གཉིས་པ་རང་ལུགས་བཤད་པ།

གཉིས་པ་རང་ལུགས་བཤད་པ་ལ།

རྒྱུ་བཤད་པ་དང༌། འབྲས་བུ་བཤད་པ་དང༌། རྐྱེན་བཤད་པ་དང་གསུམ། དང་པོ་ནི། ཆོས་དེའི་ཕན་འདོགས་བྱེད་ཆོས་དེའི་རྒྱུའི་མཚན་ཉིད། དབྱེ་ན། བྱེད་རྒྱུ་དང༌། ལྷན་ཅིག་འབྱུང་རྒྱུ་དང༌། སྐལ་མཉམ་གྱི་རྒྱུ་དང༌། མཚུངས་ལྡན་གྱི་རྒྱུ་དང༌། ཀུན་འགྲོའི་རྒྱུ་དང༌། རྣམ་སྨིན་གྱི་རྒྱུ་དང་དྲུག་ཡོད་པའི་ཕྱིར་ཏེ། མཛོད་ལས། བྱེད་རྒྱུ་ལྷན་ཅིག་འབྱུང་བ་དང༌། །སྐལ་མཉམ་མཚུངས་པར་ལྡན་པ་དང༌། །ཀུན་ཏུ་འགྲོ་དང་རྣམ་སྨིན་དང༌། །རྒྱུ་ནི་རྣམ་པ་དྲུག་ཏུ་འདོད། །ཅེས་གསུངས་པའི་ཕྱིར་རོ། །རང་འབྲས་སྐྱེད་བྱེད་ཀྱི་རྒྱུའི་ངོ་བོ་ཉིད་དུ་གནས་པ་དེ། བྱེད་རྒྱུའི་མཚན་ཉིད། བུམ་པ་སྐྱེད་བྱེད་ཀྱི་ངོ་བོ་ཉིད་དུ་གནས་པ། བུམ་པའི་བྱེད་རྒྱུའི་མཚན་ཉིད། མཚན་གཞི་ནི། བུམ་པའི་ཉེར་ལེན་ལྟ་བུའོ། །ཆོས་དེ་དང་ཚོགས་པ་གཅིག་པའི་སྒོ་ནས་ཕན་འདོགས་པའི་ཆོས་དེ། ཆོས་དེའི་ལྷན་ཅིག་འབྱུང་རྒྱུའི་མཚན་ཉིད། རོ་སྐད་ཅིག་དང་པོ་ལྟ་བུའོ། །འདི་ལ་ས་བཟང་ཀུན་བཏུས་འགྲེལ་བ་ལས། མཚན་ཉིད་ནི། འབྲས་བུའི་ཆོས་གང་དག་གྲོགས་སུ་ངེས་པའི་ཆོས་དེ་ཡོད་ན་དེ་དང་ལྷན་ཅིག་འབྱུང་གི་གྲོགས་སུ་ངེས་པའི་ཆོས་གང་ཡང་རུང་བ་མ་ཚང་ན་ཆོས་དེའང་འབྱུང་བ་མ་ཡིན་པ་ནི་གྲོགས་ཀྱི་སྒོ་ནས་ཕན་ཚུན་རྒྱུའི་རྐྱེན་དུ་བལྟ་སྟེ་ཞེས་པའོ། །དཔེ་བརྗོད་ནི། འདི་ལྟ་སྟེ། གྲོགས་སུ་ངེས་པའི་འབྱུང་བ་རྣམས་ཕན་ཚུན་རླུང་མེད་ན་མེ་འབར་བ་མི་འབྱུང་བ་དང༌། འབྱུང་བ་ལས་གྱུར་བ་རྣམས་ཕན་ཚུན་གཟུགས་མེད་ན་རོ་མི་འབྱུང་བ་ལྟ་བུའོ། །དེའང་རྒྱུ་འབྲས་དུས་མཉམ་སྟོན་པ་མ་ཡིན་གྱི་རྒྱུའི་ཚོགས་པ་ཚར་གཅིག་པའི་ཆ་ནས་བཞག་པ་སྟེ། ནུས་པ་འཇུག་པ་མེད་པར་ནི། །རོ་མེད་དེ་ཉིད་གཞན་གྱི་རྒྱུ། །ཞེས་གསུངས་པའི་ཕྱིར། རང་འབྲས་རང་དང་རིགས་འདྲ་སྐྱེད་བྱེད་དེ། སྐལ་མཉམ་གྱི་རྒྱུའི་མཚན་ཉིད། དད་པ་སྐད་ཅིག་དང་པོ་ལྟ་བུའོ། །མཚུངས་ལྡན་དུ་གྱུར་བའི་སྒོ་ནས་