རྡོ་རྗེ་སེམས་དཔའ་ལ་བརྟེན་པའི་བླ་མ་མཆོད་པའི་ཆོ་ག་དང་འབྲེལ་བའི་ཁྱད་པར་གྱི་ཕྲིན་ལས་བདེ་ཆེན་སྙིང་པོ།
རྡོ་རྗེ་སེམས་དཔའ་ལ་བརྟེན་པའི་བླ་མ་མཆོད་པའི་ཆོ་ག་དང་འབྲེལ་བའི་ཁྱད་པར་གྱི་ཕྲིན་ལས་བདེ་ཆེན་སྙིང་པོ་ཞེས་བྱ་བ་བཞུགས་སོ།། །།
ན་མོ་གུ་རུ་བཛྲ་སཏྭཱ་ཡ། སྟོང་ཉིད་རྡོ་རྗེར་སྲིད་ཞིའི་ཆོས། །སྡོམ་མཛད་བདེ་ཆེན་སེམས་དཔའ་ཆེ། །དཔལ་ལྡན་བླ་མ་ལ་བཏུད་ནས། །ཁྱད་པར་ཕྲིན་ལས་ཅུང་ཟད་དབྱེ། །འདི་ལ་གསུམ། སྡིག་སྒྲིབ་ཞི་བ་ཚེ་བསོད་རྒྱས་པ། མཆོག་གི་ཡེ་ཤེས་སྐྱེད་པའོ། །དང་པོ་ནི། རྫོགས་པ་ཆེན་པོ་རྡོ་རྗེ་སེམས་དཔའི་སྙིང་ཐིག་གི་རྒྱུད་ཕྱི་མ་ལས། སློབ་མའི་ལུས་ཀྱི་གནས་དྲུག་ཏུ། །རིགས་དྲུག་ས་བོན་དྲུག་བཀོད་དེ། །རང་བྱུང་ཡེ་ཤེས་བུམ་པའི་ཆུས། །སྡིག་སྒྲིབ་བག་ཆགས་སྦྱང་བར་བྱ། །ཞེས་པའི་དགོངས་དོན། སྡིག་སྒྲིབ་ནད་གདོན་བག་ཆགས་ཐམས་ཅད་ཞི་བར་བྱེད་པ་ཡེ་ཤེས་ཁྲུས་ཀྱི་ཆོ་ག་བྱེད་པར་འདོད་པས། དཀྱིལ་འཁོར་གྱི་མདུན་དུ་ཁྲུས་བུམ་བཅུད་ལྡན་ཁ་རྒྱན་མགུལ་ཆིངས་དུང་ཆོས་གཟུངས་རྡོར་དང་བཅས་པ་བཤམ། བླ་མ་མཆོད་པའི་ཕྲིན་ལས་ཀྱི་གཞུང་བསྲང་། བསྡུ་ན་དབང་བསྐུར་གྱི་སྐབས་ལྟར་བུམ་བཟླས་བྱ། ཅུང་ཟད་རྒྱས་པར་སྤྲོ་ན།།
མདུན་བསྐྱེད་ཀྱི་བཟླས་པ་གྲུབ་རྗེས། བུམ་པ་ཤུནྱ་ཏཱས་སྦྱང་། སྟོང་པའི་ངང་ལས་པད་ཟླའི་གདན་གྱི་སྟེང་། །ཧཱུྃ་ཡིག་ཡོངས་གྱུར་རིན་ཆེན་བུམ་པ་ནི། །མཚན་ཉིད་ཡོངས་རྫོགས་བདུད་རྩིས་གང་བའི་དབུས། །གླང་པོས་མཚན་པའི་རིན་ཆེན་པད་ཟླའི་ཁྲིར། །ཞེས་སོགས་ནས། “བཛྲ་ཏུཥྛ་ཧོ༔ཞེས་པའི་བར་བླ་མ་མཆོད་པའི་ཕྲིན་ལས་ལྟར་བྱ།། ཨོ་ཨཱཧཱུྃ། དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོའི་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ༀ་གུ་རུ་བཛྲ་སཏཱ་ས་པ་རི་ཝཱ་ར་ཨརྒྱུ་ནས། ཤརྡ་པྲཏཱིཙྪ་སྭཱ་ཧཱའི་བར་དང་། མ་ཧཱ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི། མི་རྟོག་རྡོ་
རྗེ་ཐབས་ཀྱི་ཡེ་ཤེས་ནི། །དམིགས་མེད་ཤེས་རབ་ཡུམ་གྱི་ངང་དུ་རྟོགས། །ཐུགས་རྗེའི་བྱེ་བྲག་སྣ་ཚོགས་ཅིར་ཡང་སྟོན། །རྡོ་རྗེ་སེམས་དཔའ་ཆེ་ལ་ཕྱག་འཚལ་བསྟོད། །ཅེས་མཆོད་ཅིང་བསྟོད། རང་གི་ ཐུགས་ནས་འོད་ཟེར་གཟུངས་ཐག་ལ། །འཁྲིལ་ཏེ་བུམ་པའི་ལྷ་ཡི་ཐུགས་རྒྱུད་བསྐུལ། །སྙོམས་འཇུག་བྱང་ཆུབ་སེམས་ཀྱི་བདུད་རྩིའི་རྒྱུན། །བབས་པས་བུམ་ཆུར་དབྱེར་མེད་རོ་གཅིག་གྱུར། །ཅེས་བརྗོད་ཅིང་བསམས་ལ་རྩ་སྔགས་ཡི་གེ་འབྲུ་དྲུག་པ་དང་། ཡི་གེ་བརྒྱ་པ་ཅི་ནུས་ཀྱི་མཐར། ཨ་སུ་ནཱི་ཏྲི་པྲ་དུསརྦ་པཱ་པཾ་ཀྵེ་ཤ་ཤཱནྟིཾ་ཀུ་རུ་སྭཱ་ཧཱ། ཞེས་བཏགས་པ་དང་། ཁྲུས་སྔགས་ཨ་བྷི་ཥེ་ཀའང་ཅུང་ཟད་བཟླས་མཐར་མཆོད་ཅིང་བསྟོད། ཡི་གེ་བརྒྱ་པས་ནོངས་པ་བཤགས། ཨོཾ་ཨཱཧཱུཾ། མཆོད་ཡོན་ཕུལ་བས་བུམ་པའི་ལྷ་བདེ་སྟོང་ཆེན་པོའི་ངོ་བོར་ཞུ་བ་བུམ་ཆུ་དང་དབྱེར་མེད་དུ་གྱུར་པར་བསམ། ཕྱག་འཚལ་ནས་ཚོགས་མཆོད་བར་གྲུབ་རྗེས་བསྒྲུབ་བྱ་མདུན་དུ་འཁོད་པ་ལ། འོ། ཁྱོད་རང་གི་ཚེ་འཁོར་བ་ཐོག་མ་མེད་པ་ནས་བསགས་པའི་ལས་དང་ཉོན་མོངས་པ་དང་། དེས་བསྐྱེད་པའི་ནད་གདོན་གྲིབ་དང་མི་གཙང་བ་ཐམས་ཅད་ཞི་ཞིང་དག་པར་བྱེད་པ་རྡོ་རྗེ་སེམས་དཔའི་ཁྲུས་ཀྱི་ཆོ་གས་རྗེས་སུ་འཛིན་པ་ལ་དམིགས་པ་འདི་བཞིན་དུ་མཛོད། རང་ཉིད་ཐ་མལ་དུ་གནས་པའི་སྤྱི་བོར་ལྷའི་ས་བོན་ཨ་དཀར་པོ། མགྲིན་པར་ལྷ་མ་ཡིན་གྱི་ས་བོན་སུ་སེར་པོ། སྙིང་
