ཐེག་ཆེན་གྱི་ཐར་པ་ཆ་མཐུན་བཤད་པ།
ཐེག་ཆེན་གྱི་ཐར་པ་ཆ་མཐུན་བཤད་པ། གཉིས་པ་ཐར་པ་ཆ་མཐུན་ནས་བཟུང་སྟེ་རྒྱུད་ལ་སྐྱེ་བའི་རིམ་པ་བཤད་པ་ལ་གསུམ། བསྐལ་པ་གྲངས་མེད་གསུམ་ནས་འཚང་རྒྱ་བའི་ལམ་
གྱི་ཐོག་མ་བཤད་པའི་སྒོ་ནས་རྒྱན་གྱི་ཆེད་དུ་བྱ་བའི་གདུལ་བྱ་ངོས་གཟུང་བ། རྒྱུད་སྨིན་བྱེད་ཀྱི་ལམ་སྐྱེ་བའི་རིམ་པ། དེ་ལ་བརྟེན་ནས་མངོན་རྟོགས་ཁྱད་པར་ཅན་རྒྱུད་ལ་སྐྱེ་བའི་རིམ་པ་བཤད་པའོ། །དང་པོ་ལ། ལམ་སྤྱིའི་མཚན་ཉིད་དང་། ལམ་གྱི་ཆིངས་ལྔར་བསྡུས་ནས་དེ་ལ་མཁས་པའི་གདུལ་བྱ་ངོས་བཟུང་བའོ། །དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། སྦྱོར་བའི་རྗེས་སུ་ཐར་པ་ཆ་མཐུན་འཆད་པའི་རྒྱུ་མཚན་ཡོད་དེ། དང་པོ་ལ། ལམ་སྤྱིའི་མཚན་ཉིད་དང་། ལམ་གྱི་ཆིངས་ལྔར་བསྡུས་ནས་དེ་ལ་མཁས་པའི་གདུལ་བྱ་ངོས་གཟུང་བའོ། །དང་པོ་ལ། མཚམས་སྦྱར་བ། རྩ་བ། འགྲེལ་པ་གསུམ་ལས། དང་པོ་ནི། སྦྱོར་བའི་རྗེས་སུ་ཐར་པ་ཆ་མཐུན་འཆད་པའི་རྒྱུ་མཚན་ཡོད་དེ། འོག་ནས་འཆད་པའི་ཐེག་ཆེན་གྱི་ཐར་པའི་ཆ་དང་མཐུན་པའི་དགེ་བའི་རྩ་བ་དང་ལྡན་པ། ཁོ་ན་ལ། སྔར་ཇི་སྐད་བཤད་པའི་སྦྱོར་བ་མཚན་ཉིད་ཀྱི་སྒོ་ནས་ཡོངས་སུ་ཤེས་པ་རྣམས་འབྱུང་བའི་ཕྱིར། གཉིས་པ་ལ། ཚིག་དོན་དང་། མཐའ་དཔྱད་པ་གཉིས་ལས། དང་པོ་ནི། སྟོང་ཉིད་རྟོགས་པའི་ཐེག་ཆེན་གྱི་ཚོགས་ལམ་ཆོས་ཅན། ཁྱོད་རྣམ་པ་ཐམས་ཅད་མངོན་པར་རྫོགས་པར་རྟོགས་པའི་སྦྱོར་བ་སྟོན་པའི་སྐབས་འདི་ལ་ཐར་པའི་ཆ་དང་མཐུན་པ་ཡིན་པར་འདོད་དེ། དོན་དམ་པར་མཚན་མ་མེད་པར་རྟོགས་པའི་ཤེས་རབ་ཀྱིས་ཟིན་པའི་རབ་ཏུ་སྦྱིན་པ་ལ་སོགས་པ་རྣམ་མཁྱེན་གྱི་བར་རང་རྒྱུད་ལ་ཡང་དག་པར་སྒྲུབ་པ་ལ་མཁས་པའི་གང་ཟག་གི་རྒྱུད་ཀྱི་ཆོས་མངོན་རྟོགས་ཡིན་པའི་ཕྱིར། གཉིས་པ་མཐའ་དཔྱད་པ་ལ། དགག་གཞག་སྤང་གསུམ་ལས། དང་པོ་ལ། ཁ་ཅིག །རྣམ་མཁྱེན་རང་རྒྱུད་ལ་སྒྲུབ་པར་མཁས་པའི་སེམས་དཔའི་རྒྱུད་ཀྱི་ཆོས་མངོན་རྟོགས་དེ། སྐབས་འདིར་དངོས་སུ་བསྟན་པའི་ཐེག་ཆེན་གྱི་ཐར་པ་ཆ་མཐུན་གྱི་མཚན་ཉིད་ཟེར་ན། ཉན་ཐོས་དགྲ་བཅོམ་པའི་རྟོགས་པ་སྔོན་དུ་སོང་བའི་བྱང་སེམས་ཚོགས་ལམ་པའི་རྒྱུད་ཀྱི་རྣམ་མཁྱེན་རང་རྒྱུད་ལ་སྒྲུབ་པར་མཁས་པའི་ཡེ་ཤེས་དེ་ཆོས་ཅན། མཚོན་བྱ་དེར་ཐལ། མཚན་ཉིད་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར།
འདོད་ན། མ་ཡིན་པར་ཐལ། ཐེག་དམན་གྱི་རྟོགས་པ་སྔོན་དུ་སོང་བའི་བྱང་སེམས་ཀྱི་མངོན་རྟོགས་ཡིན་པའི་ཕྱིར། ཁ་ཅིག །དད་སོགས་ཡུལ་ལྔ་ལ་མཁས་པའི་སེམས་དཔའི་ཆོས་མངོན་རྟོགས་དེ། ཐེག་ཆེན་ཚོགས་ལམ་གྱི་མཚན་ཉིད་ཟེར་ན། བདེན་འཛིན་གྱིས་བཅིངས་པའི་ཐེག་ཆེན་གྱི་ཚོགས་ལམ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། དེར་ཐལ། ཆོས་ཅན་དེ་ཡིན་པའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། བདེན་འཛིན་གྱིས་བཅིངས་བཞིན་དུ་སྦྱིན་པའི་ཉམས་ལེན་གྱི་བྱ་བ་ལ་འཇུག་པའི་སེམས་དཔའ་ཡོད་པའི་ཕྱིར། དེར་ཐལ། ཤེར་ཕྱིན་སུམ་བརྒྱ་པ་ལས། དཔེར་ན་མིག་ལྡན་པའི་མི་ཞིག་མུན་པར་ཞུགས་ནས་ཅི་ཡང་མི་མཐོང་བ་དེ་བཞིན་དུ་གང་དངོས་པོར་ལྷུང་བས་སྦྱིན་པ་ཡོངས་སུ་གཏོང་བའི་བྱང་ཆུབ་སེམས་དཔའ་བལྟ་བར་བྱའོ། །རབ་འབྱོར་འདི་ལྟ་སྟེ་དཔེར་ན། ནམ་ལངས་ཏེ་ཉི་མ་ཤར་ན་མིག་དང་ལྡན་པའི་མིས་གཟུགས་རྣམ་པ་སྣ་ཚོགས་མཐོང་བ་དེ་བཞིན་དུ་གང་དངོས་པོར་མ་ལྷུང་བས་སྦྱིན་པ་ཡོངས་སུ་གཏོང་བའི་བྱང་ཆུབ་སེམས་དཔའ་བལྟ་བར་བྱའོ། །ཞེས་གསུངས་པའི་ཕྱིར། འདོད་ན། སྟོང་ཉིད་རྟོགས་པའི་ཤེས་རབ་ལ་མཁས་པར་ཐལ། འདོད་པའི་ཕྱིར། འདོད་མི་ནུས། ཁ་ཅིག །སྟོང་ཉིད་རྟོགས་མ་མྱོང་བའི་ཐེག་ཆེན་ཚོགས་ལམ་དུ་ཞུགས་པ་ཐག་པའི་ཐེག་ཆེན་གྱི་ཚོགས་ལམ་ཡིན་ན། བསྐལ་པ་གྲངས་མེད་གསུམ་ནས་འཚང་རྒྱ་བའི་ལམ་གྱི་ཐོག་མ་ཡིན་པའི་ཁྱབ་ཟེར་ན། འཚང་རྒྱ་བ་ལ་བསྐལ་པ་གྲངས་མེད་གསུམ་དུ་ཚོགས་གསོག་དགོས་པའི་སྟོང་ཉིད་རྟོགས་མྱོང་བའི་ཐེག་ཆེན་ཚོགས་ལམ་དུ་བཞུགས་མ་ཐག་པའི་ཡེ་ཤེས་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེ་ལྟར་ཡོད་པར་འགྲེལ་ཆེན་ལས་གསུངས་པའི་ཕྱིར། རྩ་བར་འདོད་མི་ནུས།
