ཉམས་ལེན་བདེ་སྟོང་འཁོར་ལོ།
ཕག་མོ་དམར་མོའི་ཟབ་ཐིག་ལས༔ ཉམས་ལེན་བདེ་སྟོང་འཁོར་ལོ་བཞུགས༔ ཡེ་ཤེས་མཁའ་འགྲོའི་ལྷ་ཚོགས་རྣམས་ལ་འདུད༔ དབང་བཞི་ཐོབ་ཅིང་ཐེག་ཆེན་སྐལ་བར་ལྡན༔ བླ་མ་ལ་མོས་གསང་སྔགས་བསྒྲུབ་ལ་བརྩོན༔ ཚེ་འདི་བློས་བཏང་ཕྱི་མ་དང་དུ་བླངས༔ ཆགས་ཅན་བུ་ལ་ཆགས་པས་གྲོལ་བའི་ཕྱིར༔ བདེ་བ་ཆེན་པོ་རང་ལུས་གདམས་པ་འདི༔ མཁའ་འགྲོའི་དུས་བཟང་ཚོགས་འཁོར་མཎྜལ་བཅས༔ སྣོད་དང་ལྡན་ལ་གདམས་པ་སྙན་དུ་སྐྱུགས༔ དེས་ཀྱང་ཐོབ་ཆོག་ལེ་ལོ་མེད་པ་རུ༔ དབེན་པའི་གནས་སུ་སྒྲུབ་པ་རེམ་ལ་འབུངས༔ རྡོ་རྗེའི་སྐུ་འགྲུབ་བདེ་སྟོང་ཡེ་ཤེས་འབར༔ དབང་བཞི་ཐོབ་པས་སྒྲིབ་བཞི་མཐར་ཟད་ཅིང་༔ སྐུ་བཞིའི་ཡེ་ཤེས་མངོན་སུམ་རང་ལ་རྙེད༔ བྱང་སེམས་མ་ཉམས་བརྟེན་ཞིང་གོང་དུ་སྤེལ༔ དགེ་ཚུལ་དགེ་བསྙེན་དགེ་སློང་བསླབ་སྡོམ་རྫོགས༔ བདེ་སྟོང་འབར་ཞིང་དགའ་བཞིའི་ཡེ་ཤེས་མྱོང་༔ དམ་ཚིག་གསུམ་གྱིས་བརྒྱན་པའི་སྔགས་པ་སྟེ༔ སྣོད་ལྡན་སྐྱེས་བུའི་མྱུར་ལམ་ཨེ་མ་ཧོ༔ ས་མ་ཡཱ༔ རྒྱ་རྒྱ་རྒྱ༔ དེ་ནས་བདེ་བའི་གདན་ལ་སྐྱིལ་ཀྲུང་འདུག༔ སྐྱབས་འགྲོ་སེམས་བསྐྱེད་གསོལ་བ་སྙིང་ནས་འདེབས༔ ཆོས་བདུན་ལྡན་པས་ལུས་གནད་དྲང་པོར་བསྲང་༔ མ་དག་ལུས་ཀྱི་སྟོང་ར་བསྒོམ་པ་ཡིས༔ འབྱུང་བཞིའི་དུག་སངས་ལས་རླུང་རང་སོར་རྒྱུ༔ དག་པ་ལྷ་ཡི་སྟོང་ར་བསྒོམ་པ་ཡིས༔ བར་ཆད་བགེགས་གྲོལ་ཡེ་ཤེས་བྱིན་རླབས་འཐོབ༔ དེ་ཡི་ཕྱིར་ན་སྔོན་འགྲོ་འདི་ལ་འབད༔ དམིགས་པ་གསལ་ཞིང་ཏིང་འཛིན་བརྟན་པ་དང་༔ མཚན་ཉིད་བཞི་ལྡན་དབུ་རྐྱང་རོ་གསུམ་དང་༔ རྩ་དང་འཁོར་ལོ་ཡི་གེ་དཀར་དམར་རྣམས༔ ངོ་བོ་སྟོང་པ་རང་བཞིན་གསལ་བ་ལ༔ ཡེ་ཤེས་ལྔ་ལྡན་མདངས་དང་ལྡན་པར་བསྒོམ༔ བུམ་པ་ཅན་གྱི་རླུང་བསྐྱིལ་ཕོ་བར་དགང་༔ ཨ་ཤད་མེ་དང་ཧཾ་ཡིག་བསིལ་རྒྱུན་རྣམས༔ འབར་འཛག་འབྲོས་འདེད་མ་ཡེངས་རྩེ་གཅིག་ངང་༔ དགའ་བཞིའི་ཡེ་ཤེས་མས་འབེབས་ཡས་འཛེག་བསྒོམ༔ ཡན་ལག་ལྔ་འདུལ་འབེབས་ཆེན་འབེབས་ཆུང་དང་༔ བར་འབེབས་རླུང་རོ་འབུད་དང་གསིག་ཅིང་སྤྲུག༔ ས་མ་ཡཱ༔ རྒྱ༔ དེ་ལྟར་གདམས་པ་གནད་བསྣུན་མཐར་ཕྱིན་ནས༔ དྲང་སྲོང་ཙོག་པུའི་འཁྲུལ་འཁོར་བཅས་ནས་ཀྱང་༔ རང་མདུན་ཡིད་འོང་གཞོན་ནུ་ཡིད་ལ་བཀོད༔ རང་ཉིད་དབང་ཆེན་རྟ་མཆོག་རྒྱལ་པོར་བསྒོམས༔ མུ་དྲ་རྡོ་རྗེ་རྣལ་འབྱོར་མ་རུ་གསལ༔ བལྟ་འཁྱུད་གཡའ་སྒོག་འོ་བྱེད་ལྕེ་འཇིབ་དང་༔ དལ་བུས་རྡོ་རྗེ་པདྨ་འདུ་འཕྲོད་སྦྱོར༔ ཐིག་ལེ་དབབ་བསྐྱིལ་ལྡོག་འདྲེན་བཀྲམ་པ་ཡི༔ འཁྲུལ་འཁོར་དམིགས་པ་རིམ་གྱིས་ལས་ལ་སྦྱོར༔ བསྐྱེད་རྫོགས་ལས་རུང་གོམས་པ་ལྡན་པའི་ཚེ༔ ལུས་ནི་ཕྱེད་སྐྱིལ་ལག་སོར་མཁའ་འགྲོ་ལྔ༔ རྡོ་རྗེ་གཅུན་པས་རྟ་མགྲིན་རིགས་ལྔ་དང་༔ སྙོམས་འཇུག་དགའ་བདེ་གོང་བཞིན་ཉམས་བལྟ་སྟེ༔ ཐིག་ལེ་གསང་བར་འབེབ་ཅིང་བསྐྱིལ་ལྡོག་འདྲེན༔ བཀྲམ་པ་ལ་སོགས་ཉམས་ལེན་གནད་དུ་བསྣུན༔ ས་མ་ཡཱ༔ རྒྱ༔ འདི་ཉིད་མཐར་ཕྱིན་བསྐྱེད་རྫོགས་ལས་སུ་རུང་༔ དམིགས་པ་གར་གཏད་བསྒྱུར་ཐུབ་བདེ་སྟོང་རྒྱས༔ ཚ་གྲང་ཐུབ་དང་སྲོག་རྩོལ་དྲོད་གསལ་ཚེ༔ མཚན་ལྡན་མུ་དྲ་གསང་བ་བཅུ་གསུམ་ལྟར༔ ཡང་དག་དམ་ཚིག་ལྡན་པས་བརྟེན་པར་བྱ༔ ཐ་མལ་སྐྱེ་བོས་མཐོང་ཐོས་མེད་པར་སྦད༔ གསང་སྒོ་འཆལ་ན་མཁའ་འགྲོའི་བཀའ་ཆད་ཡོང་༔ ལོག་རྟོག་མཁན་གྱི་འགྲོ་བ་ངན་སོང་འཁྱམ༔ བདག་གཞན་གཉིས་འཕུང་སྔགས་སྤྱོད་ཉེས་པ་ཡིན༔ དེ་ཕྱིར་ལས་ཅན་སྦྱང་པ་སྔོན་ལ་སོང་༔ སྐལ་ལྡན་ཕོ་མོ་རེས་འགའི་སྤྱོད་ཡུལ་ལས༔ ཀུན་གྱི་ཐུན་མོང་མ་ཡིན་གསང་ངོ་རྒྱ༔ ཨོ་རྒྱན་མཁན་པོ་པདྨ་འབྱུང་གནས་བདག༔ མཁའ་འགྲོའི་གསང་མཛོད་ཟབ་མོའི་ཆོས་རྣམས་རྡོལ༔ ཕྱི་མའི་དུས་ཀྱི་འགྲོ་བའི་དོན་བསམ་ཏེ༔ ཟབ་ཆོས་མང་བོ་སྒྲུབ་གནས་རྣམས་སུ་སྦས༔ དེ་དག་ནང་ནས་ཡང་ཟབ་མཆོག་གྱུར་ལམ༔ ཕག་མོ་རིགས་ལྔ་ཟབ་ཏིག་སྐོར་ལྔའི་ཆོས༔ མཁའ་འགྲོ་སྡེ་ལྔའི་གནས་སུ་ཨ་ཐམ་རྒྱ༔ མ་འོངས་དུས་སུ་ཐུགས་སྤྲུལ་སྐལ་ལྡན་ཞིག༔ སྦས་ཚུལ་འགྲོ་འདྲེན་སྣང་སྤྱོད་ཆོ་ལེ་བ༔ ཟང་ཐལ་ཞེན་བྲལ་ཁམས་ནས་ཉི་གྲགས་འབྱུང་༔ རྟེན་འབྲེལ་འགྲིག་ཚེ་གདམས་པ་འདི་དང་འཕྲད༔ དེ་དུས་ཤོག་སེར་ལྟོས་ལ་རང་ཉམས་ལོང་༔ དེ་ནས་ས་གཡོ་ལྕེ་འབབས་ཐུག་ཆོམ་དང་༔ རྣམསལ་སོགས༔ སྡེ་བརྒྱད་འབྱུང་བ་འཁྲུག་པའི་དུས་ཡིན་པས༔ དུས་རྟགས་གསལ་ཚེ་ཟབ་ཆོས་འདི་ཕོབ་ལ༔ ཚོགས་འཁོར་བསྐང་བཤགས་གསོལ་བ་ཐོབ་མཛོད་དང་༔ བོད་འབངས་འགྲོ་བའི་བར་ཆད་སྐབས་ཤིག་སེལ༔ སྐྱབས་ཚེ་དར་ཨ་སྦར་དང་ཐར་པའི་མིང་༔ བདུད་སྤྲུལ་དྲུག་གིས་བསྐུར་འདེབས་འཕུང་དཀྲུག་བརྩོམ༔ དེ་དུས་ཚོགས་བརྒྱ་བསྐང་བཤགས་འཕགས་པ་བསྒྲུབ༔ པདྨ་ང་ལ་གསོལ་བ་ཐོབ་དང་སེལ༔ ལོག་པའི་སེམས་འཆང་ལོག་པའི་སྤྱོད་པ་སྤྱོད༔ དམ་སྲིའི་སྤྲུལ་པ་འགྲུབ་གྱི་མིང་ཅན་གྱི༔ སེལ་ཐབས་ཕག་མོ་སྒྲུབ༔ ཚེས་བཅུ་ཆག་མེད་གསོལ་འདེབས་འབུང་ན་བཟློག༔ དེ་དག་རྣམས་ལ་སྲུང་མ་དམ་ཅན་གྱི༔ བཀའ་ཡི་ཆད་པས་མ་རུང་འཕུང་གསུམ་སྡང་༔ ཡིད་ཆེས་སྐྱེད་ཅིག་མ་འོངས་སྐལ་ལྡན་བུ༔ ཁྱད་པར་གནས་མཆོག་རྡོ་རྗེ་སྙིང་རྫོང་དུ༔ སྒྲུབ་པའི་སྡེ་ཚུགས་མདོ་ཁམས་སེམས་ཅད་བདེ༔ ལམ་ཡིག་གསང་བའི་སྙིང་པོའི་ལུང་བྱང་རྣམས༔ བཀའ་ཡི་ཐ་རམ་ཡིན་པས་སྙིང་ལ་ཆོངས༔ གཞུང་དང་ལུང་བྱང་སྤང་བླང་སོ་སོར་ཕྱེ༔ གཞུང་ནི་ཡིད་ཆེས་བསྐྱེད་ཕྱིར་འགྲོ་ལ་སྟོན༔ ལུང་བྱང་སྤང་བླང་རང་གི་ཉེར་ལེན་གྱིས༔ གཟའ་བདུད་གདམས་སྐོར་ཆོས་ཚན་སུམ་ཅུ་པ༔ ལྕགས་མོ་བྱ་ལ་འབེབས་ལུང་མ་གསལ་ན༔ ཡང་གཏེར་མཁར་གྱི་རི་ལ་སྦ་བ་དགེ༔ ལས་ཅན་ལྕོག་རོའི་སྤྲུལ་པའི་སྐྱེས་བུ་ཡིས༔ ཕྱག་རྟེན་ལོངས་སྤྱོད་རྫོགས་སྐུའི་ཅོད་པན་འབུལ༔ རྟེན་འབྲེལ་ལེགས་བབས་ཆོས་བཀའ་ངང་གིས་སྤེལ༔ གོ་མཚོན་བྱུང་ན་སྐབས་ཤིག་བསྡམ་པར་བྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཉན་རྒྱ༔ ས་མ་ཡ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པ་རྩལ་གྱིས་ཁམས་སྲིང་མོ་རྫོང་གི་ཆགས་རུ་ཕུག་དམར་ནས་ཤིང་ཕོ་སྟག་གི་ལོ་ལ་སྤྱན་དྲངས་ཤིང་། མེ་ཕོ་སྟག་གི་ལོ་ལ་ཆགས་རུ་ཕུག་ནག་བདེ་བ་ཆེན་པོར་ཤོག་སེར་ལས་ཕབ་པའོ། །མངྒ་ལཾ། །