གར་མིའི་ས་བོན་ནི་སྔོ་སྐྱ། ལྟེ་བར་དུད་འགྲོའི་ས་བོན་ཏྲི་ལྗང་གུ། གསང་གནས་སུ་ཡི་དྭགས་ཀྱི་ས་བོན་སྡེ་ཐལ་སྐྱ། རྐང་མཐིལ་གཉིས་སུ་དམྱལ་བའི་ས་བོན་དུ་དུད་ཀའི་རྣམ་པར་གནས་པ། སློབ་དཔོན་རྡོ་རྗེ་སེམས་དཔར་གསལ་བའི་ཕྱག་ན་བུམ་པ་བྱང་ཆུབ་སེམས་ཀྱི་བདུད་རྩིས་གང་བས་ཁྲུས་བགྱིས་པས་ཡེ་ཤེས་ཀྱི་ཆུ་རྒྱུན་སྤྱི་བོ་ནས་ཞུགས། གནས་དྲུག་གི་རིགས་དྲུག་གི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག །ནད་གདོན་སྡིག་སྒྲིབ་ཐམས་ཅད་ཞི་ཞིང་། ཡེ་ཤེས་དྲུག་གི་སྐལ་བ་རྒྱུད་ལ་བཞག་པའི་མོས་པ་མཛོད། འདི་ནི་བསམ་གཏན་རང་བཞིན་ཆུ། །ཉོན་མོངས་ང་རྒྱལ་སྦྱོང་བྱེད་པ། །རང་བྱུང་འོད་གསལ་ཡེ་ཤེས་ཀྱིས། །སྐུ་ལྔ་ཡོངས་རྫོགས་ཁྲུས་བགྱིའོ། །རྩ་སྔགས་དང་ཡི་གེ་བརྒྱ་པ་སྦྲེལ་བའི་མཐར། སརྦ་སུ་ར་ག་ཏེ་པཱ་པཾ་ཀྵེ་ཤ་ཤཱནྟིཾ་ཀུ་རུ་སྭཱ་ཧཱ། འདི་ནི་ཚུལ་ཁྲིམས་རང་བཞིན་ཆུ། །ཉོན་མོངས་ཕྲག་དོག་སློང་བྱེད་པ། །བྱ་བ་གྲུབ་པའི་ཡེ་ཤེས་ཀྱིས། །དཔལ་ལྡན་ཕྲིན་ལས་ཁྲས་བས་ཁྲུས་བགྱིའོ། །སརྦ་ཨ་སུ་ར་ག་ཏེ་པཱ་པཾ་།བརྩོན་འགྲུས་རང་བཞིན་ཆུ། །ཉོན་མོངས་འདོད་ཆགས་སྦྱོང་བྱེད་པ། །སོ་སོར་རྟོག་པའི་ཡེ་ཤེས་ཀྱིས། །དཔལ་ལྡན་གསུང་གི་ཁྲུས་བགྱིའོ། །སརྦ་ཚྭ་ག་ཏེ་པཱ་པཾ་ཀྵེ་ཤ་ཤཱནྟཾ་ཀུ་རུ་སྭཱ་ཧཱ། འདི་ནི་
ཤེས་རབ་རང་བཞིན་ཆུ། །ཉོན་མོངས་གཏི་མུག་སྦྱོང་བྱེད་པ། །མེ་ལོང་ལྟ་བུའི་ཡེ་ཤེས་ཀྱིས། །དཔལ་ལྡན་སྐུ་ཡི་ཁྲུས་བགྱིའོ། །སརྦ་ཏིརླ་ཀ་ག་ཏེ་པཱ་པཾ་ཀྵེ་ཤ་ཤཱནཾ་ཀུ་རུ་སྭཱ་ཧཱ། འདི་ནི་སྦྱིན་པའི་རང་བཞིན་ཆུ། །ཉོན་མོངས་སེར་སྣ་སྦྱོང་བྱེད་པ། །མཉམ་པ་ཉིད་ཀྱི་ཡེ་ཤེས་ཀྱིས། །དཔལ་ལྡན་ཡོན་ཏན་ཁྲུས་བགྱིའོ། །སརྦ་པྲ་ཏ་ཀ་ག་ཏེ་པཱ་པཾ་ཀྵེ་ཤ་ཤཱནྟཾ་ཀུ་རུ་སྭཱ་ཧཱ། འདི་ནི་བཟོད་པའི་རང་བཞིན་ཆུ། །ཉོན་མོངས་ཞེ་སྡང་སྦྱོང་བྱེད་པ། །ཆོས་ཀྱི་དབྱིངས་ཀྱི་ཡེ་ཤེས་ཀྱིས། །དཔལ་ལྡན་ཐུགས་ཀྱི་ཁྲུས་བགྱིའོ། །སརྦ་ན་ར་ཀ་ག་ཏེ་པཱ་པཾ་ཀྵེ་ཤ་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་བཀྲུ། བྱབ་པའི་སླད་དུ། བཀྲུས་པས་མ་དག་པའི་རིགས་དྲུག་ཏུ་སྐྱེ་བའི་ལས་དང་། ཉོན་མོངས་པ། ནད་གདོན་སྡིག་སྒྲིབ་བག་ཆགས་དང་བཅས་པ་ཐམས་ཅད་དཀོན་མཆོག་གསུམ་གྱི་བདེན་པ་དང་། སྔགས་ཀྱི་འོད་ཟེར་གྱིས་ཕྱིར་བསལ་བའི་མོས་པ་མཛོད། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་བདེན་པས་དུག་སྦྱང་ངོ་། །སྔགས་མཐར། ཨ་སུ་ནཱི་ཏྲི་པྲ་དུསརྦ་པཱ་པཾ་ཀྵེ་ཤ་ཨ་པ་ན་ཡེ་སྭཱ་ཧཱ། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སྐྱོབ་པའི་དམ་ཆོས་དུག་མི་
མངའ། །དམ་ཆོས་བདེན་པས་དུག་སྦྱང་ངོ་། །སྔགས་བརྗོད། འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །འཕགས་པའི་དགེ་འདུན་དུག་མི་མངའ། །དགེ་འདུན་བདེན་པས་དུག་སྦྱང་ངོ་། །སྔགས་བརྗོད། སྤྲོ་ན་འབྱུང་བཞི་སོ་སོས་ཀྱང་བྱབ་ཅིང་། ས་འདི་དུག་གི་ཕ་ཡིན་ཏེ། །ས་འདི་དུག་གི་མ་ཡང་ཡིན། །སངས་རྒྱས་སྤྱན་མའི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་བརྗོད། ཆུ་འདི་དུག་གི་ཕ་ཡིན་ཏེ། །ཆུ་འདི་དུག་གི་མ་ཡང་ཡིན། །མཱ་མ་ཀཱི་ཡི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་བརྗོད། མེ་འདི་དུག་གི་ཕ་ཡིན་ཏེ། །མེ་འདི་དུག་གི་མ་ཡང་ཡིན། །གོས་དཀར་མོ་ཡི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་བརྗོད། རླུང་འདི་དུག་གི་ཕ་ཡིན་ཏེ། །རླུང་འདི་དུག་གི་མ་ཡང་ཡིན། །དམ་ཚིག་སྒྲོལ་མའི་བྱིན་རླབས་ཀྱིས། །སྐལ་ལྡན་ཁྱོད་ལ་དུག་མེད་ཤོག །སྔགས་གོང་ལྟར་བརྗོད། བསྲུང་བའི་སླད་དུ་རྡོ་རྗེ་སྤྱི་བོ་ལ་སོགས་པའི་གནས་དྲུག་ཏུ་བཞག་པས་རིགས་དྲུག་ཏུ་སྐྱེ་བའི་ས་བོན་བག་ཆགས་དང་བཅས་པ་དང་། དེས་བསྐྱེད་པའི་ལས་དང་། ཉོན་མོངས་པ་དང་། ནད་གདོན་སྡིག་སྒྲིབ་ཐམས་ཅད་ཡེ་ཤེས་ཀྱི་མཐུས་བསྲུང་བར་བྱས་པའི་མོས་པ་མཛོད། སྟོང་ཉིད་ཡེ་ཤེས་རྡོ་རྗེ་ལ། །
གང་གིས་གཞོམ་པར་མི་ནུས་ཏེ། །ལས་དང་ཉོན་མོངས་བག་ཆགས་བཅས། །དེང་ནས་ཀུན་ཏུ་སྲུང་གྱུར་ཅིག །ཅེས་དང་སྔགས་ཀྱི་མཐར། ཨ་སུ་ནཾ་ཏྲི་པྲ་དུསརྦ་པཱ་པཾ་ཀྵེ་ཤ་རཀྵ་རཀྵ ཞེས་བརྗོད་ལ་རྡོ་རྗེ་གནས་དྲུག་ཏུ་རྒྱ་གྲམ་གྱི་ཚུལ་གྱིས་རེག རྒྱལ་བར་བྱ་བའི་སླད་དུ་ཤིས་པ་བརྗོད་པས་ཀྱང་མངའ་གསོལ་བའི་མོས་པ་མཛོད། ཅེས་དང་། བཀྲ་ཤིས་པའི་ཚིགས་བཅད་ཇི་ལྟར་རིགས་པ་བརྗོད། ཆོ་ག་ལྷག་མ་རྣམས་དཀྱུས་བཞིན། བླ་མཆོད་དང་མ་འབྲེལ་ན། ཁྲུས་བུམ་གྱི་མདུན་དུ་མཆོད་པ་བཤམ། སྐྱབས་སེམས་སྔོན་དུ་འགྲོ་བས། རང་སྐད་ཅིག་གིས་དཔལ་རྡོ་རྗེ་སེམས་དཔའི་སྐུར་གྱུར་པར་བསམས་ལ་མཆོད་པ་བརླབ། བུམ་པ་གོང་བཞིན་བསྒྲུབས་ནས་ཁྲུས་ཀྱི་ཆོ་ག་ལ་འཇུག་ཀྱང་རུང་ངོ་། །དེ་ལྟར་བགྱིས་པས་གནས་སྐབས་ནད་གདོན་བར་ཆད་ཐམས་ཅད་ཞི་ཞིང་། མཐར་ཐུག་རིགས་དྲུག་ཏུ་སྐྱེ་བའི་སྒྲིབ་གཉིས་བག་ཆགས་དང་བཅས་པ་བྱང་ཞིང་དག་སྟེ་རྣམ་པར་གྲོལ་བའི་ཡེ་ཤེས་ཐོབ་པར་འགྱུར་རོ། །གཉིས་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བའི་རྒྱུད་རྒྱས་པ་ལས། བུམ་པ་མཆོག་ནི་བཟང་པོ་ཉིད། །ཚེ་གཞག་གནས་ནི་འདི་ཡིན་ཏེ། །ཡང་དང་ཡང་དུ་དགུག་བྱ་ཞིང་། །མངོན་སུམ་སྨིན་པར་གྱུར་པ་དང་། །དབྱིངས་སུ་ཡང་ནི་སྦ་བར་བྱ། །རྡོ་རྗེའི་གོ་ཆ་སྲུང་བ་ཡིས། །བརྟན་ཅིང་འཁོར་ལོས་དགག་པར་བྱ། །ཞེས་རྡོ་རྗེའི་ཚེ་སྒྲུབ་པའི་རྟེན་དང་། དགུག་པ་དང་། བསྟིམ་པ་དང་། སྦ་བ་དང་། བསྲུང་བའི་ཚུལ་སོགས་རྒྱ་ཆེར་གསུངས་པའི་སྙིང་པོ་འདི་ཡིན་ཏེ། དཀྱིལ་འཁོར་གྱི་མདུན་ཏུ་སྙིང་པོ་ལྔའི་རྫས་ལས་གྲུབ་པའི་ཚེ་འབྲང་དང་། །
