ད་ནི་སྐྱབས་སུ་འགྲོ་བའི་ཚུལ་ལ་ཅུང་ཟད་དཔྱད་པ།

ད་ནི་སྐྱབས་སུ་འགྲོ་བའི་ཚུལ་ལ་ཅུང་ཟད་དཔྱད་པ་ལ།

ཉ་ཊཱིཀ་ལས། སྤྱིར་ཐེག་པ་སྤྱིའི་ལུགས་ལ། མཚན་ཉིད་ནི། རང་རང་གི་སེམས་ཀྱིས་དམིགས་པའི་འཇིགས་པ་སྤང་བའི་ཕྱིར་དུ་དཀོན་མཆོག་གསུམ་ལ་བརྟེན་པར་ཁས་ལེན་པའི་རིག་བྱེད་དོ། །ཞེས་པ་ལྟར་སྐྱབས་འགྲོའི་མཚན་ཉིད་མི་འཐད་པར་ཐལ། སྐྱབས་འགྲོ་ལ་དཀོན་མཆོག་གསུམ་ལ་བརྟེན་པ་ཞིག་མི་དགོས་པ་གང་ཞིག ངག་གི་རྣམ་པ་རིག་བྱེད་མི་དགོས་པའི་ཕྱིར། དང་པོ་གྲུབ་སྟེ། མདོ་སྡེ་རྒྱན་ས་འགྲེལ་ལས། ཐུན་མོང་གི་མཚན་ཉིད། ཞེས་པ་ནས། དང་པོ་ནི་འཇིགས་པས་ཉེན་ནས་དེ་ལས་གྲོལ་པར་འདོད་པས་རང་བས་ཡུལ་མཆོག་ཏུ་གྱུར་པ་ཞིག་ལ་བློ་གཏོད་ཅིང་སྐྱབས་གནས་སུ་ཁས་བླངས་ཏེ་བརྟེན་པར་དམ་བཅས་ནས་གསོལ་བ་འདེབས་པའོ། །ཞེས་གསུངས་པ་དང༌། སྐྱབས་གསུམ་ལས་སངས་རྒྱས་ཁོ་ན་ལ་སྐྱབས་སུ་འགྲོ་བའི་སྐྱབས་འགྲོ་ཡང་དཀོན་མཆོག་གསུམ་ལ་བརྟེན་པ་དེ་མ་ཡིན་པའི་ཕྱིར་རོ། །རྩ་རྟགས་གཉིས་པ་གྲུབ་སྟེ། དེ་ལ་སེམས་ཞིག་ཡོད་པའི་ཕྱིར་ཏེ། ཉ་ཊཱིཀ་ལས། ཐེག་ཆེན་སྐྱབས་འགྲོའི་མཚན་ཉིད། སེམས་ཅན་སྡུག་བསྔལ་ལས་སྒྲོལ་བར་བཞེད་པའི་སྙིང་རྗེས་བསླངས་ནས་གཞན་དོན་དུ་སངས་རྒྱས་ཐོབ་པར་འདོད་པས་དཀོན་མཆོག་ལ་སྐྱབས་སུ་ཁས་ལེན་པའི་སེམས་སམ་ངག་གི་རིག་བྱེད་གང་རུང་ངོ༌། །ཞེས་གསུངས་སོ། །ཉ་ཊཱིཀ་ལས།ཐེག་པ་སྤྱིའི་སྐྱབས་འགྲོའི་མཚན་ཉིད་ཀྱི་ཟུར་ངག་གི་རིག་བྱེད་ཅེས་སྨོས་པ་ནི། མཛོད་རང་འགྲེལ་ལས། སྐྱབས་སུ་འགྲོ་བ་རྣམས་ཀྱི་རང་བཞིན་ཅི་ཞེ་ན། ངག་གི་རྣམ་པར་རིག་བྱེད་ཀྱི་ངོ་བོ་ཉིད་དག་ཡིན་ནོ། །ཞེས་པ་ལ་བརྟེན་པར་སྣང་ངོ༌། །གོང་གི་མདོ་སྡེ་རྒྱན་གྱི་རྣམ་བཤད་ལས། སྐྱབས་འགྲོའི་མཚན་ཉིད་དེ་ལྟར་བཞག་པ་མི་འཐད་པར་ཐལ། འཇིག་རྟེན་པའི་སྐྱབས་འགྲོ་སྐྱབས་འགྲོ་མ་ཡིན་པའི་ཕྱིར་ཏེ། ལྷན་ཐབས་འོད་བརྒྱ་འབར་བ་ལས།དེ་ལ་འཇིག་རྟེན་པའི་སྐྱབས་འགྲོ་རྣམས་ནི། སྐྱབས་འགྲོའི་མིང་ཅན་ཙམ་ལས་མཚན་ཉིད་པ་མ་ཡིན་ལ། དགེ་མི་དགེ་ལུང་མ་བསྟན་གསུམ་ཀ་ཡོད་དོ། །ཞེས་སོགས་གསུངས་སོ། །ཡང་གཞན་དུ་མི་སྨྲ་བ་མི་ཚང་བའི་སྐྱབས་འགྲོ་ཡོད་པར་ཐལ། གོང་གི་ཐེག་པ་སྤྱིའི་སྐྱབས་འགྲོའི་མཚན་ཉིད་དེ་ཚང་བ་ལ་གཞན་དུ་མི་སྨྲ་བ་ཚང་མི་དགོས་པའི་ཕྱིར་ཞེ་ན། དེ་མི་འཐད་པར་ཐལ། ལྷན་ཐབས་འོད་བརྒྱ་འབར་བ་ལས། དེས་ན་ཁྱད་པར་བཞི་ཆར་ཚང་བ་དགོས་སོ། །ཞེས་གསུངས་སོ། །སྟོན་པ་སངས་རྒྱས་དེ་ཕྱི་རོལ་བའི་སྟོན་པ་ཡིན་པར་ཐལ། དེ་སེམས་ཅན་ཐམས་ཅད་ཀྱི་སྟོན་པ་ཡིན་པའི་ཕྱིར་ཏེ། དཀོན་མཆོག་རྗེས་དྲན་གྱི་མདོ་དོན་བཤད་པ་ལས། ཁམས་གསུམ་དུ་གཏོགས་པའི་སེམས་ཅན་ཐམས་ཅད་ཀྱི་སྟོན་པ་ཡིན་ཡང༌།ཞེས་གསུངས་སོ། །ཞེ་ན་མ་ཁྱབ་སྟེ། དེ་གཉིས་ཁས་ལེན་མི་འདྲ་བའོ། །ཡང་མཛོད་ལས།སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང༌། །ཞེས་དང༌། དེའི་རང་འགྲེལ་ལས། གཟུགས་ཀྱི་སྐུ་ནི་སངས་རྒྱས་མ་ཡིན་ཏེ། སྔ་མ་དང་ཕྱི་མ་གཉིས་ལ་ཁྱད་པར་མེད་པའི་ཕྱིར། ཞེས་དང༌། ཉ་ཊཱིཀ་ལས། བྱེ་བྲག་སྨྲ་བ་ནི་སྐྱབས་ཡུལ་སངས་རྒྱས་ནི་མི་སློབ་པ་ཟད་མི་སྐྱེ་ཤེས་འཁོར་བཅས་ཏེ་གཟུགས་སྐུ་ནི་སྐྱབས་མིན་ཏེ་སོ་སྐྱེའི་སྐབས་དང་ཁྱད་མེད་པས་སོ། །ཞེས་བྱེ་བྲག་སྨྲ་བའི་ལུགས་ལ་གཟུགས་སྐུ་སྐྱབས་མ་ཡིན་པར་བཤད་པ་མི་འཐད་པར་ཐལ། མཛོད་རང་འགྲེལ་ལས། དེའི་ཕྱིར་རྟེན་སངས་རྒྱས་ཉིད་དུ་མ་བཀག་པས། ཞེས་གསུངས་པའི་ཕྱིར་ཞེ་ན་མ་ཁྱབ་སྟེ། ལུང་དེའི་དོན་ནི་སངས་རྒྱས་ཀྱི་ཟག་མེད་ཀྱི་སྡོམ་པ་ལྟ་བུའི་ཟག་མེད་ཀྱི་གཟུགས་སུ་གྱུར་བའི་ལམ་བདེན་དེ་སངས་རྒྱས་ཡིན་པའི་དོན་ཡིན་པར་སྣང་ངོ༌། །ཞང་སྟོན་རྒྱུད་བླའི་འགྲེལ་བ་ལས། གཉིས་པ་ངོ་བོ་ནི།དཀོན་མཆོག་གསུམ་ལ་འབྲས་བུ་དང་རྒྱུར་དམ་འཆའ་བ་སྟེ། དེའང་གཞན་རྒྱུད་ལ་གྲུབ་ཟིན་གྱི་དཀོན་མཆོག་ལ་སྟོན་པ་དང་ལམ་དང་གྲོགས་ཀྱི་རྒྱུར་འཛིན་པ་རྒྱུའི་དང༌། རང་ལ་འབྱུང་འགྱུར་ལ་འབྲས་བུར་འཛིན་པ་འབྲས་བུའི་སྐྱབས་འགྲོའོ། །ཞེས་པ་དེ་གཉིས་ལ་སྐྱབས་འགྲོའི་མཚན་ཉིད་ཚང་མ་ཚང་དཔྱད་པར་བྱའོ། །ཡང་སངས་རྒྱས་འཕགས་པའི་རྒྱུད་ལ་སྐྱབས་འགྲོ་ཡོད་མེད་དཔྱད་པར་བྱའོ། །