གཉིས་པ་གང་ལ་སྐྱབས་སུ་འགྲོ་བའི་ཡུལ།
གཉིས་པ་གང་ལ་སྐྱབས་སུ་འགྲོ་བའི་ཡུལ་ནི།
སངས་རྒྱས་ཆོས་དང་དགེ་འདུན་གསུམ་ལ་སྟེ། དེ་དག་ལ་གྲུབ་མཐའི་འདོད་ལུགས་མང་ཡང༌། བྱེ་བྲག་སྨྲ་བའི་ལུགས་ཀྱིས།སངས་རྒྱས་ནི་སྔོན་ཐོག་མ་མེད་པའི་དུས་ནས་དབང་པོ་རྣོན་པོའི་རིགས་སུ་འོངས་པ་བསྐལ་བ་གྲངས་མེད་པ་གསུམ་དུ་ཚོགས་བསགས་པའི་སོ་སོའི་སྐྱེ་བོ་དེས་མཚན་མོ་གཅིག་ལ་སྲོད་ལ་བདུད་བཏུལ། ནམ་གུང་ལ་བསམ་གཏན་བཞི་པ་ལ་མཉམ་པར་བཞག་སྟེ། ཐོ་རངས་སངས་རྒྱས་པ་དེའི་ཟད་པ་དང་མི་སྐྱེ་བ་ཤེས་པའི་ཡེ་ཤེས་དེ་སངས་རྒྱས་ཡིན་པར་འདོད་དོ། །སྐྱེ་བ་མཐའ་མའི་བྱང་ཆུབ་སེམས་དཔའ་དེ་སོ་སོའི་སྐྱེ་བོ་ཡིན་པར་ནི། མཛོད་ལས། འཕགས་པ་མིན་ཡང་ཕ་མ་དང༌། །ནད་པ་དང་ནི་ཆོས་སྨྲ་དང༌། །སྐྱེ་མཐའི་བྱང་ཆུབ་སེམས་དཔའ་ལ། །ཡོན་ནི་གཞལ་དུ་མེད་པར་འགྱུར། །ཞེས་སོ། །ཆོས་ནི་མྱ་ངན་ལས་འདས་པ་སྟེ། འགོག་པའི་བདེན་པ་རྫས་སུ་གྲུབ་པར་འདོད་ཅིང༌། དགེ་འདུན་ནི་ཞུགས་འབྲས་བརྒྱད་ཀྱི་ཡེ་ཤེས་སོ། །སངས་རྒྱས་དང་དགེ་འདུན་གཉིས་ཀའི་གཟུགས་སྐུ་ནི་སྔ་ཕྱིའི་ཁྱད་པར་དུ་གྱུར་པ་མེད་པའི་ཕྱིར་སྐྱབས་གནས་མ་ཡིན་ནོ། །ཞེས་སོ། །དེ་དག་ནི་མཛོད་ལས། གང་དག་གསུམ་ལ་སྐྱབས་འགྲོ་བ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང༌། །མྱ་ངན་འདས་ལ་སྐྱབས་སུ་འགྲོ། །ཞེས་སོ། །མདོ་སྡེ་པ་ནི་གཞན་སྔ་མ་དང་འདྲ་ལ་ཆོས་རྫས་སུ་མི་འདོད་ཅིང༌། སངས་རྒྱས་དང་དགེ་འདུན་གཉིས་ཀྱི་རྟེན་སྐུ་དང་བརྟེན་པ་ཡེ་ཤེས་གཉིས་ཀ་ལ་སྐྱབས་སུ་འགྲོ་སྟེ་དེ་ལྟར་མཛོད་འགྲེལ་ལས་བཤད་དོ། །སྐབས་འདིར་ནི་བྱེ་བྲག་སྨྲ་བའི་གཞུང་ལུགས་ལྟར་གཟུང་ངོ༌། །