ལྔ་པ་ཆོ་ག་གང་གིས་བླང་བ།
ལྔ་པ་ཆོ་ག་གང་གིས་བླང་བ་ནི།
སྦྱོར་དངོས་རྗེས་གསུམ་སྟེ་ཀརྨ་ཤ་ཏཾ་སོགས་སྡོམ་ཆོག་ལ་བལྟའོ། །མཚོ་ཊཱིཀ་ལས། སྐྱབས་སུ་འགྲོ་བ་ཁས་བླང་པའི་ཚིག་གིས་དགེ་བསྙེན་ཉིད་དང་དགེ་ཚུལ་ཉིད་དུ་ཁས་བླང་པའི་ཚིག་གི་འགོ་རྩོམ་པ་དང་ཞེས་པ་འདི་ནི་གཞན་གྱི་འདོད་པ་ལ་ཟུར་ཟ་བ་སྟེ། རྒྱ་གར་གྱི་འདུལ་འཛིན་ཁ་ཅིག་ན་རེ་དགེ་བསྙེན་དང་དགེ་ཚུལ་གྱི་སྡོམ་པའི་ཆོ་ག་ལ། སྐྱབས་འགྲོ་ཉི་ཚེ་ལན་གསུམ་བརྗོད་ནས། དེའི་འོག་ཏུ་དགེ་བསྙེན་དུའམ་དགེ་ཚུལ་དུ་གཟུང་དུ་གསོལ་ཞེས་ལན་གསུམ་བརྗོད་ཅེས་ཟེར་ཏེ། ཊཱི་ཀ་ལས། དེ་ནི་འཁྲུལ་པ་ཡིན་པར་རིག་པར་བྱའོ། །ཞེས་གསུངས་སོ། །ལུང་གཞི་ལས། སྐྱབས་འགྲོ་དང་གཟུང་དུ་གསོལ་སྤེལ་ཞིང༌། ལན་གསུམ་བརྗོད་པར་གསུངས་པ་དང་འགལ་བའི་ཕྱིར་རོ། །འོན་ཀྱང་གཞན་ཞེ་འདོད་དེ་དང་མཐུན་པར་ལུང་ཕྲན་ཚེགས་ལས། དགེ་བསྙེན་མ་དང་དགེ་ཚུལ་མའི་ཆོ་གའི་སྐབས་ནས་བཤད་སྣང་སྟེ། འོན་ཀྱང་ལུང་གཞི་དང་མདོ་རྩ་འགྲེལ་ལས་སྐྱབས་འགྲོ་དང་གཟུང་དུ་གསོལ་སྤེལ་བ་འདི་ཆོ་ག་རྣམ་དག་ཡིན་ནོ། །དེའི་འོག་ཏུ་ཞེས་པ་འདི་ཡང་གཞན་གྱི་འདོད་པ་ལ་ཟུར་ཟ་བ་སྟེ། སྔར་སྐྱབས་འགྲོ་ལན་གསུམ་བྱས་ནས་གཟུང་དུ་གསོལ་ལན་གསུམ་བྱེད་པའི་ལུགས་ལྟར་ན་བསླབ་པ་བརྗོད་པའི་འོག་ཏུ་གཟུང་དུ་གསོལ་བརྗོད་པར་འདོད་པ་དེ་དགག་པའི་ཕྱིར་རོ། །ཞེས་གསུངས་སོ། །བསླབ་པ་བརྗོད་པ་ནི་དགེ་བསྙེན་རྣམས་ཀྱི་ནི་ལྔའོ། །དགེ་ཚུལ་རྣམས་ཀྱི་ནི་བཅུའོ་ཞེས་ཊཱི་ཀ་ལས་སོ། །ཁས་བླངས་པའི་ཚུལ་གྱིས་བྱའོ་ཞེས་པ་འདིར། སྲོག་གཅོད་པར་མི་བྱའོ་ཞེས་དགག་ཚིག་ཏུ་བརྗོད་དམ། སྲོག་གཅོད་པ་སྤངས་ཏེ་ཞེས་སྒྲུབ་ཚིག་བརྗོད་ཅེ་ན། མི་བྱ་བ་ནི་རེ་ཞིག་མི་བྱ་བ་ལ་ཡང་འཇུག་སྟེ་གཏན་སྤངས་སུ་གོ་བའི་ངེས་པ་མེད་པས། སྲོག་གཅོད་པ་སྤངས་ཏེ་ཞེས་བརྗོད་པའོ། །བསླབ་པ་བརྗོད་པ་འདི་ལན་གཅིག་བརྗོད་པ་སྟེ། ལུང་གཞིའི་དགོངས་པའོ། །ལུང་ཕྲན་ཚེགས་ལས། དགེ་བསྙེན་མ་དང་དགེ་ཚུལ་མའི་ཆོ་གའི་སྐབས་ནས་བསླབ་པ་བརྗོད་པའི་མཇུག་ཐོགས་སུ་བདག་ཇི་སྲིད་འཚོའི་བར་དུ་དགེ་ཚུལ་མར་གཟུང་དུ་གསོལ་ཞེས་བཤད་ཅིང༌། བསླབ་པ་བརྗོད་པ་ལན་གསུམ་སྨྲ་བར་བྱ་སྟེ་ཞེས་བཤད་པ་ཡིན་པར་སྣང་སྟེ། ལུང་ཡི་གེ་ཉམས་པ་ཡིན་ནོ་ཞེས་རིགས་སོ། །འགྲེལ་ཆུང་ལས། བསླབ་པ་བརྗོད་པ་ལན་གསུམ་གྱི་བར་དུ་བཟླས་ཞེས་བཤད་སྣང་སྟེ་དེའི་རྗེས་སུ་མི་འབྲང་ངོ༌། །ཞེས་པ་དེ་དག་མཚོ་ཊཱིཀ་གི་ཚིག་ཟིན་ལྟར་བཀོད་པའོ། །