ཁ་ཅིག །ཐེག་ཆེན་རིགས་ངེས་ཀྱི་གང་ཟག་ཡིན་ན། རྒྱན་གྱི་ཆེད་དུ་བྱ་བའི་གདུལ་བྱ་ཡིན་པས་ཁྱབ་ཟེར་ན། རྒྱན་རྩོམ་པ་པོའི་རྗེ་བཙུན་བྱམས་མགོན་ཆོས་ཅན། དེར་ཐལ། དེའི་ཕྱིར། འདོད་མི་ནུས། ཁ་ཅིག །མངོན་རྟོགས་རྒྱན་གྱི་ཆེད་དུ་བྱའི་གདུལ་བྱ་ཡིན་ན། བྱང་ཆུབ་སེམས་དཔའ་ཡིན་པས་ཁྱབ་ཟེར་ན། ཡུམ་མཁྱེན་གསུམ་ལ་དང་བའི་དད་པ། དེ་ལས་དོན་གཉེར་གྱི་འདུན་པ། དེ་ལ་ཞུགས་ནས་མཐར་ལེགས་པའི་མཆོག་རྣམ་མཁྱེན་འཐོབ་པ་དེ། རྒྱན་གྱི་ཆེད་དུ་བྱ་བའི་གདུལ་བྱའི་ལམ་ཉམས་ལེན་གྱི་རིམ་པ་མ་ཡིན་པར་ཐལ། དམ་བཅའ་འཐད་པའི་ཕྱིར། འདོད་ན། ཡིན་པར་ཐལ། རྗེ་བཙུན་གྱིས་རྒྱན་རྩོམ་པའི་ཐོག་མར་མཁྱེན་གསུམ་ལ་བསྟོད་ཕྱག་མཛད་པ་དེ། དེ་འདྲའི་གདུལ་བྱས་ཡུམ་མཁྱེན་གསུམ་ལ་ཞེས་པ་ནས། མཐར་ལེགས་པའི་མཆོག་རྣམ་མཁྱེན་འཐོབ་པའི་ཆེད་དུ་ཡིན་པའི་ཕྱིར། དེར་ཐལ། དེས་རྒྱན་རྩོམ་པའི་ཐོག་མར་ཡུམ་མཁྱེན་གསུམ་ལ་བསྟོད་ཕྱག་མཛད་པའི་ཕྱིར། ཁ་ཅིག །རྣོན་པོ་ཡིས། །རྟོགས་སླ་རྟུལ་པོས་རྟོགས་དཀར་བཞེད། །ཅེས་པའི་དོན་ལ་བསམས་ནས། རྒྱན་གྱི་ཆེད་དུ་བྱ་བའི་གདུལ་བྱ་བྱང་སེམས་ཚོགས་ལམ་པ་དབང་པོ་རྣོ་རྟུལ་གཉིས་རྫོགས་བྱང་འཐོབ་དཀའ་སླ་མཚུངས་པ་མ་ཡིན་ཏེ། དེ་གཉིས་ལ་རྫོགས་བྱང་འཐོབ་དཀའ་སླའི་ཁྱད་པར་ཡོད་པའི་ཕྱིར། ཟེར་ན། འོ་ན། དག་པ་ས་གསུམ་ལ་གནས་པའི་སེམས་དཔའ་རྫོགས་བྱང་འཐོབ་སླ་བར་མཚུངས་པ་མ་ཡིན་པར་ཐལ། དེ་གསུམ་ལ་རྫོགས་བྱང་འཐོབ་དཀའ་སླའི་ཁྱད་པར་ཡོད་པའི་ཕྱིར། ཁྱབ་པ་ཁས། དེར་ཐལ། ས་བཅུ་པ་དེ་སྔ་མ་གཉིས་ལས་རྫོགས་བྱང་འཐོབ་སླ་བའི་ཕྱིར། འདོད་མི་ནུས་ཏེ། ས་བརྒྱད་པ་རྫོགས་བྱང་འཐོབ་སླ། དེ་ལས་ཀྱང་ཕྱི་མ་གཉིས་རིམ་པ་བཞིན་འཐོབ་སླ་བའི་ཕྱིར། ཁ་ཅིག །རྒྱན་གྱི་ཆེད་དུ་བྱ་བའི་གདུལ་བྱ་ཡིན་ན། སོ་
