བསྐལ་ངན་དུས་ཀྱི་ཁུག་པ་ལ་སྐྱོ་བའི་ལྐོག་ལབ་རིང་མོ།
བསྐལ་ངན་དུས་ཀྱི་ཁུག་པ་ལ་སྐྱོ་བའི་ལྐོག་ལབ་རིང་མོ་ཞེས་བྱ་བ་བཞུགས་སོ།། །།
ཨོཾ་མ་ཎི་པདྨེ་ཧཱུྃ། །བླ་མ་དང་དཀོན་མཆོག་གསུམ་ལ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་རློབས་ཤིག་སངས་རྒྱས་པདྨ་འབྱུང། །ཐུགས་རྗེས་གཟིགས་ཤིག་འཕགས་མཆོག་གངས་རིའི་མགོན། །ཡལ་བར་མ་འདོར་ཏཱ་རེ་མཚོ་རྒྱལ་མ། །ལྔ་བདོའི་འཇིགས་སྐྱོབ་རྣམས་ལ་གདུང་བས་འབོད། །མི་མཐུན་དུས་ཀྱི་རྒུད་པ་དབྱིངས་སུ་སོལ། །མཐུན་པའི་ལམ་སྣ་སྦས་ཡུལ་གནས་སུ་དྲོངས། །ཀྱེ་མ་གསོན་དང་མོས་ལྡན་སྐྱེ་འགྲོ་རྣམས། །འཁོས་ཆུང་སྤྲང་པོས་ལྐོག་གཏམ་ཚིག་གསུམ་ཞུ། །དེ་ཡང་སྔོན་ཚེ་ཨོ་རྒྱན་ཆེན་པོ་ལ། །རྗེ་
འབངས་ལོ་པཎ་རྣམས་ཀྱིས་ཞུ་ཕུལ་ངོར། །མ་འོངས་དུས་ཀྱི་ལུང་བསྟན་དཔག་མེད་གསུངས། །བདག་གིས་ཀྱང་ནི་དེ་ལས་མང་རབ་མཇལ། །བསོད་ནམས་མར་འགྲིབ་དེང་སང་དུས་རྟགས་དང་། །འཆུག་མེད་ཁ་དང་ལག་པ་སྤྱད་བཞིན་མཐོང་། །རྡོ་རྗེའི་ལུང་ལ་བསླུ་མེད་ངེས་པ་རྙེད། །བསྐལ་ངན་དུས་ཀྱི་ཁུག་སོ་འདི་ལྟ་བུ། །འབྱུང་བའི་རྒྱུ་རྐྱེན་རྩ་བ་གང་ཞེ་ན། །སྤྱི་མཐུན་བོད་འབངས་བསོད་ནམས་མར་འགྲིབ་ཅིང་། །དུས་རྣམས་མི་འགྱུར་མི་རྣམས་འགྱུར་བ་དང་། །ཁྱད་པར་སྨོན་ལོག་བདུད་ཀྱིས་སྤྲུལ་པ་ནི། །བླ་སྤྲུལ་
རྒྱལ་བློན་ཕལ་པའི་ཚུལ་བརྫུས་ནས། །ཆོས་སྲིད་ཁྲིམས་ཀྱི་ལེགས་པའི་རི་མོ་བསྲུབས། །ནག་པོ་བདུད་བསྟན་གངས་ལྗོངས་ཁྲོད་དུ་དར། འདུལ་ས་ཡི་མེ་བཙའ་ཞིག །གཙུག་ལག་ཁང་དང་མཆོད་རྟེན་རྨང་འོག་ནས། །སྔོན་ཚེ་མནན་པའི་བདུད་དང་དམ་སྲི་ཤོར། །ས་སྟེང་ནད་མཚོན་མུ་གེའི་སྣ་འདྲེན་བྱེད། །མི་སེམས་འདྲེས་བསྐལ་བློ་ཕུགས་འགོང་པོར་གཏོད། །བདུད་ཀྱི་མཚོན་ཆ་དང་ནི་ཐམ་ཁའི། །རྫས་ངན་སེར་སྐྱ་མཆོག་དམན་མེད་པས་བརྟེན། །དེ་ཡིས་སྐྱེ་འགྲོའི་གཡང་ཉམས་སྲིས་མི་རྨེད། །དཀར་ཕྱོགས་ལྷ་སྲུང་ཁྲོས་ནས་གཤེད་དུ་བབས། །ནག་ཕྱོགས་དམ་འགོང་གདུག་པས་བོད་ཁམས་ཕུང་། །དགོན་སྡེའི་བསྟན་འཛིན་བཤེས་གཉེན་ཁས་འཆེ་ནས། །མདོ་སྔགས་ཆོས་ལ་འགལ་འདུ་ཕྱོགས་རིས་རྩོད། །ཆོས་སྤོང་ལས་བསགས་དམྱལ་བའི་ས་མཁན་བྱེད། །བསྟན་ལ་ཁ་
གཡར་དད་གཤིན་དཀོར་ནག་འགམ། །རྟ་ཕྱུགས་བཤས་ཚོང་བུན་བསྐྱེད་ཤོ་བག་ལ། །ཆུད་ཟོས་གཏོང་ནས་རྣམ་སྨིན་ཁུར་ཆེན བསགས། །དམར་གཟུགས་མགོ་རིལ་རྣམས་ཀྱང་བཤད་སྒྲུབ་དང་། །འདུལ་ཁྲིམས་བོར་ནས་ཚོང་ཁེ་བག་མེད་ལས། །དམག་ཇག་འཕྲོག་བཅོམ་བསྟན་སེལ་སྡེ་འཁྲུགས་སློང་། །གྲྭ་ལོག་བཙུན་ལོག་མང་པོས་རྒྱལ་ཁམས་གང་། །ཆོས་ལྟར་བཅོས་རྣམས་གྲོང་ཆོག་འདྲེ་འདུལ་གྱིས། །ལོག་འཚོ་སྒྲབ་ཅིང་དབེན་པར་བསྡད་མི་ཚུགས། །སྒྲུབ་གནས་ཕལ་ཆེར་སྟོང་པར་གྱུར་པ་མཐོང་། །གཏེར་མིན་གཏེར་འདྲ་མང་པོས་རང་གཞན་ཕུང་། །བཀའ་གཏེར་ཆོས་ལ་གཟུ་ལུམ་རང་བཟོས་བསླད། །རྩིང་སྤྱོད་ཡ་མ་ཟུང་དང་མིག་འཕྲུལ་གྱིས། །མ་རིག་འགྲོ་བའི་བློ་སེམས་སྣང་བ་བསྒྱུར། །ལོག་པའི་བཤེས་གཉེན་ལོང་བས་ལོང་ཁྲིད་མང་། །ལྟོ་ཕྱིར་
ཆོས་བཙོང་རྫུན་གྱིས་གཞན་མགོ་བསྐོར། །རང་རྒྱུད་མ་ཐུལ་མི་ལ་ངོ་སྤྲོད་འདེབས། །རི་ཁྲོད་བརྟེན་ཀྱང་ཆོས་དྲིས་མ་འབྱར་རྣམས། །མཐུན་འཇུག་ངོ་དགས་བླ་མར་དབང་ཁྲིད་ཞུས། །དག་སྣང་མི་སྦྱང་སྐྱོན་རྟོག་ལོག་ལྟ་ཆེ། །སློབ་དཔོན་སྤངས་ཤིང་མཆེད་ལྕམ་དགྲ་རུ་བལྟ། །དམ་ཉམས་རྡོ་རྗེ་དམྱལ་བའི་གཏིང་རྡོ་བྱེད། །ཆོས་བྱེད་སྨོད་ཅིང་ངས་བྱས་ང་རྒྱལ་མཐོ། །ཀུན་དང་ཞེ་འགྲས་ལས་འབྲས་ཆུ་ལ་གཡུགས། །མི་ནག་མགོ་བསྐོར་བསྟན་པའི་ཞབས་འདྲེན་བསྒྲུབ། །བཙུན་མ་ཆོས་མེད་ནི