བཞི་བ་སྒྲུབ་པ་ཕུན་ཚོགས་ཀྱི་རྒྱུ་ལ་གདམས་པ།

བཞི་བ་སྒྲུབ་པ་ཕུན་ཚོགས་ཀྱི་རྒྱུ་ལ་གདམས་པ་ལ།

སྒྲུབ་པའི་གེགས་སེལ་གྱི་ཆོས། སྒྲུབ་པ་ལ་གཞན་དྲིང་མི་འཇོག་པའི་རྒྱུ་སྤྱན་ལྔ། དོན་གཉིས་ཕུན་སུམ་ཚོགས་པའི་རྒྱུ་མངོན་ཤེས་དྲུག སྤང་བྱ་ཐམས་ཅད་སྤོང་བའི་རྒྱུ་ལམ་ལ་གདམས་པ་དང་བཞི། དང་པོ་ནི། ཉ་ཊཱིཀ་ལས། བྱ་བ་ངན་ཞེན་གྱི་ལེ་ལོ་སྤོང་བྱེད་མ་ཞེན་པར། སྒྱིད་ལུག་པའི་ལེ་ལོ་སྤོང་བྱེད་མི་ངལ་བར། བདག་ཉིད་བརྙས་ནས་ཞུམ་པའི་གཉེན་པོར་ལམ་ཡོངས་སུ་འཛིན་པར་གདམས་པའོ། །སྤྱོད་འཇུག་ཏུ། ལེ་ལོ་ངན་ལ་ཞེན་པ་དང༌། །སྒྱིད་ལུག་བདག་ཉིད་བརྙས་པའོ། །ཞེས་པ་ལྟར་རོ། །ཞེས་གསུངས་ལ། ཡུམ་ལས། བྱང་ཆེན་གང་ཚེ་ལུས་མི་དམིགས་པ་དང་ངག་མི་དམིགས་པ་དང་སེམས་མི་དམིགས་པ་དང༌། ཞེས་སོགས་ཀྱིས་བྱ་བ་ངན་པ་ལ་ཞེན་པའི་ལེ་ལོའི་ཞེན་ཡུལ་ལུས་ངག་ཡིད་གསུམ་དོན་དམ་པར་ངོ་བོ་ཉིད་མེད་པར་དངོས་སུ་གདམས་ནས་ཤུགས་ལ་ལུས་ངག་ཡིད་གསུམ་དང་དེའི་བྱ་བ་མངའ་ཐང་སྟོབས་འབྱོར་ལ་སོགས་པ་དང་བཅས་པ་བདེན་གྲུབ་ཏུ་བཟུང་བའི་རྒྱུ་ལས་བྱ་བ་ངན་པ་ལ་ཞེན་ནས་དེ་ལ་སྤྲོ་བའི་ལེ་ལོ་སྐྱེ་བ་ཡིན་པ་ལ་ལེ་ལོའི་ཡུལ་དེ་དག་དོན་དམ་པར་མེད་པར་རྟོགས་པའི་སྒོ་ནས་བྱ་བ་ངན་པ་ལ་ཞེན་ནས་སྤྲོ་བའི་ལེ་ལོ་སྤངས་ཏེ་མ་ཞེན་པའི་སྒོ་ནས་ཐེག་ཆེན་གྱི་སྒྲུབ་པ་ཉམས་སུ་ལེན་པ་ལ་སྤྲོ་བའི་བརྩོན་འགྲུས་བསྐྱེད་དེ་སྒྲུབ་པར་གྱིས་ཤིག་ཅེས་གདམས་པའོ། །ཡུམ་ལས། བྱང་ཆེན་གཟུགས་སུ་མི་རློམ། ཚོར་བར་མི་རློམ། ཞེས་སོགས་ཀྱིས་གཟུགས་ནས་རྣམ་མཁྱེན་གྱི་བར་གྱི་ཆོས་གང་ལའང་བདེན་པར་རློམ་པ་སྟེ་འཛིན་བྱ་མེད་པར་དངོས་སུ་གདམས་ནས་ཤུགས་ལ་བསྒྲུབ་བྱ་རྣམ་མཁྱེན་དང་སྒྲུབ་བྱེད་ལམ་དང་ལམ་གྱི་གྲངས་དང་སྒྲུབ་དུས་ཀྱི་ཡུན་ཚད་སོགས་བདེན་གྲུབ་ཏུ་བཟུང་ནས་ལམ་གྲངས་མང་བ་ལ་སོགས་པ་དེ་ལྟ་བུ་སྒྲུབ་མི་ནུས་སྙམ་དུ་སྒྱིད་ལུག་པ་སྟེ་སེམས་ཀྱི་སྟོབས་ཞུམ་ནས་སྒྲུབ་པ་ལ་མི་སྤྲོ་བ་ཡིན་པས་སྒྱིད་ལུག་དགོས་པའི་ཡུལ་གང་ཡང་བདེན་མེད་དུ་རྟོགས་པར་བྱས་ཏེ། སྒྱིད་ལུག་པའི་ལེ་ལོ་མེད་པའི་སྒོ་ནས་སྒྲུབ་པ་ཉམས་ལེན་ལ་སྤྲོ་བའི་བརྩོན་འགྲུས་ཀྱིས་ལམ་སྒྲུབས་ཤིག་ཅེས་གདམས་པའོ། །ཡུམ་ལས། བྱང་ཆེན་ཡེ་ཤེས་གང་དང་ལྡན་པས་ཤར་ཕྱོགས་ཀྱི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ། ཞེས་སོགས་ཀྱིས་གདམས་ངག་ཞུ་བའི་ཡུལ་ཕྱོགས་བཅུའི་སངས་རྒྱས་དང༌། གདམས་ངག་གི་ཆོས་མཐའ་ཡས་པ་དང༌། ཞུ་བ་པོ་རང་ཉིད་ལ་སོགས་པ་དོན་དམ་པར་རང་བཞིན་གྱིས་མ་སྐྱེས་པ་ཡིན་པར་དངོས་སུ་གདམས་ནས། ཤུགས་ལ་ཐེག་ཆེན་སྒྲུབ་པ་ནི་ཕྱོགས་བཅུའི་སངས་རྒྱས་གྲངས་མེད་པ་ལ་གདམས་ངག་ཞུ་དགོས་པ་དང༌། གདམས་ངག་ཀྱང་མཐའ་ཡས་པ་ཞུ་དགོས་ན་བདག་གིས་མི་ནུས་སྙམ་དུ་བདག་ཉིད་ལ་བརྙས་ནས་ཐེག་ཆེན་སྒྲུབ་པ་ལ་མི་སྤྲོ་ཞིང༌། དེ་ལས་ཐེག་དམན་དུ་ཞུགས་ན་འཁོར་བ་ལས་ཐར་རོ་སྙམ་པ་ནི་ཡུལ་ཕྱོགས་བཅུའི་སངས་རྒྱས་སོགས་བདེན་པར་འཛིན་པའི་རྒྱུ་ལས་བྱུང་བ་ཡིན་པས་གདམས་ངག་ཞུ་ཡུལ་སོགས་ཐམས་ཅད་བདེན་མེད་དུ་རྟོགས་པར་གྱིས་ལ། བདག་གིས་དེ་དག་བསྒྲུབ་མི་ནུས་སྙམ་པ་སྤངས་ཏེ་བདག་གིས་སྒྲུབ་ནུས་པའི་སྙིང་སྟོབས་ཀྱི་སྒོ་ནས་ཐེག་ཆེན་སྒྲུབ་པ་ལ་སྤྲོ་བའི་བརྩོན་འགྲུས་ཀྱིས་སྒྲུབ་ལ་བརྩོན་པར་གྱིས་ཤིག་ཅེས་གདམས་པའོ། །གཉིས་པ་སྒྲུབ་པ་ལ་གཞན་དྲིང་མི་འཇོག་པའི་རྒྱུ་སྤྱན་ལྔ་བཤད་པ་ལ། སྤྱི་དོན་དང་མཐའ་རགས་ཙམ་དཔྱད་པ་དང་