གཉིས་པ་བཤད་པ་ཉིད་ཉེ་བར་འགོད་པ།

གཉིས་པ་བཤད་པ་ཉིད་ཉེ་བར་འགོད་པ་ལ།

བླ་མ་བསྟེན་པའི་ཚུལ་དང༌། བསྟེན་ཚུལ་བཤད་པའི་དུས་དང༌། བཤད་ནས་སྣོད་རུང་དུ་ཇི་ལྟར་བྱ་བ་དང་གསུམ། དང་པོ་ལ། བསྟེན་ཚུལ་སྤྱིར་བསྟན་པ་དང༌། དེའི་དམིགས་སེལ་དང༌། བསྟེན་ཚུལ་གྱི་དོན་བསྡུ་བའོ། །དང་པོ་ལ་དངོས་ཀྱི་དོན་དང་ཞར་བྱུང་གི་དོན་དང་གཉིས། དང་པོ་ལ་བླ་མ་བསྟེན་ཚུལ་མདོར་བསྟན་པ་དང་རྒྱས་པར་བཤད་པ་གཉིས། དང་པོ་ལ་བླ་མ་གུས་པར་བྱས་པས་འཐད་པ་དང༌། གུས་པ་སྒྲུབ་པའི་ཚུལ་དང༌། བླ་སློབ་གཉིས་ཀྱི་འབྲེལ་བརྟག་པ་དང་གསུམ། དང་པོ་ནི། དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་པས། །དུས་གསུམ་དུ་ནི་མངོན་ཕྱག་འཚལ། །ཞེས་ཆོ་ག་སོགས་ལ་རང་བཟོའི་སྐྱོན་མེད་པས་དབ༷ང་བསྐུ༷ར་ཕྱིན་ཅི་མ་ལོག་པ་མཆོ༷ག་ཏུ་གྱུར་པ་ཐོ༷བ་པའི་རྡོ༷་རྗེ༷་ཡི༷་སློ༷བ་དཔོ༷ན་ནམ་བླ་མ་ལ༷་ནི༷། སྔར་བླ་མ་དེ་ཉིད་ཀྱང་སོ་སོ་སྐྱེ་བོ་ཡིན་ལ། སློབ་མ་ཡང་སོ་སོ་སྐྱེ་བོ་ཡིན་པས་དབང་ཐོབ་ནས་ལམ་སྒོམ་པ་ལ་བླ་མ་བས་སློབ་མ་བརྩོན་འགྲུས་ཆེ་བར་བརྩམས་པའི་རིགས་ཅན་སློབ་མ་སྔོན་ལ་སངས་རྒྱས་པ་ཡང་ཡོད་པས། དེ་ལྟར་སངས་རྒྱས་པའི་དེ༷་བཞི༷ན་གཤེ༷གས་པ་རྣམས་ཕྱོ༷གས་བཅུ༷འི་འཇི༷ག་རྟེ༷ན་གྱི་ཁ༷མས་གང་ན་བཞུ༷གས་པ༷ས་ཀྱང། སྔར་སློབ་པ་ལམ་གྱི་གནས་སྐབས་སུ་དབང་བསྐུར་བའི་བླ་མ་སོ་སོ་སྐྱེ་བོ་ལ་སྔ་དྲོའི་དུས་དང༌། ཉིན་གུང་གི་དུས་དང་ཕྱི་དྲོའི་དུ༷ས་གསུ༷མ་དུ༷་ནི༷་དྲིན་དྲན་པའི་ཚུལ་གྱིས་ཕྱིན་ཆད་ལྟོས་པ་ཡོད་པ་མིན་ནའང་མངོ༷ན་པར་གུས་པས་ཕྱ༷ག་འཚ༷ལ་བར་མཛད་ན་སོ་སོ་སྐྱེ་བོ་བླ་མ་ལ་ལྟོས་དགོས་པས་གུས་པ་དང་ཕྱག་དང་བསྙེན་བཀུར་སོགས་ལྟ་སྨོས་ཀྱང་ཅི་དགོས་ཞེས་སྟོན་པའོ། །གུས་པས་ཚུལ་བཞིན་དུ་བསྟེན་རིགས་ཏེ། ཕན་ཡོན་ཁྱད་པར་དུ་འཕགས་པ་ཐོབ་པའི་ཕྱིར་ཏེ། རྗེ་བཙུན་ཏཱ་ར་ནཱ་ཐའི་ལྷན་ཐབས་འོད་བརྒྱ་འབར་བ་ལས། ཕན་ཡོན་ལུང་དང་སྦྱར་བ་ནི། དེ་ཡང་སྒྱུ་འཕྲུལ་དྲྭ་བ་ལས་ཀྱང༌། སློབ་དཔོན་ཇི་ལྟར་བལྟ་ཞེ་ན། །བླ་མ་སངས་རྒྱས་ཀུན་དང་མཉམ། །དེ་ཉིད་རྟག་ཏུ་རྡོ་རྗེ་འཆང༌། །དེ་བཞིན་གཤེགས་པ་རིན་ཆེན་ཏོག །དེ་ཉིད་ཡེ་ཤེས་རྒྱ་མཚོ་སྟེ། །ཡིད་བཞིན་ནོར་བུ་རིན་ཆེན་སྦྱིན། །སློབ་དཔོན་གྱི་ནི་ཡོན་ཏན་གཟུང༌། །སྐྱོན་ནི་ནམ་ཡང་མ་ཡིན་ནོ། །ཡོན་ཏན་གཟུང་བས་དངོས་གྲུབ་ཅིང༌། །སྐྱོན་རྣམས་ཀྱིས་ནི་དངོས་གྲུབ་ཉམས། །དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །ཞེས་དང༌། དཔལ་དྲི་མ་མེད་པའི་འོད་ལས། དུས་ཀྱི་འཁོར་ལོའི་རྒྱུད་སྟོན་པ་པོ་རྡོ་རྗེ་སློབ་དཔོན་ནི་བཅོམ་ལྡན་འདས་འཇམ་དཔལ་ཇི་ལྟ་བ་དང༌། དུས་ཀྱི་འཁོར་ལོ་དང་པོའི་སངས་རྒྱས་ཇི་ལྟ་བ་བཞིན་དུ། ཐར་པ་དོན་དུ་གཉེར་བ་རྣམས་ཀྱིས་བལྟ་བར་བྱའོ། །ཞེས་པ་དང༌། སློབ་དཔོན་གྱིས་ནི་སྡིག་པ་འཕྲོག །སློབ་དཔོན་གྱིས་ནི་འཇིགས་པ་སེལ། །སློབ་དཔོན་གྱིས་ནི་སྡུག་བསྔལ་གྱི། །རྒྱ་མཚོའི་འཇིངས་ལས་སྒྲོལ་བར་འགྱུར། །ཞེས་གསུངས་ཤིང༌། དཔལ་ས་ར་ཧས་ཀྱང༌། བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་འདྲ། །ཞེས་དང༌། ཨིནྡྲ་བྷུ་ཏིའི་ཡེ་ཤེས་གྲུབ་པ་ལས་ཀྱང༌། སྐྱ་བ་འཛིན་པ་མེད་པར་ནི། །གྲུ་ཡིས་ཕ་རོལ་འགྲོ་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང༌། ། བླ་མ་མེད་པར་སྲིད་མཐར་མིན། །ཞེས་དང༌། མཐུ་སྟོབས་དབང་ཕྱུག་བིརྺ་བས་ཀྱང༌། བླ་མ་དང་ནི་རྡོ་རྗེ་སེམས། །ཐ་དད་པར་ནི་མི་བྱ་སྟེ། །བླ་མ་སངས་རྒྱས་ཆོས་དང་ནི། །དེ་བཞིན་དགེ་འདུན་བླ་མ་སྟེ། །དངོས་གྲུབ་གོ་འཕང་མཆོག་འདོད་པས། །ཀུན་ནས་བླ་མ་མཉེས་པར་བྱ། །སངས་རྒྱས་ཀུན་དངོས་རྡོ་རྗེ་འཆང༌། །རྩོད་པའི་དུས་འདིར་བདག་དོན་དུ། །ཀུན་དང་མཐུན་པར་སྟོན་མཛད་པ། །དེ་ལྟར་ཤེས་ནས་དངོས་ཀུན་གྱིས། །བསྟེན་བྱ་དུས་གསུམ་སངས་རྒྱས་ཀྱི། །དངོས་གྲུབ་བདེ་ཆེན་ཐོབ་པར་འགྱུར། །ཞེས་པ་ལ་སོགས་པ་སྟེ། མདོར་ན་དངོས་གྲུབ་ཐམས་ཅད་ཀྱི་རྩ་བ་བླ་མར་གསུངས་པའི་ལུང་ཁུངས་མཐའ་ཡས་སོ། །ད་ལྟ་མངོན་སུམ་གྱིས་གྲུབ་པ་ཡང༌། རྩ་བའི་བླ་མ་ལ་དད་པ་མེད་པ་རྣམས། མི་འདོད་པ་དུ་མ་ཐོག་ཏུ་འབབ་པ་དང༌། བླ་མ་གུས་པས་བསྟེན་པ་རྣམས་ལ། བདེ་སྐྱིད་སྙན་གསུམ་རང་ཤུགས་ཀྱིས་འབྱུང་བ་མཐོང་ངོ༌། །གཞན་ཡང༌། བླ་མ་དམ་པ་རྣམས་ཀྱི་གསུང་ལས་འདི་སྐད་ཅེས། བླ་མ་སངས་རྒྱས་སུ་མཐོང་ན་སངས་རྒྱས་ཀྱི་བྱིན་རླབས་འཇུགབྱང་ཆུབ་སེམས་དཔར་མཐོང་ན་བྱང་ཆུབ་སེམས་དཔའི་བྱིན་རླབས་དང༌། གྲུབ་ཐོབ་ཏུ་མཐོང་ན་གྲུབ་ཐོབ་ཀྱི་བྱིན་རླབས། སོ་སོ་སྐྱེ་བོའི་དགེ་བཤེས་བཟང་པོར་མཐོང་ན། དེ་དང་མཐུན་པར་བྱིན་རླབས་འཇུག་སྟེ། ལར་མོས་གུས་མེད་ན་བྱིན་རླབས་ཡེ་མི་འཇུག་གོ །ཞེས་གསུངས་པའི་ཕྱིར་རོ། །དེ་ལྟར་མདོ་ལས། དད་པ་མེད་པའི་མི་རྣམས་ལ། །དཀར་བོའི་ཆོས་ནི་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་ཇི་བཞིན་ནོ། །ཞེས་དང༌། འབྲི་གོང་སྐྱོབས་པ་རིན་པོ་ཆེས། བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་ཤར་ན། །བྱིན་རླབས་ཀྱི་ཆུ་རྒྱུན་མི་འབེབས་པས། །སེམས་མོས་གུས་འདི་ལ་ནན་ཏན་མཛོད། །ཅེས་གསུངས་པའི་ཕྱིར་རོ། །གུས་པའི་སྤྱོད་ལམ་གྱི་སྒོ་ནས་ཆོས་ཉན་རིགས་ཏེ། སྐྱེས་རབས་ལས། རབ་ཏུ་དམའ་བའི་སྟན་ལ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །གུས་པ་བསྐྱེད་དེ་རྩེ་གཅིག་བཏུད། །རབ་ཏུ་དང་ལ་དྲི་མེད་ཡིད། །ནད་པས་སྨན་པའི་ཚིག་ཉན་བཞིན། །རིམ་གྲོ་བསྐྱེད་དེ་ཆོས་ཉོན་ཅིག །ཅེས་གསུངས་པའི་ཕྱིར་རོ། །དེ་ལྟར་མཉན་ནས་ཡིད་ལ་བཟུང་དགོས་ཏེ། མདོ་ལས། བཅོམ་ལྡན་འདས་ཀྱིས། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག ཅེས་གསུངས་པས་སོ། །སྤྱིར་ཉན་པ་པོ་ནི་གཟུ་བོར་གནས་པ་དང༌། བློ་གྲོས་དང་ལྡན་པ་དང༌། དོན་གཉེར་དང་གསུམ་ལྡན་དགོས་ཏེ། བཞི་བརྒྱ་བ་ལས། གཟུར་གནས་བློ་ལྡན་དོན་གཉེར་བ། །ཉན་པོ་སྣོད་ཅེས་བྱ་བར་བརྗོད། །ཅེས་གསུངས་པའི་ཕྱིར་རོ། །སྤྱིར་ཆོས་ཉན་པའི་སྐབས་སུ་སྣོད་ཀྱི་སྐྱོན་གསུམ་དྲི་མ་དྲུག་མི་འཛིན་པ་ལྔ་སྤངས་དགོས་པས་དེ་དག་ཤེས་པར་བྱ་དགོས་སོ། །