གཡས་སུ་ཚེ་རིལ། གཡོན་དུ་ཚེ་ཆང་། རང་གི་མདུན་དུ་ཚེ་འགུགས་པའི་མདའ་དར་སོགས་བཤམ། ཕྲིན་ལས་ཀྱི་གཞུང་བསྲངས་ལ་འདུན་བསྐྱེད་ཀྱི་བཟླས་པའི་མཇུག་ཏུ། ཚེའི་འབྲང་རྒྱས་ལ་དམིགས་ཏེ། ཤཱ་རྱ་ཏཱས་སྦྱང་། སྟོང་པའི་ངང་ལས་འཁོར་འདས་སྙིང་པོ་ཀུན། །དྭངས་མ་འོད་ཕུང་གཅིག་ཏུ་འཁྱིལ་པའི་ཀློང་། །གླང་པོས་མཚན་པའི་རིན་ཆེན་པད་ཟླའི་ཁྲིར། །ཞེས་སོགས་ནས། བཛྲ་ཏུཥྛ་ཧོ༔ ཞེས་པའི་བར་གཞུང་ལྟར་དང་། གོང་བཞིན་མཆོད་ཅིང་བསྟོད། རྡོ་རྗེ་སེམས་དཔའ་ཚེ་དཔག་ཏུ་མེད་པའི་ཐུགས་ཀར་ཉི་ཟླའི་གའུ་ཁ་སྦྱོར་གྱི་དབུས་སུ་མི་འགྱུར་བའི་སྲོག་ཧཱུྃ་ཡིག་ཟླ་བ་ཆུ་ཤེལ་གྱི་མདངས་ལྟར་འཚེར་བ་ལས་གཞལ་དུ་མེད་པའི་འོད་ཟེར་གྱི་ཚོགས་དང་ལྷ་མོ་མགྱོགས་མའི་སྤྲུལ་པ་ཉི་ཟེར་གྱི་རྡུལ་ལྟར་སྤྲོས་པས། རང་དང་བསྒྲུབ་བྱའི་བླ་ཚེ་ཆད་ཉམས་ཡར་བ་དང་། འབྱུང་བ་བཞིའི་བཅུད། འཁོར་འདས་ཀྱི་དྭངས་མ་ཐམས་ཅད་འཆི་མེད་བདུད་རྩིའི་རྣམ་པར་སྤྱན་དྲངས། བདག་གི་སྤྱི་བོ་ནས་ཞུགས། སྙིང་གར་ཉི་ཟླའི་གའུའི་ནང་དུ་ཧཱུྃ་སྨུག་པོའི་ཁོག་པར་ནི་ཡིག་ཨ་དཀར་པོས་མཚན་པ་ལ་སིབ་སིབ་ཐིམ་པས་རྡོ་རྗེའི་སྲོག་ལ་དབང་ཐོབ། འཆི་མེད་སྒྲུབ་པའི་དམ་ཚིག་གི་རྫས་ལ་ཐིམ་པས་རྡོ་རྗེ་ཚེའི་བཅུད་ལེན་དུ་གྱུར་པར་བསམས་ལ། རྩ་སྔགས་ཀྱི་མཐར། བཛྲ་ཨཱ་ཡུ་ཥ་ཧཱུྃ་ཨ། ཞེས་བཏགས་པ་རྩེ་གཅིག་ཏུ་བཟླ། སྤྲོ་ན་ཚེ་འགུགས་སྐུལ་བ་ནི།
ཨོ་། མགོན་པོ་སངས་རྒྱས་ཀུན་གྱི་བདག །རྡོ་རྗེ་སེམས་དཔའ་ཚེ་དཔག་མེད། །བདེ་ཆེན་སྙེམས་མར་མཉམ་སྦྱོར་བ། །སྒྱུ་འཕྲུལ་དྲྭ་བའི་དཀྱིལ་འཁོར་གཙོ། །ཐུགས་དམ་བསྐུལ་ལོ་ཐུགས་རྗེ་ སྐྱེད། །ཡེ་ཤེས་ཆེན་པོའི་རོལ་པ་ལས། །ལྷ་མོ་མགྱོགས་མའི་ཕོ་ཉ་སྤྲོས། །བླ་ཚེ་ཆད་ཉམས་ཡར་བ་ཁུག །འབྱུང་བཞིའི་བཅུད་ཀྱི་དྭང་མ་སྡུས། །ཁམས་གསུམ་སྐྱེ་འགྲོའི་ཚེ་དཔལ་དངོས། །དུས་གསུམ་རྒྱལ་བའི་ཡེ་ཤེས་དབྱིག །རྣལ་འབྱོར་ལུས་ངག་ཡིད་ལ་སྟིམས། །ནད་མེད་བདེ་བའི་རྟོགས་པ་སྤོར། །རྒས་མེད་ལང་ཚོའི་གཟི་མདངས་སྐྱེད། །འཆི་མེད་ཚེ་ཡི་རིག་འཛིན་སྩོལ། །རྡོ་རྗེའི་ཚེ་མཆོག་འགྲུབ་མཛད་གསོལ། །ཅེས་བརྗོད། གང་ལྟར་ཡང་མཐར། ཚེའི་དྭངས་བཅུད་ཐམས་ཅད་སྙིང་གའི་ཚེ་རྟེན་ལ་འདུས། ཉི་ཟླའི་གའུ་སྲུབ་མེད་པ་སྔགས་ཀྱི་ཕྲེང་བས་ལུ་གུ་རྒྱུད་དུ་བཅིངས་པས་ཅིས་ཀྱང་མི་ཆོད་མི་ཤིགས་པར་གྱུར་པར་བསམས་ལ། ཨ། རིག་སྟོང་ཟུང་འཇུག་རྡོ་རྗེ་སེམས། །འོད་གསལ་གཉུག་མའི་ཐིག་ལེ་རུ། །འཆི་མེད་རྟག་པའི་ཚེ་སྦས་པས། །འཕོ་འགྱུར་མཚན་མ་དབྱིངས་སུ་ཡལ། །ཨ་ཨ་ཨ་ཞེས་བརྗོད་ཅིང་དོན་གྱི་དགོངས་པ་བསྐྱང་། སླར་ཡང་ལུས་ཀྱི་གནས་རྣམས་སུ་རྡོ་རྗེའི་ཕྱག་རྒྱས་གོ་ཁྲབ་ཀྱི་ཚུལ་དུ་གཡོགས་ཤིང་བསྲུངས་པར་བསམས་ལ། ཨོཾ་བཛྲ་ཀཱ་ཝཱ་ཙི་བཛྲ་རཀྵ་ཧཱུཾ། ཨོཾ་
སརྦ་ཏ་ཐཱ་ག་ཏ་བཛྲ་ཨ་དྷི་ཏིཥྛ་བཛྲ་ཡ་སྭཱ་ཧཱ། ཞེས་བརྟན་པར་བྱ། ཕྱག་འཚལ་ཚོགས་བསག་གི་རིམ་པ་ནས་བཟུང་དཀྱུས་ལྟར་བྱའོ། །སྒྲུབ་པ་སོགས་ཀྱི་སྐབས་ཚེའི་དངོས་གྲུབ་བླང་བ་དང་རྗེས་སུ་འབྲེལ་བར་དབང་ལེན་པར་སྤྲོ་ན། ཚོགས་ཀྱི་མཆོད་པའི་རྗེས། ཁྲུས་བྱ། མཎྜལ་ཕུལ། རྡོ་རྗེ་སེམས་དཔའ་བདེ་བ་ཆེ། །སྒྱུ་འཕྲུལ་གཙོ་བོ་དགོངས་སུ་གསོལ། །རྡོ་རྗེའི་ཚེ་དང་ཡེ་ཤེས་ཀྱི། །དབང་དང་དངོས་གྲུབ་བདག་ལ་སྩོལ། །ལན་གསུམ། ཚེ་འགུགས་བསྐུལ། ཚེ་འབྲང་སྤྱི་བོར་བླངས་ལ། ཨོ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་སྐུ། །དེང་འདིར་སངས་རྒྱས་ཐམས་ཅད་ཀྱི། །མི་འགྱུར་རྟག་པའི་དབང་བསྐུར་རོ། །སྔགས་མཐར། ཀཱ་ཡ་ཨ་བྷི་ཥིཉྩ་ཨོཾ། བདུད་རྩི་མགྲིན་པར་བཞག་ལ། ཨ དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་གསུང་། །དེང་འདིར་སངས་རྒྱས་ཐམས་ཅད་ཀྱི། །འགག་མེད་དབྱངས་ཀྱི་དབང་བསྐུར་རོ། །སྔགས་མཐར། ཝཱ་ཀ་ཨབྷི་ཥིཉྩ་ཨཱ རིལ་བུ་སྙིང་གར་བཞག་ལ། ཧཱུྃ། དཔལ་ལྡན་རིགས་རྣམས་ཀུན་གྱི་བདག །རྡོ་རྗེ་མི་ཕྱེད་གསུམ་གྱི་ཐུགས། །དེང་འདིར་སངས་རྒྱས་ཐམས་ཅད་ཀྱི། །འཁྲུལ་མེད་ཡེ་ཤེས་དབང་བསྐུར་རོ། །སྔགས་མཐར། ཙིཏྟ་ཨ་བྷི་ཥིཉྩ་ཧཱུཾ། རྗེས་སུ་བསྟིམ་ཞིང་རྒྱས་གདབ། ཤིས་པ་བརྗོད། སློབ་མ་རྗེས་སུ་འཛིན་ནའང་གསོལ་འདེབས་ཀྱི་རྗེས་ཡན་ལག་བདུན་གྱིས་རྒྱུད་སྦྱང་།
ཡེ་ཤེས་དབབ་ཅིང་བསྟིམ། ཚེ་འགུགས་བསྐུལ། ཚེ་འབྲང་དང་དབང་སོགས་གོང་ལྟར་བསྐུར་རོ། །དེས་ནི་རྡོ་རྗེ་སེམས་དཔའི་ཚེ་དང་ལང་ཚོ་ལ་མངའ་བརྙེས་ཤིང་། མཐར་ཐུག་འཆི་མེད་གྲུབ་པའི་ཡེ་ཤེས་མངོན་དུ་བྱེད་པར་འགྱུར་རོ།། །།གསུམ་པ་ནི། རྒྱུད་ཀླུ| ལས། བདུད་རྩི་མཆོག་ནི་མཉམ་པའི་དབྱིངས། །བདུད་རྩིའི་དོན་ནི་སྐྱེ་ཤི་མེད། །བདུད་རྩིའི་གནས་ནི་བྱང་ཆུབ་སེམས། །བདུད་རྩིའི་ལས་ནི་རྣམ་རྟོག་སྦྱོང་། །བདག་དཔལ་ཚོགས་ཤིང་འགྲོ་དོན་མཛད། །སྨན་གྱི་བྱིན་རླབས་བསམ་མི་ཁྱབ། །ཅེས་ངེས་པ་དང་དྲང་བའི་དོན་གྱིས་གཏན་ལ་དབབ་ཅིང་ལག་ཏུ་ལེན་པའི་ཚུལ་རྒྱ་ཆེར་གསུངས་པ་ལས། འདིར་ཤིན་ཏུ་མདོར་བསྡུས་པའི་ཚུལ་ལ་གཉིས། ཁྲོལ་བུ་དང་། ཕྱི་མ་སྒྲུབ་པའོ། །དང་པོ་ནི། དཀྱིལ་འཁོར་གྱི་དབུས་སུ་བྷནྡྷ་མཚན་ལྡན་གྱི་སྣོད་བཟང་པོར། དྲི་ཆེན་གླང་ཤ་ཛཱ་ཏི་ཤར། །ཤ་ཆེན་རྟ་ཤ་ཀ་ཀོ་ལྷོ། །པདྨ་རྨ་བྱ་ལི་ཤི་ནུབ། །དྲི་ཆུ་ཁྱུང་ཤ་གུར་གུམ་བྱང་། །བྱང་སེམས་སེང་ཤ་བཟང་དྲུག་དབུས། །ཞེས་པའི་ཤ་དང་བདུད་རྩི་དངོས་སམ་ཕབས་གཏའ་སོ་སོའི་སྦྱོར་དང་བཅས་པ་དང་། འབྲས་བུ་གསུམ། ཁ་ཆེ། ནཱ་གི། གླ་རྩི། ཙནྡན་དཀར་པོ་སོགས་དྲི་རོ་དང་ཁ་དོག་བཟང་པོ་གཙོ་བོར་གྱུར་པའི་སྨན་སྣ་རྣམས་བཞག །གཟུངས་ཐག་བཏགས། མཆོད་གཏོར་སོགས་འདྲ། ཕྲིན་ལས་ཀྱི་གཞུང་དཀྱུས་ལྟར་བསྲངས་ལ། ཞབས་གཉིས་སེམས་སྐྱིལ་པད་ཟླའི་གདན་ལ་བཞུགས། །ཞེས་པའི་མཚམས། མདུན་དུ་རླུང་མེ་ཐོད་སྐྱེད་ལ་གནས་པའི། །རང་བྱུང་བདེ་ཆེན་བྷནྡྷའི་གཞལ་མེད་ཁང་། །ཡངས་ཤིང་རྒྱ་ཆེ་མཚན་ཉིད་ཕུན་ཚོགས་ནང་། །གོ་ཀུ་ད་ཧ་ན་ལས་ཤ་ལྔ་