གཉིས། དང་པོ་ལ་སྤྱན་གྱི་རྒྱུུ་དང༌། མཚན་ཉིད། དབྱེ་བ། ས་མཚམས། འབྲས་བུ་བཤད་པ་དང་ལྔ། དང་པོ་ནི། ཉ་ཊཱིཀ་ལས། ཐེག་ཆེན་གྱི་སྤྱན་ལྔའི་རྒྱུ་ནི་ཕྱིན་དྲུག་སྟེ། བྱང་ཆེན་པོ་མིག་ལྔ་ཡོངས་སུ་སྦྱང་བར་འདོད་པ་དང་ཐོབ་པར་འདོད་པས་ཕར་ཕྱིན་དྲུག་ལ་བརྩོན་པར་བྱའོ། །ཞེས་དང༌། མདོ་རྒྱན་བཤད་སྦྱར་དུ།ཤའི་སྤྱན་ཞེས་བྱ་བ་ནི་རྫུ་འཕྲུལ་གྱི་རྐང་བ་བསྒོམས་པས་ཞེས་པ་ལྟར་རོ། ། གཉིས་པ་སྤྱན་གྱི་མཚན་ཉིད་ནི། རང་རྒྱུ་ཕྱིན་དྲུག་དང་བདག་རྐྱེན་རྫུ་འཕྲུལ་རྐང་བ་བསྒོམས་པ་ལ་བརྟེན་ནས་རང་ཡུལ་ཇི་བཞིན་མཐོང་བའི་མཁྱེན་པ། ཐེག་ཆེན་གྱི་སྤྱན་གྱི་མཚན་ཉིད། རང་རྒྱུ་ཕྱིན་དྲུག་དང་བདག་རྐྱེན་རྫུ་འཕྲུལ་རྐང་བ་བསྒོམས་པ་ལ་བརྟེན་ནས་རང་ཡུལ་ཇི་བཞིན་མཐོང་བའི་ཐེག་ཆེན་གྱི་མཁྱེན་པ་ཡིན་ཏེ། ཉ་ཊཱིཀ་ལས། ཐེག་ཆེན་གྱི་དེའི་མཚན་ཉིད་ནི། རང་གི་བདག་རྐྱེན་རྫུ་འཕྲུལ་རྐང་བའམ་གཟུང་འཛིན་བདེན་པའི་རང་བཞིན་མེད་རྟོགས་ཀྱི་ཤེས་རབ་བསྒོམ་པ་ལས་རང་ཡུལ་ཇི་བཞིན་མཐོང་བའི་མིག་གོ །ཞེས་གསུངས་སོ། །གསུམ་པ་སྤྱན་གྱི་དབྱེ་བ་ལ། ཤའི་སྤྱན། ལྷའི་སྤྱན། ཤེས་རབ་ཀྱི་སྤྱན། ཆོས་ཀྱི་སྤྱན། སངས་རྒྱས་ཀྱི་སྤྱན་དང་ལྔའོ། །དེ་དག་གི་མཚན་ཉིད་ལས། དང་པོ་ཤའི་སྤྱན་གྱི་མཚན་ཉིད་ནི། རང་རྒྱུ་ཐེག་ཆེན་གྱི་ཕྱིན་དྲུག་དང་ཐེག་ཆེན་གྱི་རྫུ་འཕྲུལ་གྱི་རྐང་བ་སྒོམ་པ་ལ་བརྟེན་ནས་རང་གི་བདག་རྐྱེན་མིག་དབང་ཁྱད་པར་ཅན་གྱི་བདག་རྐྱེན་བྱས་པའི་རང་ཡུལ་དཔག་ཚད་བརྒྱ་སོགས་ཀྱི་གཟུགས་ཕྲ་རགས་ཐམས་ཅད་མཐོང་བའི་སྤྱན་དེ་ཡིན་ཏེ།ཉ་ཊཱིཀ་ལས། བྱང་སེའི་ཤའི་སྤྱན་ནི་དངོས་པོ་སོ་སོར་ངེས་པ་དཔག་ཚད་བརྒྱ་ནས། སྟོང་གསུམ་ཚུན་ཆད་ཀྱི་གཟུགས་