགས་པར་བཅས་པའི་ཆོས་སྲིད་དགེ་བའི་ཁྲིམས་བཟང་པོ་ཐམས་ཅད་
ཞིག་ནས་དེང་སང་བསམ་ན་གནའ་སྒང་གི་དཔེར་སོང་ནས་གདའ་བའི་ལན་རྩ་་ལ་ཐུག་པ་ཤེས་ལས་ཆེ། ལར་སྤྱི་མཐུན་ལས་ཀྱི་ཆུ་ཀླུང་དྲག་པོ་བཙན་ཐབས་སུ་བཟློག་ནུས་པ་གཤིས་ཀྱིས་དཀའ་མོད། འོན་ཀྱང་ད་དུང་བདེ་སྐྱིད་སྤྲིན་བར་གྱི་ཉི་ཞུར་ཙམ་ཨེ་འབྱུང་གི་རེ་ཆེ་ལྷ་ལ་བྱེད་ཚེ། རྒྱུ་མེད་ཀྱི་འབྲས་བུ་མི་སྲིད་པས། ཁྱེད་ལུགས་གཉིས་མཁྱེན་པའི་མངའ་བདག་རྣམས་གཞན་ཕྱོགས་ཀྱི་ངོ་དགའ་དང་ཟས་ནོར་དུམ་རེ་བྱུང་བལ་བརྩིས་ཏེ་རེ་དོགས་ལ་ལྐོག་ནོར་དུ་བཟུང་ནས་ཇི་མི་སྙམ་དུ་ལྐུག་བརྫུ་འདེབས་པའི་དུས་མིན་པས། ཐལ་འགྱོད་མེད་པའི་གྲོས་ཀ་སྔ་གོང་ནས་གཟབ་ལ་བགྱིད་འཚལ། གཞན་བྱང་ཆུང་ཁ་ཅིག་ཚོང་ཕྲུག་སྲིན་མོའི་གླིང་དུ་མགོ་འཁོར་བ་ལྟར་ཕྱིན་ཅི་ལོག་གི་རྗེས་སུ་ངོ་ཚ་མེད་པར་མཆོངས་ནས་རང་ཕུང་གཞན་བརླག་གི་རྒྱུ་དེ་འདྲ་མ་བྱེད་པར་རང་ཕྱོགས་རྒྱང་མིག་མཐོང་བའི་ཚིག་ཕན་པར་སྨྲ་བ་བྱུང་ན་དང་དུ་
ལོངས། ཕལ་ཆེ་བ་སྔ་བསམ་ཕྱིས་མནོ་གང་ཡང་མེད་པར་བོང་རྒན་ཉི་མ་འདེ་བ་ལྟར་འཐོམ་མེར་མགོ་རྨོངས་པའི་ཐབས་སྡུག་དེ་ཡང་མི་བྱ་བར་སྙིང་ལ་རུས་པ་བསྐྱེད་ནས་འཕྲལ་ཕུགས་ལེགས་ཉེས་ཀྱི་མདུན་མ་གཏོད་ཡུལ་མ་ནོར་བར་རྡོག་སྣ་གཏད་ཕྱོགས་མཐུན་པའི་སྒོ་ནས་གྱེན་དུ་གོམ་པ་གང་རེ་ཡིན་ཀྱང་སྤོས། སྤྱིར་ན་ལྷ་སྡེ་མི་སྡེ་ཚང་མས་བླང་དོར་གལ་པོ་ཆེ་རྣམས་འདིར་དོན་ཚན་ལྔར་བསྡུས་ཏེ་སྨོས་པ་ལ། དོན་དང་པོར། མཆོག་གསུམ་ཡལ་བར་བོར་ཞིང་ལས་འབྲས་ཁྱད་དུ་བསད་ནས། ཚེ་འདི་འབའ་ཞིག་གི་ཆེད་དུ་ངལ་བ་དང་ལེན་གྱིས་རྨོ་བརྐོ་སོ་ནམ་ལ་འབད་པ་ཁོ་ན་ཙམ་ལུགས་གཉིས་ཀྱི་འདུན་མའི་རྩེ་མོར་མི་རློམ་པར། འདི་ཕྱི་ཚེ་རབས་ཀུན་ཏུ་ཕན་བདེ་ལེགས་ཚོགས་མ་ལུས་པ་གང་ལས་འབྱུང་བའི་རྒྱུ་མ་ནོར་བ་ཞིང་དང་བསམ་པ་རྣམ་དག་ལ་བརྟེན་ནས་མཆོད་སྦྱིན་བསོད་ནམས་གསོག་པ་
ལ་གཙོ་བོར་བཟུང་ནས་ནམ་ཡང་རྒྱུན་མི་བཅད་པ་དང་། དོན་གཉིས་པར། སྔོན་ཆད་བོད་དུ་ཡོངས་སུ་མ་དར་བའི་ཆོས་ལུགས་མི་མཐུན་པའི་སྐད་ཡིག་འཕྲུལ་ཆ་སོགས་ལ་བསླབ་ཀྱང་དོན་ཆུང་ལ་ཚེགས་ཆེ་ཞིང་དལ་འབྱོར་དང་བློ་གྲོས་ཆུད་འཛའ་བའི་ཚུལ་ལས་ལྡོག་སྟེ། བསླབ་བྱའི་གནས་མ་ནོར་ཞིང་ཤེས་ན་དོན་ཆེ་བ་སྔོན་བྱོན