གསུམ་པ་རྩོད་པ་སྤོང་བ།
གསུམ་པ་རྩོད་པ་སྤོང་བ་ལ།
ནམ་མཁའ་ཆོས་ཅན། བུམ་པའི་བྱེད་རྒྱུ་ཡིན་པར་ཐལ། བུམ་པ་ལས་གཞན་པའི་ཆོས་ཡིན་པའི་ཕྱིར་ན་མ་ཁྱབ། ཁྱབ་པར་ཐལ། མཛོད་ལས། རང་ལས་གཞན་པ་བྱེད་རྒྱུའི་རྒྱུ། ཞེས་གསུངས་པའི་ཕྱིར་ན་མ་ཁྱབ་སྟེ། དེ་ནི་བྱེ་བྲག་སྨྲ་བས་ལུགས་ལ་གསུངས་པའོ། །རྣམ་སྨིན་གྱི་སྔ་ལོགས་སུ་བྱུང་བ་ཆོས་ཅན། ལུང་དུ་བསྟན་པའི་ཆོས་ཡིན་པར་ཐལ། རྣམ་སྨིན་གྱི་རྒྱུ་ཡིན་པའི་ཕྱིར། རྟགས་མ་གྲུབ་པོ། །དེ་ལྟར་བྱས་པ་ལ་ཁོ་ན་རེ། རྣམ་སྨིན་ཆོས་ཅན། ཁྱོད་ཀྱི་སྔ་ལོགས་སུ་བྱུང་བ་ཁྱོད་གྱི་རྒྱུ་ཡིན་པར་ཐལ། ཁྱོད་དངོས་པོ་ཡིན་པའི་ཕྱིར་ཟེར་ན། རྣམ་སྨིན་དེའི་སྔ་ལོགས་སུ་བྱུང་བ་རྣམ་སྨིན་དེའི་རྒྱུ་ཡིན་པར་འདོད་ཅེས་བྱའོ། །དགེ་བ་ཟག་བཅས་དང་མི་དགེ་བ་གཉིས་ཆོས་ཅན། དགེ་བ་དང་མི་དགེ་བ་གང་རུང་ཡིན་པར་ཐལ། རྣམ་སྨིན་གྱི་རྒྱུ་ཡིན་པའི་ཕྱིར་ན་མ་ཁྱབ། ཁྱབ་པར་ཐལ། མཛོད་ལས། རྣམ་སྨིན་རྒྱུ་ནི་མི་དགེ་དང༌། དགེ་བ་ཟག་བཅས་རྣམས་ཁོ་ན། །ཞེས་གསུངས་པའི་ཕྱིར་ན་ཡང་མ་ཁྱབ་སྟེ། རྫས་སྤྱི་གཉིས་འགོད་ཆོད་ན་དེ་ལ་དེ་གཉིས་གང་རུང་གིས་ཁྱབ་ཅེས་པའོ། །ཐུབ་པ་སངས་རྒྱས་བཅོམ་ལྡན་འདས་ཆོས་ཅན། ཚད་མའི་སྐྱེས་བུ་མཐར་ཐུག་ཡིན་པར་ཐལ། རྒྱུ་བསམ་སྦྱོར་ཕུན་སུམ་ཚོགས་པ་གོམས་པ་མཐར་ཕྱིན་པའི་གང་ཟག་ཡིན་པའི་ཕྱིར་ཏེ། ཚད་མ་མདོ་ལས། ཚད་མར་གྱུར་བ་འགྲོ་ལ་ཕན་བཞེད་པ། །སྟོན་པ་བདེར་གཤེགས་སྐྱོབ་ལ་ཕྱག་འཚལ་ལོ། །ཞེས་གསུངས་པའི་ཕྱིར། ཡང་ཐུབ་པ་སངས་རྒྱས་བཅོམ་ལྡན་འདས་ཆོས་ཅན། དོན་གཉིས་ཕུན་སུམ་ཚོགས་པ་དང་ལྡན་པ་ཡིན་ཏེ། རང་དོན་སྤངས་རྟོགས་ཕུན་སུམ་ཚོགས་པ་དང་ལྡན་པ་གང་ཞིག གཞན་དོན་གཟུགས་སྐུ་རྣམ་གཉིས་དང་ཐབས་འཕྲིན་ལས་ཕུན་སུམ་ཚོགས་པ་དང་ལྡན་པ་ཡིན་པའི་ཕྱིར། ཞེས་སྟོན་པར་བྱེད་པ་ལ། ཚད་མ་རྣམ་འགྲེལ་ལས། རྟོག་པའི་དྲ་བ་རྣམ་བསལ་ཞིང༌། །ཟབ་ཅིང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ། ཞེས་གསུངས་པའི་ཕྱིར་རོ།། །།
སྨྲས་པ།དུས་གསུམ་རྒྱལ་བ་རྣམས་ཀྱི་ངོ་བོ་ཉིད། །རྗེ་བཙུན་དམ་པ་རྣམས་ཀྱི་བཀའ་དྲིན་ལས། །མངོན་ཚད་གཙོ་བྱས་ལེགས་བཤད་ནོར་བུའི་ཚོགས། །ཕྱོགས་གཅིག་བསྡུས་པའི་རིགས་འཕྲུལ་འདི་ཉིད་གྲུབ། །གསུང་རབ་རིགས་པའི་རྗེས་འབྲང་ཡིན་པའི་ཕྱིར། །དོན་དེ་སེམས་ལ་བཟུང་ནས་ཐོག་མ་རུ། །སྤུན་གྲོགས་རིགས་སྨྲ་ཡོངས་དང་ཆབས་ཅིག་ཏུ། །རིགས་ལམ་འདི་ལ་སྦྱངས་བ་ནན་ཏན་མཛོད། །ཐོས་བསམ་སྒོམ་པའི་གྲུ་གཟིངས་ལ་བརྟེན་ནས། །གཞུང་ལུགས་རྒྱ་ཆེའི་རྒྱ་མཚོ་ཤེས་འདོད་རྣམས། །འགྲན་བསམ་ཕྲག་དོག་བསམ་པ་རིང་དོར་ལ། །རིགས་ལམ་བདུད་རྩིའི་དགའ་སྟོན་མྱང་བར་མཛོད། །འདིར་འབད་དགེ་བས་ཚེ་རབས་ཀུན་ཏུ་ཡང༌། །མཚན་ལྡན་བླ་མས་འགྲོ་ཀུན་རྗེས་བཟུང་ཞིང༌། །རིགས་ལམ་དྲི་མ་མེད་པ་ལ་བརྟེན་ནས། །རྒྱལ་བསྟན་མ་ལུས་འཛིན་པའི་སྣོད་གྱུར་ཅིག །ཅེས་ཚད་མའི་དགོངས་དོན་ཕྱོགས་གཅིག་ཏུ་དྲིལ་བ་བསྟན་བཅོས་བསྡུས་གྲྭའི་རྣམ་བཞག་གཞུང་བརྒྱ་གསལ་བའི་རིགས་ལམ་བློ་གསལ་ཡིད་ཀྱི་མུན་སེལ་ཞེས་བྱ་བ་འདི་ནི་རང་ལུགས་ཀྱི་དམ་པ་གོང་མ་རྣམས་ཀྱི་བཞེད་སྲོལ་གཞིར་བཟུང་ནས་དགག་བཞག་སྤོང་གསུམ་སོགས་ས་བཅད་རྣམས་བསྡུས་གྲྭའི་སྤྱིའི་སྒྲོས་ཀྱིས་བརྒྱན་ཏེ། སྔ་ཕྱི་དུ་མར་བློ་གསལ་དམ་པ་དུ་མས་བསྐུལ་ངོར་༧ ངག་དབང་དངོས་གྲུབ་དཔལ་གྱིས་མགོ་ལོག་གི་ཐོག་མའི་ཆོས་སྡེ་ཨ་སྐྱོང་དགོན་དུ་རབ་བྱུང་བཅུ་བདུན་པའི་ས་བྱིའི་སྣྲོན་ཟླའི་ཚེས་དགུ་ལ་དབུ་བཟུང་ནས་ཉིན་བཅུ་གསུམ་ཙམ་གྱིས་རྫོགས་པར་སྦྱར་བའོ། །འདིས་ཀྱང་ངེས་དོན་གྱི་བསྟན་པ་འདི་ཉིད་རིགས་ལམ་དྲི་མ་མེད་པའི་སྒོ་ནས་ཕྱོགས་དུས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །སརྦ་མངྒ་ལམ།། །།