ཕན་འདོགས་བྱེད་ཀྱི་རིགས་སུ་གནས་པའི་ཤེས་པ་དེ། མཚུངས་ལྡན་གྱི་རྒྱུའི་མཚན་ཉིད། མཚན་གཞི་ནི་གཞན་རིག་གི་ཤེས་པ་རྣམས་སོ། །འདི་ལ་ས་བཟང་ཀུན་བཏུས་འགྲེལ་བ་ལས། མཐུན་པར་རྟོགས་པས་ཇི་ལྟ་བུ་ཞེ་ན། མཚུངས་ལྡན་རྒྱུ་ནི་སེམས་རྣམས་དང༌། སེམས་བྱུང་རྟེན་མཚུངས་ཅན་རྣམས་སོ། །ཞེས་གསུངས་ཤིང༌། འདིར་ཡང་དེ་དང་མཐུན་པར་མཚན་ཉིད་ནི། རིག་པའི་ཆོས་གང་དག་གཙོ་འཁོར་དུ་གྱུར་བ་ལྷན་ཅིག་འབྱུང་པས་དམིགས་པ་དང་མཐུན་ཞིང་མཚུངས་པར་རྟོགས་ཀྱི། མཚུངས་ལྡན་དུ་ངེས་པའི་ཆོས་གང་ཡང་རུང་བ་མ་ཚང་ན་དམིགས་པ་མཐུན་པར་རྟོགས་པ་མ་ཡིན་པ་དེ་དག་ཕན་ཚུན་རྒྱུའི་རྐྱེན་དུ་བལྟ་སྟེ་ཞེས་པའོ། །མཚན་གཞི་ནི། འདི་ལྟ་སྟེ། རྟེན་མཚུངས་པའི་སེམས་དང་སེམས་ལས་བྱུང་བ་ཕན་ཚུན་གྲོགས་བྱས་ནས་དམིགས་པ་མཐུན་པར་རྟོགས་པ་རྣམས་སོ། །དུས་མཚུངས་པ་རྣམས་ནི་མ་ཡིན་ཏེ་ རྒྱུ་འབྲས་ཡིན་པའི་ཕྱིར་རོ། །འདིས་ནི་སེམས་བྱུང་རྫས་ཐ་དད་དུའང་བསྟན་ཅིང༌། ཞེས་གསུངས་སོ། །རང་གི་འབྲས་བུར་གྱུར་བའི་ཉོན་མོངས་ཅན་ཕྱི་མ་སྐྱེད་བྱེད་ཀྱི་ཉོན་མོངས་ཅན་དེ། ཀུན་འགྲོའི་རྒྱུའི་མཚན་ཉིད། ཉོན་མོངས་པ་དང་དེ་དང་མཚུངས་ལྡན་རྣམས་སོ། །འདི་ལ་ཐེག་མཆོག་དབུ་མའི་ཟིན་བྲིས་ལས། ཀུན་འགྲོའི་རྒྱུ་འདི་ཡང་སྐལ་མཉམ་གྱི་རྒྱུའི་ཁོངས་སུ་ཕལ་ཆེར་འདུ་བ་ཡིན་ལ། མི་འདུ་བ་དག་ཀྱང་ཡོད་པ་ནི་ཡིན་ཏེ། རྒྱུ་ཉོན་མོངས་པ་ལས་འབྲས་བུ་ཉོན་མོངས་སྐྱེད་པར་བྱེད་པ་ཡང་རིགས་དང་ས་མ་ངེས་པ་རྣམས་ནི་དེར་མི་འདུའོ། །ཞེས་སོགས་གསུངས་སོ། །མཛོད་ལས་ས་མཚུངས་དགོས་པར་གསུངས་པས་སྐབས་འདི་དང་མི་འདྲ་བའོ། །རང་འབྲས་རྣམ་སྨིན་འབྱིན་བྱེད་དུ་ལུང་དུ་བསྟན་པའི་ཆོས་དེ། རྣམ་སྨིན་གྱི་རྒྱུའི་མཚན་ཉིད། མཚན་གཞི་ནི། མི་དགེ་བ་དང༌། དགེ་བ་ཟག་བཅས་རྣམས་སོ། །དགེ་མི་དགེ་ལུང་མ་བསྟན་གྱི་མཚན་ཉིད་ནི། གཏན་ཚིགས་རིགས་པའི་དོན་བསྡུས་ལས། དགེ་མི་དགེ་ལུང་མ་བསྟན་གསུམ་གྱི་མཚན་ཉིད་ནི་རིམ་པ་ལྟར། ལུང་དུ་བསྟན་པའི་ཆོས་གང་ཞིག