སྐྱེ་ཡིན་པས་ཁྱབ་ཟེར་ན། འཕགས་པ་ཐོགས་མེད་ཆོས་ཅན། དེར་ཐལ། དེའི་ཕྱིར། དེར་ཐལ། དེ་དེ་ལ་གཙོ་བོར་དགོངས་ནས་གསུངས་པའི་ཕྱིར། དེར་ཐལ། དེའི་དོན་དུ་བཅོམ་ལྡན་འདས་འཕགས་པ་བྱམས་པ་མཉེས་པར་བྱས་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་མདོའི་བཤད་པ་མངོན་པར་རྟོགས་པའི་རྒྱན་གྱི་ཚིག་ལེའུར་བྱས་པའི་བསྟན་བཅོས་མཛད་ཅེས་གསུངས་པའི་ཕྱིར། ཁ་ཅིག །རྒྱན་གྱི་ཆེད་དུ་བྱ་བའི་གདུལ་བྱ་ཡིན་ན། དེ་དབང་པོ་རྣོ་རྟུལ་གང་རུང་ཡིན་པས་ཁྱབ་ཟེར་ན། རྒྱན་གྱི་ཆེད་དུ་བྱ་བའི་གདུལ་བྱ་དབང་འབྲིང་ཆོས་ཅན། དེར་ཐལ། དེའི་ཕྱིར། དེར་ཐལ། དེ་ཡོད་པའི་ཕྱིར། དེར་ཐལ། བྱང་སེམས་དབང་རྣོན་གྱིས་ཐེག་ཆེན་གྱི་སྦྱོར་ལམ་ནས་ཕྱིར་མི་ལྡོག་པའི་རྟགས་འཐོབ། དབང་འབྲིང་གིས་མཐོང་ལམ་ནས་འཐོབ། དབང་རྟུལ་གྱིས་སྒོམ་ལམ་ནས་འཐོབ་པའི་ཕྱིར། གཉིས་པ་རང་ལུགས་ནི་སྦྱིན་སོགས་རང་རྒྱུད་ལ་སྒྲུབ་པར་མཁས་པའི་སེམས་དཔའི་རྒྱུད་ཀྱི་ཆོས་མངོན་རྟོགས་ཐེག་ཆེན་གྱི་ཐར་པ་ཆ་མཐུན་གྱི་མཚན་ཉིད། གསུམ་པ་རྩོད་པ་སྤོང་བ་ལ། ཁོ་ན་རེ། ཉན་ཐོས་ཀྱི་ཚོགས་ལམ་དུ་འཇུག་པར་ངེས་པའི་བྱང་སེམས་ཚོགས་ལམ་པའི་མཁྱེན་པ་ཆོས་ཅན། མཚན་ཉིད་དེར་ཐལ། མཚོན་བྱ་དེའི་ཕྱིར། འདོད་ན། མ་ཡིན་པར་ཐལ། དེ་དེ་ལ་མི་མཁས་པའི་ཕྱིར། དེར་ཐལ། དེ་རྣམ་མཁྱེན་རང་རྒྱུད་ལ་སྒྲུབ་པ་ལ་མི་མཁས་པའི་ཕྱིར་ཟེར་ན། འོ་ན། དེའི་རྒྱུད་ལ་དེ་སྒྲུབ་པ་ལ་མཁས་པའི་ཐབས་ཤེས་ཁྱད་པར་ཅན་གྱི་ཉམས་ལེན་མེད་པར་ཐལ། མཚོན་བྱ་དེའི་ཕྱིར། འདོད་ན། མ་ཡིན་པར་ཐལ། དེ་དེ་ལ་མི་མཁས་པའི་ཕྱིར། དེར་ཐལ། དེ་རྣམ་མཁྱེན་རང་རྒྱུད་ལ་བསྒྲུབ་པ་ལ་མི་མཁས་པའི་ཕྱིར་ཟེར་ན། འོ་ན། དེའི་རྒྱུད་ལ་དེ་སྒྲུབ་པ་ལ་མཁས་པའི་ཐབས་ཤེས་ཁྱད་པར་ཅན་གྱི་ཉམས་ལེན་མེད་པར་ཐལ། འདོད་པའི་ཕྱིར། འདོད་ན། དེ་འདྲ་བའི་སྟོང་ཉིད་རྟོགས་པའི་བྱང་སེམས་ཀྱི་རྒྱུད་ལ་དེ་ཡོད་པར་ཐལ། དེའི་རྒྱུད་ལ་སྟོང་ཉིད་རྟོགས་པའི་ཤེས་རབ་དང་བྱང་ཆུབ་ཀྱི་སེམས་ཡོད་པའི་ཕྱིར། གཉིས་ཀ་ཡོད་པར་ཐལ། ཆོས་ཅན་དེ་ཡིན་པའི་ཕྱིར། ཁ་ཅིག །རྒྱན་གྱི་ཆེད་
དུ་བྱ་བའི་གདུལ་བྱ་བྱང་འཕགས་མེད་པར་ཐལ། ས་དང་པོ་ཐོབ་ནས་རྒྱན་ལ་མ་ལྟོས་པར་སངས་རྒྱས་གྲངས་མེད་ལ་གདམས་ངག་ཉན་ནུས་པའི་ཕྱིར་ན་མ་ཁྱབ། དེར་ཐལ། དང་པོ་ཐོབ་ནས་ཡོན་ཏན་བརྒྱ་ཕྲག་བཅུ་གཉིས་འཐོབ་པའི་ཕྱིར། གསུམ་པ་ནི། སྟོང་ཉིད་རྟོགས་པའི་བྱང་སེམས་གྱི་ཚོགས་ལམ་ཆོས་ཅན། ཁྱོད་རྣམ་པ་ཐམས་ཅད་མངོན་པར་རྫོགས་པར་རྟོགས་པའི་སྦྱོར་བ་སྟོན་པའི་སྐབས་འདི་ལ་ཐེག་ཆེན་གྱི་ཐར་པའི་ཆ་དང་མཐུན་པའི་ལམ་ཡིན་པར་འདོད་དེ། དོན་དམ་པར་སྤྲོས་པའི་མཚན་མ་མེད་པར་དམིགས་པའི་ཤེས་པའི་རྣམ་པས་ཟིན་པའི་སྒོ་ནས་སྦྱིན་པ་ལ་སོགས་པའི་ཕ་རོལ་དུ་ཕྱིན་པ་ནས་རྣམ་པ་ཐམས་ཅད་མཁྱེན་པ་ཉིད་ལ་ཐུག་པ་རྣམས་རང་གི་རྒྱུད་ལ་སྐྱེད་པ་ལ་མཁས་པའི་དེ་ཡིན་པའི་ཕྱིར། གཉིས་པ་ལམ་གྱི་ཆིངས་ལྔར་བསྡུས་ནས་དེ་ལ་མཁས་པའི་གདུལ་བྱ་ངོས་གཟུང་བ་ལ་གསུམ། མཚམས་སྦྱར་བ། རྩ་བ། འགྲེལ་པའོ། །དང་པོ་ནི། སྦྱིན་སོགས་རང་རྒྱུད་ལ་སྒྲུབ་པར་མཁས་པ་དེ་གང་ཡིན་ཞེ་ན། ཡོད་དེ། དེ་བསྟན་པའི་ཕྱིར་བར་སྐབས་ཀྱི་ཚིགས་སུ་བཅད་པ་འོག་མ་གཉིས་གསུངས་པའི་ཕྱིར། གཉིས་པ་ལ། ལམ་སྤྱིའི་ཆིངས་ལ་མཁས་པའི་ཚད། དེ་ལ་མཁས་པའི་རྒྱན་གྱི་གདུལ་བྱ་ངོས་གཟུང་བའོ། །དང་པོ་ལ། ཐེག་ཆེན་གྱི་འཇུག་སྒོ་སེམས་བསྐྱེད་དུ་བསྟན་པ་དང་། སྤྱོད་པ་ལ་སློབ་པའི་ཚུལ་གཉིས་ལས། དང་པོ་ནི། ཤེས་བྱ་ཆོས་ཅན། ཐེག་ཆེན་གྱི་འཇུག་སྒོ་འཆད་ཚུལ་ཡོད་དེ། སངས་རྒྱས་སོགས་ལམ་འབྲས་ལ་དམིགས་པའི་དད་པ་དང་། བསམ་པ་ཕུན་ཚོགས་སེམས་བསྐྱེད་ཀྱིས་བསྡུས་པའི་དྲན་པ་གཉིས་སུ་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། ཡོད་དེ། སྦྱིན་སོགས་སྤྱོད་ཡུལ་དུ་སྤྲོ་བའི་བརྩོན་འགྲུས་དང་། རྣམ་པར་མི་རྟོག་པ་ནམ་མཁའ་མཛོད་ཀྱི་ཏིང་ངེ་འཛིན་དང་། བདེན་གཉིས་ཀྱིས་བསྡུས་པའི་ཆོས་རྣམས་
