གཉིས་པ་བཤད་པར་དམ་བཅའ་བ།
གཉིས་པ་བཤད་པར་དམ་བཅའ་བ་ནི།
དེ་བསྟན་པ་ནི་དྲི་མེད་རྒྱུད་མང་ལས་གསུངས་པ། །མདོར་བསྡུས་བཤད་པ་འདི་ནི་གུས་པས་མཉན་པར་གྱིས། །ཞེས་ཕན་ཡོན་ཆེན་པོ་དང་ལྡན་པའི་བླ་མ་དེ༷་བསྟེན་པ༷འི་ཚུལ་ནི༷་བྱ་བའི་རྒྱུད་གསང་བ་སྤྱི་རྒྱུད། འཇམ་དཔལ་རྩ་རྒྱུད། རྣལ་འབྱོར་རྒྱུད་ཀྱི་རྡོ་རྗེ་རྩེ་མོ། བླ་མེད་ཀྱི་གསང་འདུས་རྩ་རྒྱུད། རྣམ་སྣང་སྒྱུ་འཕྲུལ་དྲྭ་བ། གཤིན་རྗེ་གཤེད་དམར་པོ། དགྲ་ནག་གི་རྒྱུད། ཀྱཻ་རྡོ་རྗེ་བཤད་རྒྱུད་རྡོ་རྗེ་གུར། བདེ་མཆོག་རྩ་རྒྱུད། བཤད་རྒྱུད་རྡོ་རྗེ་མཁའ་འགྲོ་སྡོམ་པ་འབྱུང་བ་སོགས་དྲི༷་མ་མེ༷ད་པའི་རྒྱུ༷ད་རྣམ་པར་དག་པ་མ༷ང་པོ་ལ༷ས་གསུ༷ངས་པ༷འི་ཁུངས་སྨོས་པས་ནི་རང་བཟོ་སྤངས་བ་ཡིན་ལ། ཟློས་སྐྱོན་སྤང་བའི་ཕྱིར་རྒྱུད་ཐ་དད་པ་མང་པོ་རྣམས་ན་ཟུར་མི་གསལ་བ་དང༌། གོ་རིམ་འཁྲུགས་པ་དང་དོན་ཚན་སོ་སོར་འཐོར་བའི་ཚུལ་གྱིས་བཞུགས་པ་འདིར་ཕྱོགས་གཅིག་ཏུ་མདོ༷ར་བསྡུ༷ས་ཏེ་གོ་སླ་བར་བཤ༷ད་པ༷་ཡིན་པས་རྗེས་འཇུག་རྣམས་ཀྱིས་གཞུང་འདི༷་ནི༷་གུ༷ས་པ༷ས་མཉ༷ན་པ༷ར་གྱི༷ས་ཞེས་སྣོད་ལྡན་མཉན་པར་བསྐུལ་བའོ། །