གསང་སྔགས་སྔ་འགྱུར་པ་རྣམས།
གསང་སྔགས་སྔ་འགྱུར་པ་རྣམས་ནི། རྣལ་འབྱོར་རྣལ་འབྱོར་ཆེན་པོ་དང་། །རྗེས་སུ་རྣལ་འབྱོར་ཤིན་ཏུ་ནི། །རྣལ་འབྱོར་ཞེས་བྱ་རྣམ་པ་བཞི། །ཐེག་པའི་རིམ་པ་ཡིན་ཞེས་ཟེར། །ཤིན་ཏུ་རྣལ་འབྱོར་བཟང་བར་འདོད། །ཅེས་གསུངས་པར་འདོད་ཚུལ་དེ་གསར་མ་ལྟར་ན་མི་འཐད་ལ། རྙིང་མ་ལྟར་ན་ཤིན་ཏུ་འཐད་དེ།
གསར་མས་བླ་མེད་ཀྱི་ནང་གསེས་གསུམ་དུ་མ་ཕྱེ་བར་དེ་ལས་གོང་ན་གཞན་མེད་པར་འདོད་ཀྱང་། ཨ་ཏི་ཡོ་ག་ཡེ་ཤེས་སྐྱེ་བའི་ཐབས་ཀྱི་ཐེག་པ་བ་ལ་ཐེག་རིམ་དུ་བཞག་པ་ངེས་པར་འཐད་དེ། འཕགས་པ་ཐོགས་མེད་ཀྱིས། ཤེས་བྱའི་གནས་དང་མཚན་ཉིད་དེ་འཇུག་དང་། །དེ་ལ་གནས་དང་དེ་དངོས་དབྱེ་བ་དང་། །ཉེས་པ་གསུམ་དང་དེ་འབྲས་སྤངས་པ་དང་། །ཡེ་ཤེས་ཐེག་པ་མཆོག་གྱུར་ཁྱད་པར་འཕགས། །ཞེས་གསུངས། གསར་མ་པ་རྣམས་ཀྱི་ལུགས་ལ་དེ་ལྟར་མ་ཡིན་ཏེ། དེའི་ཚུལ་ནི། དེས་ན་གསང་སྔགས་གསར་མ་ལ། །རྣལ་འབྱོར་ཆེན་པོའི་ལྟག་ན་ནི། །དེ་བས་མཐོ་བའི་རྒྱུད་སྡེ་མེད། །སྒོམ་པའི་དམིགས་པ་ཉིད་ཀྱང་ནི། །རྣལ་འབྱོར་ཆེན་པོའི་གོང་ན་མེད། །དེ་ལས་སྐྱེས་པའི་ཡེ་ཤེས་ནི། །དམིགས་པ་མེད་ཅིང་བརྗོད་བྲལ་བས། །ཐེག་པའི་རིམ་པར་མི་བཞེད་དོ། །ལུགས་འདི་ལེགས་པར་ཤེས་གྱུར་ན། །ཨ་ཏི་ཡོ་གའི་ལྟ་བ་ཡང་། །ཡེ་ཤེས་ཡིན་གྱི་ཐེག་པ་མིན། །བརྗོད་བྲལ་བརྗོད་བྱར་བྱས་པ་ནི། །མཁས་པའི་དགོངས་པ་མིན་ཞེས་བྱ། །ཞེས་བཤད་ལ། རྙིང་ལུགས་འཆད་པ་ན། དེས་ན་ཐོས་པའི་ལྟ་བ་ནི། །དབུ་མ་ཡན་ཆད་ཐམས་ཅད་མཐུན། །དེ་ཕྱིར་ལྟ་བའི་ལུང་སྦྱོར་ཀུན། །ཕ་རོལ་ཕྱིན་བཞིན་ཐམས་ཅད་མཛོད། །དེ་རྟོགས་པ་ཡི་ཐབས་ལ་ནི། །ཐེག་པའི་རིམ་པ་ཡོད་པ་ཡིན། །ཞེས་གསུངས།
མདོར་ཧྲིལ་བཤད་ན། གསར་མ་ལྟར་བླ་མེད་ཀྱི་གོང་ན་དེ་ལས་ལྷག་པའི་རྒྱུད་སྡེ་མེད་། བསྒོམ་པ་མེད། ཨ་ནུ་དང་ཨ་ཏིའི་དགོངས་པ་དེ་ནི། གསང་སྔགས་གསར་མ་བའི་བླ་མེད་ཀྱི་ཡེ་ཤེས་ཡིན་གྱི་ཐེག་པ་མ་ཡིན། གལ་ཏེ་ཐེག་པར་བགྲངས་ན་བརྗོད་བྲལ་བརྗོད་བྱར་སོང་བའི་སྐྱོན་འབབ་གསུངས་པ་ཡིན་ལ། ཐོས་པས་གཏན་ལ་དབབ་པའི་ལྟ་བ་དབུ་མའི་སྤྲོས་བྲལ་ལས་ལྷག་པ་སྔགས་ལའང་མེད་དེ། ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་བ་ཡོད་ན་ནི། །ལྟ་དེ་སྤྲོས་པ་ཅན་དུ་འགྱུར། །ཞེས་པ་དང་མཐུན་པར་ལམ་རིམ་ལས། རྒྱ་མཚོ་དངས་པའི་གཟུགས་བརྙན་ལྟར། །སྒྲ་བརྙན་ཡིད་ལ་བྱེད་མིན་པར། །རང་དམིགས་མངོན་སུམ་དམིགས་བྲལ་བ། །རང་གསལ་གསུམ་བྲལ་མི་བསྒུལ་བར། །ངེས་པར་གདེང་དུ་གང་བྱས་པར། །ཐོས་བསམ་བརྟེན་པའི་ལྟ་མཐར་ཕྱིན། །ཞེས་པས་ཐོས་བསམ་གྱིས་འཚོལ་བའི་ལྟ་བ་སྔགས་དང་། ཕ་རོལ་ཕྱིན་པ་ཁྱད་པར་མེད་ཚུལ་བཤད་ནས། སྒོམ་པས་ཉམས་སུ་ལེན་པའི་ཚེ་ལྟ་བའི་ངོ་བོ་དེའི་ལྡོག་ཆ་ལ་རིམ་པ་གསུམ་ཡོད་དེ། གང་ཞེ་ན་རིག་པའི་ཆོ་འཕྲུལ་དུ་སྣང་བ་མ་ཧཱ། རིག་པའི་རྩལ་དུ་སྣང་བ་ཨ་ནུ། རིག་པ་རང་སྣང་བ་ཨ་ཏི་གསུམ་པོ་སྣང་ཐབས་ཀྱི་ངོ་བོ་དེ་མྱོང་བྱ་རིག་པས་ཐག་གཅོད་པ་ལས་ཚིག་གི་ལམ་ཆད་པས་གཏན་ལ་མི་ཕེབས་ཏེ། གཉན་དཔལ་དབྱངས་ཀྱིས། བརྗོད་དུ་མེད་གང་བཤད་དུ་ཇི་ལྟར་ཡོད། །ཅེས་དང་། ཇི་ཙམ་ཟབ་པའི་ཚིག་བརྗོད་ཀྱང་། །རྟོགས་པར་ནུས་པ་མ་ཡིན་ནོ། །ཞེས་བཤད་པ་དང་། རིག་པས་གཏན་ལ་ཕེབས་པ་ནི། རྔམས་གློག་
ལས། མངོན་སུམ་རིག་པས་ཐག་ཆོད་ན། །རྣལ་འབྱོར་ས་ལ་སླེབས་པ་ཡིན། །ཞེས་དང་། བི་མ་ལའི་སེམས་ཕྱོགས་ཀྱི་སྤྱི་ཆིངས་སུ། འདི་ལྟར་གསལ་བའི་དུས་ན་རྟོག་ཅེའམ། མི་རྟོག་ཅེའམ། ཡོད་ཅེའམ། མེད་ཅེའམ། སྟོང་ཅེའམ། མི་སྟོང་ཅེའམ། ཐམས་ཅད་ལས་འདས་ཏེ། འདིས་ནི་ཐེག་པ་ཆེན་པོའི་མདོ་སྡེ་དབུ་མ་ལ་སོགས་པ་བདར་ཤ་བཅད་དེ། ཐེ་ཚོམ་དང་གླེང་གཞི་ཐམས་ཅད་དང་བྲལ་བས་ན། རྣམ་རྟོག་མི་མངའ་ཅིར་ཡང་ས་ལེ་མཁྱེན་ཞེས་གསུངས་སོ། །ལར་འོན་ཀྱང་སྤྲོས་བྲལ་རྟོགས་པ་ཡིས། །ཐབས་ལ་གསང་སྔགས་ཁྱད་པར་འཕགས། །ཞེས་དང་། ལྟ་སྒོམ་རྣམ་དབྱེ་མ་ཕྱེད་ཅིང་། །ཐབས་དང་ཤེས་རབ་མ་ཤེས་པས། །ཞེས་སོགས་ཀྱིས་སྤྱིར་བཤད་ནས། བདག་མེད་བསྟོད་འགྲེལ་དུ་སྔགས་དང་ཕ་རོལ་ཕྱིན་པའི་ལྟ་བའི་ཁྱད་པར་གསལ་བར་བཤད་དོ། །