བཅུ་གཅིག་པ་མུན་གླིང་དུ་དཀོན་མཆོག་གི་སྒྲ་བསྒྲགས་པའི་རྒྱལ་སྲས།
བཅུ་གཅིག་པ་མུན་གླིང་དུ་དཀོན་མཆོག་གི་སྒྲ་བསྒྲགས་པའི་རྒྱལ་སྲས་ནི།
ཉི་ཁྲི་ལྔ་སྟོང་པ་ལས། ཤཱ་ར་དྭ་ཏིའི་བུ། འདི་ལྟར་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་ཤེས་པ་དྲུག་ཐོབ་པ་དག འཇིག་རྟེན་གྱི་ཁམས་གང་ན་སངས་རྒྱས་ཀྱི་སྒྲ་མི་གྲག་པ་དང༌། ཆོས་ཀྱི་སྒྲ་མི་གྲག་པ་དང༌། དགེ་འདུན་གྱི་སྒྲ་མི་གྲག་པ་དེ་ལྟ་བུའི་འཇིག་རྟེན་གྱི་ཁམས་ནས་འཇིག་རྟེན་གྱི་ཁམས་སུ་འདོང་ཞིང་སངས་རྒྱས་ཀྱི་ལེགས་པ་བརྗོད། ཆོས་ཀྱི་ལེགས་པ་བརྗོད། དགེ་འདུན་གྱི་ལེགས་པ་བརྗོད་ཅིང༌། སེམས་ཅན་དེ་དག་ཀྱང་སངས་རྒྱས་ཀྱི་སྒྲ་དང༌། ཆོས་ཀྱི་སྒྲ་དང༌། དགེ་འདུན་གྱི་སྒྲ་དེས་སེམས་དང་བར་གྱུར་ཏེ། གང་ན་སངས་རྒྱས་བཅོམ་ལྡན་འདས་རྣམས་བཞུགས་པ་དེ་དག་ཏུ་སྐྱེ་བར་འགྱུར་བར་བྱེད་པ་དག་ཀྱང་ཡོད་དོ། །ཞེས་གསུངས་སོ། །