ཤིན་ཏུ་ཕྲ་བ་ཡང་མཐོང་བས་དེའི་ཡུལ་ཅན་ནོ། །ཞེས་སོ། ། གཉིས་པ་ལྷའི་སྤྱན་གྱི་མཚན་ཉིད་ནི། རང་རྒྱུ་ཐེག་ཆེན་གྱི་ཕྱིན་དྲུག་དང་ཐེག་ཆེན་གྱི་རྫུ་འཕྲུལ་གྱི་རྐང་བ་སྒོམ་པ་ལ་བརྟེན་ནས་སེམས་ཅན་མཐའ་ཡས་པའི་སྐྱེ་བ་དང་འཆི་འཕོ་བ་རབ་ཏུ་ཤེས་པའི་སྤྱན་དེ་ཡིན་ཏེ། ཉ་ཊཱིཀ་ལས། སྔོན་གྱི་དགེ་བའི་རྣམ་པར་སྨིན་པ་ལས་བྱུང་བའི་བྱང་སེའི་ལྷའི་སྤྱན་ནི། སེམས་ཅན་ཐམས་ཅད་ཀྱི་སྟེ་མཐའ་ཡས་པ་མང་པོ་གང་ནས་འཆི་འཕོ་བ་དང་གང་དུ་སྐྱེ་བ་རབ་ཏུ་ཤེས་པ་སྟེ། ཞེས་སོ། །གསུམ་པ་ཤེས་རབ་ཀྱི་སྤྱན་གྱི་མཚན་ཉིད་ནི། རང་རྒྱུ་ཐེག་ཆེན་གྱི་ཕྱིན་དྲུག་དང་ཐེག་ཆེན་གྱི་རྫུ་འཕྲུལ་གྱི་རྐང་བ་སྒོམ་པ་ལ་བརྟེན་ནས་འདུས་བྱས་འདུས་མ་བྱས་སོགས་ལ་ཅིར་ཡང་མི་རྟོག་པའི་སྒོ་ནས་དེ་དག་ཅི་རིགས་ཤེས་པའི་ཐེག་ཆེན་འཕགས་པའི་སྤྱན་དེ་ཡིན་ཏེ། ཉ་ཊཱིཀ་ལས། བྱང་སེའི་ཤེས་རབ་ཀྱི་སྤྱན་ནི། འདུས་བྱས་མ་བྱས་དགེ་མི་དགེ་ཟག་པ་དང་བཅས་མ་བཅས་ཀྱི་བར་གྱི་ཆོས་ཐམས་ཅད་ལ་ཅིར་ཡང་རྣམ་པར་མི་རྟོག་པའི་སྒོ་ནས་དེ་ཐམས་ཅད་ཤེས་པ་སྟེ། ཞེས་སོ། ། བཞི་བ་ཆོས་སྤྱན་གྱི་མཚན་ཉིད་ནི། རང་རྒྱུ་ཐེག་ཆེན་གྱི་ཕྱིན་དྲུག་དང་ཐེག་ཆེན་གྱི་རྫུ་འཕྲུལ་གྱི་རྐང་བ་བསྒོམས་པ་ལ་བརྟེན་ནས་སྐྱེ་འཕགས་ཀྱི་དབང་པོའི་རིམ་པ་སོགས་ཅི་རིགས་རྟོགས་པའི་ཐེག་ཆེན་འཕགས་པའི་སྤྱན་དེ་ཡིན་ཏེ། ཉ་ཊཱིཀ་ལས། བྱང་སེའི་ཆོས་ཀྱི་སྤྱན་ནི། འཕགས་པའི་གང་ཟག་ཐམས་ཅད་ཀྱི་རྟོགས་པའི་ཡུལ་ཅན་ཏེ། ཞེས་སོགས་སོ། །ལྔ་བ་རང་རྒྱུ་ཐེག་ཆེན་གྱི་ཕྱིན་དྲུག་དང་ཐེག་ཆེན་གྱི་རྫུ་འཕྲུལ་གྱི་རྐང་བ་སྒོམ་པ་ལ་བརྟེན་ནས་ཆོས་ཐམས་ཅད་ཅིག་ཆར་དུ་མངོན་པར་རྫོགས་པར་བྱང་ཆུབ་པའི་མཐར་ཐུག་གི་སྤྱན་དེ། སངས་རྒྱས་ཀྱི་སྤྱན་གྱི་མཚན་ཉིད་ཡིན་ཏེ། ཉ་ཊཱིཀ་ལས། སངས་རྒྱས་ཀྱི་སྤྱན་ནི། ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པའི་ཡུལ་ཅན།ཞེས་སོ། །

