གསུམ་པ། བླ་ན་མེད་པའི་ཆིངས།
གསུམ་པ་བླ་ན་མེད་པའི་ཆིངས་ལ། དབྱིངས་ཀྱི་སྐབས་སུ་ཐིག་ལེའི་སྣང་བར་མཐོང་ན། མིག་གཉིས་མཉམ་པར་བལྟ་བ་གནད་དོ། །འོད་རྩིབས་ཤར་ལ་མདུན་དུ་དྲིལ་ནས་བལྟ་བ་གནད་དོ། །གྱེན་འགྲེང་ལ་ཐུར་དུ་དབབ་བོ། །གྲུ་བཞི་ལ་གཡས་སུ་གཅུན་ནོ། །ཟླུམ་པོ་ལ་གཡོན་ན་གཅུན་ནོ། །ཟླ་གམ་ལ་སྟེང་དུ་བལྟའོ། །གྲུ་གསུམ་ལ་ཐུར་དུ་བལྟའོ། །ཡེ་ཤེས་ལྔའི་དབྱིངས་མཁར་ཐབས་དང་། པདྨ་སྟོང་ལྡན་དང་། ཟ་འོག་བེར་ཁྱིམ་ལ་སོགས་པའི་དུས་ན་གང་དུ་སྣང་བའི་དཀྱིལ་དུ་བལྟ་བ་གནད་དོ། །འཆར་བ་ཡུལ་གྱི་གནད་ལ། ཕྱིའི་ཡུལ་ནམ་མཁའ་སྟོང་པ་ལ་ནང་གི་རྣམ་པར་དག་པའི་སྒྲོན་མ་གཏད་དོ། །ཐིག་ལེ་གནས་པའི་གནད་ལ། ཉི་མའི་དཀྱིལ་འཁོར་ལ་རིག་པ་བཅུག་སྟེ་བསྒོམས་པས། ཡེ་ཤེས་ཀྱི་སྣང་བ་ལྷུག་པར་འཆར་རོ། །ཤེས་པ་གཏད་པ་འབེམ་གྱི་གནད་ལ། ཡུལ་ནམ་མཁའ་ལ་མིག་མ་འགུལ་བར་བལྟ། རླུང་དལ་བས་འཕངས་ཏེ། ཕྱིར་བཟུང་བས་སྟོང་གསལ་རང་བྱུང་གི་ཡེ་ཤེས་ཁོང་ནས་འཆར་རོ། །རིག་པའི་གནད་ལུ་གུ་རྒྱུད་དབྱིངས་ཀྱི་ར་བར་བཅུག་པས། དབྱིངས་རིག་འདུ་འབྲལ་མེད་པའི་དགོངས་པ་ལ་གནས་པའོ། །ལྟ་སྟངས་དང་གཟིགས་སྟངས་རྒྱུན་དུ་བཅས་པས་རིག་པའི་གནད་འཆིང་བར་བྱེད་དོ། །སྤྱོད་ལམ་གཞན་གྱིས་དེ་ལྟར་མ་ཡིན་པས། སྒོམ་རུང་མི་བསྒོམ་རུང་དེ་ལྟར་བཅའ་བ་གཅེས་སོ། །(༡༩༩)སྒོ་ཡི་གནད་ཀྱི་དུས་སུ་དམར་ཤས་ཆེ་ན་ཐུར་ལ་མནན། དཀར་ཤས་ཆེ་ན་གཡས་སུ་བཟློག །སེར་ཤས་ཆེ་ན་གྱེན་དུ་བཟློག །ལྗང་ཤས་ཆེ་ན་གཡོན་དུ་བལྟ། མཐིང་ཤས་ཆེ་ན་དབུས་སུ་བལྟ། ཁ་དོག་ལྔ་སྙོམས་ན་དཀྱིལ་ལས་མ་ཡེངས་པ་གནད་དོ། །འཁྲིད་པའི་དུས་སུ་ཙནྡྲའི་ཚེ་མིག་ལ་བྱ་ནག་མོའི་སྒོང་ངའི་སེར་པོ་བྱུག །འོད་དུ་སྣང་དུས་ས་རྡོ་ལ་སོགས་པའི་སྟེང་དུ་གཏད་ལ་བལྟ། རླུང་དར་རེ་ནང་དུ་བསྡམ་མོ། །ཉི་མའི་དུས་སུ་སྐབས་སུ་དོམ་ལྤགས་སམ། རས་ཡུག་ནག་པོ་བཏིང་ལ་བལྟས་པས་འབྱུང་བ་སྙོམས་སོ། །དེའང་སྐྱེས་པ་མིག་གཡས་ནས་ཁྲིད་པ་དང་། བུད་མེད་གཡོན་ནས་ཁྲིད་པ་ནི་གནད་དོ། །འདི་དག་གི་སྐབས་སུ་བླ་མའི་མོས་གུས་ཁོ་ན་གལ་ཆེའོ། །རླུང་ལ་ཤིས་པའི་ཁ་ཟས་བརྟེན་ནོ། །དབྱིངས་ཀྱི་སྒྲོན་མའི་སྐབས་སུ། བུད་མེད་ཀྱིས་ཉི་མའི་རྟེན་ལ་བལྟས་པས། འོད་ཀྱི་གྲུ་ཆད་མཐོང་སྟེ། ཁད་ཀྱི་སྔར་བཞིན་ཁྲིད་ལ་ཉམས་སུ་བླངས་པས། གཞུག་ཏུ་གང་བལྟས་འོད་དུ་སྣང་དུས། ལག་ཏུ་ཤེལ་གོང་བཟུང་ནས། ཉི་མ་ལ་བལྟས་པས་སྐུའི་སྣང་བ་ནམ་མཁའ་ཁྱབ་པར་འཆར་རོ། །སྐྱེས་པས་ཟླ་བ་རྒྱས་པའི་དུས་སུ་གོང་ལྟར་བལྟས་པས་འཁྲུལ་སྣང་འགག་གོ། །མིག་མི་བདེ་ན་བཅོས་པའི་ཐབས་ནི། མིག་ལ་ཞེམ་རྩོའི་ལྡེ་གུ་བྱུགས། སྣང་བ་པྲ་ཡས་ན་མིག་ཐུར་ལ་མནན་ནོ། །དེ་ཁྲིད་དུ་མ་བཏུབ་ན་རླུང་གྱེན་ལ་དྲང་ངོ་། །ཡུལ་གྱི་སྐབས་སུ་ལུས་གློད། མིག་རང་བབས། རླུང་རང་སར་བཞག་ལ། ཆ་ཆ་ནས་གློད་ཆགས་པས་རིག་པ་མིག་ལ་གཏད་དོ། །དབྱིངས་རིག་གི་སྣང་བ་མ་ཡེངས་པར་བལྟ་བ་གནད་ཀྱི་དམ་པའོ། །ཡུལ་གྱི་གནད་མེད་ན་བསྒོམས་ཀྱང་ཉམས་གོང་དུ་མི་འཕེལ། སྒོའི་གནད་མེད་ན་ཆོས་ཉིད་ཡིད་དཔྱོད་དུ་འགྱུར། རླུང་དང་རིག་པའི་གནད་མེད་ན་བསྒྲུབས་ཀྱང་དོན་མེད་འགྱངས་པས་ན། དོན་གནད་གསུམ་དང་ལྡན་པ་གཅེས་སོ། །དབྱིངས་ཀྱི་དུས་སུ་བྱིང་ན་རླུང་གྱེན་ལ་འཐེན། རྒོད་ན་ཐུར་ལ་མནན་པ་གནད་དོ། །སྣང་བའི་གནད་ལ་འཕེལ་བ་དང་ཟད་པ་གཉིས་ཏེ། རླུང་ནང་དུ་མི་གཞག་པར་ཕྱིར་(༢༠༠)འཕུལ་ལ། ཁ་ནས་དྲངས་ཏེ་ཧིག་གི་སྒྲ་འདོན་པས་གཉིས་ཀ་འགྲུབ་བོ། །ལས་རླུང་ཟད་པའི་གནད་ལ། ནང་དུ་འགེངས་པ་དལ་ལ། ཕྱིར་འཕངས་དྲགས་པས་ཧུ་སྒྲ་ཐོན་པའོ། །དབྱིངས་ལུ་གུ་རྒྱུད་གཟུང་བའི་གནད་ནི། རླུང་ཁ་ནས་དྲངས་ཏེ། མིག་ཨར་ལ་གཏད། ལུས་འདུག་སྟངས་བསྟུན། ཤེས་པ་ཡངས་སུ་བཅུག་པས་ཟིན་པའོ། །དེའང་དབྱིངས་རིག་ལ་གཏད་པས། སེམས་འཕྲོ་ལ་སྒོམ་མེད་པ་འདྲ་བ་ནི། དང་པོ་རླུང་མ་འཆིང་དུས་སུ་འོང་སྟེ། སེམས་ཡས་སུ་བཅུག་པས་རང་ཟིན་ལ་འགྲོ། ནང་དུ་རླུང་དག་པ་ལ་དབྱིངས་ལ་བལྟས་པས་ངང་གིས་འགགས་ཏེ། བལྟ་འཕྲོ་བཞག་དུས་དྭངས་རྙེད་པས་ཤེས་སོ། །སྒྲོན་མའི་གནད་གཟིགས་སྟངས་འབེམ་དང་མ་བྲལ་བར་བྱེད་པ་སྟེ། དབྱིངས་རིག་གི་སྣང་བ་མཐོང་བས། རླུང་སེམས་གཞི་ལ་དག་ནས་སྣང་བ་བཞི་ཚད་དུ་ཕྱིན་ཏེ། གཞི་སྣང་རླུང་གི་རྐྱེན་དང་བྲལ་བས། ནང་དབྱིངས་སུ་ཐིམ་སྟེ། ཀ་དག་གི་སར་གྲོལ་ལོ། །དེའང་འཕྲོ་འདུ་མེད་དུས། དར་རེ་ཀ་དག་རང་མལ་དུ་ཐིམ་ལ། སྣང་བ་ཐམས་ཅད་ཐིམ་དུས་རང་མལ་ཆེན་པོར་རྟག་ཏུ་བཞུགས་པ་ཞེས་བྱའོ། །གནད་འདི་ལྟ་བུའི་བརྩོན་པས་ཉམས་སུ་བླངས་ན། རབ་ལོ་གསུམ། འབྲིང་ལྔ། ཐ་མ་བདུན་ན་ལྷག་མེད་དུ་སངས་རྒྱའོ། །
དེ་ལྟར་ཡང་ཟབ་སྙིང་པོའི་བཅུད་བསྡུས་ནས། །ཕྱི་རབས་སྐལ་བཟང་རྣམས་ཀྱི་དོན་དུ་བསྡེབས། །དགེ་བ་འདི་ཡིས་བདག་དང་འགྲོ་བ་ཀུན། །འོད་ལུས་དག་པས་གདོད་མའི་སར་ཕྱིན་ཤོག །སྙིང་པོ་ཡང་བཅུད་ཅེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གངས་རི་ཐོད་དཀར་གྱི་མགུལ་དུ་སྦྱར་བ་རྫོགས་སོ།། །།
དགེའོ། །དགེའོ། །དགེའོ།། །།