དང་། །བི་མུ་མ་ར་ཤུ་ལས་བདུད་རྩི་ལྔ། །ཧཱུྃ་ཨོཾ་སྭཱ་མཾ་ཨོཾ་དང་ཧཱ་ཡིག་དང་། །ཨཾ་ལཾ་ཏཱཾ་པཱ་ཏྭཾ་གྱིས་མཚན་པ་ལས། །འོད་འཕྲོས་རླུང་གཡོས་མེ་སྦར་རྫས་རྣམས་ཞུ། །བྱང་ཆུབ་སེམས་ཀྱི་བདུད་རྩིར་འཁྱིལ་བའི་དབུས། །གླང་པོས་མཚན་པའི་རིན་ཆེན་པད་ཟླའི་ཁྲིར། །བརྟན་གཡོའི་དྭང་མ་མི་ཤིགས་ཐིག་ལེའི་གཟུགས། །རིགས་ཀུན་ཁྱབ་བདག་དཔལ་ལྡན་བླ་མ་དང་། །དབྱེར་མེད་གསང་ཆེན་རིགས་གཅིག་བདེ་བ་ཆེ། །དང་པོའི་མགོན་པོ་རྡོ་རྗེ་མི་བསྐྱོད་པ། །སྐུ་མདོག་དཀར་གསལ་སོགས་ནས། བཛྲ་ཏུཉྩ་ཧོ་ཞེས་པའི་བར་གཞུང་ལྟར་དང་། མཆོད་བསྟོད་རྒྱས་བསྡུས་གང་རིགས་བྱ། སྨན་སྲུང་སྤྱན་དྲེན་པ་ནི། དར་སྣས་གཡབ་ཅིང་སྤོས་དཀར་གྱི་དུད་པས་བདུགས་ལ། ཧཱུྃ། རྩི་དང་སྨན་གྱི་བདག་པོ་དང་། །རྟགས་ལྡན་རིག་འཛིན་བྲན་མོ་དག །རོལ་མོའི་ཆ་བྱད་མང་པོས་འབོད། །འདིར་གཤེགས་བཅུད་ལེན་དངོས་གྲུབ་སྩོལ། །ཞེས་རོལ་མོའི་སྒྲ་དང་བཅས་སྤྱན་དྲངས་པས་སྨན་གྱི་ཕོ་བྲང་གི་ནམ་མཁར་སྤྲིན་གཏིབས་པ་ལྟར་བཞུགས་པ་ལ་རྟོག་པ་བསལ་བའི་ཕྱིར་བདུད་རྩི་འཐོར་ཞིང་། ཨོཾ་ཨཱཧཱུཾ། ཧཱུཾ། ཚངས་དང་དྲང་སྲོང་གཙང་མ་ཟ། །ལྷ་ཀླུ་བྲམ་ཟེ་གཙང་མ་ཟ། །དེ་དག་གྲོལ་བར་ངས་མ་བཤད། །བདུད་རྩི་དག་པ་ཡེ་ཤེས་ལྔ། །རིགས་ལྔ་སྐུ་ལྔ་ལྷུན་གྲུབ་ཡིན། །གཉིས་མེད་རྟོགས་པའི་ཐབས་མཁས་ཀྱིས། །གཙང་རྨེ་མེད་པར་
ཀུན་སྤྱོད་ན། །དེ་དག་གྲོལ་བར་ངས་བཤད་དོ། །ཞེས་བརྗོད་པས་རྟོག་པ་དག་ནས་དངོས་གྲུབ་སྩོལ་བ་ལ་དགྱེས་པར་བསམ། གཟུངས་ཐག་ནས་བཟུང་ལ། བདག་གི་ཐུགས་ནས་རྡོ་རྗེའི་སྔགས་ཀྱི་འོད། །གཟུངས་ཐག་ལ་ འཁྲིལ་མདུན་བསྐྱེད་ཐུགས་རྒྱུད་བསྐུལ། །འོད་འཕྲོས་སྲིད་ཞིའི་དྭངས་བཅུད་ཞལ་དུ་བཀུག །སྦྱོར་མཚམས་ནས་བབས་དམ་ཚིག་རྫས་ལ་ཐིམ། །ཞེས་བརྗོད་ཅིང་བསམས་ལ་རྩ་སྔགས་ཅུང་ཟད་དང་། ཨོཾ་སརྦ་པཉྩ་ཨ་མྲྀ་ཏ་ར་ས་ཡཱ་ན་ཏ་ན་ཛ་ཡ་གུ་ནྱ་སིདྡྷི་ཧཱུཾ་ཧཱིཏྟཱ། ཞེས་བཟླ། སྤྲོ་ན་ཡན་ལག་བདུན་པའང་བྱ། གང་ལྟར་ཡང་ཚོགས་ཀྱི་འཁོར་ལོས་མཆོད། དྲག་སྔགས་བཟླ་ཞིང་ཐུན་བྲབས་པས་བལྟ་ཉན་གྱི་ཉུལ་ལེ་ཚར་བཅད། བྱིན་འབེབས་རྒྱས་པའམ། ཨོ་ཧཱུྃ་ཨ་ལ་ལ་ཧོ༔ བྷ་ག་ཝཱན་ས་མ་ཡ་ཧོ༔ ས་མ་ཡ་སྟེ། ཧཱུྃ། འཕགས་མཆོག་ཐུགས་རྗེའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་རྩལ་དབྱུང་བའི་དུས་ལ་བབ། །བྱིན་གྱིས་བརླབ་པའི་དུས་ལ་བབ། །དབང་མཆོག་བསྐུར་བའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །མཐུ་ཆེན་བདུད་འདུལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་སྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་ཅག་ལས་འབྲས་མཆིས་པར་མཛོད། །ཅེས་དང་རྩ་སྔགས་བཟླ་ཞིང་སྤྲོས་རོལ་དང་བཅས་པས་བྱིན་དབབ། ཧཱུཾ་ཧཱུཾ་ཧཱུཾ་
