དྲི་བ་གསུམ་པ་ནི་རྟེན་འབྲེལ་ཡན་ལག་བཅུ་གཉིས་རྟོགས་ཚུལ་ལ་ཉན་རང་གཉིས་ཁྱད་པར་ཡོད་དམ་ཞེས་པ།
དྲི་བ་གསུམ་པ་ནི་རྟེན་འབྲེལ་ཡན་ལག་བཅུ་གཉིས་རྟོགས་ཚུལ་ལ་ཉན་རང་གཉིས་ཁྱད་པར་ཡོད་དམ་ཞེས་པའོ། །
དེའི་ལན་ནི་རྟེན་འབྲེལ་ཡན་ལག་བཅུ་གཉིས་རྟོགས་ཚུལ་ལ་ཉན་རང་གཉིས་ལ་ཁྱད་པར་ཡོད་དེ། རྟེན་འབྲེལ་ཡན་ལག་བཅུ་གཉིས་ཉན་རང་གཉིས་ཀས་སྒོམ་པ་ཡིན་ཡང་རང་རྒྱལ་གྱིས་རྟེན་འབྲེལ་ཡན་ལག་བཅུ་གཉིས་ལུགས་འབྱུང་བཟློག་གི་སྒོ་ནས་རྒྱས་པར་བསྒོམས་ཞིང་རྟོགས་ལ། ཉན་ཐོས་རྣམས་ཀྱིས་དེ་ལྟར་རྒྱས་པར་རྟོགས་པ་ནི་མ་ཡིན་ཏེ། ཐེག་མཆོག་དབུ་མའི་ཟིན་བྲིས་ལས།རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་དེ་ནི། ཉན་ཐོས་དང་རང་སངས་རྒྱས་ཀྱི་རིགས་ཅན་གཉིས་ཆར་ལ་བཅོམ་ལྡན་འདས་ཀྱིས་བསྟན་ཅིང་བསྟན་པ་ལྟར་གཉིས་ཆར་གྱིས་བསྒོམ་པ་ཡིན་ཡང་རང་སངས་རྒྱས་རྣམས་ཀྱིས་ནི་ལུགས་འབྱུང་དང་ལུགས་བཟློག་གི་རྟེན་འབྲེལ་རྣམས་རྒྱས་པར་རྟོགས་པ་ཡིན་ལ། ཉན་ཐོས་རྣམས་ཀྱིས་ནི་རང་རྒྱལ་ལྟར་རྟེན་འབྲེལ་རང་བྱན་ཆུད་པའི་སྒོ་ནས་ཤིན་ཏུ་རྟོགས་པ་ནི་མ་ཡིན་ནོ། །ཞེས་གསུངས་སོ། །སྤྱིར་བཅོམ་ལྡན་འདས་ཀྱིས་རིགས་ཅན་གསུམ་ལ་རྟེན་འབྲེལ་ཡན་ལག་བཅུ་གཉིས་བསྟན་ཅིང༌། བྱང་སེམས་ལ་གཙོ་བོར་ངོ་བོ་ཉིད་རྣམ་པར་འབྱེད་པའི་རྟེན་འབྲེལ་དང༌། རང་རྒྱལ་ལ་གཙོ་བོར་སྡུག་པ་དང་མི་སྡུག་པ་རྣམ་པར་འབྱེད་པའི་རྟེན་འབྲེལ་དང༌། ཉན་ཐོས་ལ་གཙོ་བོར་ཉེར་སྤྱོད་ཅན་གྱི་རྟེན་འབྲེལ་བསྟན་ཅིང་་བསྟན་པ་ལྟར་རྟོགས་ཤིང་བསྒོམ་པ་ཡིན་ཏེ། ཐེག་མཆོག་དབུ་མའི་ཟིན་བྲིས་ལས། ངོ་བོ་ཉིད་རྣམ་པར་འབྱེད་པའི་རྟེན་འབྲེལ་དང༌། སྡུག་པ་དང་མི་སྡུག་པ་རྣམ་པར་འབྱེད་པའི་རྟེན་འབྲེལ་དང༌། ཉེར་སྤྱོད་ཅན་གྱི་རྟེན་འབྲེལ་དང་གསུམ་ལས་དེ་གསུམ་པོ་ཡང་རིམ་པ་བཞིན་དུ་གདུལ་བྱ་རིགས་ཅན་གསུམ་ལ་