བླ་མའི་རྣལ་འབྱོར་བྱིན་རླབས་ཉེ་ལམ།
༄༅།། བླ་མའི་རྣལ་འབྱོར་བྱིན་རླབས་ཉེ་ལམ་བཞུགས་སོ།།
༄༅།། ན་མོ་གུ་རུ་རཏྣ་པདྨ་ཀཱ་ར་ཡེ། །རྒྱལ་བ་ཀུན་གྱི་སྤྱི་གཟུགས་མཆོག །བཀའ་དྲིན་གསུམ་ལྡན་ཨོ་རྒྱན་རྗེ། །སྐྱབས་ཀུན་ངོ་བོར་ངེས་རྙེད་ནས། །བྱང་ཆུབ་བར་དུ་སྤྱི་བོས་མཆོད། །དེ་ཡི་རྣམ་རོལ་འཛམ་གླིང་འདིར། །མདོ་དང་སྔགས་ཀྱི་དགེ་བའི་བཤེས། །གཏེར་རིགས་བཅོ་བརྒྱད་ལ་དབང་བའི། །རང་མོས་བླ་མ་བསྒྲུབ་པའི་ཐབས། །གང་ལའང་སྦྱར་དུ་རུང་བ་ཡི། །རྒྱུན་གྱི་ཉམས་ལེན་འདི་རུ་འབྲི། །ངེས་འབྱུང་ཐར་པ་ལ་འདུན་པས། །ཡེངས་མེད་སྒོམ་བཟླས་འདི་ལྟར་བྱ། ཨེ་མ་ཧོ། གང་ཐུགས་རྣམ་གྲོལ་རྫོགས་སངས་རྒྱས། །གང་གསུང་ཐེག་གསུམ་དམ་པའི་ཆོས། །གང་སྐུ་འགྲོ་འདྲེན་དགེ་བའི་བཤེས། །མཆོག་གསུམ་ངོ་བོ་བླ་མ་ལ། །སྙིང་ནས་གུས་པས་སྐྱབས་སུ་མཆི། །མཁའ་ཁྱབ་འགྲོ་བ་མ་ལུས་པ། །སངས་རྒྱས་གོ་འཕང་ལ་འགོད་ཕྱིར། །ཡང་དག་ལམ་སྟོན་བླ་མ་མཆོག །རྟག་ཏུ་བསྒྲུབ་ལ་བརྩོན་པར་བྱ། །ནམ་མཁའ་གང་བའི་རྩ་གསུམ་ལྷར། །རང་གཞན་དཔག་མེད་ལུས་སྤྲུལ་ནས། །ཕྱག་འཚལ་མཆོད་འབུལ་སྡིག་པ་བཤགས། །དུས་གསུམ་དགེ་ལ་རྗེས་ཡི་རང་། །རྟག་ཏུ་ཆོས་འཁོར་བསྐོར་བར་བསྐུལ། །མྱ་ངན་མི་འདའ་བཞུགས་གསོལ་འདེབས། །དགེ་རྩ་བྱང་ཆུབ་རྒྱུ་རུ་བསྔོ། །བླ་མའི་གསང་གསུམ་མྱུར་འགྲུབ་ཤོག །དེ་ཡིས་སྔོན་འགྲོའི་ཆོས་གསུམ་རྫོགས། །དངོས་གཞི་སྒོམ་བཟླས་འདི་ལྟར་བྱ། །ཨེ་མ་ཧོ། རང་ལུས་ཐ་མལ་མ་ཡིན་ཏེ། །ཡེ་ཤེས་མཁའ་འགྲོ་མཚོ་རྒྱལ་མ། །དམར་མོ་གྲི་ཐོད་གར་སྟབས་འགྱིང་། །དར་དང་རུས་པའི་རྒྱན་གྱིས་སྤྲས། །སྤྱི་བོར་པདྨ་གེ་སར་སྟེང་། །ཐབས་ཤེས་ཉི་ཟླ་བརྩེགས་པའི་ཁྲིར། །མཆོག་གསུམ་རྒྱལ་བ་ཀུན་འདུས་པ། །བཀའ་དྲིན་གསུམ་ལྡན་བླ་མ་རྗེ། །འགྲོ་འདུལ་རིག་འཛིན་ལུང་རིག་གླིང་། །ཡང་ན། འགྲོ་འདུལ་རིག་འཛིན་གསང་སྔགས་གླིང་། །རྒྱལ་དབང་པདྨ་ཐོད་ཕྲེང་དང་། །དབྱེར་མེད་གཞོན་ནུ་ལོ་བརྒྱད་ཚུལ། །དཀར་དམར་མདངས་ལྡན་ཞི་འཛུམ་བཞད། །ཐེག་གསུམ་ཆོས་ལ་དབང་བསྒྱུར་རྟགས། །གསང་གོས་དཀར་དང་སྔགས་བེར་མཐིང་། །ཆོས་གོས་དམར་པོ་གསེར་རིས་ཅན། །ཕྱི་ནས་བེར་ཕྱམ་སྨུག་པོ་གསོལ།།པད་ཞྭ་རྒོད་ལྡེམ་དར་སྣ་དཔྱང་། །ཕྱག་གཡས་གསེར་རྡོར་ཐུགས་ཀར་གདེངས། །ཕྱག་གཡོན་ལྟེ་བའི་ཐད་ཀ་རུ། །ཐོད་བུམ་བདུད་རྩིིས་གང་བ་བསྣམས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །མཆན་གཡོན་ཁ་ཊཱཾ་རྩེ་
གསུམ་བསྣམས། །དེ་ཡི་སྟེང་གི་ནམ་མཁའ་ལ། །བརྒྱུད 
་པ་དྲུག་ལྡན་བླ་མ་དང་། །བར་དུ་རྒྱུད་སྡེ་བཞི་ཡི་ལྷ། །འོག་ཏུ་མཁའ་འགྲོ་ཆོས་སྐྱོང་རྣམས། །སྤྲིན་དཔུང་གཏིབས་པ་ལྟ་བུར་བསྒོམ། །རྩེ་གཅིག་གསོལ་བ་འདི་ལྟར་འདེབས། །ཀྱཻ་དུས་གསུམ་སངས་རྒྱས་མ་ལུས་པའི། །སྐུ་གསུང་ཐུགས་ཀྱི་བདག་ཉིད་མཆོག །བཀའ་དྲིན་གསུམ་ལྡན་བླ་མ་ལ། །སྙིང་ནས་གུས་པས་གསོལ་བ་འདེབས། །བདག་ནི་འཁོར་བའི་རྒྱ་མཚོ་འདིར།།ལས་དང་ཉོན་མོངས་རྦ་ལ་གཡེང་། །སྡུག་བསྔལ་གསུམ་གྱིས་མནར་བ་ལ། །ཁྱོད་ཀྱི་བརྩེ་ཆེན་ཐུགས་རྗེའི་གྲུས། །ཐར་མཆོག་རིན་ཆེན་གླིང་ཉིད་དུ། །ད་ལྟ་ཉིད་དུ་འདྲེན་དུ་གསོལ། །ཁྱོད་སྐུ་འཕགས་པའི་དགེ་འདུན་ཏེ། །གསུང་མཆོག་ཟབ་རྒྱས་སྨིན་གྲོལ་ཆོས། །ཐུགས་གསང་རྣམ་མཁྱེན་རྫོགས་སངས་རྒྱས། །དཀོན་མཆོག་གསུམ་གྱི་རང་བཞིན་ཅན། །བླ་མེད་བླ་མ་པད་འབྱུང་དང་། །དབྱེར་མེད་ངེས་ཤེས་དྲག་པོའི་བློས། །རྟག་ཏུ་གུས་པས་གསོལ་བ་འདེབས། །བདག་ནི་འཁོར་བའི་སྡུག་བསྔལ་ལ། །ངེས་འབྱུང་ཐར་པའི་བློ་སྐྱེས་ཏེ། །བདེན་བཞིའི་ཚུལ་ཁྲིམས་སྒོར་ཞུགས་ཀྱང་། །ལས་ཉོན་ཉེས་ལྟུང་ཆར་ལྟར་འབེབས། །དེ་བཞིན་ཐེག་ཆེན་སྒོར་ཞུགས་ཀྱང་། །སྨོན་འཇུག་བྱང་ཆུབ་སེམས་ལས་ཉམས། །དབང་བཞི་དམ་ཚིག་འགལ་ཉམས་འདས། །མི་འཆབ་འགྱོད་པ་དྲག་པོས་བཤགས། །དག་ཚངས་མཆོག་གི་དངོས་གྲུབ་སྩོལ། །ཅེས་པས་གདུང་བའི་ཤུགས་བསྐྱེད་དེ། །མཚན་སྔགས་འདི་ཉིད་ཅི་ནུས་བཟླ།། ཨོཾ་ཨཱཿམ་ཧཱ་གུ་རུ་བིདྱཱ་དྷ་ར་མཎྜ་གུ་ཧྱ་དྭཱི་པ་སརྦ་སིདྡྷི་ཕ་ལ་ཧཱུྃ། ཞེས་པ་འདི་ཉིད་ཅི་མང་བཟླ། མཐར་ནི་དབང་བཞི་ལེན་པ་ནི། ཨེ་མ་ཧོ། དེ་ལྟར་མོས་གུས་རྩེ་གཅིག་པས། །གསོལ་བཏབ་བླ་མའི་ཐུགས་རྒྱུད་བསྐུལ། །སྐུ་ཡི་གནས་བཞི་ལས་འཕྲོས་པའི། །འོད་ཟེར་དཀར་དམར་མཐིང་ལྗང་གིས། །བདག་གི་ལུས་ངག་ཡིད་གསུམ་དང་། །ཀུན་གཞིའི་བག་ཆགས་བཅས་པ་སྦྱངས། །མཐར་ནི་བླ་མ་རྩ་བ་གསུམ། །འོད་ཞུ་རང་དང་དབྱེར་མེད་ངང་། །ཆོས་དབྱིངས་སྤྲོས་བྲལ་དགོངས་པའི་ཀློང་། །མ་བཅོས་རང་བབས་ཆེན་པོར་ཨཱཿ དེ་ལྟར་རང་གཞན་དུས་གསུམ་དུ། །བླ་མ་མཆོག་གསུམ་སྒོམ་བཟླས་བསྒྲུབས། །རྣམ་དཀར་དགེ་ཚོགས་ཅི་བསགས་པ། །མཁའ་ཁྱབ་འགྲོ་བ་ཡོངས་ལ་བསྔོ། །ཀུན་ཀྱང་སྐུ་གསུམ་བདག་ཉིད་ཅན། །ཨོ་རྒྱན་བླ་མའི་གོ་འཕང་མཆོག །དཀའ་བ་མེད་པར་མྱུར་འགྲུབ་ཤོག །ཅེས་པའང་རྩོད་བྲལ་དུས་བབས་ཀྱི་གཏེར་ཆེན་གསང་སྔགས་གླིང་པ་སོགས་རང་མོས་ཀྱི་བླ་མ་གང་ལའང་སྦྱར་དུ་རུང་བའི་སྒྲུབ་ཐབས་ཤིག་དགོས་ཞེས་བློ་གསལ་སྐལ་བ་དང་ལྡན་པའི་བཙུན་པ་ལུང་རྟོགས་བསྟན་འཛིན་གྱིས་བསྐུལ་ངོར། དགེ་སྦྱོང་རྒན་པོ་རྒྱ་སྤྲུལ་མིང་ནས་སྨྲས་པ་ཡི་གེ་པ་ནི་བསྐུལ་བ་པོ་ཉིད་ཀྱིས་བྲིས་པ་ཛ་ཡནྟུ།