དམ་པ་རྣམས་ཀྱིས་བསྔགས་པར་འོས་པ་དང༌། གང་ཞིག་དམ་པ་རྣམས་ཀྱིས་སྨད་པར་འོས་པ་དང༌། དགེ་མི་དགེ་གང་ཡང་མིན་པའི་ཆོས་ཞེས་པའོ། །ཞེས་གསུངས་པའི་ཕྱིར། དེ་གསུམ་གྱི་མཚན་གཞི་ནི་རིམ་པ་ལྟར། དད་པ་དང༌། ཁོང་ཁྲོ་དང༌། བུམ་པ་ལྟ་བུའོ། །གཉིས་པ་འབྲས་བུ་བཤད་པ་ལ། ཕན་འདོགས་བྱ། འབྲས་བུའི་མཚན་ཉིད། འབྲས་བུ་ལ་སྒྲས་བརྗོད་ཀྱི་དབྱེ་ན། རྣམ་སྨིན་གྱི་འབྲས་བུ། རྒྱུ་མཐུན་གྱི་འབྲས་བུ། སྐྱེས་བུའི་བྱེད་འབྲས། བདག་འབྲས། བྲལ་འབྲས་དང་ལྔ་ཡོད་པའི་ཕྱིར། རང་རྒྱུ་དགེ་བ་ཟག་བཅས་དང་མི་དགེ་བ་གང་རུང་གི་ནུས་པ་རིམ་གྱིས་སྨིན་པ་ལས་བྱུང་ཞིང་མ་སྒྲིབ་ལུང་མ་བསྟན་གྱི་ཉེར་ཕུང་དེ། རྣམ་སྨིན་གྱི་འབྲས་བུའི་མཚན་ཉིད། རྣམ་སྨིན་དང༌། རྣམ་སྨིན་གྱི་འབྲས་བུ་དོན་གཅིག མཚན་གཞི་ནི། ཟག་བཅས་ཉེར་ལེན་གྱི་ཕུང་པོ་ལྔ་དེ་ཡིན་ནོ། །རང་གི་རྒྱུ་དང་འདྲ་བའི་འདུས་བྱས་དེ། རྒྱུ་འཐུན་གྱི་འབྲས་བུའི་མཚན་ཉིད། མཚན་གཞི་ནི། བུམ་པའི་འབྲས་བུར་གྱུར་པའི་བུམ་པ་ལྟ་བུའོ། །རང་གི་རྒྱུའི་སྟོབས་ལས་སྐྱེས་པ་དེ། སྐྱེས་བུ་བྱེད་འབྲས་ཀྱི་མཚན་ཉིད། མཚན་གཞི་ཡོད་དེ། གཟུགས་དེ་ཡིན་པའི་ཕྱིར། དེ་ཆོས་ཅན། ཁྱོད་ལ་སྐྱེས་བུའི་བྱེད་འབྲས་ཞེས་བརྗོད་པའི་རྒྱུ་མཚན་ཡོད་དེ། སྐྱེས་བུས་ལས་བྱེད་པ་ལྟར་རྒྱུ་རྐྱེན་ཚོགས་པས་བསྐྱེད་པས་ན་དེ་ལྟར་བརྗོད་པའི་ཕྱིར། རང་རྒྱུའི་རང་དབང་དུ་བསྐྱེད་པར་བྱ་བ། བདག་འབྲས་ཀྱི་མཚན་ཉིད། འདུས་བྱས་ཡིན་ན་སྐྱེས་བུའི་བྱེད་འབྲས་དང་བདག་འབྲས་གཉིས་ཀ་ཡིན་པས་ཁྱབ། གཉེན་པོ་ཤེས་རབ་ཀྱི་སྟོབས་ཀྱིས་རང་གི་སྤང་བྱ་ཟད་པའི་བྲལ་བ་དེ། བྲལ་བའི་འབྲས་བུའི་མཚན་ཉིད། བྲལ་བ་བློ་ཡིས་ཟད་པའོ། །ཞེས་པ་ལྟར་རོ། །སོ་སོར་བརྟག་འགོག་དང་བྲལ་འབྲས་གཉིས་དོན་གཅིག། ཆོས་དབྱིངས་བྲལ་བའམ་ཟད་པ་ཡིན་ཀྱང་བྲལ་འབྲས་མཚན་ཉིད་པ་མ་ཡིན་ནམ་སྙམ། མཚན་གཞི་ནི། སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྒྲིབ་པ་དང་བྲལ་བ་དེའོ། །གསུམ་པ་རྐྱེན་གྱི་མཚན་ཉིད། རང་གི་འབྲས་བུ་འགྲུབ་བྱེད་དེ་ཡིན་པའི་ཕྱིར། རྐྱེན་དེ་ལ་དབྱེ་ན་བཞི་ཡོད་དེ། རྒྱུའི་རྐྱེན་དང༌། དེ་མ་ཐག་རྐྱེན་དང༌། དམིགས་རྐྱེན་དང༌། བདག་རྐྱེན་དང་བཞི་ཡོད་པའི་ཕྱིར། རྒྱུའི་རྐྱེན་གྱི་མཚན་ཉིད་ཡོད་དེ། རང་འབྲས་སྐྱེད་བྱེད་དེ་ཡིན་པའི་ཕྱིར། རྒྱུ་དང་རྐྱེན་དང་རྒྱུ་རྐྱེན་རྣམས་དོན་གཅིག དེ་མ་ཐག་རྐྱེན་གྱི་མཚན་ཉིད་ཡོད་དེ། རང་འབྲས་ཤེས་པ་མྱོང་བ་གསལ་རིག་ཏུ་གཙོ་བོར་དངོས་སུ་སྐྱེད་བྱེད་དེ་ཡིན་པའི་ཕྱིར། དམིགས་རྐྱེན་གྱི་མཚན་ཉིད་ཡོད་དེ། རང་འབྲས་ཤེས་པ་ཡུལ་གྱི་རྣམ་ལྡན་དུ་གཙོ་བོར་དངོས་སུ་སྐྱེད་བྱེད་དེ་ཡིན་པའི་ཕྱིར། བདག་རྐྱེན་གྱི་མཚན་ཉིད་ཡོད་དེ། རང་འབྲས་འབྱུང་བ་ལ་དབང་བྱེད་པའི་ཚུལ་གྱིས་སྐྱེད་བྱེད་དེ་ཡིན་པའི་ཕྱིར། རྐྱེན་བཞིའི་མཚན་ཉིད་འཇོག་ཚུལ་དེ་ལྟར་འཐད་དེ། ས་བཟང་གི་ཀུན་བཏུས་འགྲེལ་བ་ཤེས་བྱ་རབ་གསལ་སྣང་བ་ལས། འབྲས་བུའི་ངོ་བོར་སྐྱེད་པ་རྒྱུའི་རྐྱེན་དང༌། ཁྱད་པར་ཤེས་རིག་ཕྱི་མ་སྐྱེད་པ་དེ་མ་ཐག་པའི་རྐྱེན་དང༌། ཤེས་པ་ཡུལ་གྱི་རྣམ་ལྡན་དུ་སྐྱེད་པ་དམིགས་པའི་རྐྱེན་དང༌།འབྲས་བུ་འབྱུང་བ་ལ་དབང་བྱེད་པ་བདག་པོའི་ཀྱང་རྐྱེན་གྱི་མཚན་ཉིད་ཅན་དུ་བལྟའོ། །ཞེས་གསུངས་པའི་ཕྱིར་རོ། །ཤེས་པ་ཡིན་ན་རྐྱེན་བཞི་ལས་སྐྱེ་བས་ཁྱབ་མ་ཁྱབ་ལ་གསུངས་ཟིན་གཉིས་ཡོད་དེ། ས་བཟང་གི་ཀུན་བཏུས་འགྲེལ་བ་ལས། སེམས་སེམས་བྱུང་རྐྱེན་བཞི་ལས་སྐྱེ་བ་ཡང་སྲིད་པའི་དབང་དུ་བྱས་ཀྱི་ཁྱབ་པའི་དོན་ནི་མ་ཡིན་ནོ་ཞེས་ཟེར་རོ། །ཞེས་པ་ནས། རྐྱེན་བཞི་སྲིད་པའི་དོན་ཙམ་དུ་འདོད་པའང་མི་རིགས་ཏེ། སྡེ་བ་ཐམས་ཅད་ཀྱིས་ཀྱང་སེམས་སེམས་བྱུང་ཐམས་ཅད་རྐྱེན་བཞི་ལས་སྐྱེ་བར་བཤད་པའི་ཕྱིར། ཞེས་གསུངས་པ་དང༌། དེ་ལས། རིག་པ་གང་ཡིན་རྐྱེན་བཞི་ལས་སྐྱེ་བའི་ངེས་པ་ནི་མེད་དེ། དོན་དུ་ན་ཤེས་པ་འཁྲུལ་བ་ལ་དམིགས་རྐྱེན་མེད་པའི་ཕྱིར་རོ། །ཞེས་གསུངས་པ་དང་གཉིས་སོ། །