ཧོམ་ཟློག་ཆུའི་ཞགས་པ། ཡང་ཟློག་ལྷན་ཐབས་དམིགས་པའི་སྐོར།
ཧོམ་ཟློག་ཆུའི་ཞགས་པ། ཡང་ཟློག་ལྷན་ཐབས་དམིགས་པའི་སྐོར། ཨྠྀི། ན་མོ་མཉྫ་ཤྲཱི་ཀྲོ་དྷ་ཡ། ཡང་ཟློག་བཅའ་ཐབས་གཞུང་ལྟར་ཏེ། །ཁྱད་པར་དམིགས་རིམ་གབ་པ་ནི། །ཕ་རོལ་བྱད་མ་ལྷ་སྲུང་རྦད་འདྲེ་རྣམས། །མེ་ལས་གྲུབ་པའི་ཁྲོ་བོ་ཁྲོ་མོའི་ཚོགས། །ལག་པ་མེ་ཡི་མཚོན་ཆ་སྣ་ཚོགས་ཐོགས། །།བདག་ཅག་འཁོར་བཅས་སྟེང་དུ་དམག་ལྟར་ཆས། །བདག་ཉིད་སྐད་ཅིག་ཆུ་ལས་གྲུབ་པ་ཡི། །ཁྲོ་ཆུ་ལུས་དཀྱིལ་བཅས་པ་དྲན་རྫོགས་གསལ། །རང་ལས་སྤྲུལ་པ་ཆུ་ལས་གྲུབ་པ་ཡི། །ཁྲོ་ཆུང་དཔག་མེད་ནམ་མཁའ་ཁྱབ་པར་སྤྲོས། །ཕྱག་ན་ཆུ་ལས་གྲུབ་པའི་མཚོན་ཆ་ཐོགས། །ཕར་ལ་བརྒྱབས་པས་དགྲ་བོ་བྱེད་མ་བཅས། །མེ་ཡི་སྟེང་དུ་ཆུ་ཆེན་རྒྱབ་པ་ལྟར། །ནག་ཐུམ་གྱིས་བསད་རྗེས་མེད་བརླག་པར་བསམ། །ཁྲོ་ཆུའི་བསྙེན་སྔགས་ཟློག་སྔགས་བཅས་པའི་མཐར། །ཡ་མ་ས་མ་ཏི།། དགྲ་བོ་བྱེད་མའི་སྲོག་ལ་བྷྱོ་བྷྱོ་ཟློག །དེ་ལ་ཞག་རེ་བརྒྱ་ལས་མང་མི་བྱ། །ཡང་ན་བསྙེན་སྔགས་ཟློག་སྔགས་སྦྲེལ་བའི་མཐར། །བྱད་མ་ལྷ་དང་བཅས་པའི་ཤ་ལ་རྒྱུག །སྙིང་ལ་མཱ་ར་ཡ་སོད༔ དབུགས་ལ་རྒྱུག །སྲོག་ལ་མཱ་ར་ཡ་སོད༔
ཁྲག་ལ་རྒྱུག༔ རུས་ལ་མཱ་ར་ཡ་རྦད་ཡ་སོད་ཡ་སོད་ཅིག༔ དེ་ཡང་ཞག་རེ་བརྒྱ་བས་མང་མི་ཉན། །ཡང་ཟློག་བཅའ་ཚེའམ་ནི་དུས་རྒྱུན་དུས། །འཇམ་དཔལ་ཁྲོ་ཆུའི་བསྙེན་སྔགས་མཇུག་ཉིད་དུ། །ཡེ་ཤེས་འཇིག་རྟེན་གང་ཡིན་གཅུན་པའི་སྔགས། །སྔགས་སྒྲོམ་ནང་ནས་ཇི་ལྟར་འབྱུང་བ་ལྟར། །ཕ་རོལ་ལྷ་སྲུང་གང་ཡིན་ངོས་བཟུང་ལ། །དེ་ཉིད་གཅུན་པའི་སྔགས་ལ་ནན་ཏན་བྱ། །ཐུབ་རྟགས་བྱུང་ན་ཚོད་བཟུང་བཟླ་མི་རུང་། །དམིགས་པ་ཁྲོ་བོ་སྡིག་རྡེབ་དམིགས་པ་སྦྱར། །ཕ་རོལ་ལྷ་དེ་ཕྱག་བར་རབ་ཏུ་བཙིར། །དེ་མིན་བྱ་ཚུལ་ཐམས་ཅད་གོང་ལྟར་རོ། །སྤྱིར་ནི་ཟློག་པ་ཐམས་ཅད་རྩྭ་དང་འདྲ། །ཡང་ཟློག་རྣམས་ནི་རྩྭ་སྟེང་མེ་བཞག་འདྲ། །ཡང་ཟློག་མེ་ཡི་སྤུ་གྲི་ཡོད་འགྱུར་ཀྱང་། །ཧོ་ཟློག་འདི་ནི་མེ་སྟེང་ཆུ་དང་འདྲ། །འདི་ནི་ཡང་ཟློག་ཧོ་ཟློག་གཉིས་ཀ་ཡིན། །འདིས་ནི་རྡོ་རྗེ་འཛིན་པའི་ནུས་པའང་ཟློག །འདི་ནི་གནུབས་སྟོན་སངས་རྒྱས་ཡེ་ཤེས་ཀྱིས། །སུ་ལའང་མ་བསྟན་སྙན་བརྒྱུད་ཡིན་པར་བཤད། །དམ་དུམ་ཡིག་ཆ་ཡོད་ཀྱང་བཅའ་ཚོགས་དང་། །དམིགས་པ་སྔགས་བཅས་ཐམས་ཅད་གསལ་བ་ནི། །སྔོན་ཆད་ཡི་གེར་བྲིས་པ་ཡོད་རེ་ཀན། །དེ་ཕྱིར་
ཟིན་བྲིས་གཞུང་ལའང་འདི་མ་བྲིས། །བདུད་རྩི་དིལ་གྱི་སྔགས་འཆང་མཆེད་གསུམ་གྱིས། །རིག་སྔགས་སློབ་ལ་ཡུན་རིང་ནན་ཏན་བྱས། །དེ་ཕྱིར་ཟློག་པ་ཀུན་གྱི་མཐར་ཐུག་འདི། །སྔགས་ནག་རཱ་ག་ཨ་སྱས་ཁོ་ནས་ཤོར། །གཞན་ཡང་ཁྱད་འདོན་བསྟན་པའི་བཙས་སུ་ཤོག །བརྩེ་བྲལ་བསྟན་བཅོས་བརྩམས་པའི་ཉེས་མཆིས་ན། །ཕྱོགས་བཅུའི་རྒྱལ་བ་སྲས་བཅས་དྲུང་དུ་བཤགས། །དགེ་བས་སྙིང་པོ་དོན་གྱི་བསྟན་པ་འདི། །ཕྱོགས་ལས་རྣམ་རྒྱལ་འགྲན་ཟླ་བྲལ་བར་ཤོག།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།