ཐོར་བུ་བ་ལུགས་ཀྱི་བསྟན་བཅོས།
གསུམ་པ་ཐོར་བུ་བ་ལུགས་ཀྱི་བསྟན་བཅོས་ལ་སོགས་པ་ལ། ལུགས་ཀྱི་བསྟན་བཅོས་ལ། སློབ་དཔོན་ཀླུ་སྒྲུབ་ཀྱིས་མཛད་པའི་ཤེས་རབ་བརྒྱ་པ་དཔལ་བརྩེགས་ཀྱི་འགྱུར། ཤེས་རབ་སྡོང་བུ་སྐྱེ་བོ་གསོ་བའི་ཐིགས་པ་ཡེ་ཤེས་སྡེའི་འགྱུར། སློབ་དཔོན་ཉི་མ་སྦས་པས་མཛད་པའི་ཚིགས་སུ་བཅད་པའི་མཛོད་དཔལ་གྱི་ལྷུན་པོའི་འགྱུར། བྲམ་ཟེ་མཆོག་སྲེད་ཀྱི་མཛད་པའི་ཚིགས་སུ་བཅད་པ་བརྒྱ་པ་ཆོས་ཀྱི་ཤེས་རབ་ཀྱི་འགྱུར། སྙན་ངག་མཁན་དོན་ཡོད་འཆར་གྱིས་མཛད་པའི་དྲེ་མ་མེད་པའི་དྲིས་ལན་རིན་པོ་ཆེའི་ཕྲེང་བ་དང་། ཙ་ན་ཀ་ལུགས་ཀྱི་བསྟན་བཅོས་གཉིས། རིན་ཆེན་བཟང་པོའི་འགྱུར། མ་སུ་རཀྵའི་ལུགས་ཀྱི་བསྟན་བཅོས་ཤཱཀྱ་བློ་གྲོས་ཀྱི་འགྱུར་ཏེ་བརྒྱད་དང་། གསོ་བ་རིགས་པའི་བསྟན་བཅོས་ལ། སློབ་དཔོན་ཀླུ་སྒྲུབ་ཀྱིས་མཛད་པ་ལ། སྦྱོར་བ་བརྒྱ་པ་ཉི་མ་རྒྱལ་མཚན་གྱི་འགྱུར། སྨན་དཔྱད་འཚོ་བའི་མདོ། །སློབ་དཔོན་རྟ་དབྱངས་ཀྱིས་མཛད་པའི་སྨན་དཔྱད་ཡན་ལག་བརྒྱད་པའི་སྙིང་པོ་བསྡུས་པ་རིན་ཆེན་བཟང་པོའི་འགྱུར། དེའི་རང་འགྲེལ་དུ་གྲགས་པ་ཤཱཀྱ་བློ་གྲོས་ཀྱི་འགྱུར། དེའི་འགྲེལ་ཆེན་ཁ་ཆེ་ཟླ་བ་ལ་དགའ་བ་མཛད་པ་ཚིག་དོན་གྱི་ཟླ་ཟེར་རིན་ཆེན་བཟང་པོའི་འགྱུར། སློབ་དཔོན་ཟླ་བ་ལ་དགའ་བས་མཛད་པའི་ཡན་ལག་བརྒྱད་པ་ལ་སོགས་པའི་སྨན་གྱི་མིང་གི་རྣམ་གྲངས། སྨན་མིང་སྒྲ་སྦྱོར་ངེས་པ་ཐང་ལ་འབར་གྱིས་མཛད་པ་ཉི་མ་རྒྱལ་མཚན་གྱི་འགྱུར་ཏེ་བདུན་དང་། བཟོ་རིག་པའི་བསྟན་བཅོས་ལ་དྲང་སྲོང་ཨ་ཏིའི་བུས་མཛད་པའི་ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་སྐུ་གཟུགས་ཀྱི་མཚན་ཉིད་རྣམ་འགྲེལ་དང་། དྲང་སློང་ཨ་ཏིའི་བུས་མཛད་པའི་སྐུ་གཟུགས་ཀྱི་ཚད་ཀྱི་མཚན་ཉིད་གཉིས་གྲགས་པ་རྒྱལ་མཚན་གྱི་འགྱུར། གྲུབ་ཐོབ་བརྒྱད་ཅུའི་བྲི་ཐབས་དགེ་སློང་དཔལ་གྱི་སྡེས་མཛད་པ་སྟེ་གསུམ་དང་། རྩིས་ཀྱི་གཙུག་ལག་ལ། སློབ་དཔོན་ཀླུ་སྒྲུབ་ཀྱིས་མཛད་པའི་རྟེན་ཅིང་འབྲེལ་པར་འབྱུང་བའི་གཙུག་ལག་གི་དེ་ཁོ་ན་ཉིད་འགོས་ཀྱི་འགྱུར། ཤཱ་རིའི་བུའི་རྩིས་མཚན་མ་བརྒྱད་པ་དང་། ཞི་བ་ལྷའི་རྩིས་གཉིས་ཉི་མ་རྒྱལ་མཚན་གྱི་འགྱུར། བཟའ་དང་སྐར་མ་སྦྱོར་པའི་འབྲས་རྩིས་གྲགས་པ་ཤེས་རབ་ཀྱི་འགྱུར། གཟའ་སྐར་གྱི་རྩིས་འབྲས་ཆེན་མོ། །དབང་ཕྱུག་གི་རྩིས་ཀྱི་རྟེན་འབྲེལ་རྟགས་བརྒྱད་པ། མུ་སྟེགས་ཀྱི་རྒྱུད་དམ་བསྟན་བཅོས་གཡུལ་ལས་རྣམ་པར་རྒྱལ་བ་གློ་བོ་ལོ་ཙྪ་བའི་འགྱུར་ཏེ་བརྒྱད་དང་། སྤོས་སྦྱོར་གྱི་བསྟན་བཅོས་རྩ་འགྲེལ་གཉིས། དྲང་སྲོང་མེས་སྦྱིན་གྱིས་མཛད་པའི་མིའི་མཚན་ཉིད་བརྟག་པ་རྒྱ་མཚོ་གྲགས་པ་རྒྱལ་མཚན་གྱི་འགྱུར། དངུལ་ཆུ་སྒྲུབ་པའི་བསྟན་བཅོས་སློབ་དཔོན་ཆེན་པོ་བྷ་ལི་པས་མཛད་པ་ཨུ་རྒྱན་པ་རིན་ཆེན་དཔལ་གྱི་འགྱུར། འདི་མ་ཆུད་དོ། །གསེར་འགྱུར་གྱི་བསྟན་བཅོས་བསྡུས་པ་མཇུག་མ་ཚང་བ། སློབ་དཔོན་གཟུགས་བཟང་གིས་མཛད་པའི་འདོད་པའི་བསྟན་བཅོས་ཏེ། ཐོར་བུ་བ་སུམ་ཅུ་སོ་གཉིས་སོ། །དེ་ལྟར་ཀུན་དྲིལ་བས་བསྟན་བཅོས་ལྔ་བརྒྱ་བཅུ་དགུའོ། །