ལྟ་སྒོམ་སྤྱོད་འབྲས་རྡོ་རྗེའི་གླུ།
ལྟ་སྒོམ་སྤྱོད་འབྲས་རྡོ་རྗེའི་གླུ།
ན་མོ་གུ་རུ་ཝེ། སྲིད་གསུམ་དྲི་ཟའི་གྲོང་ཁྱེར་ན། །གཏད་མེད་སྒྱུ་མའི་སྐྱེས་བུར་ཞིག །རྟག་ཆད་སྤངས་པའི་ལྟ་བ་བདེ། །དགག་སྒྲུབ་མེད་པའི་སྤྱོད་པ་བདེ། །འབད་རྩོལ་མེད་པའི་བསྒོམ་པ་བདེ། །རེ་དོགས་མེད་པའི་འབྲས་བུ་བདེ། །ལྟ་བ་རྟག་ཆད་སྤངས་པ་དེ། །རྟེན་འབྲེལ་རང་མཚང་རིག་པ་ཡིན། །དགག་སྒྲུབ་མེད་པའི་སྤྱོད་པ་དེ། །བླང་དོར་རང་མཚང་རིག་པ་ཡིན། །འབད་རྩོལ་མེད་པའི་བསྒོམ་པ་དེ། །སྤང་གཉེན་རང་མཚང་རིག་པ་ཡིན། །འབྲས་བུ་རེ་དོགས་མེད་པ་དེ། །འཁོར་འདས་རང་མཚང་རིག་པ་ཡིན། །ཅི་ཡང་མི་ཤེས་བཟོ་བོ་ཡིས། །མཁའ་ལ་བྲིས་པའི་རི་མོ་ལ། །དམུས་ལོང་བརྒྱ་ཕྲག་དུ་མ་ཞིག ། བསྐལ་བའི་བར་དུ་ལྟ་བ་མཚར། །འབྲེལ་མེད་བསྒྲིགས་པའི་གྲལ་རྣམས་བཤིག ། ཡེ་ཤེས་བཟོ་བོ་བཅིངས་ཏེ་བཞག །མ་བཏགས་ཟ་འོག་ཡུག་ཆེན་ལ། །ཁྱེའུའི་ས་ཁ་མ་བསྟན་ཅིག །ནམ་མཁའི་དབྱིངས་དང་སྒྱུ་མའི་མི། །བྲག་ཆའི་སྒྲ་གསུམ་ཐོས་ན་ལེགས། །ཞེས་པའི་རྡོ་རྗེའི་གླུ་འདི་ཡང་དགེ་སློང་གཞོན་ནུ་བློ་གྲོས་ཀྱིས་སྦྱར་བའོ།། །།དགེའོ། །
ལྟ་སྒོམ་སྤྱོད་འབྲས་རྡོ་རྗེའི་གླུ། ན་མོ་གུ་རུ། གཞན་དག་ལྟ་སྒོམ་སྤྱོད་པ་དང་། །འབྲས་བུའི་རྣམ་གཞག་ཅི་བྱེད་ཀྱང་། །ཁོ་བོའི་ལྟ་སྒོམ་སྤྱོད་པ་དང་། །འབྲས་བུའི་རྣམ་གཞག་འདི་ལྟར་ལགས། །མཐར་འཛིན་དགག་བྱར་ལྟ་བ་དང་། །མཐའ་བྲལ་བསྒྲུབ་བྱར་ལྟ་བ་ཡི། །དགག་སྒྲུབ་ལྟ་བས་ལྟ་མཁན་འཆིང་། །དགག་སྒྲུབ་མེད་པའི་ལྟ་བ་གཅེས། །རྣམ་རྟོག་སྐྱེས་ཀྱི་དོགས་པ་དང་། །མི་རྟོག་སྐྱེ་ལ་རེ་བ་ཡི། །རེ་དོགས་བསྒོམ་པས་སྒོམ་ཆེན་འཆིང་། །རེ་དོགས་མེད་པའི་བསྒོམ་པ་གཅེས། །དགེ་བཅུ་བླང་བྱར་འཛིན་པ་དང་། །མི་དགེ་དོར་བྱར་འཛིན་པ་ཡི། །བླང་དོར་སྤྱོད་པས་སྤྱོད་མཁན་འཆིང་། །བླང་དོར་མེད་པའི་སྤྱོད་པ་གཅེས། །ཡོན་ཏན་ཐོབ་པར་འདོད་བ་དང་། །ཉེས་པ་འདོར་བར་འདོད་བ་ཡི། །དོར་ཐོབ་འབྲས་བུས་ཐོབ་མཁན་འཆིང་། །དོར་ཐོབ་མེད་པའི་འབྲས་བུ་གཅེས། །ཅེས་པ་ཤཱཀྱའི་དགེ་སློང་གཞོན་ནུ་བློ་གྲོས་ཀྱིས་སྦྱར་བའོ། །འདིས་ཀྱང་བསྟན་པ་རིན་པོ་ཆེ་དང་འགྲོ་བ་མང་པོ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག། །