ཚད་མའི་པཎ་གྲུབ་འགྲོ་བའི་སྒྲོན་མེ་རྣམས་ཀྱི་ཐུགས་བསྐྱེད་སྨོན་པའི་དྲིན་ལས། ད་ལྟ་ཡང་ཉན་བཤད་མ་ནུབ་པའི་མདོ་སྔགས་རིག་གནས་དང་བཅས་པའི་བཀའ་དང་དགོངས་འགྲེལ་མན་ངག་གི་གནས་ལ་སེར་སྐྱ་སོ་སོའི་མོས་འདོད་རྒྱུད་ཚོད་ལ་དཔགས་པའི་སློབ་གཉེར་ཚུལ་མཐུན་བྱེད་པ་དང་། དོན་གསུམ་པར། ཉེས་པ་སྟོང་གི་སྣ་འདྲེན་དུ་རུ་ཀའི་འཕྲུལ་གྱི་མཚོན་ཆ་དང་རྫས་ངན་ཐ་མ་ཁའི་རིགས་འདི་དག་གིས་དངོས་དང་བརྒྱུད་ནས་བསྟན་འགྲོ་ལ་ཕུང་ཁྲོལ་གནོད་ཚབས་ཆེ་བས་དངོས་སུ་བསྟེན་
ཅིང་ལོངས་སྤྱོད་པ་ལྟ་ཞོག་རེག་པ་དང་དྲི་ཚོར་བ་ཙམ་ཡང་འགོ་བའི་ནད་བཞིན་རིང་དུ་སྤོང་བ་དང་། དོན་བཞི་པར། བོད་ཡུལ་བཀྲ་མི་ཤིས་པའི་ལྟས་མཚན་འབྱུང་པོའི་ཆ་ལུགས་ཡ་མ་ཟུང་བསྟེན་པའི་རྐྱེན་གྱིས་ལྷ་སྲུང་གཉེན་པོ་གཡེལ་ཞིང་ཁེངས་ལོག་འབྱུང་བ་དང་ཚེ་བསོད་རླུང་རྟ་ཉམས་པར་འགྱུར་བས། སོ་སོའི་ཡུལ་སྲོལ་གནའ་བོའི་དུས་ནས་གང་དར་བ་ལ། གང་དྲན་བསྒྱུར་བཅོས་མི་བྱ་བ་དང་། དོན་ལྔ་པར། ཐུགས་རྗེ་དང་ཕྲིན་ལས་དེང་དུས་ལྷག་པར་མྱུར་བས་བོད་འབངས་སྐྱོབ་པར་བསླུ་མེད་རྡོ་རྗེའི་ཞལ་བཞེས་མངའ་བའི་ལྷ་ཐུགས་རྗེ་ཆེན་པོ་དང་། བླ་མ་ཨོ་རྒྱན་རིན་པོ་ཆེ་ལ་ཡིད་ཆེས་ཁྱེད་ཤེས་ཀྱི་དད་མོས་བརྟན་པོའི་སྒོ་ནས་ཡིག་དྲུག་དང་། གུ་རུ་སིདྡྷི་ལ་རྒྱུན་དུ་ཁ་ཏོན་བྱེད་པ་སྟེ། གོང་གསལ་དོན་ཚན་ཚང་མར་འཇུག་ལྡོག་བག་ཡོད་དང་བས་ལྷུར་ལེན་བགྱིས་ན། བདེན་འབྲས་ནམ་ཡང་
མི་བསླུ་བས་རེ་ཞིག་དུས་ངན་གྱི་ཁུག་པ་ཕྱིར་བསྲིངས་ནས། བོད་འབངས་རྣམས་ཕན་བདེ་ཉི་མ་གསར་དུ་འཆར་བའི་དགའ་སྟོན་ལ་སྤྱོད་དུ་ཡོད་ཀྱི། གཞན་དུ་ནག་ཕྱོགས་བདུད་འགོང་ཁ་རྒྱལ་དུ་བཏང་ནས་མི་རུང་སྣ་དགུའི་བསམ་སྤྱོད་ཤ་སྟག་ལས་མེད་ཕྱིན་ཆད་དུས་མི་རིང་བར་རང་བྱས་ལས་ཀྱི་ལ་ཡོག་རང་ལ་འཁོར་ནས་བཟོད་བླག་མེད་པའི་སྡུག་བསྔལ་གྱི་ཁུར་ཆེན་མི་འདོད་བཞིན་དུ་གཉའ་བར་བརྩེགས་པ་མ་ཟད། ཤི་འཕོས་ནས་ཀྱང་ངན་སོང་དམྱལ་བའི་ཆད་པ་རྩུབ་མོ་མངོན་སུམ་མྱོང་བར་གདོན་མི་ཟ་བས་ཅི་ནས་ཀྱང་ཁེ་ཉེན་གྱི་འདམ་ཀ་མ་ནོར་བར་བྱོས་ཤིག །ཅེས་གདོང་ངན་གྱི་ལོ་དབང་ཆེན་སྤྲེལ་ཟླའི་ཚེས་བཅུ་ལ་རང་སྣང་མ་འགག་བདེན་རྫུན་བྲལ་བའི་ཕོ་བྲང་ནས་བྲིས།