ཧཱུྃ་གིས་བྱིན་བསྡུས་པས། ནམ་མཁའ་གང་བའི་ལྷ་ཚོགས་ཐམས་ཅད་སྒྲུབ་པའི་རྫས་ལ་ཐིམ་པས་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོས་བྱིན་གྱིས་བརླབས་པར་གྱུར་པར་བསམ། རྗེས་ཆོག་གཞུང་ལྟར་ལ། ཉེར་བསྡུའི་མལ་དུ་བརྟན་བཞུགས་བྱ། དེ་ལྟར་ཐུན་བཞིའམ་དྲུག་ཏུ་ཞག་གྲངས་ཅི་རིགས་སུ་བསྒྲུབས་པའི་མཐར། ཐུན་ཐ་མ་ལ་རྗེས་ཆོག་གི་བཤགས་པའི་རྗེས། མདུན་གྱི་ལྷ་ཡབ་ཡུམ་བྱང་ཆུབ་སེམས་ཀྱི་བདུད་རྩིར་ཞུ་བ་དམ་གི་རྫས་དང་རོ་གཅིག་ཏུ་གྱུར་པར་བསམ་མོ། །གཉིས་པ་ནི། ཡུམ་དུ་བཏགས་པའི་ལས་ཀྱི་རྡོ་རྗེས་སྨན་སྣོད་བླངས་ཏེ་སློབ་དཔོན་ལ་ཕུལ། ཤར་དུ་རྡོ་རྗེའི་གཏུན་དུ་འཐག་ཅིང་སྔགས་ཀྱི་མཐར་ཨོ་ཨོ་ཨོ་ཞེས་བརྗོད་པས་སྦྱང་། ལྷོར་བཙག་ཅིང་སྔགས་མཐར་ཨཱཨཱwཞེས་བཏགས་པས་སྤེལ། ནུབ་ཏུ་ཆང་སྣ། ཆུ་སྣ། འོ་མ། རིན་པོ་ཆེའི་ཆུས་སྒྲོལ་ཞིང་། སྔགས་མཐར་ཧཱུྃ་ཧཱུྃ་ཧཱུྃ་ཞེས་བརྗོད་པས་བསྒྱུར། བྱང་དུ་དམ་རྫས་སྔ་མའི་རྒྱུན་དང་ཕབས་ཀྱིས་བྲན་ཅིང་འདྲེས་པར་དཀྲུགས་ལ་སྔགས་མཐར་ཧོཧོ༔ཧོཞེས་པས་དབྱེར་མེད་དུ་བྱ། དེ་ནས་དྲིལ་བུས་གཞལ་ཞིང་སྣོད་དུ་བླུགས། ཅོད་པན་དང་རྡོ་རྗེ་དྲིལ་གྱིས་བརྒྱན་ཅིང་དཀྱིལ་འཁོར་དབུས་སུ་ལྡིང་ཁྲིའི་ཁར་བཞག །འོག་ཏུ་དྲོད་འབེབས་ཀྱི་མར་མེ་སྦར། གཟུངས་ཐག་བཏགས། འབྱོར་ན་གདུགས་འཕན་རྒྱལ་མཚན་ཚར་དུ་དངར་བས་བརྒྱན། སྒྲུབ་ཚུལ་གོང་དུ་སྨོས་པ་ཇི་ལྟ་བ་ལས་བཟླས་པའི་སྐབས་སུ། བདག་མདུན་ཐུགས་ཀར་ཟླ་སྟེང་ཧཱུྃ་ཡིག་མཐར། །སྔགས་ཀྱི་ཕྲེང་བས་བསྐོར་ལས་འོད་ཟེར་འཕྲོས། །རླུང་གཡོས་
མེ་སྦར་ཐོད་པའི་རྫས་རྣམས་ཞུ། །ཟེར་རླངས་རྡོར་སེམས་ཞི་ཁྲོའི་ལྷ་ཚོགས་ལ། །ཕོག་པས་སྙོམས་འཇུག་བདེ་བའི་འོད་དང་སྒྲས། །འཁོར་འདས་དྭངས་བཅུད་ཀུན་བསྡུས་ཞལ་དུ་ཞུགས། །སྐུ་ཡི་དབྱིབས་བརྒྱུད་བདེ་སྟོང་སྦྱོར་མཚམས་ནས། །ཡེ་ཤེས་བདུད་རྩི་མུ་ཏིག་དཀར་པོའི་མདོག །ཆར་ལྟར་བབས་ནས་སྒྲུབ་པའི་རྫས་ལ་ཐིམ། །མི་འགྱུར་འཆི་མེད་རྟག་པའི་རྡོར་སེམས། །མཐོང་ཐོས་དྲན་རེག་མྱོང་གྲོལ་རྫས་ཀྱི་ཚུལ། །བདེ་ཆེན་ཐིག་ལེ་གཅིག་ཏུ་འཁྱིལ་བར་གྱུར། །ཅེས་བརྗོད་ཅིང་བསམས་ལ་གཟུངས་ཐག་བཟུང་སྟེ། ཨོཾ་ཨཱཏྟཱཧཱུྃ་བཛྲ་ཨ་མྲྀ་ཏ་ཧཱུྃ་ཧཱིཥ། ཞེས་ཆིག་སྒྲིལ་དུ་བཟླ། ཐུན་བསྡུ་བ་ན་དབྱངས་གསལ་རྟེན་སྙིང་དང་མཆོད་བསྟོད་བྱ། ཡན་ལག་བདུན་པ། སྐོང་བ། ཚོགས་མཆོད་སོགས་རྒྱས་པར་བྱ་ཞིང་། རྗེས་ཆོག་གི་ནོངས་པ་བཤགས་པའི་རྗེས་སུ། ཧཱུྃ་ཧཱུྃ་ཧཱུྃ་ཞེས་བརྗོད་པས། མདུན་གྱི་བཅོམ་ལྡན་འདས་དཔལ་རྡོ་རྗེ་སེམས་དཔའ་ཡབ་ཡུམ་ལུས་དཀྱིལ་གྱི་ལྷ་དང་བཅས་པ་སྙོམས་པར་ཞུགས་པའི་བདེ་བ་ཆེན་པོས་འོད་དུ་ཞུ་ནས་དྭངས་མ་མི་ཤིགས་པའི་ཐིག་ལེ་དམ་ཚིག་གི་བདུད་རྩི་དང་དབྱེར་མེད་དུ་འཁྱིལ་བར་གྱུར་པར་བསམས་ལ་རྟེན་འབྲེལ་སྙིང་པོ་བརྗོད་ཅིང་མེ་ཏོག་འཐོར། བསྔོ་སྨོན་བཀྲ་ཤིས་གཞུང་ལྟར་དང་། སྐབས་ཇི་ལྟར་རིགས་པར་ཉུལ་ལེ་འདུལ་བ་དང་། བྱིན་དབབ་པ་སོགས་འདྲའོ། །དེ་ལས་འཕྲོས་པའི་དམིགས་རིམ་བྱེ་བྲག་པ་མང་དུ་ཡོད་ཀྱང་སྤྲོས་པ་ཉེར་བསྡུའི་སྐབས་སུ་འདི་