བཅོམ་ལྡན་འདས་ཀྱིས་གསུངས་ཤིང༌། གསུངས་པ་ལྟར་དེ་དག་གིས་གཙོ་བོར་དེ་དང་དེ་རྟོགས་པ་ཡང་ཡིན་ཏེ། ཞེས་གསུངས་པའི་ཕྱིར་རོ། །དེ་ལ་ངོ་བོ་ཉིད་རྣམ་པར་འབྱེད་པའི་རྟེན་འབྲེལ་ནི། ཐེག་མཆོག་དབུ་མ་ལས། ངོ་བོ་ཉིད་རྣམ་འབྱེད་པའི་རྟེན་འབྲེལ་ནི། །ཆོས་ཀུན་ཀུན་གཞི་རྣམ་ཤེས་ལས་སྤྲུལ་བའོ། །ཞེས་དང༌། དེའི་ཟིན་བྲིས་ལས། ངོ་བོ་ཉིད་རྣམ་པར་འབྱེད་པའི་རྟེན་འབྲེལ་ནི། ཕྱི་ནང་གི་ཆོས་ཀུན་ཀུན་གཞི་རྣམ་པར་ཤེས་པ་ལས་སྤྲུལ་ཞིང་དེའི་མཐུ་ལས་སྣང་བ་ལ་དེར་འཇོག་པ་ཡིན་ལ། དེ་ནི་ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་རྣམས་ལ་བགོ་སྐལ་དུ་བསྟན་གྱི། རིགས་ཅན་གཞན་གཉིས་ལ་བསྟན་པ་མེད་ཅིང༌། དེའི་ཕྱིར་བྱང་ཆུབ་སེམས་དཔའ་དང་སངས་རྒྱས་ཉག་གཅིག་གིས་རྟོགས་པ་ཡིན་གྱི། ཉན་ཐོས་དང་རང་སངས་རྒྱས་གཉིས་ཀྱིས་ནི་ཕྱོགས་ཙམ་ཡང་རིགས་པ་མ་ཡིན་ནོ། །ཞེས་གསུངས་སོ། །སྡུག་པ་དང་མི་སྡུག་པ་རྣམ་པར་འབྱེད་པའི་རྟེན་འབྲེལ་ནི་རྟེན་འབྲེལ་ཡན་ལག་བཅུ་གཉིས་དང༌། དེ་ལ་ཀུན་ནས་ཉོན་མོངས་པའི་དབང་དུ་བྱས་པ་དང༌། རྣམ་བྱང་གི་དབང་དུ་བྱས་པ་གཉིས་ཡོད་དེ།ཐེག་མཆོག་དབུ་མ་ལས། སྡུག་མི་སྡུག་རྣམ་འབྱེད་པ་བཅུ་གཉིས་ཏེ། །ཞེས་དང༌། དེའི་ཟིན་བྲིས་ལས། སྡུག་དང་མི་སྡུག་པ་རྣམ་པར་འབྱེད་པ་ཡང༌། རྣམ་པར་འབྱེད་པའི་དོན་ནི།གོང་དུ་བཤད་པ་ལྟར་འཕེལ་བ་དང་རྒྱས་པའི་དོན་ཡིན་ལ། སྡུག་པ་ནི་ཡིད་དུ་འོང་བ་དང༌།མི་སྡུག་པ་ནི་ཡིད་དུ་མི་འོང་བ་ཡིན་ཞིང༌། དེ་ལ་རྣམ་པ་གཉིས་ཏེ། ཀུན་ནས་ཉོན་མོངས་ཀྱི་དབང་དུ་བྱས་པ་དང༌། རྣམ་བྱང་གི་དབང་དུ་བྱས་པ་གཉིས་ལས། དང་པོ་ནི་མ་རིག་པ་དང་མཚུངས་ལྡན་གྱི་དགེ་བ་ཟག་བཅས་ཀྱི་མཐུ་ལས། མཐོ་རིས་སུ་སྐྱེ་བ་ནི་སྡུག་པ་རྣམ་པར་འབྱེད་པའི་རྟེན་འབྲེལ་དང༌། མ་རིག་པ་དང་མཚུངས་པར་ལྡན་པའི་ལས་མི་དགེ་བའི་མཐུ་ལས་ངན་སོང་གསུམ་དུ་སྐྱེ་བ་ནི་མི་སྡུག་པ་རྣམ་པར་འབྱེད་པའི་རྟེན་འབྲེལ་ཞེས་བྱའོ། །གཉིས་པ་ནི་མ་རིག་པ་དང་མཚུངས་ལྡན་གྱི་ལས་དགེ་སྡུག་གི་མཐུ་ལས། རིགས་དྲུག་གི་སྐྱེ་བ་ནི་མི་སྡུག་པ་རྣམ་པར་འབྱེད་པ་དང༌། དགེ་བ་ཟག་མེད་ཀྱི་མཐུ་ལས་ཐར་བ་ཐོབ་པ་ནི་སྡུག་པ་རྣམ་པར་འབྱེད་པའི་རྟེན་འབྲེལ་ཞེས་བྱའོ། །ཞེས་གསུངས་སོ། །ཉེར་སྤྱོད་ཅན་གྱི་རྟེན་འབྲེལ་ནི། ཐེག་མཆོག་དབུ་མ་ལས། ཉེར་སྤྱོད་ཅན་ནི་ཚོགས་དྲུག་འཇུག་ཚུལ་ལོ། །ཞེས་དང༌། དེའི་ཟིན་བྲིས་ལས། ཉེར་སྤྱོད་ཅན་གྱི་རྟེན་འབྲེལ་ཞེས་པ་ཡང༌། རྣམ་ཤེས་ཚོགས་དྲུག་སྐྱེ་འགག་བྱེད་པའི་ཚུལ་ཡིན་ལ། དེ་ཡང་ཉེར་བར་སྤྱོད་པ་པོ་ཚོར་བ་དང་ཉེ་བར་སྤྱོད་པ་རེག་པ་ཡིན་ཞིང༌། དེ་ལྟ་བུ་དངོས་པོ་གང་ལ་ལྡན་པ་ལ་ཉེ་བར་སྤྱོད་པ་ཞེས་བྱའོ། །ཞེས་གསུངས་སོ། །རྒྱས་པར་དེར་ཤེས་པར་བྱའོ། །དེ་ལྟར་ས་བཟང་གི་ཀུན་བཏུས་ལས། ངོ་བོ་ཉིད་རྣམ་པར་འབྱེད་པའི་རྟེན་འབྲེལ་ཀུན་གཞི་ལས་ཆོས་ཐམས་ཅད་འབྱུང་བ་དང༌། སྡུག་པ་དང་མི་སྡུག་པ་རྣམ་པར་འབྱེད་པའི་རྟེན་འབྲེལ་ཡན་ལག་བཅུ་གཉིས་དང༌། ཉེ་བར་སྤྱོད་པ་ཅན་གྱི་རྟེན་འབྲེལ་རྣམ་པར་ཤེས་པ་ཚོགས་དྲུག་སྟེ་གསུམ་གསུངས་ཤིང༌། དེའི་དང་པོ་ནི་ཟབ་ཅིང་ཕྲ་བས་ཐེག་ཆེན་ཁོ་ན་ལ་བསྟན་ལ། ཕྱི་མ་དག་ནི་ཐམས་ཅད་ལ་ཐུན་མོང་དུ་བསྟན་པའོ། །ཞེས་གསུངས་སོ། །འདིའི་སྐབས་སུ་དཔྱད་པར་བྱ་བ་འདི་ཡོད་དེ། ཉན་རང་ལ་ངོ་བོ་ཉིད་ཀྱི་རྟེན་འབྲེལ་རྟོགས་པ་ཡོད་དམ་མེད། ཡོད་ན་ངོ་བོ་ཉིད་རྣམ་པར་འབྱེད་པའི་རྟེན་འབྲེལ་ཉན་རང་ལ་བསྟན་པར་འགྱུར་ལ། མེད་ན་ཐེག་དམན་སྡེ་སྣོད་ལས་ཀུན་གཞི་བསྟན་པ་མ་ཡིན་པར་མི་འགྱུར་རམ། ཡང་ཉན་རང་གིས་རྟེན་འབྲེལ་ཡན་ལག་བཅུ་གཉིས་ཀྱི་ནང་ནས་གསུམ་པ་རྣམ་ཤེས་རྟོགས་ན་ཀུན་གཞིའི་རྣམ་ཤེས་རྟོགས་དགོས་མི་དགོས་སོགས་ལ་ཕྲ་ཞིབ་ཀྱིས་རིགས་པས་དཔྱད་པར་བྱའོ།། །།