གཉིས་པ་གུས་པས་སྒྲུབ་པའི་ཚུལ།

གཉིས་པ་གུས་པས་སྒྲུབ་པའི་ཚུལ་ལ།

བསྙེན་བསྐུར་བྱ་བའི་ཚུལ་སྤྱིར་བསྟན་པ་དང༌། དམིགས་ཀྱིས་བསལ་བ་དང་གཉིས། དང་པོ་ནི། མཆོག་ཏུ་དད་པས་དུས་གསུམ་དུ། །དཀྱིལ་འཁོར་མེ་ཏོག་བཅས་ཐལ་མོས། །སྟོན་པ་བླ་མ་བསྙེན་བཀུར་ཞིང༌། །ཞབས་ལ་སྤྱི་བོས་ཕྱག་བྱའོ། །ཞེས་མཆོ༷ག་ཏུ༷་ད༷ད་པ༷ས་ཚུལ་འཆོས་དང་ཁ་གསག་ལ་བརྟེན་པའི་འཕྲལ་གྱི་ངོ་འཛིན་ཙམ་མ་ཡིན་པར་ཞེ་ནས་གུས་པ་ཡིན་ལ། དུས་གསུམ་ནི་ཉིན་ལན་གསུམ་དང་མཚན་ལན་གསུམ་ལས་འདིར་མཚན་དུས་ནི་ངེས་པར་བླ་མའི་བྱ་བ་ཡོད་ན་མ་གཏོགས་མི་དགོས་ལ་ཉིན་པར་སྔ་དྲོའི་དུས་དང། གུང་གི་དུས་དང་ཕྱི་དྲོ་ཉི་མ་ནུབ་པའི་དུ༷ས་གསུ༷མ་དུ༷་བླ་མའི་སྐུ་མདུན་དུ་འོང་ཞིང་ཕྱག་བྱ་བ་དང་སྙུན་དྲི་བ་དང་བྱ་བ་དགོས་པ་རྣམས་སྒྲུབ་པ་ཡིན་ལ། དེ་ཡང་དཀྱིལ་འཁོར་བྱ་བ་ནི་རྒྱ་གར་བ་རྣམས་ལ་བྲམ་ཟེའི་རིགས་ཀྱི་སློབ་དཔོན་ཁ་ཅིག་ལ་རིགས་ཀྱི་ཆོས་དང་མཐུན་པའི་བྱ་བ་གཙང་སྦྲ་ལ་གནས་པ་མཉེས་པའི་དོན་དུ་བླ་མའི་གནས་ཁང་དང༌། གང་དུ་བཞུགས་པའི་ས་ཕྱོགས་མཐོ་དམན་ཅན་དང༌། མི་གཙང་བ་དང་ས་རྡུལ་ཅན་རྣམས་མི་འབྱུང་བའི་དོན་དུ་བ་དམར་སེར་གྱི་ལྕི་བ་གསར་པས་ཞལ་བ་དཔང་ཅུང་ཟད་མཐོ་བ་ཟླུམ་པོ་ལ་སོགས་པའི་དབྱིབས་སུ་བྱས་པ་ལ་དཀྱི༷ལ་འཁོ༷ར་དང། དེའི་སྟེང་དུ་མེ༷་ཏོ༷ག་སྣ་ཚོགས་བཅ༷ས་པ་སིལ་བུར་བཀོད་དེ་བཀྲམ་ཞིང་མཛེས་པར་བྱས་གུར་གུམ་སོགས་དྲི་བཟང་གི་ཆུས་ཆག་ཆག་གདབ་པར་བྱས་ནས། དེ་ཟིན་པ་ན་ཐལ་མོ་མཉམ་པོར་སྦྱར་བའི་ཐ༷ལ་མོ༷ས་གུས་པའི་ཚུལ་གྱིས་འདི་ལྟར་བགྱིས་སོ་ཞེས་སྙན་དུ་གསོལ་ཞིང་དེར་བླ་མའི་བཞུགས་སའམ། བླ་མའི་རྟེན་མཆོད་དང་དཔེ་ལ་སོགས་པ་འཇོག་ས་བྱེད་པ་ལྟ་བུ་ཡིན་ལ། བོད་ལ་སོགས་པའི་ཡུལ་དུའང་དེ་དང་ཆ་མཐུན་པའི་བྱ་བ་མང་པོ་ཡོད་པ་རྣམས་ཡིན་ནོ། །དེ་ལྟར་བསྙེན་བཀུར་གྱི་ཡུལ་འདི་ནི་སྔར་དབང་བསྐུར་མ་ཐོབ་པ་ལ་ཡིན་ཅིང། སྟོ༷ན་པ༷་བླ༷་མ༷་ནི་སྐྱབས་འགྲོ་སོགས་ཆོས་ཐོབ་པའོ། །བསྙེ༷ན་པ་ནི་བླ་མའི་དྲུང་དུ་ཉེ་བར་འདུག་པའོ། །བཀུ༷ར་བ་ནི་མཆོག་ཏུ་ཤེས་པའི་སྒོ་ནས་ལུས་ངག་གི་སྤྱོད་ལམ་ཐམས་ཅད་གུས་པར་བྱ་ཞི༷ང༌། ཞ༷བས་ལ༷་སྤྱི༷་བོ༷ས་བཏུད་དེ་རང་ཉིད་རིགས་མཐོ་བ་དང༌། རྒན་པ་དང། ཡོན་གྱིས་ཕྱུག་པ། ལོངས་སྤྱོད་དང་ནོར་ཆེ་བ་སོགས་ཀྱི་ང་རྒྱལ་བོར་ཏེ་ཕྱ༷ག་བྱ༷འོ༷། །