གསང་གི་བློན་པོ་རྡོ་རྗེ་གྲགས་ལྡན་གྱི་གསོལ་མཆོད་འདོད་འབྱུང་ནོར་བུའི་ཕྲེང་བ།

གསང་གི་བློན་པོ་རྡོ་རྗེ་གྲགས་ལྡན་གྱི་གསོལ་མཆོད་འདོད་འབྱུང་ནོར་བུའི་ཕྲེང་བ་ཞེས་བྱ་བ་བཞུགས་སོ།། ཨོཾ་སྭ་སྟི། །ཆོས་ཉིད་ཞི་ལས་མ་གཡོས་ཀྱང་། ལོག་པར་འདྲེན་པའི་དམ་སྲིའི་ཚོགས། མ་རུང་འདུལ་བའི་གཤེད་པོ་ཆེ། རྟ་མཆོག་དཔལ་ལ་ཕྱག་འཚལ་བསྟོད། དེ་ལ་འདིར་ལྷ་མཆོག་དགྲ་ལྷའི་རྒྱལ་པོ་རྡོ་རྗེ་གྲགས་ལྡན་འདི་ཉིད་ཀྱི་མཁོ་བའི་ཡོ་བྱད་རྣམ་འདུ་བྱས་ལ། རང་ཉིད་རྟ་མཆོག་རོལ་པའི་ང་རྒྱལ་དང་མ་བྲལ་བའི་ངང་ནས། །ཧྲཱིཿ དབང་ཆེན་པདྨ་ཧེ་རུ་ཀའི། བཀའ་ཡི་ལས་མཁན་མཐུ་བོ་ཆེ། མཐུ་ཆེན་དགྲ་ལྷ་ཡོངས་ཀྱི་གཙོ། གསུང་བློན་རྡོ་རྗེ་གྲགས་ལྡན་ནི། དུས་མཐའི་མེ་ཡི་ཕུང་པོ་འདྲ། འོད་ཟེར་ཉི་མ་འབུམ་གྱི་གཟི། མི་བཟད་གར་དགུའི་ཉམས་དང་ལྡན། ཛ༔བྷྱོ་རུ་ལུའི་གད་རྒྱང་ཅན། ཐུགས་ནི་སྙིང་རྗེའི་ཉམས་དང་ལྡན། སྒྲུབ་ལ་རྗེས་སུ་ཆགས་པ་དང་། སྡང་བའི་དགྲ་བོ་མཐའ་དག་ལ། མི་བཟད་ཁྲོ་གཏུམ་རྔམ་པའི་ཚུལ། དབང་དྲག་ཁྲོས་པའི་ཧེ་རུ་ཀ། བརྗིད་ལྡན་ཟ་འོག་དམར་ཁྲའི་བེར། རིན་ཆེན་རུས་པའི་རྒྱན་གྱིས་སྤྲས། བསེ་ཁྲབ་བསེ་རྨོག་རུ་དར་ཅན། རྒྱལ་མཚན་རྣམས་དགུའི་སྐུ་ལ་བརྒྱན། ཞབས་ལ་སག་ལྷམ་ཡུ་རིང་གསོལ། དགྲ་བགེགས་འགུགས་ཅིང་བསྒྲལ་བའི་ཕྱིར། ཕྱག་ན་རུ་མཚོན་བཙན་ཞགས་བརྣམ། ཞབས་གཉིས་གཡས་བརྐྱང་གཡོན་བསྐུམ་གྱིས། མེ་དཔུང་འབར་བའི་ཀློང་ན་བཞུགས། ཡུམ་ཆེན་གཟི་བརྗིད་ཆེན་མོ་ནི། དཀར་གསལ་ཡིད་འོང་མཛེས་མའི་ལུས། རྩེ་བེར་གཉིས་བརྩེག་སྐུ་ལ་གསོལ། མེ་ཏོག་སྣ་ཚོགས་ཐོད་དུ་