རྫོགས་ཆེན་གྱི་རང་བཞིན་ལྟ་བའི་དམ་ཚིག་བཞི་པོ་ངོས་འཛིན།
ཡང་རྫོགས་ཆེན་གྱི་རང་བཞིན་ལྟ་བའི་དམ་ཚིག་བཞི་པོའི་ངོས་འཛིན་ནི། འདི་དག་མིང་ངམ་ཚིག་ཏུ་བཏགས་ཀྱང་ངོ་བོ་ནི། ཆོས་ཉིད་གཞིའི་གནས་ལུགས་དངོས་ཀྱི་མངོན་རྟོགས་སུ་གདའ་ལ། སྐབས་དོན་འགག་བསྡུས་སུ། མེད་པ། ཕྱལ་བ། གཅིག་པུ། ལྷུན་རྫོགས་དང་བཞི་ལས། དང་པོ་ནི། འཁོར་འདས་ཀྱི་ཆོས་ཐམས་ཅད་རང་གི་ངོ་བོས་སྟོང་ཞིང་སྐྱེ་འགག་གནས་གསུམ་གྱི་མཚན་མ་དང་བྲལ་བའི་རང་བཞིན་དུ་གདོད་ནས་སྟོང་པ་ཆེན་པོ་སྟེ། དེའི་ཕྱིར་དམ་ཚིག་གི་བསྲུང་བྱའི་ངོ་བོ། སྲུང་བྱེད་ཀྱི་གང་ཟག །
ཇི་ལྟར་བསྲུང་བའི་ཚུལ་ལ་སོགས་པ་ཐམས་ཅད་ཀྱང་ཆོས་ཉིད་སྟོང་པ་ཆེན་པོ་ལས་གཞན་དུ་རྡུལ་ཙམ་གྲུབ་པ་མེད་པས་ན་མེད་པའི་དམ་ཚིག་ཅེས་བྱ། དེ་ལྟར་ངོ་བོའི་ཆ་ནས་དངོས་མཚན་དུ་གྲུབ་པ་མེད་ཀྱང་། རྣམ་པའི་ཆ་ནས་མེད་བཞིན་སྣང་བའི་ཆོ་འཕྲུལ་རྨི་ལམ་ལྟར། སྣ་ཚོགས་སུ་སྣང་བ་འདི་ལ་དམ་ཚིག་བསྲུང་མཚམས་ཇི་ལྟར་བྱ་ཞེ་ན། སྣང་བ་བདེན་མེད་རྨི་ལམ་མམ། ཆུ་ཟླའི་ངང་ཚུལ་དུ་གྱུར་པ་དེ་ཀའི་གནད་ཀྱིས་ལྟར་སྣང་གི་དམ་ཚིག་བླང་བསྲུང་ཉམས་བཤགས་པ་ལ་སོགས་མཐའ་དག་ཀྱང་འདུས་བྱས་དྲང་དོན་བྱིས་པ་ཁྲིད་ཐབས་ཙམ་དུ་ཟད་ལ། བསྲུངས་པའི་ཕན་ཡོན་དང་། ཉམས་པའི་ཉེས་མིག་གི་མཐོང་ཆོས་ཐམས་ཅད་ཀྱང་ཀུན་བརྟགས་ཀྱི་མེ་ལོང་ལ་ཀུན་བརྟགས་ཀྱི་གཟུགས་བརྙན་ཤར་བའི་རྣམ་འགྱུར་ལས་མ་འདས་པའི་ཕྱིར་ན། གཟུང་འཛིན་དངོས་པོའི་ཆོས་ཀྱིས་ཀུན་ནས་བླངས་པས་བསྲུང་བྱ་སྲུང་བྱེད་བསྲུང་མཚམས་ཐམས་ཅད་རང་རིག་ཡེ་ཤེས་ཁྱབ་གདལ་ཕྱོགས་ལྷུང་མེད་པར་ཐག་ཆོད་ཅིང་གདེངས་རྙེད་པ་ལ་ཕྱལ་བའི་དམ་ཚིག་ཅེས་བྱ། དེ་ལྟ་བུའི་གདོད་ནས་གནས་ལུགས་སམ་རང་རིག་པའི་ཡེ་ཤེས་དམ་ཚིག་བསྲུང་བྱ་སྲུང་བྱེད་ཀྱི་མཚན་མས་མ་གོས་ཤིང་། ཉམས་རྒྱུ་ཉམས་རྐྱེན་ཉམས་པའི་རྣམ་སྨིན་སོགས་ཀྱི་དངོས་པོ་རིས་ཅན་དུ་མ་གྲུབ་ན། དམ་ཚིག་དེ་གང་ལ་ཟེར་གང་ཞིག་ཡིན་སྙམ་ན། དེ་ནི་ཕྱི་རོལ་ལམ་ནང་ངམ་བར་དང་སྟེང་འོག་སོགས་གང་དུ་ཡང་མེད། གང་དུ་ཡང་མི་གནས། གང་ལ་ཡང་མ་སོང་སྟེ། ད་ལྟའི་ཐ་མལ་