དམ་སྲིས་རྒྱུད་བརླམས་ནས། །རྗེ་ལ་མི་གུས་ཕྱི་མ་མི་དྲན་ཞིང། །ཀོ་ལོང་མིག་སེར་ཆགས་སྲེད་སུ་ལས་ཐུ། ཤབ་ཤུབ་ཁ་མང་བླ་སློབ་མཆེད་གྲོགས་དཀྲུགས། །དམ་སྡོམ་མི་སྲུང་བྱི་ཕོ་ལྷ་བཞིན་མཆོད། །ཕྲུག་གུ་སློག་ནས་ལྐོག་གསོད་ལག་དམར་བྱེད། །ཕ་མའི་ཞེ་གཅོད་ཕུང་བྱུར་གྱོད་སྣ་འདྲེན། །ཁ་དྲག་
དཔོན་བློན་སྙིང་དུ་ཕུང་སྲི་ཞུགས། །ལྐོག་རྔན་ངོར་ལྟ་ཞལ་ལྕེ་འཁྱོག་པོར་གཅོད། །བསྟན་འཛིན་སྐྱེས་བུའི་སྐུ་ཚེ་མཛད་ཕྲིན་བཀག༔ ཁྲམ་པའི་རྒྱབ་སྐྱོར་ཡ་རབས་དམངས་སུ་འབེབས། །བློ་གཏད་འབངས་རིགས་བཙན་ཤེད་སྟོབས་ཀྱིས་མནར། །ངོ་ཚ་སྤྱི་དོན་སྙིང་རྗེ་ཕན་སེམས་བྲལ། །ཆུང་མའི་གྲོས་ཉན་ཕ་མ་སྒོ་ཕྱིར་འདོར། །བསྟན་འགྲོའི་བདེ་སྐྱིད་འཕྲོགས་ཤིང་མཐའ་དམག་འབོད། །དམངས་རྣམས་མི་དགེའི་ལས་ཀྱིས་བདེ་བ་འཚོལ། །དཀོན་མཆོག་རྒྱབ་བོར་སྐྱབས་གནས་གདུག་འདྲེར་བཅོལ། །གཡོ་ཁྲམ་མནའ་ཟ་ཇག་རྐུན་རྔོན་ལས་བརྩོན། །དམ་པར་སྐུར་འདེབས་ཟོག་པོ་གཙུག་ཏུ་ཁུར། །རིགས་ཀྱི་རྒན་རབས་ཕ་མའི་ངག་མི་ཉན། །ནོར་རྫས་མཆོག་སྦྱིན་ཕྱོགས་སུ་ལག་པ་དམ། །ཨ་གསར་རི་མགོ་གང་མཐོའི་ཉི་མ་བྱེད། །ཆད་དང་ཕྱི་གཞུང་ཐུང་ཞིང་དྲིན་ལོག་
འཇལ། །ཕྱི་མ་མི་དྲན་བྱོལ་སོང་ཁྱུ་འདྲ་རྣམས། །མཐའ་མིའི་བསླུ་ཚིག་དྲང་སྲོང་གསུང་བཞིན་ཉན། །རང་ཕྱོགས་བདེན་པའི་ངག་ལའང་ཆ་བཞོག་མེད། ཆོས་ལྡན་བོད་དང་ཕ་མ་གཉེན་བཤེས་སོགས། །ཅམ་སྟེ་བཞག་ནས་ཆོས་མེད་རླབས་ཆེན་གྱི། །ཕྱོགས་སུ་བསྙེགས་འདི་མཐོང་ཚེ་ཡི་ག་སྐྱོ། །ཆོས་སྤྱོད་སྐད་ལུགས་བསྒྱུར་བ་ཙམ་ལ་ཡང་། །མགུ་བ་སྐྱེས་ལ་འདི་ཕྱིར་ཕན་བདེ་ཡི། །གཞི་མར་འགྲོ་བའི་ཡོན་ཏན་འདུག་གམ་ཅི། །ཀླ་ཀློའི་རྫས་སྔགས་སྒྱུ་མའི་འཕྲུལ་ཐབས་ཀྱིས། །ཅོལ་ཆུང་བོད་ཀྱི་བློ་ཡིད་བརྟན་པ་འཕྲོགས། །སྐྱབས་སྡོམ་རལ་ཞིང་མུ་སྟེགས་ཅན་དང་འགྲོགས། །བླ་སྤྲུལ་མགོ་དམངས་ཆེ་རྒུ་ཇི་སྙེད་ཅིག །དུ་རུ་ཀ་ཡི་ཁ་ལོ་སྒྱུར་བྱེད་གྲོགས། །སེང་ཁོག་འབུ་ཞུགས་ཚུལ་གྱུར་ཀྱེ་མ་ཧུད། །བོད་ཕྲུག་གཞོན་རིགས་ཐམས་ཅད་བདུད་དབང་གྱུར། །རྒན་རབས་སྡུག་ཚེའི་ཉི་རྒས་ནུབ་ཙ་
ན། །ནང་པའི་བསྟན་པ་འཛིན་སྐྱོང་སུ་ཡིས་བྱེད། །ཆོས་ལྡན་བོད་ཁམས་བསྟན་མཇུག་སྡུད་ལ་ཐུག །དེ་ཡི་ལྟས་སུ་རྒྱལ་ཁམས་མཐའ་དབུས་སུ། །ས་གཡོ་རི་ཉི་ལ་བྲག་ཆད་ཆུ་ལོག་བརྡོལ། །ཡུལ་དགོན་ཞིང་ལྷས་གྲོང་མང་རྩད་ནས་སྟོང་། །གསོར་མེད་ནད་རིགས་གཟའ་ཀླུ་རྒྱལ་གདོན་དར། །མི་ཕྱུགས་ཁ་བཏགས་ཕྱི་ནང་བཅུད་གཡང་ཉམས། །རྟེན་གསུམ་རབ་གནས་ཉམས་ཤིང་དྲི་ཟས་བཟུང་། །ཕྱོགས་མཚམས་ཀུན་ནས་མཚོན་འཁྲུགས་བསྐལ་ངན་ལངས། །ཟླ་རེ་ལ་ཡང་གསར་འགྱུར་འུར་ཟིན་སྦིར། །བསྟན་འཛིན་ཆོས་བྱེད་མི་བཞུགས་ཞིང་དུ་གཤེགས། །རང་བྱས་ལ་གཡོག་རང་ལ་འཁོར་བའི་འབྲས། དུས་ངན་ཟློག་ཐབས་ཡོད་ཀྱང་བརྩོན་པའི་མི། །རེ་རེ་ཙམ་ཡིན་རིས་མེད་མཐུན་སྒྲིལ་གྱིས། །ཆུ་རག་གོང་ནས་རྒྱག་ལྟར་འབད་གྱུར་ན། །དུས་ངན་ཁུག་པ་རེ་ཞིག་
བསྲིངས་སྲིད་ཀྱང་། །ཐམས་ཅད་བདུད་དབང་སོང་ནས་བཏང་སྙོམས་ལུས། །ད་དུང་ཨའུ་རྩི་ཟེར་འཐོམ་མེད་བསྡད། །དེ་འདྲའི་ངང་ལ་བསྟན་འགྲོའི་བདེ་སྐྱིད་འཇོམས། །ཤི་ཚད་དྲི་ཟ་ངན་སོང་གནས་སུ་སྐྱེ། །དམྱལ་བ་ཡི་དྭགས་ཟེར་ཡང་དེ་ལས་མེད། །ཀྱེ་མ་ཀྱི་ཧུད་གང་ལ་བསམ་ཀྱང་སྐྱོ། །ཅི་ལ་བལྟས་ཀྱང་སྙིང་པོ་རྡུལ་ཙམ་དབེན། །གནས་ཁང་མི་རྟག་འབྱུང་བ་དགྲར་ལངས་འཇིག །སྐྱོ་འགྲོ་མི་རྟག་བདུད་ཀྱི་ཁ་ནང་ཚུད། །ལོངས་སྤྱོད་མི་རྟག་གཞན་གྱིས་ཧབ་ཐོབ་བྱེད། །བོད་འབྲོག་མི་རྟག་རྔ་ཐོག་སྲན་གཏོར་འདྲ། །དལ་འབྱོར་སྟོང་ལོག་བྱེད་པའི་ཕོ་རྒོད་རྣམས། །ཨ་ཙ་མ་ན་འགྱོད་པའི་དུས་ཤིག་མཆིས། །ལས་ཅན་ཡོད་ན་སྙིང་ལ་རུས་པ་སྐྱེད། །མཚོ་བྲག་ལྗོངས་འབྲོས་སྙིང་ཐིག་ཉམས་སུ་ལོངས། །གསོལ་འདེབས་མ་ཎི་བགྲང་ཞིང་སེམས་ལ་ལྟོས། །མགོ་བརྒྱའི་དཀྱིལ་ནས་རང་མགོ་འདོན་རེ་