བཅིངས། རིན་ཆེན་སྣ་ལྔའི་རྒྱན་གྱིས་སྤྲས། ཕྱག་ན་ཁ་ཊཾ་ཙེ་་གསུམ་དང་། ཐོད་པ་བདུད་རྩིས་བཀང་བ་བསྣམ། ཡབ་ལ་རྗེས་སུ་ཆགས་པའི་ཚུལ། རོལ་དུ་འཕར་སྤྱང་བྱ་འུག་ཁྲིད། ཕོ་ཉ་རླུང་ནག་འཚུབས་མ་དང་། ལྷ་སྲིན་སྡེ་བརྒྱད་ཕོ་ཉ་འགྱེད། གནམ་ལྕགས་ཐོག་མདའ་ཤ་ར་ར། སྤྲུལ་པ་རབ་བྱུང་ཆ་བྱད་ཅན། ཆོས་གོས་དར་ཞུ་སེར་པོ་གསོལ། ཕྱག་ན་བིང་དབྱུག་ལྕགས་ཕྲེང་བསྣམས། རྔམ་བརྗིད་ཕག་ནག་སྟེང་ན་འགྱིང་།བློན་པོ་བདུད་ནག་མི་སྡུག་པ། མ་ཟད་རལ་པ་གྱེན་དུ་བརྫེས། ཕྱག་ན་དར་མདུང་རྒྱུ་ཞགས་བསྣམ། དར་དམར་བེར་ཆེན་སྐུ་ལ་གསོལ། བཀའ་ཉན་ལས་བྱེད་ཚུལ་དུ་་བཞུགས། རུ་འདྲེན་སྡེ་བཞིའི་ཚོགས་རྣམས་བཅས། ལྷ་སྲིན་སྡེ་བརྒྱད་དམག་དཔུང་ནི། ཇི་ལྟར་ལྷ་མའི་ཁྲོམ་ཚོགས་ལྟར། ཉི་མའི་ཟེར་གྱི་རྡུལ་འཁྲིགས་བཞིན། ནམ་མཁའི་ཁམས་ཀུན་གང་ནས་ཀྱང་། མཁའ་ལ་ཀློག་ཕྲེང་ཇི་བཞིན་དུ། སྐད་ཅིག་ཙམ་གྱིས་འདིར་གཤེགས་ལ། དུར་ཁྲོད་རོལ་པའི་གཞལ་ཡས་ནས། པད་ཉི་དགྲ་བགེགས་བསྣོལ་བའི་སྟེང་། དགྱེས་ཤིང་བརྟན་པར་བཞུགས་སུ་གསོལ། དྭངས་བའི་ཡིད་ཀྱིས་ཕྱག་འཚལ་ལོ། །ཁྱེད་དང་མཐུན་པའི་དམ་རྫས་ནི། དངོས་འབྱོར་ཡིད་སྤྲུལ་ལས་བྱུང་བའི། ངོ་མཚར་ཀུན་བཟང་མཆོད་པའི་སྤྲིན། རབ་འབྱནས་ནམ་མཁའི་ཁམས་བཀང་ནས། གུས་པའི་བློ་ཡི་འབུལ་ལགས་ན། དགྱེས་པའི་ཚུལ་གྱིས་བཞེས་སུ་གསོལ། ཁམས་གསུམ་ཀུན་ལས་རྒྱལ་བ་དང་། དྲག་སྔགས་འབྲུག་སྟོང་ལྡིར་བ་བཞིན། ཆོས་དབྱིངས་ངང་ལས་སྐུར་བཞེངས་པའི། རྣམ་པ་ཀུན་ཏུ་ཁྱོད་ལ་བསྟོད། ཁྱོད་ལ་གསོལ་དང་མཆོད་པའི་མཐུས། སྔར་བཅོལ་ལས་ཀྱི་གཏང་རག་དང། ད་བཅོལ་ལས་ཀྱིའཕྲིན་ལས་ནི། སྔོན་ལས་འཕྲལ་རྐྱེན་ནད་གདོན་བགེགས། མེ་ཆུ་དུག་མཚོན་གནོད་སྦྱིན་དང་། རྒྱལ་པོའི་ཆད་པ་འབྱུང་བཞིའི་དགྲ། འཇིགས་བརྒྱད་ཞི་བའི་ཕྲིན་ལས་མཛོད། ཚེ་དཔལ་བསོད་ནམས་སྙན་གྲགས་རྒྱས། དབང་ཐང་རླུང་རྟ་དགུང་དུ་བསྐྱེད། རྒྱན་དང་རྩོད་པ་ཀུན་ལས་རྒྱལ། ཡར་ངོའི་ཟླ་བ་ལྟ་བུར་མཛོད། རང་རང་ཡིད་ལ་གང་འདོད་དང་། མདོར་ན་ཁམས་གསུམ་སྲིད་གསུམ་ཀུན། ཡིད་ལ་དྲན་པ་ཟམ་གྱིས་ཀྱང་། ཐམས་ཅད་དབང་དུ་སྡུད་པར་མཛོད། སྔོན་གྱི་ལས་དང་འཕྲལ་གྱི་རྐྱེན། བདག་ལ་བརྣག་པའི་བསམ་སྦྱོར་གྱི། མི་ཁ་བྲ་མཆུ་བྱུར་ངན་དང་། ཀེག་དང་ཐན་ལྟས་ངན་པ་སོགས། བྱད་ཕུར་རྦོད་གཏོང་ཕྲ་མེན་མཐུ། ལོག་པར་འདྲེན་པའི་བདུད་སྡེའི་ཚོགས། གཟུགས་ཅན་དགྲ་དང་གཟུགས་མེད་བགེགས། བཀྲ་མི་ཤིས་པའི་དངོས་པོ་ཀུན། མདོར་ན་མི་མཐུན་མཐའ་དག་རྣམས། ཐལ་བར་བརློགས་པའི་ཕྲིན་ལས་མཛོད། དེང་ནས་བྱང་ཆུབ་མ་ཐོབ་པར། དགྲ་ལྷའི་རྒྱལ་པོ་ཁྱོད་ཉིད་ནི། སྒྲུབ་པའི་རིག་འཛིན་བདག་ཅག་ལ། དུས་དང་གནས་སྐབས་ཐམས་ཅད་དུ། ལུས་དང་གྲིབ་མར་འགྲོགས་ནས་ཀྱང་། ཉིན་གྱིས་དུས་སུ་བྱ་ར་གྱིས། མཚན་གྱི་དུས་སུ་མེལ་ཚེ་མཛོད། བཅོལ་པའི་ལས་རྣམས་མཐའ་དག་ཀུན། ཅི་བསམ་ཡིད་བཞིན་འགྲུབ་པ་དང་། ཕན་བདེའི་དཔལ་ལ་སྤྱོད་པར་ཤོག། ཅེས་པ་འདི་ནི་ཡིག་ཐུབ་བརྟན་ནོར་བུ་དང་། གད་ཐུབ་བསྟན་ནོར་འཕེལ་གཉིས་ནས་བསྐུལ་ངོར།ལྷ་མཆོག་འདི་ཉིད་ཀྱིས་རྟགས་མཚན་མངོན་དུ་བྱུང་བ་རྫོགས་སྤྲུལ་ལྔ་པ་ཐུབ་བརྟན་ཆོས་ཀྱི་རྡོ་རྗེས་མགོན་ཁང་དབང་དྲག་རོལ་བ་ནས་མེ་སྦྲུལ་ཟླ་ཚེས་ལ་བྲེས་པ་དགེ་ལེགས་སུ་གྱུར་ཅིག། དགེའོ་།།