གྱི་ཤེས་པ་གཉུག་མ། མ་བཅོས། ལྷན་སྐྱེས་སེམས་ཉིད་རྗེན་པ་འདི་ཁོ་ན་སྟེ། འདི་ནི་དམ་ཚིག་ཀུན་གྱི་རྩ་བའམ། སྙིང་པོ་མཐར་ཐུག་ཡིན་པའི་ཕྱིར། ཇི་སྐད་དུ།(དཔལ་སྒེག་པའི་རྡོ་རྗེའི་དམ་ཚིག་མདོར་བསྡུས་པ་ལས།) དམ་ཚིག་དམ་ཚིག་ཅེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་ཡིན། །ཞེས་དང་། སྤྱོད་འཇུག་ལས་ཀྱང་། སེམས་བསྲུང་བརྟུལ་ཞུགས་མ་གཏོགས་པ། །བརྟུལ་ཞུགས་མང་པོས་ཅི་ཞིག་བྱ། །ཞེས་པ་ལྟ་བུ་འདི་ཉིད་ལ་གཅིག་པུའི་དམ་ཚིག་ཅེས་བྱ། དེ་ལྟར་ཡིན་པའི་གནད་དོན་རྟོགས་ཤིང་རིག་ནས། དུས་དང་རྣམ་པ་ཐམས་ཅད་དུ་འཁོར་འདས་ཀྱི་ཆོས་ལ་བཟང་ངན་བདག་གཞན་སྤང་བླང་བསྲུང་ཉམས་སོགས་ཀྱི་མཚན་འཛིན་ཞེས་རྟོག་པ་མང་པོས་རང་སེམས་རང་གིས་གཡེང་། དཀྲུག །གཟེངས། བསླད། བཅིངས་པ་སོགས་ཀྱིས་རྩོལ་བའི་མགོ་འཁོར་དུ་མི་གཞུག་པར། སེམས་ཉིད་སྐུ་གསུམ་ལྷུན་གྲུབ་ཡེ་ཤེས་ལྔ་དང་གསུམ་དང་གཉིས་སོགས་ཀྱི་ཡོན་ཏན་མཐའ་དག་གཟོད་ནས་རང་ཆས་སུ་གནས་ཤིང་རྫོགས་ལ་སྐྱོན་དང་སེལ་གྱི་དྲི་མ་ཐམས་ཅད་ཡེ་བྲལ་དུ་གྱུར་པའི་ས་ལམ་གྱི་ཡོན་ཏན་མཐའ་དག་གཞི་ལ་ལྷུན་རྫོགས་སུ་ཚང་ཕྱིར། རྩོལ་སྒྲུབ་མཚན་བཅས་ཀྱིས་གཡེང་བ་ལ་མ་ལྟོས་པར་རང་བྱུང་རང་བབས་མ་བཅོས་གཉུག་མ་ལྷན་སྐྱེས་ཀྱི་ངང་དུ་གཞག་བྱ་འཇོག་བྱེད་མེད་པར་མཉམ་པར་འཇོག་པ་ནི་ཆོས་ཀྱི་སྒོ་རབ་འབྱམས་མ་ལུས་པའི་ཉམས་ལེན་ལྷུན་གྱིས་གྲུབ་ཅིང་རྫོགས་ཕྱིར་ལྷུན་རྫོགས་ཀྱི་དམ་ཚིག་ཅེས་བྱ་བ་སྟེ། དེ་ལྟར་ན་རང་བཞིན་ལྟ་བའི་དམ་ཚིག་བཞི་
