གཉིས་པ་གཞུང་གི་དོན་དངོས་ལ་གསུམ།

གཉིས་པ་གཞུང་གི་དོན་དངོས་ལ་གསུམ་སྟེ།

བཤད་པ་ལ་འཇུག་པའི་ཡན་ལག བཤད་པ་ཉིད་ཉེ་བར་འགོད་པ། བཤད་པ་མཐར་ཕྱིན་པའི་བྱ་བའོ། །དང་པོ་ལ། ཕྱག་འཚལ་བའམ་མཆོད་པར་བརྗོད་པ་དང༌། བཤད་པར་དམ་བཅའ་བ་གཉིས། དང་པོ་ནི། དཔལ་ལྡན་རྡོ་རྗེ་སེམས་དཔའི་གནས་ཐོབ་རྒྱུར་གྱུར་པ། །བླ་མའི་ཞབས་ཀྱི་པདྨར་ཇི་བཞིན་བཏུད་བྱས་ཏེ། །ཞེས་དཔ༷ལ་ནི་ཀྱཻ་རྡོ་རྗེའི་རྒྱུད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཞེས་གསུངས་པ་ལྟར་ཟབ་གསལ་གཉིས་སུ་མེད་པའི་ཡེ་ཤེས་ལྡ༷ན་པ་ནི་ཐུགས་རྒྱུད་ལ་མངོན་དུ་གྱུར་པའི་ཆོས་སྐུའི་ཡེ་ཤེས་ནི་རྡོ༷་རྗེ༷་ཡིན་ལ། དེ་ལས་བྱུང་བའི་གཟུགས་སྐུ་ནི་སེམ༷ས་དཔ༷འ་འམ་རྡོ་རྗེ་འཆང་ཡིན་ཏེ། ཇི་སྐད་དུ། ཅིའི་ཕྱིར་རྡོ་རྗེ་སེམས་དཔའ་ཡིན། །བྱང་ཆུབ་མཆོག་གི་ཡེ་ཤེས་གང༌། །དེ་ནི་རྡོ་རྗེ་ངེས་པར་བརྗོད། །ཡེ་ཤེས་རྡོ་རྗེ་ལས་བྱུང་བ། །དེ་ནི་རྡོ་རྗེ་སེམས་དཔར་བརྗོད། །ཅེས་གསུངས་པས་སོ། །དེ་འདྲའི་རྡོ་རྗེ་སེམས་དཔའི་གན༷ས་སམ་གོ་འཕང་ཐོ༷བ་པའི་རྒྱུ༷འི་གཙོ་བོར་གྱུ༷ར་པ༷་བླ༷་མ༷་ཡིན་ཞིང། དེ་ལ་གཞན་གུས་པས་འདུད་པ་ཧ་ཅང་ཆེ་མོད་སྐུའི་དམའ་ཤོས་ཞ༷བས་ཀྱི༷་པ༷དྨ༷ར་སྒོ་གསུམ་གུས་པའི་ཚུལ་ཇི༷་ལྟ་བ་བཞི༷ན་རང་གི་སྤྱི་བོ་ལ་སོགས་པ་ཡན་ལག་མཆོག་རྣམས་ཀྱིས་བཏུ༷ད་པར་བྱ༷ས་ནས་ཏེ༷་ཞེས་པ་ལྷག་བཅས་ཡིན་པས་བཏུད་ནས་ཅི་བྱེད་ན་ཚིག་རྐང་འོག་མར་བླ་མ་བསྟེན་ཚུལ་བཤད་པའི་མགོར་ཕྱག་འཚལ་བའམ་མཆོད་པར་བརྗོད་པའོ། །