དྲི་བ་གཉིས་པ་ཟིན་བྲིས་ལས་གཞན་དབང་གང་ཡིན་པ་རྣམས་ཀུན་བརྟགས་སུ་འདུས་པའི་ཕྱིར་ཞེས་པའི་འདུ་ཚུལ་གང་ཞེས་པའི་ལན།
དྲི་བ་གཉིས་པ་ཟིན་བྲིས་ལས་གཞན་དབང་གང་ཡིན་པ་རྣམས་ཀུན་བརྟགས་སུ་འདུས་པའི་ཕྱིར་ཞེས་པའི་འདུ་ཚུལ་གང་ཞེས་པའི་ལན།
དེའི་ལན་ནི་ཚུལ་འདི་ལྟ་སྟེ། གཞན་སྟོང་སྙིང་པོ་ལས། རིགས་པའི་རྣམ་པར་དཔྱད་པའི་ཚེ་གཞན་དབང་དངོས་ནི་ཀུན་བརྟགས་སུ་འདུ་ཞིང༌། དེའི་ཆོས་ཉིད་ཀྱི་གནས་ཚུལ་ནི་ཡོངས་གྲུབ་ཡིན་པས། ཀུན་བརྟགས་དང་ཡོངས་གྲུབ་གཉིས་སུ་ཆོས་ཐམས་ཅད་འདུས་སོ། །ཞེས་དང༌།ཐེག་མཆོག་དབུ་མ་ལས། རྣམ་པར་དཔྱད་ན་གཞན་དབང་ཀུན་བརྟགས་སུ། །འདུས་ཕྱིར་མཚན་ཉིད་གཉིས་སུ་འགྱུར་བ་ཡིན། །གཞན་དབང་གི་ནི་སྣང་ཆ་ཀུན་བརྟགས་ཏེ། །འཁྲུལ་བའི་སྣང་བ་བགྲང་ཡས་བསམ་མི་ཁྱབ། །སྣང་གཞིའི་སེམས་ཀྱང་ས་བོན་ཐམས་ཅད་པ། །དེ་དེའི་ཆོས་ཉིད་དུ་སོང་དེ་ཡང་དེའོ། །ཀུན་བརྟགས་མེད་ཕྱིར་གཟུང་འཛིན་སྤྲོས་དང་བྲལ། །ཞེས་དང༌། དེའི་ཟིན་བྲིས་ལས། མཚན་ཉིད་གསུམ་པོ་དེ་གཉིས་སུ་བསྡུ་བ་ནི། དོན་དམ་དཔྱོད་བྱེད་དང་འབྲེལ་བའི་རིགས་པས་རྣམ་པར་དཔྱད་པ་ནི། གཞན་དབང་གང་ཡིན་པ་རྣམས་ཀུན་བརྟགས་སུ་འདུས་པའི་ཕྱིར། ཀུན་བརྟགས་པའི་མཚན་ཉིད་དང༌། ཡོངས་སུ་གྲུབ་པའི་མཚན་ཉིད་གཉིས་སུ་འགྱུར་བ་ཡིན་ལ། དེའི་རྒྱུ་མཚན་ཡང་གཞན་དབང་གི་སྣང་ཆ་ཀུན་བརྟགས་ཡིན་ཞིང༌། དེ་ཡང་འཁྲུལ་བའི་སྣང་བ་བསམ་གྱིས་མི་ཁྱབ་པ་ཡིན་ཏེ། སྣང་བ་དེ་འཆར་བའི་གཞི་སེམས་ཀུན་གཞི་རྣམ་པར་ཤེས་པ་ཡང་ས་བོན་ཐམས་ཅད་པ་ཡིན་པའི་ཕྱིར་རོ། །འཁྲུལ་བའི་སྣང་བ་བསམ་གྱིས་མི་ཁྱབ་པ་དེ་དང༌། དེའི་ཆོས་ཉིད་དུ་གཞན་དབང་ས་བོན་ཐམས་ཅད་པ་དེ་སོང་བ་ཡིན་ཞིང༌།འཁྲུལ་བའི་སྣང་བ་དེ་ཡང་གཞན་དབང་ས་བོན་ཐམས་ཅད་པ་དེའི་ཆོས་ཅན་གྱི་ཚུལ་གྱིས་གནས་པ་ཡིན་ནོ། །དེ་ཡང་དཔེར་ན་བུམ་པར་སྣང་བའི་སྣང་ཆ་དེ་ལ་སྣང་བ་དེ་འཆར་བར་འགྱུར་བའི་ས་བོན་དེ་དེའི་ཆོས་ཉིད་དུ་སོང་བ་ཡིན་པ་སོགས་ཤེས་བྱ་ཐམས་ཅད་ལ་དེས་རིགས་བསྒྲེ་བར་བྱའོ། །འདི་སྐབས་ཀྱི་ཆོས་ཉིད་ཡང་ཀུན་རྫོབ་ཀྱི་ཆོས་ཉིད་ཡིན་ཏེ། ཀུན་རྫོབ་རང་རང་གི་གནས་ལུགས་ལ་ཆོས་ཉིད་ཀྱི་མིང་གི་བསྟན་པ་ཡིན་པས་སོ། །བག་ཆགས་ཀྱིས་ཁ་མ་བསྒྱུར་པའི་གཞན་དབང་དག་པ་བ་དེ་གཅིག་པུུ་ལ་ཀུན་བརྟགས་གཟུང་བ་དང་འཛིན་པ་གཉིས་སུ་མེད་པའི་ཕྱིར། སྤྲོས་པ་དང་བྲལ་བ་ཙམ་ཡིན་ལ། ངེས་པར་ན་ཤེས་རིག་དག་པ་བ་དེ་ཡང་ནང་འཛིན་པའི་ཤེས་པ་ཡིན་མོད། གཟུང་འཛིན་གཉིས་སུ་སྣང་བ་མེད་པའི་ཕྱིར་རོ། །གཟུང་འཛིན་གྱི་སྤྲོས་པ་དང་བྲལ་ཞེས་བསྟན་པ་ཡིན་ནོ། །ཞེས་གསུངས་ལ། དེའི་དོན་ནི། མདོར་ན་འཁྲུལ་བ་ཀུན་བརྟགས་རྣམས་ཆོས་ཅན་དང་འབྲས་བུ་ལྟ་བུར་བྱས་ནས་གཞན་དབང་ས་བོན་སོགས་ཀུན་རྫོབ་གནས་ཐབས་ཀྱི་ཆོས་ཉིད་དང་རྒྱུ་ལྟ་བུར་བྱས་ཏེ། སྐབས་འདིའི་ཆོས་ཉིད་དང་སྣང་བ་འཆར་བྱེད་ས་བོན་རྣམས་དེ་ལས་འཆར་བའི་ཆོས་ཅན་སྣང་ཆས་བསྡུས་ཚུལ་ཞིག་གཞུང་འདིར་བཞག་པར་སྣང་ངོ༌། །གཞན་ཡང་ཐེག་མཆོག་དབུ་མ་ལས། དོན་ལ་སྣང་ཆ་ལས་གཞན་སྣང་བ་མེད། །གཞན་དབང་ལ་ནི་རང་ངོས་ཚུགས་ཐུབ་བྲལ། །དེ་ཡི་རང་བཞིན་ཚུལ་དུ་ཡོངས་གྲུབ་གནས། །རྣམ་པ་གང་ཡིན་ཀུན་བརྟགས་ཚུལ་ཡིན་ནོ། །མདོ་ལས་ཀྱང༌། གང་བརྟགས་པ་ཡི་དངོས་པོ་འདི། །གཞན་གྱི་དབང་ཡང་དེ་ཉིད་དེ། །བརྟགས་པ་སྣ་ཚོགས་སྣང་བ་ནི། །གཞན་གྱི་དབང་ཞེས་རྟོགས་པར་བྱེད། །ཅེས་དང༌། དེའི་ཐད་ཀྱི་ཟིན་བྲིས་ལས། དོན་ལ་སྣང་ཆ་ལས་གཞན་པའི་སྣང་བ་མེད་པས་གཞན་དབང་རང་གི་ངོ་བོ་ཚུགས་ཐུབ་དང་བྲལ་བ་ཡིན་ནོ། །འོ་ན་སྣང་ཆ་ཀུན་བརྟགས་དང་བྲལ་བའི་ཤུལ་ལམ་དེའི་རང་བཞིན་དུ་གཞན་དབང་མེད་ན་དེ་ལ་རང་བཞིན་གཏན་ནས་མེད་པ་ཞིག་ཡིན་ནམ་འོན་ཏེ་གཞན་ཞིག་ཡོད་སྙམ་ན་དེའི་རང་བཞིན་གྱི་ཚུལ་དུུ་ཡོངས་གྲུབ་གནས་པ་ཡིན་ཞིང་ཀུན་རྫོབ་ཀྱི་རྣམ་པ་གང་ཡིན་པ་ཐམས་ཅད་ཀུན་བརྟགས་ཞེས་བརྗོད་དོ། །མཚན་ཉིད་གཉིས་སུ་བསྡུས་པའི་རྒྱབ་བརྟེན་པའི་མདོ་སྡེ་ལང་གཤེགས་ལས་གསུངས་པ་གང་ཀུན་བརྟགས་པའི་དངོས་པོ་འདི་རྣམས་གཞན་གྱི་དབང་ཡང་དེ་ཁོ་ན་ཡིན་ལ། ཀུན་བརྟགས་སྣ་ཚོགས་པའི་སྣང་བ་ཅན་དེ་ནི་གཞན་གྱི་དབང་ཞེས་རྟོགས་པར་བྱའོ། །ཞེས་གསུངས་པའི་དོན་མདོར་བསྡུས་ན་དོན་དམ་དཔྱོད་བྱེད་ཀྱི་རིགས་པས་དཔྱད་ཚེ་སྣང་ཆ་ཀུན་བརྟགས་དང་བྲལ་བའི་ཤུལ་ན་གཞན་དབང་ཡང་མེད་པས་དེ་གཉིས་འཁྲུལ་ཤེས་ཀྱིས་བརྟགས་པ་ཡིན་ལ། ཤུལ་ན་ཡོད་པ་ནི་ཡོངས་གྲུབ་གཅིག་པུ་ཡིན་པས་ཆོས་ཅན་ཀུན་རྫོབ་རྣམས་ལ་ཀུན་བརྟགས་ཞེས་བརྗོད་པ་ཡིན་པར་གསུངས་པའོ།། །།