པོའི་འགག་དོན་ཐམས་ཅད་འདིར་འདུ་བ་ལགས། ཡང་ཁ་ཅིག་འདི་སྐད་དུ། ཁྱེད་རང་གི་གཞིའི་སྐབས་སུ་འཁྲུལ་བ་འབྱུང་སྟེ། དེ་ལ་གསར་མ་པའི་ལུགས་ནི་ཀླུ་སྒྲུབ་དཔའ་བོ་ལ་སོགས་འཕགས་ཡུལ་གྱི་མཁས་གྲུབ་ཕལ་མོ་ཆེ་དང་། ཁྱད་པར་ཆོས་ཀྱི་གྲགས་པའི་བཞེད་པས། ཀུན་གཞིའི་རྣམ་ཤེས་ནི། ངོ་བོ་མ་བསྒྲིབས་ལུང་མ་བསྟན། །ཞེས་པ་ལྟར་མེ་ལོང་རང་གི་ངོ་བོའི་དུས་ན་གཟུགས་བརྙན་གྱིས་སྟོང་པ་བཞིན་དུ། ཀུན་གཞི་རང་གི་ངོ་བོའི་དུས་ན་ཚོགས་བདུན་སེམས་བྱུང་དང་བཅས་པས་སྟོང་པ། གཟུགས་བརྙན་ཅིར་ཡང་སྣང་རུང་གི་གསལ་བ་མི་འདོར་བ་བཞིན་དུ། འཁོར་འདས་ལམ་གསུམ་གྱི་བག་ཆགས་འཇོག་རུང་གི་ནུས་པ་མི་འདོར་བ་ཡུལ་རྐྱེན་དང་མ་འཕྲད་པས་མེ་ལོང་རང་གི་དུས་ན་ལུང་མ་བསྟན་གྱི་གསལ་བ་ཡིན་པ་བཞིན། ཀུན་གཞི་འཁྲུལ་གྲོལ་འདུ་བྱེད་མ་གཡོས་པའི་དུས་ན་འཁོར་འདས་ཀྱི་ཕྱོགས་སུ་མ་ལྷུངས་པའི་ལུང་མ་བསྟན་གྱི་ཕྱོགས་སུ་བཞེད་པ་ལས། ཁྱེད་རང་གི་ལུགས་ལ་གཞི་ཀ་དག་དང་། ཡེ་གྲོལ་དུ་འདོད་ཟེར་བ་ཀུན་གཞི་དང་ཀ་དག་གཅིག་གམ་ཐ་དད། གཅིག་ན་ཀུན་གཞི་འཁོར་འདས་གཉིས་ཀྱི་སྤྱི་གཞི་ཡིན་པས་དོན་གྱིས་ལྷན་ཅིག་སྐྱེས་པའི་མ་རིག་པ་ཡོད་ལ། དེ་མ་རིག་པ་ཐམས་ཅད་ཀྱི་རྩ་བ་ཡིན་པས་ཀ་ནས་དག་པ་དང་། ཡེ་གྲོལ་གྱི་དོན་མ་ཚང་། ཀུན་གཞི་དང་ཀ་དག་གཉིས་མི་གཅིག་ན། དེ་གཉིས་ཐོག་མར་གང་སྔ། ཀ་དག་སྔ་ན། དང་པོ་ཀ་དག་ལ་རྗེས་ཞིག་ནས་ཀུན་གཞིའི་གནས་ལུགས་སུ་བྱུང་བ་ནི་ལུང་རིགས་ཀྱི་ངོས་ནས་མི་
འཐད་དོ། །ཀུན་གཞི་ནི་འཁོར་འདས་ཀྱི་ཕྱོགས་སུ་མ་ལྷུང་བའི་གདོད་མའི་གནས་ལུགས་ཡིན་ལ། དེའི་གོང་ན་གཞན་མེད་པས་སོ། །ཀུན་གཞི་སྔ་ན་ཀ་དག་དང་ཡེ་གྲོལ་དུ་མི་འགྱུར་བས། དེ་བས་ན་ཀ་དག་ཅེས་ས་བོན་གྱི་བརྡ་མིང་བརྗེས་པ་སྟེ། དང་པོ་ཡེ་མེད་དུ་འདོད་པ་ལ་ཀ་དག་དང་། དེ་ནས་ཡེ་ཡོད་ཅུང་ཙམ་སྲིད་པ་ལ་མ་རྟོགས་པ་འཁོར་བའི་འཁྲུལ་གཞི་ཞེས་མིང་འདོགས་བསྒྱུར་བ་ཡིན་མོད། ཅེས་པར་ལན་འདི་སྐད་སྨྲ་སྟེ། འདི་དོན་ཁྱོད་རང་ཐོས་རྒྱ་ཆུང་ཞིང་ཀུན་གཞིའི་སྤུ་རིས་མ་འབྱེད་པར་ཟད།