ཙམ་གྱིས་ཆོག་པར་རྒྱུད་དང་མན་ངག་གི་གཞུང་ལས་གསལ་བས། ཇི་སྐད་བཤད་པ་བཞིན་ཐུན་བཞིའམ་དྲུག་ཏུ་འབད་པས་འོད་དང་། སྒྲ་དང་། དྲི་སོགས་དངོས་གྲུབ་ཀྱི་མཚན་རྟགས་མཐོང་བའམ། བདུན་ཕྲག་སོགས་དུས་ཀྱི་ངེས་པ་རྫོགས་ནས་ནངས་པར་སྔ་བར་དངོས་གྲུབ་ལེན་པའི་ཚུལ་ནི། གོང་ལྟར་ཕྲིན་ལས་ཀྱི་གཞུང་བསྲང་། རྗེས་ཆོག་གི་མཆོད་བསྟོད་ནོངས་བཤགས་ཀྱི་རྗེས། ཨོཾ་ཨཱཿཧཱུྃ། བདག་གཞན་བླ་མེད་བསྙེན་སྒྲུབ་འདི་དག་གིས། །སྡིག་སྒྲིབ་ཉམས་ཆག་མ་ལུས་ཀུན་བྱང་ནས། །ཚེ་འདི་ཉིད་ལ་རིག་འཛིན་མཆོག་འགྲུབ་ཅིང་། །བྱིན་རླབས་རྩལ་དབང་གཟི་བྱིན་ནུས་མཐུར་ལྡན། །སྐུ་གསུང་ཐུགས་ཀྱི་དངོས་གྲུབ་སྩལ་དུ་གསོལ། །ཅེས་བསྐུལ་ཞིང་སྔགས་ཀྱི་མཐར། ཀཱ་ཡ་ཝཱ་ཀ་ཙིཏྟ་སིདྡྷི་ཕ་ལ་ཧཱུྃ་ཞེས་བཏགས་པ་མང་དུ་བཟླས། ཨོཾ་བོ་དྷི་ཙིཏྟ་ཀཱ་ཡ་ཝཱ་ཀ་ཙིཏྟ་མ་ཧཱ་ས་མ་ཡ་ཧོ༔ ཞེས་པས་རིག་པའི་མེ་ཏོག་དོར། ཡུམ་གྱིས་སྨན་གྱི་ཕོ་བྲང་བཏེག་ལ་སློབ་དཔོན་གྱི་སྤྱི་གཙུག་ཏུ་བཀོད། སྔགས་ཀྱི་མཐར། ཨོཾ་ཨཱཧཱུྃ་སརྦ་པཉྩཨ་མྲྀ་ཏ་ཀཱ་ཡ་ཝཱ་ཀ་ཙིཏྟ་ཨཱ་ཡུར་སིདྡྷི་ཕ་ལ་ཨ་བྷི་ཥིཉྩ་ཏུ་ནཱཾ། ཞེས་དབང་བླངས་པས་བདུད་རྩི་བདེ་བ་ཆེན་པོ་རྡོ་རྗེ་སེམས་དཔའ་ཡབ་ཡུམ་ལུས་དཀྱིལ་གྱི་ལྷ་དང་བཅས་པ་རང་ལ་ཐིམ་པར་བསམ། སློབ་མ་ཡོད་ན། ཧཱུྃ། རྟོག་འདུལ་དམ་ཚིག་བླ་ན་མེད། །དངོས་གྲུབ་ཀུན་གྱི་དབྱིག་ཆེན་པོ། །རྡོ་རྗེ་སེམས་དཔའི་ཡེ་ཤེས་ཀྱིས། །སྐུ་གསུང་ཐུགས་སུ་དབང་བསྐུར་རོ། །ཞེས་དང་། སྔགས་ཀྱི་
མཐར་ཀཱ་ཡ་ཝཱཀ་ཙིཏྟ་ཨ་བྷི་ཥིཉྩ་ཨོཾ་ཨཱ༔ ཞེས་བརྗོད་ཅིང་གནས་གསུམ་རེག །ཨ་ཧོ་མ་ཧཱ་སུ་ཁ་ཧོཞེས་རྟོགས་པ་བརྗོད་ལ། བཛྲ་པྲ་བེ་ཤ་ཡ་ཕཊ་ཅེས་རྒྱ་དཀྲོལ། སརྦ་པཉྩ་ཨ་མྲྀ་ཏ་ཨ་བེ་ཤ་ཡ་ཨཱ༔ ཞེས་བརྗོད་པས་བདུད་རྩིའི་དྭངས་མ་དཀར་དམར་མཐིང་བའི་འོད་ཀྱི་རྣམ་པས་རང་ལ་ཐིམ་པར་བསམ། ནང་མཆོད་དང་སྦྱར་ལ་གཞུང་ལྟར་སྨན་མཆོད་ཀྱི་རྗེས། བདུད་རྩི་སྙིང་པོ་ཅན་གྱི་དབུས། །སངས་རྒྱས་ཀུན་གྱི་སྐུ་གསུང་ཐུགས། །ཡི་གེ་གསུམ་གྱི་རྣམ་པ་ཅན། །དམ་ཚིག་ཕྱག་རྒྱ་གཉེན་པོས་བླང་། །སྔགས་མཐར་ཀཱ་ཡ་སིདྡྷི་ཨོ། ཝཱ་ཀ་སིདྡྷི་ཨ། ཙིཏྟ་སིདྡྷི་ཧཱུྃ། ཞེས་བརྗོད་ཅིང་གནས་གསུམ་དུ་ཐིག་ལེ་བྱས་ལ་མྱང་ཞིང་སློབ་མ་ལའང་སྦྱིན། དེ་ནས་བསྔོ་སྨོན་བཀྲ་ཤིས་སོགས་གཞུང་ལྟར་བྱས་པས་གྲུབ་བོ། །འདི་ཉིད་སྒྲུབ་པ་པོ་རང་ཉིད་ཁོ་ནས་སྤྲོས་མེད་རྐྱང་སྒྲུབ་ཏུ་བྱ་བའི་ཚུལ་ཡིན་ལ། ཤིན་ཏུ་བསྡུ་ན་ཁྲོལ་སྒྲུབ་མ་བྱས་ཀྱང་རུང་། སྒྲུབ་གྲོགས་གཞན་ཡོད་ན་སྒྲུབ་པའི་ཁོག་དབུབས་རྒྱས་བསྡུས་གང་རིགས་དང་། །ཁོར་ཡུག་གསུང་མི་ཆད་པའི་བཟླས་པ་བྱའོ། །དེ་ལྟར་བསྒྲུབས་པའི་དམ་རྫས་ཀྱི་ཡོན་ཏན་བསྔགས་པའང་རྒྱུད་ལས། འཐུང་ན་ངན་སང་སྒྲིབ་པ་འབྱང་། །རྟག་བསྟེན་དངོས་གྲུབ་མཆོག་ཀྱང་འགྲུབ། །བཞི་བརྒྱ་རྩ་བཞིའི་ནད་སེལ་ཞིང་། །ལྷ་ལ་རྟག་ཏུ་མཆོད་བྱས་ན། །བདག་དང་གཉིས་སུ་མེད་པར་འགྱུར། །མི་མཐུན་ཕྱོགས་ལ་གཏོར་བྱས་ན། །དྲག་པོ་གཏུམ་པོའང་ལྷན་ནེར་འགྱུར། །གཞན་ཡང་དངོས་གྲུབ་ཐམས་ཅད་ནི། །ཇི་ལྟར་དམིགས་པ་བཞིན་དུ་འགྲུབ། །ཅེས་སོགས་རྒྱ་ཆེར་གསུངས་པ་ལྟར་ཤེས་པར་བྱའོ། །
རྒྱུད་དང་གྲུབ་པའི་མན་ངག་དོན། །བྱིན་རླབས་སྣང་བས་ཕྱེས་པའི་དགོས། །འགྲོ་ཀུན་མི་མཐུན་ཀུན་ཞི་ཞིང་། །ཚེ་དང་ཡེ་ཤེས་རྒྱས་པར་ཤོག །ཅེས་པའང་ཀུན་མཁྱེན་བླ་མ་དགྱེས་པའི་འབངས་མཁྱེན་བརྩེའི་ལྷས་སོ།། །།སརྦ་མངྒ་ལཾ་བྷ་བ་ཏུ། །