རྣམ་པ་ཐམས་ཅད་དུ་ཤེས་པའི་ཤེས་རབ་སྟེ་བྱང་སེམས་ཚོགས་ལམ་པའི་ཡོན་ཏན་གསུམ་དང་། སྔར་བསྟན་པ་གཉིས་ཏེ་རྣམ་པ་ལྔ་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། དེ་འདྲའི་གདུལ་བྱ་ལ་དབང་པོའི་རིམ་པ་གཉིས་ཡོད་དེ། རྣོན་པོ་ཡིས་རྫོགས་པའི་བྱང་ཆུབ་རྟོགས་སླ་ཞིང་། རྟུལ་པོས་རྟོགས་དཀའ་བར་བཞེད་པའི་ཕྱིར། གསུམ་པ་འགྲེལ་པ་ལ། ཡུལ་ལྔ་ལ་མཁས་པའི་ཁྱད་པར་བཤད་པ། དབང་པོ་རྣོ་རྟུལ་གྱིས་ལམ་བགྲོད་པའི་ཁྱད་པར་བཤད་པ། ཤུགས་ལ་འཕངས་པའི་དོན་གསུམ་ལས། དང་པོ་ནི། རྒྱན་གྱི་གདུལ་བྱ་བྱང་སེམས་ཚོགས་ལམ་པ་ཆོས་ཅན། ཡུལ་རྣམ་པ་ལྔ་ལ་མཁས་པ་ཡིན་ཏེ། ཁྱོད་ལ་གྲངས་བཞིན་དུ་སངས་རྒྱས་ལ་དད་པ་དང་། སྦྱིན་སོགས་ལ་སྤྲོ་བའི་བརྩོན་འགྲུས་དང་། བསམ་པ་ཕུན་ཚོགས་པས་བསྡུས་པའི་དྲན་པ་དང་། རྣམ་པར་མི་རྟོག་པའི་ཏིང་ངེ་འཛིན་དང་། ཆོས་རྣམས་ཐམས་ཅད་ཀྱི་རྣམ་པ་ཐམས་ཅད་ཡོངས་སུ་ཤེས་པའི་ཤེས་རབ་ཁྱད་པར་ཅན་ཡོད་པའི་ཕྱིར། གཉིས་པ་ནི། ཤེས་བྱ་ཆོས་ཅན། གཉིས་ཀ་ཡང་ཡུལ་ལྔ་ལ་མཁས་པ་དེ་ལྟ་མོད་ཀྱི། ཐམས་ཅད་ཀྱིས་བླ་ན་མེད་པའི་བྱང་ཆུབ་འཐོབ་པར་སླ་བར་མཚུངས་པ་མ་ཡིན་ཏེ། འདི་ལྟར་དད་པ་ལ་སོགས་པ་ཐེག་པ་ཆེན་པོའི་དབང་པོ་རྣོན་པོ་པ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་སླ་ལ། ཐེག་ཆེན་པ་དེ་དག་ཉིད་ལས་རྟུལ་པོས་ནི་རྟོགས་པར་དཀའོ་ཞེས་བྱ་བ་འདི་ནི་ཆོས་ཉིད་ཡིན་པའི་ཕྱིར། གསུམ་པ་ནི། དད་སོགས་ལ་གནས་པ་འབྲིང་པོ་སྟེ་རང་རྒྱལ་ཚོགས་ལམ་པ་རྣམས་ཀྱིས་ནི་རང་སངས་རྒྱས་ཀྱི་བྱང་ཆུབ་རྟོགས་ལ། དད་སོགས་ཆུང་ངུ་ལ་གནས་པ་ཉན་ཐོས་རྣམས་ཀྱིས་ནི་ཉན་ཐོས་ཀྱི་བྱང་ཆུབ་རྟོགས་སོ་ཞེས་བྱ་བ་
འདི་འཕངས་པ་ཡིན་ཏེ། རྩ་བས་བྱང་སེམས་དེ་དངོས་སུ་བསྟན་ཅིང་། ཅིག་ཤོས་ཤུགས་ལ་བསྟན་པའི་ཕྱིར།