རན། །བསྐལ་ངན་དུས་སྐྱེས་མ་ནུས་སྤྲང་པོ་བདག །དད་མེད་བླ་མ་མི་ཡི་ངོ་བསྲུང་སོགས། །དོན་མེད་ཆོས་བརྒྱད་བྱ་བ་ལིང་བ་ནས། །ཟབ་མོའི་གདམས་པ་རང་ཉིད་ཉམས་ལེན་ཕྱིར། །ཕ་གཅིག་གུ་རུས་བྱིན་རླབས་སྦས་ཡུལ་དུ། །ད་ནི་མི་འགྱངས་ཧག་གིས་བགྲོད་རེ་རན། །ཅེ་རེེ་ལོང་རིགས་མི་མཐུན་ནང་སྒུར། །སྐྱག་པ་ངས་ནི་དེ་སྐད་བྱས་ནས་སོང་། །ཡིད་སྐྱོ་ཁས་མ་ཚུགས་པའི་ལྐོག་ལབ་འདི། །སྒྲགས་ནང་མེ་ལོང་གདན་ས་ངང་ཕུག་ཏུ། །གར་སྐྱིད་སྨྱོན་པ་སངས་རྡོར་སེམས་ཤར་བྲིས། །མོས་ཚད་དངོས་མེད་སེམས་ཀྱི་སྟེག་པོ་མཛོད། །ཅེས་གསུངས་སོ།། །།
ཤོག་སྟོང་།
ན་མོ་པདྨ་ཀཱ་ར་ཡ། སྙིགས་མའི་ཡང་མཐའ་ཉི་ཤུ་ཁ་རལ་དུས། །བོད་ཁམས་མི་རྣམས་སྡིག་སྤྱོད་རྒྱུ་རྐྱེན་གྱིས། །ཤར་གྱི་ཕྱོགས་ནས་ཅེ་ཧང་དབུགས་ཕྱུར་ནས། །མངའ་རིས་མན་ཆད་སྟོབས་ཀྱི་དབང་དུ་བསྒྱུར། །རྟ་ལོའི་མཇུག་ནས་ཟར་ཟིང་བག་མི་ཕེབས། །གང་ཟག་གཅིག་མིན་ཀུན་གྱི་ཤི་སྨོན་འདེབས། །འོན་ཀྱང་པད་འབྱུང་སྤྲུལ་པའི་སྐྱེས་བུ་ནི། །སྟོད་སྨད་བར་ནས་སྦས་ཚུལ་ཡོངས་གྲགས་འགས། །མཐའ་དམག་བཟློག་ཅིང་བོད་ཁམས་བདེ་སྐྱིད་ཡུན། །ལོ་བདུན་བར་དུ་དུས་བདེ་གནས་འཇམ་ཡོང། །སེམས་ཁྲལ་མི་དགོས་བློ་བདེ་བག་ཕེབ་གནད། །གློ་སྙིང་བྲང་གསུམ་པདྨ་འབྱུང་གནས་དང། །རྡོ་རྗེ་གཞོན་ནུ་ཁྲོས་མ་ཝ་ར་ཧཱི། །ཞིང་སྐྱོང་སེང་གདོང་ཡབ་ཡུམ་རྣམས་ལ་གཏོད། །བསླུ་བ་མི་མངའ་རྡོ་རྗེའི་ཐ་ཚིག་ཡོད། །དེ་
སྐད་གང་ཤར་ཚིག་གི་ཕྲེང་བ་འདི། །དགག་སྒྲུབ་མེད་པར་ཤིང་ཤུན་ལོག་ལ་བཀོད། །དགེ་བས་འགྲོ་ཁམས་བདེ་བའི་རྒྱུར་གྱུར་ཅིག །