བཞི་པ་ས་མཚམས་ནི།

ཉ་ཊཱིཀ་ལས། ས་མཚམས་ནི། དང་པོ་ཚོགས་ལམ་ནས་གཉིས་པ་རྣམ་སྨིན་ལས་བྱུང་བ་ནི་ལྷ་རྣམས་ལ་ཡོད་པས་ལྷར་སྐྱེས་པའི་སྦྱོར་ལམ་པ་ལ་ཡང་ཡོད་དམ་སྙམ། ཞེས་གསུངས་སོ། །སྒོམ་བྱུང་ནི་རྣལ་འབྱོར་པས་ཏིང་ངེ་འཛིན་བསྒོམས་པས་ཐོབ་ཅེས་བློ་བརྟན་ཏེ་བོད་དག་སྦྱོར་ལམ་ནས་བཤད་དོ། །གསུམ་པ་མཐོང་ལམ་མཉམ་བཞག་ནས། བཞི་བ་མཐོང་ལམ་རྗེས་ཐོབ་ནས་སོ། །བློ་བརྟན་གྱིས་ལྔ་བ་ཉན་རང་དགྲ་བཅོམ་དང་སངས་རྒྱས་ལ་བཤད་དོ། །ཡང་ན་རྡོར་ཏིང་ནའོ། །ཐུབ་དགོངས་སུ། དང་པོའི་བག་ཙམ་སྲོག་ཆགས་ཕལ་ཆེར་ལ། །གསུམ་པའི་བག་ཙམ་རྒྱུན་ཞུགས་འབྲས་ཞུགས་ལ། །བཞི་བའི་བག་ཙམ་དགྲ་བཅོམ་པ་ལ་ཡོད། །ཅེས་སོ། །འབུམ་ཊཱིཀ་ཏུ། སངས་རྒྱས་ཀྱི་སྤྱན་གྱི་ཡོན་ཏན་དེ་ལྟ་བུ་བྱང་པའི་ས་བཅུ་ལ་ཡོངས་སུ་སྦྱངས་པའི་རྒྱུས་ཐོབ་པའི་ཕྱིར་བྱང་ཆུབ་སེམས་དཔའི་སངས་རྒྱས་ཀྱི་སྤྱན་ཞེས་བྱའོ། །ཞེས་སོ། །ལྔ་བའི་ངོ་བོ་ཙམ་ས་བདུན་པ་ནས་ཁས་ལེན་དགོས་ཏེ། བདུན་པའི་ཡོངས་སྦྱོང་དུ་སངས་རྒྱས་ཀྱི་སྤྱན་ཐོབ་ཅེས་ཉ་ཊཱིཀ་ལས་སོ། །འོན་ཀྱང་ས་མཚམས་དེ་དག་ལ་ཞིབ་ཆ་ཅུང་ཟད་དགོས་སོ། །སློབ་ལམ་ལ་སངས་རྒྱས་ཀྱི་སྤྱན་ཡོད་པ་ལྟ་བུར་གསུངས་པ་ནི་རྗེས་མཐུན་པ་དང་དོད་ཙམ་ཡོད་པ་ལ་དགོངས་པ་ཡིན་ནམ་སྙམ་མོ། ། ལྔ་བ་འབྲས་བུ་ནི། བསྒྲུབ་པ་ལ་གཞན་དྲིང་མི་འཇོག་ཅིང་འཚང་རྒྱ་བ་སྟེ། མིག་ལྔ་བོ་དེ་དག་ལ་བསླབས་པའི་བྱང་ཆེན་པོ་རྣམས་ནི་བླ་མེད་རྫོགས་བྱང་དུ་མངོན་འཚང་རྒྱའོ་ཞེས་སོ། །