གཉིས་པ་ཐུན་མོང་བ་སྐྱབས་འགྲོ་བཤད་པ་ལ་བརྒྱད།

གཉིས་པ་ཐུན་མོང་བ་སྐྱབས་འགྲོ་བཤད་པ་ལ་བརྒྱད་ལས།

དང་པོ་དགོས་པའི་དོན་ལ་དགོས་པ་ངོས་བཟུང་བ་དང༌། རྩོད་པ་སྤང་བ་དང་གཉིས། དང་པོ་ནི། སྐྱབས་འགྲོའི་ཕན་ཡོན་བརྒྱད་ལ་སོགས་པ་ཡང་སྐབས་གཞན་ནས་བཤད་ལ། སྐབས་འདིར་ནི་སྐྱབས་འགྲོའི་དགོས་པ་དེ་མྱ་ངན་ལས་འདས་པའི་བསམ་པ་བརྟན་པོ་སྐྱེ་བ་སྟེ། ཊཱི་ཀ་ལས། མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་བས། སྐྱབས་སུ་འགྲོ་བས་ནི་མྱ་ངན་ལས་འདས་པའི་བསམ་པ་བརྟན་པོ་སྒྲུབ་པར་བྱེད་དེ། ཞེས་གསུངས་སོ། །འོ་ན་དེ་ཇི་ལྟར་སྒྲུབ་སྙམ་ན། ཊཱི་ཀ་ལས། སངས་རྒྱས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ལམ་ཉེ་བར་སྟོན་པར་མཛད་པ་ལ་ཡང་དག་པར་བརྟེན་པར་བྱེད། ཆོས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ཆོས་ཀྱི་མཆོག་མྱ་ངན་ལས་འདས་པ་ལ་ཡང་དག་པར་བརྟེན་པར་བྱེད། དགེ་འདུན་ལ་སྐྱབས་སུ་མཆིའོ་ཞེས་བྱ་བ་འདིས་ནི་མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་ཟླ་གྲོགས་ལ་ཡང་དག་པར་བརྟེན་པར་བྱེད་པའི་ཕྱིར་ཏེ། ཞེས་གསུངས་སོ། ། གཉིས་པ་རྩོད་པ་སྤང་བ་ལ་གཉིས་ལས། དང་པོ། གཞུང་ནང་འགལ་གྱི་སྐྱོན་སྤོང་བ་ནི། ཊཱི་ཀ་ལས། མྱ་ངན་ལས་འདས་པའི་བསམ་པ་བརྟན་པོ་མེད་པར་ནི་སུ་ཡང་སྐྱབས་སུ་འགྲོ་བ་སྒྲུབ་པར་མི་བྱེད་དོ། །ཞེས་གསུངས་པ་དང་འགལ་ལོ་ཞེ་ན། དེ་ནི་སྐྱབས་འགྲོ་ལ་བརྟེན་ནས་མྱ་ངན་ལས་འདས་པའི་བསམ་པ་སྐྱེ་བར་གསུངས་པ་ནི། སྐྱབས་འགྲོ་ཙམ་པོ་ལ་བརྟེན་ནས་མྱ་ངན་ལས་འདས་པ་ཐོབ་འདོད་ཀྱི་བསམ་པ་སྐྱེ་ཞེས་བསྟན་པ་ཡིན་ལ། ངེས་འབྱུང་གི་སྐྱབས་འགྲོ་ལ་ནི་མྱ་ངན་ལས་འདས་པའི་བསམ་པ་རྒྱུར་དགོས་ཏེ། མྱ་ངན་ལས་འདས་པའི་བསམ་པ་མེད་པར་ནི། སུ་ཡང་ངེས་འབྱུང་གི་སྐྱབས་སུ་འགྲོ་བ་སྒྲུབ་པར་མི་བྱེད་དོ། །ཞེས་དགོངས་པའོ། ། གཉིས་པ་སྐྱབས་འགྲོ་མེད་པའི་ཆོ་གས་སྡོམ་པ་མི་སྐྱེ་བར་ཐལ་བ་སྤང་བ་ནི། ད་ལྟར་གྱི་ཆོ་གས་དགེ་སློང་གི་སྡོམ་པ་ལེན་པ་ཆོས་ཅན། སྡོམ་པ་མི་སྐྱེ་བར་ཐལ། སྐྱབས་འགྲོ་མེད་པའི་ཕྱིར། དེར་ཐལ། གཞི་འགྲེལ་ལས། འདིར་བསྙེན་པར་རྫོགས་པའི་སྐབས་སུ་སྐྱབས་སུ་འགྲོ་བ་ཁས་བླངས་པའི་ཚིག་བརྗོད་མི་དགོས་སོ། །ཞེས་གསུངས་པའི་ཕྱིར་ན་མ་ཁྱབ་སྟེ། སྐྱབས་འགྲོ་དངོས་མེད་ཀྱང་སྐྱབས་འགྲོའི་དོད་གསོལ་བ་འདེབས་པ་ཡོད་པ་ལ་བརྟེན་ནས་སྡོམ་པ་སྐྱེའོ། །ཆོ་ག་ལས་ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་ལ་ཐུགས་བརྩེ་བར་མཛད་དུ་གསོལ་ལོ་ཞེས་དགེ་འདུན་ལ་གསོལ་བ་བཏབ་ཅིང༌། བསྙེན་པར་རྫོགས་པར་མཛད་དུ་གསོལ་ཞེས་ཆོས་ཀྱི་མཆོག་མྱ་ངན་ལས་འདས་པ་ལ་བསྙེན་རྫོགས་མཛད་དུ་གསོལ་ཞེས་ཆོས་ལ་གསོལ་བ་བཏབ་པའོ། ། སོ་ཐར་རིགས་བརྒྱད་པོ་གང་རུང་གི་སྡོམ་པ་རྒྱུད་ལ་སྐྱེ་བ་ལ་སྐྱབས་འགྲོ་རྒྱུད་ལ་སྐྱེས་པས་ཁྱབ་པར་ཐལ། མཛོད་ལས། གཞན་ལའང་བསྙེན་གནས་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་གསུངས་པའི་ཕྱིར།འདོད་མི་ནུས་ཏེ། སྐྱབས་འགྲོ་སྔོན་དུ་མ་བྱས་ཀྱང་བསྙེན་གནས་ཀྱི་སྡོམ་པ་སྐྱེ་བ་ཡོད་པའི་ཕྱིར། དེར་ཐལ། མཆིམས་མཛོད་༣༦༦ལས། དེ་ཡང་འགྲེལ་པ་ལས། དགེ་བསྙེན་མ་ཡིན་པ་ཡང་གང་ཞིག་ཉིན་ཞག་དེ་ལ་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་སོང་སྟེ་བསྙེན་གནས་ནོད་པ་དེ་ལ་བསྙེན་གནས་ཀྱི་སྡོམ་པ་སྐྱེ་བར་འགྱུར་ཏེ་གཞན་དུ་ནི་མ་ཡིན་ནོ། །མི་ཤེས་པ་ནི་མ་གཏོགས་སོ་ཞེས་འབྱུང་བའི་མ་གཏོགས་པའི་དོན་ནི་སློབ་དཔོན་རྒྱལ་པོའི་སྲས་སྐྱབས་འགྲོ་བརྗེད་པ་དང༌། ༼མི་ཤེས་པ་༽མ་བྱང་བ་ལ་འཆད་མོད་ཀྱི། སློབ་དཔོན་གང་སྤེལ་གང་ཞིག དཀོན་མཆོག་གསུམ་ལ་ཐེ་ཚོམ་ཟ་བ་དང་ལོག་པར་ཞུགས་པའི་བསམ་པས་སྐྱབས་སུ་མི་འགྲོ་བ་ཅན་ལ་ནི་སྡོམ་པ་མི་སྐྱེ་ལ། གང་ཞིག་འབོགས་པ་པོ་དང་ལེན་པ་པོས་སྐྱབས་སུ་འགྲོ་དགོས་པར་མ་ཤེས་པས་སྐྱབས་སུ་མི་འགྲོ་བ་ཡིན་གྱི་ལོག་པར་ཞུགས་པའམ་ཐེ་ཚོམ་ཟ་བས་སྐྱབས་སུ་མི་འགྲོ་བ་མ་ཡིན་པ་དེ་ལ་ནི་སྐྱབས་སུ་མ་སོང་ཡང་བསྙེན་གནས་ཀྱི་སྡོམ་པ་སྐྱེའོ། །ཞེས་འཆད་པ་ལྟར་ཡིན་ནོ། །ཞེས་གསུངས་པའི་ཕྱིར་ཟེར་ན་སྤྱིར་སྐྱབས་འགྲོ་སྔོན་དུ་མ་སོང་བ་མིན་ཀྱང་སྡོམ་པ་བླང་དུས་སུ་སྐྱབས་ཚིག་སྔོན་དུ་མ་སོང་བའི་དོན་ཡིན་སྙམ་སྟེ། དེ་མིན་ན་མཚོ་ཊཱིཀ་ལས། སྡོམ་པ་ཐམས་ཅད་ཀྱི་རྟེན་དུ་རུང་བ་དང༌། ཞེས་སྐྱབས་འགྲོའི་ཕན་ཡོན་བཤད་སྐབས་སུ་བཤད་པ་ལྟར་སྡོམ་པ་ཐམས་ཅད་ཀྱི་རྟེན་སྐྱབས་འགྲོ་མ་ཡིན་པར་འགྱུར་རོ་ཞེ་ན། དགེ་སློང་མའི་ལྷག་མའི་སྐབས་སུ་རྩ་བར། དཀོན་མཆོག་གཏོང་བའོ། །ཞེས་དཀོན་མཆོག་གཏོང་བའི་ལྷག་མ་ཡོད་པར་གསུངས་པས་ཅུང་ཟད་དཔྱད་པར་བྱའོ། །སྡོམ་པ་ཐོབ་པ་དེ་བྱིན་པ་ལེན་པའི་ཚུལ་གྱིས་འཐོབ་པ་ཡིན་ནམ། ཟློས་པར་བྱེད་པའི་རྗེས་སུ་བཟླས་པ་ལས་འཐོབ་པ་ཡིན་ཞེ་ན། ཕྱི་མ་ལྟར་ཡིན་གྱི། སྔ་མ་ལྟར་ནི་མ་ཡིན་ཏེ། ཊཱི་ཀ་ལས། བྱིན་པ་བླང་བ་ལྟ་བུ་ནི་མ་ཡིན་ཏེ། སྡོམ་པ་ནི་རང་གི་སེམས་ལ་རག་ལས་པའི་ཕྱིར་རོ། །ཞེས་སོ། །གཞན་དུ་ན་སློབ་མས་སྡོམ་པ་ཐོབ་པ་ན་འབོགས་པ་པོ་ལ་སྡོམ་པ་མེད་པར་ཐལ་བར་འགྱུར་ཏེ། ཊཱི་ཀ་ལས། དགེ་བསྙེན་དང་དགེ་ཚུལ་དང་དགེ་སློང་གི་སྡོམ་པ་དག་ནི་རེ་རེར་ཟད་པའི་ཕྱིར། ཞེས་སོ། །